Marcos 5

O Isus ikalda e bilačhe duxuren taro manuš

1 O Isus thaj lese sikade avile ki aver rig e jezerosi paši Gerasinsko phuv. 2 Kana iklilo o Isus taro čamco, sigate avilo premal leste andare limora manuš kas sasa bilačho duxo. 3 Kava manuš bešola ane limora thaj khoni naštine te phandol le ni sinđirencar. 4 But droma sasa phanglo sastrnencar thaj sinđirencar, al vov phaglja e sastrna thaj čhinola e sinđira. Khoni naštine te smiril le. 5 Bizo ačhipe, đive thaj rat, o manuš ane kaste sasa o bilačho duxo, phirola maškare limora thaj ane bregura dola vika thaj čalavola pe barencar.

6 Kana odural dikhlja e Isuse, prastija thaj pelo angle leste ke pe koča. 7 Dija vika andare sa o glaso: "So manđe mandar, Isuse Čhaveja Embare Devleso? Xav tu sovli e Devlesa te ma muči man!"

8 Golese so o Isus angleder phenda lese: "Iklji andar kava manuš, bilačheja duxona!"

9 O Isus pučlja le: "Sar si ćo alav?"

O manuš vaćarda lese: "Mo alav si Legion, golese so sam but, sar vojska."

10 Thaj but molisada e Isuse te ma bičhalol e bilačhe duxuren avral tare kaja phuv.

11 A gothe, ko brego, xana čar pherdo bale. 12 Gija e bilačhe duxura molisade e Isuse: "Bičhal amen te dža ane kala bale."

13 Thaj o Isus mukhlja len. E bilačhe duxura iklile taro manuš thaj dije ane bale. Sigate e bale lije te našen taro brego ano more. Gothe sesa paše duj milje (2 000) bale thaj sa tasile. 14 E manuša save arakhlje e balen, našle thaj kalestar vaćarde ano foro thaj ane pašutne thana. Gija e manuša avile te dićhen so sasa.