1 O Isus palem lija te sikavol pašo Galilejsko jezero. Ćidije pe pherdo manuša paše leste, gija vov dija ano čamco po jezero thaj bešlo ane leste. A e manuša ačhile pašo jezero ki obala. 2 Vov sikada len ane pherdo paramiča.

Dži kaj sikada len, phenda: 3 "Šunen! Jekh đive iklilo o sejači te sejil o seme. 4 Dži kaj sejisada, nesavo seme pelo ko drom. Avile e čiriklja thaj sa xalje o seme. 5 Nesavo seme pelo pe barale thana kaj ni sasa but phuv. Sigate lija te barol, golese so i phuv ni sasa duboko. 6 Al kana o kham sasa zuralo, e biljke phabile thaj sigate šućile, golese so ni sasa len duboko koreno. 7 Nesavo seme pelo ane kangre. E kangre barile thaj tasade le, gija o seme ni anda nisavo bijanipe.

8 A nesavo seme pelo pi šukar phuv, bijanda, barilo thaj lija te dol lačho bijanipe, so sasa tranda (30), šovardeš (60) thaj šel (100) droma pobut nego so sasa sejime."

9 Tegani o Isus vaćarda: "Kas isi kana te šunol, nek šunol."

10 Kana o Isus ačhilo korkoro e dešuduje (12) sikadencar thaj kolencar so ačhile lesa, von pučlje e Isuse so značin kala paramiča.

11 Vov phenda lenđe: "Tumenđe dija pe te džanen so si garajipe taro Carstvo e Devleso, a kalenđe save si avral taro Carstvo e Devleso, sa vaćarol pe ane paramiča, 12 golese sar so pisil ano Sveto lil:

‘Ka dićhen thaj ka dićhen,

al ni ka shvatin,

a ka šunen thaj ka šunen,

al ni ka haljaren,

inače bi obratina pe

thaj o Dol bi oprostila lenđe.’"

13 Tegani o Isus vaćarda lenđe: "Ni haljaren kaja paramič? Sar ka haljaren sa avera paramiča?

14 O sejači si kova savo sejil e Devleso Lafi. 15 Nesave manuša si sar seme ko drom kaj si sejimo e Devleso Lafi. Kala manuša šunen le, al avol o Satana thaj lol lendar so si sejimo ande lenđe ile. 16 Avera manuša si sar o seme so si sejimo pe barale thana. Kala šunen o Lafi thaj sigate prihvatin le radujimasa, 17 al naj len koreno ane peste thaj ićaren pe nesavo vreme. Kana avol bilačhipe thaj progonstvo zbog o Lafi, sigate peren. 18 Avera manuša si sar seme so si sejimo ane kangre. Kala manuša šunen o Lafi, 19 al ane lenđe ile si e brige kale svetose, želje bašo barvalipe thaj o manglipe za ke avera stvara, so tasaven o Lafi, gija ačhen bizo bijanipe. 20 Nesave si sar o seme so si sejimo pi lačhi phuv. Kala manuša šunen o Lafi, prihvatin le thaj anen bijanipe: tranda (30), šovardeš (60) thaj šel (100) droma pobut nego so sasa sejime."

21 O Isus pučlja len: "Ko bi tumendar anola i svetiljka thaj bi čhuvola la talo čaro il talo than e sojimaso? Ni li čhuvol pe i svetiljka ke lako than? 22 Golese, sa so si garado ka ikljol ko dićhipe thaj sa so si učhardo ka ikljol ko videlo. 23 Te isi khanika kana te šunol, nek šunol."

24 Thaj vaćarda lenđe: "Pazin so šunen! Save merasa merin, gasave merasa ka meril pe tumenđe thaj ka dol pe tumenđe pobut. 25 Golese so kas isi džanglipe, ka dol pe lese pobut, a kas naj, ka lol pe lestar i kova so isi le."

26 Tegani o Isus vaćarda lenđe: "O Carstvo e Devleso si sar o manuš savo sejil o seme pi phuv. 27 Raćasa thaj đivesesa, da li sovol il uštol, o seme bijandol thaj barol, a vov i ni džanol sar. 28 I phuv korkori pestar dol o bijanipe: angleder i čar, pale gova o klaso, tegani ano klaso but điv. 29 Samo so zrelil o bijanipe, o manuš avol e lunesa te čhinol le, golese so si o vreme bašo ćidipe."

30 Palem o Isus vaćarda: "Sar ka vaćara savo si o Carstvo e Devleso? Save paramičasa te sikava le? 31 Vov si sar o zrno tari gorušica, savo si emcikno tare sa e semenura savo sejil pe ani kaja phuv. 32 Al kana si sejimo, barol thaj avol po baro taro sa o povrće savo mećhol raja, gaći bare kaj ane leso lado e čiriklja e nebose šaj ćeren gnezdura."

33 Gasave bute paramičencar vaćarola o Isus lenđe o Lafi e Devleso thaj sikavola gaći kobor šajine von te šunen le. 34 Bize paramiča ni vaćarola lenđe khanči. A kana sasa e sikadencar korkoro, sa gova objasnila lenđe.

35 Gova đive, kana peli i rat, o Isus vaćarda pe sikadenđe: "Ka nakha ki aver rig e jezerosi."

36 Gija mukhlje e manušen. E sikade čhute pe ano čamco kaj o Isus već sasa. Pale lende sesa i avera čamcura.

37 Tegani avili zurali balval thaj e talasura čalade ano čamco, gijate da o čamco lija te pherdol paj. 38 A o Isus suta ki paluni rig e čamcosi ko šerand.

Džungade le thaj vaćarde lese: "Učitelju! Tuće sa jekh kaj amen ka tasiva?"

39 O Isus uštilo thaj vaćarda pozurale e balvaljaće thaj naredisada e pajese: "Ačh, smiri tut!"

I balval ačhili thaj khanči ni šundilo.

40 Thaj pučlja pe sikaden: "Sose gaći daraljen? Vadži li naj tumen pačajipe?"

41 Dolda len bari dar thaj jekh averese vaćarde: "Ko si kava, kaj i balval thaj o more šunen le?"