1 Kʉndogoelyo ɨyɨ, ʉnene Paʉlo, nɨntungilwe kʉnsoko akitʉma mʉlɨmo wang’wa Kilisito Yesʉ kʉnsoko anyu nɨshanga mɨ Ayahudi, kʉmʉlompeela kʉng’wi Itunda. 2 Mʉlɨngɨle kʉlʉ kʉʉlʉ kɨna Itunda kʉkɨɨla ʉkende wakwe aɨʉmpee mʉlɨmo ʉwʉ nʉmʉtanantɨlye ʉnyenye Nkani Nza. 3 Itunda ʉnkunʉkʉɨe iniino nahuma kʉlɨnga ikani ɨlɨ nɨlipihile. Ikani ɨlɨ nʉmʉandɨkɨe kʉ nkani nkehʉ, 4 anga mʉsoma nɨnʉmʉandɨkɨkɨe, ʉnyenye mʉkʉlɨnga kɨna ʉnene nʉʉlɨngile ʉnkunku wang’wa Kilisito. 5 Ʉnkunku ʉwʉ anya kalɨ aɨapihɨwe, ingɨ itungo ɨlɨ Itunda waapee ʉhumi itʉmi nɨ amanga akwe kʉlɨnga ʉnkunku nʉwanso kʉkɨɨla Ng’wahʉ Ng’welʉ. 6 Ʉnkunku nʉwanso ingɨ sʉwʉ, kʉkɨɨla Nkani Nza, antʉ nɨshanga Ayahudi Itunda ʉkʉakembeta palʉng’wɨ nɨ Ayahudi. Antʉ awa aile mapiliga a mʉɨlɨ ʉng’wɨ hangɨ ihangilye mʉʉkembetwa ʉwʉ Itunda aɨʉtambʉe ʉkʉapa kʉkɨɨla Kilisito.

7 Ʉnene naile nɨ mitʉmi nʉwa kʉtanantya Nkani Nza ɨyɨ kʉkɨɨla kɨpegwa ka ʉkende Itunda naɨ ʉnkendepile kʉ ʉhumi wakwe nʉ ʉkʉlʉ. 8 Palʉng’wɨ nɨ kɨna ʉnene nɨshanga mbaigwe lʉkʉlʉ mʉ antʉ ɨhi nɨang’wi Itunda, ingɨ wamkembetile ʉkende wakwe, nɨhume kʉatantɨlya antʉ nɨshanga Ayahudi ʉgolɨ wang’wa Kilisito nɨ shanga wakʉganʉla, 9 nʉ kʉakumʉɨla ʉnkunku nʉwanso antʉ alɨnge isɨgo lang’wi Itunda nɨlitʉng’wa. Itunda naɨʉtundile intʉ yɨhi naɨʉpihile kʉ antʉ kʉpuma ɨkalɨ. 10 Isɨgo lang’wi Itunda aɨkɨna atemi ɨhi nɨanyangulu ɨhi nɨamolɨ mʉʉnkumbigʉlʉ nʉwa kɨnkolo alɨnge nzɨla yidʉ nʉwɨtʉmɨla kʉlagɨɨla mahala akwe. Akʉlɨnga itɨ kʉkɨɨla antʉ nɨamʉhʉɨɨe ʉ Kilisito. 11 Ikani ɨlɨ lendenkanilye nisɨgo Itunda naɨʉkete kʉpuma ɨkalɨ, aɨwitʉma lʉkani lakwe kʉkɨɨla Kilisito Yesʉ Isekʉlʉ witʉ. 12 Itɨ gwa, kʉkamɨnkani nʉ Kilisito nʉkʉmʉhʉɨɨla, ʉsese kɨagimyi kʉmʉhanga Itunda ɨze kiahʉɨɨli. 13 Kʉlʉlo, nʉmʉlompile leki kʉkatapi kʉnsoko alwago nɨkagigwa ʉnene kʉnsoko anyu, nanso ingɨ kʉnsoko ikʉlyo lanyu.

14 Kʉlʉlo, ntugamile nʉkʉlompa pang’wi Itunda Tata, 15 nɨɨza ʉpuumo nʉwa iʉmbwa yɨhi mʉʉnkumbigʉlʉ nʉ kigʉlʉ. 16 Kʉmʉlompa Itunda kʉkɨɨla Ng’wahʉ wakwe wamʉkomelye inkolo yanyu, 17 ingɨ ʉ Kilisito wishiɨ mʉnkolo yanyu kʉkɨɨla ʉhʉɨɨli wanyu. Kʉmʉlompeela kʉng’wi Itunda makani ɨhi nɨmʉkituma apumɨɨla mʉʉlowa nʉwa tai, 18 ingɨ ʉnyenye palʉng’wɨ nɨ antʉ nɨagombekile kʉng’wɨ Itunda mʉlɨnge kɨna ʉ Kilisito ʉkʉloilwe ikʉlʉ kʉ ʉlowa nʉʉgila mɨmbɨ. 19 Hangɨ mʉlɨnge ʉlowa nʉwanso ingɨ nʉʉkɨlɨnkɨe ʉlɨngi nʉwa mʉntʉ wɨhi, mʉhume kʉkondanɨɨla, mʉ ʉkondanɨɨli wɨhi nʉwang’wi Itunda. 20 Itunda nʉwitʉma mʉlɨmo mʉng’witʉ, ʉhumile kitʉma makani makʉlʉ kʉkɨla ayo nɨkʉhumile kʉlompa ang’wɨ kʉsɨga, 21 wakʉligwe kʉnsoko a antʉ nɨamʉhʉɨɨe ʉ Kilisito nɨ kʉnsoko ang’wa Kilisito Yesʉ kʉ wileli matungo ɨhi, kalɨ na kalɨ. Tai.