1 Meto gallassati yontta dishin

neni, «Tana ufayssettenna»

giza wodeti gakkontta dishin

ne yelagateththa layththan

nena Medhdhidayssa qoppa.

2 Awaynne poo7oy,

aginaynne xoolinttey

dhumontta dishin,

iray bukki simmiin

shaaray kichchontta dishin

nena Medhdhidayssa qoppa.

3 Keeth naagizayti kokkoriza wode,

minoti kuunniza wode,

gaaccizayti qoodan guuth gidida

gishshas gaachche aggiza wode,

maskootera xeellizayti

doljumiza wode,

4 dubbushaso efiza ogeti

gordettiza wode,

woxay loocetidi

giireth aggiza wode,

kafo waasoy as denththiza wode,

istta yeththika daaburza wode,

5 pudunth kessi xooniza wode,

oge buussi babisiza wode,

ochcholooney ciiyiza wode,

booley barkka bana

goochchiza wode,

asappe amoy dhayza wode

asi ba mernaa keeth baana;

yeekkizaytikka balen yuuyana.

6 Bira sansalatay

duuxxontta dishin,

worqqa saaney

meqqontta dishin,

haaththa otoy pultto achchan

meqqontta dishin,

haath ollafe kessiza waagumboy

meqerettontta dishin,

7 biittay duge biittan

simmontta dishin,

shemppoy immida Xoossako

simmontta dishin,

nena Medhdhida

Xoossako simma.

8 Eranchchazi, «Hada!

Hadappeka hada!

Ubbayka hada!» gees.

9 Eranchchazi ba hu7es aadho eranchcha xalla gidontta asaakka erateth tamaarsides. Daro leemisota pilggi xeellidaappe guyen maaran maaran giigsides. 10 Eranchchazi suure qaala demmanaas pilggides; izi xaafidayssi suurenne tuma.

11 Aadho eranchcha qaalay cikka mala hoxe; qasse iza tossetikka addafe dhishkettida dhishke mala; heytikka issi heenththanchchafe imettidayta.

12 Ta naazoo! Ha ubbaafe bollara

ay miishshafekka naagetta;

aykkoka gujjofa;

daro maxaafata xaafikkoka

wurseththi deenna;

xinaate daroy bolla daaburssees.

13 Hekko ubbaa miishshi yootettides;

yo7o ubbaas kuushshi hayssa;

Xoossas yayya; iza azazo naaga;

hessika asa naas

imettida kumeththa ooso.

14 Xoossay ooso ubbaa bolla,

geemmida yo7o ubbaa bolla,

lo7o gidiin

iita gidiinkka pirdana.