1 Anyandʉgʉ ane, ʉnene naɨnzile kʉng’wanyu kʉtanantya lʉkani nʉlatai nulang’wi Itunda shanga aɨnzile kʉmʉlagɨɨla kɨna nɨngile kʉtambula iza, ang’wɨ nkete mahala. 2 Naɨnkoli kʉng’waanyu aɨnamʉe kɨwa kɨntʉ kɨhi nɨkanso nsaje kʉtambʉla mpola yang’wa Yesʉ Kilisito du niya nsha akwe naɨʉkomilwe mʉmʉsalaba. 3 Naɨmolɨ kʉng’wanyu nɨkahanga shanga nkondanɨɨe kituma makani aya nʉ Kilisito ʉloilwe nitʉme, nɨkazekagata na woa nʉʉkʉlʉ. 4 Ʉmanyisa nʉ ʉʉtanantyi wane shanga aɨnɨkendatambʉla nkani niyakʉaloeelya antʉ nɨmahala ane, ingɨ kʉtongeelwa nʉ Ng’wahʉ Ng’welʉ. 5 Aɨntendile itɨ ingɨ ʉhʉʉɨli wanyu ʉleke kʉsania mahala a kɨʉntʉ ingɨ ngulu yang’wi Itunda.

6 Nɨitɨ ga, ʉsese kɨmanyisa kʉtʉmɨla mahala kʉ antʉ nɨakomile mʉʉhʉɨɨli, ingɨ shanga mahala antʉ a mihɨɨ ɨyɨ, ang’wɨ shanga mahala a atemi a mihɨɨ ɨyɨ ʉtemi wao nʉɨlimansɨɨla. 7 Kʉʉmatambʉla mahala ang’wi Itunda kʉ mpola niyatai, mahala aya Itunda naɨʉmapihile kʉ antʉ, Itunda aɨʉlomee kitʉma puma ʉng’wandyo kʉnsoko ikʉlyo litʉ. 8 Ingɨ mahala aya atemi nɨa mihɨɨ ɨyɨ shanga aɨalɨngile, kʉnsoko anga aɨalɨnge shanga aɨazemʉkoma mʉmʉsalaba Isekʉlʉ nʉwa ʉkʉligwa. 9 Ingɨ, anga wandɨkwa wang’wi Itunda nʉwandɨkilwe.

"Makani ayo ɨliho nɨɨzelɨkɨlɨ kʉmaona, ang’wɨ kʉtwɨ ɨzewakɨlɨ kija,

makani ʉ mʉntʉ nʉwakɨlɨ kʉmasɨgɨɨla mʉ nkolo akwe,

makani nanso yayo Itunda nʉwanoneeye antʉ nɨamʉloilwe."

10 Ingɨ Itunda ʉkʉkunʉkʉɨe makani nanso kʉ ʉhumi nʉwa Ng’wahʉ wakwe. Kʉnsoko Ng’wahʉ wɨkendegeela kɨntʉ kɨhi ga nɨ makani amʉkatɨ mʉng’wi Itunda. 11 Nyenyu nʉlɨngile ɨmasɨgo a mʉntʉ mʉngɨɨza, ingɨ nkolo a mʉntʉ yɨyo ɨlɨngile. Nɨitɨ ga, Ng’wahʉ wang’wi Itunda ng’wenso ʉlɨngile makani ang’wi Itunda. 12 Ʉsese aɨkʉsɨngɨɨye Ng’wahʉ wang’wi Itunda, shanga ng’wahʉ nʉwa mihɨɨ ɨyɨ, ingɨ kʉhume kʉlɨnga ayo nɨkʉpewe ni Itunda.

13 Itɨ gwa, ʉsese kʉʉmanyisa, shanga kʉnkani nɨkʉmanyisigwe kʉ mahala a antʉ, ingɨ nkani nɨkʉmanyisigwe nʉ Ng’wahʉ, kɨzemanyisa makani akɨnkolo kʉ antʉ nɨakete ʉ Ng’wahʉ nʉwanso. 14 Mʉntʉ nɨmʉgila ʉNg’wahʉ wang’wi Itunda shanga ʉkʉsɨngɨɨlya ɨmakani aNg’wahʉ wang’wi Itunda. Kʉ mʉntʉ ʉyʉ makani nanso ingɨ ʉpʉngʉ ʉtilɨ, shanga ʉlɨngile mahala aya, kʉnsoko makani nanso ahumile kʉlɨngwa kʉkɨɨla ʉhumi nʉwa Ng’wahʉ wang’wi Itunda. 15 Ingɨ mʉntʉ nʉtongilwe nʉ Ng’wahʉ wang’wi Itunda ʉhumile kʉgema nʉ kʉlamʉla makani mʉitakɨwe, ingɨ mʉntʉ nʉwanso shanga ʉkʉlamʉlwa nʉ mʉntʉ wɨhi. 16 Mʉwandɨkwa wang’wi Itunda yandɨkilwe,

"Nyenyu nʉkʉlɨnga ɨmahala ang’wi Isekʉlʉ?

Nyenyu nʉkʉmʉɨla Itunda kɨntʉ kɨkakʉtenda?"

Ingɨ ʉsese nɨkɨahʉɨɨli ang’wa Kilisito kʉkete mahala akʉsɨga anga ʉKilisito nʉwɨsɨga.