1 Ʉnene Paʉlo, nɨ nitangilwe ni Itunda kʉʉlowa wakwe ntule nɨ mitʉmi wang'wa Kilisito Yesʉ, kine nʉ Sositene mʉnyandʉgʉ witʉ.

2 Kʉmʉandɨkɨla itʉtʉ ɨlɨ ʉnyenye nɨ mɨanya kʉ Kolinto nɨmʉmʉhʉɨɨe Itunda, ʉnyenye melisigwe mʉng'wa Kilisito Yesʉ, mɨkitangwa mʉtule mɨantʉ ang'wi Itunda, palʉng'wɨ nɨantʉ ɨhi mihɨɨ nɨakʉmʉlompa Isekʉlʉ Yesʉ Kilisito nɨɨza Isekʉlʉ nʉwao hangɨ ingɨ Isekʉlʉ witʉ.

3 Kʉmʉlompelya ʉkende nɨmatiliga kʉpuma kʉng'wi Itunda Tata witʉ nʉ kʉng'wi Isekʉlʉ witʉ Yesʉ Kilisito ʉtule palʉng'wɨ nʉnyenye.

4 Mahikʉ ɨhi nɨmʉsongelya Itunda nʉwane kʉnsoko anyu kʉ ʉkende wakwe nɨmʉpewe mʉng'wa Kilisito Yesʉ. 5 Kʉnsoko kʉkamɨnkana nʉ Kilisito, Itunda ʉmʉpe maintʉ ɨhi nɨmʉmatakile, anga mʉʉtambʉli wanyu nʉ mʉʉlɨngi wanyu. 6 Kʉnsoko nanso impola yang'wa Kilisito naɨkʉmʉtanantɨɨye ingɨ yatai, 7 kʉlʉlo shanga mʉkepewe kɨpegwa kɨhi nɨka kɨnkolo nɨmʉsʉmbɨɨye kʉtulya kʉng'wi Isekʉlʉ witʉ Yesʉ Kilisito. 8 Nʉwanso ʉkʉmʉkomelya nkolo ʉnyenye kʉpikɨɨla ɨmpelo, ingɨ mʉleke kʉtula nigazo lɨhi lʉhikʉ ʉlo nʉlakʉtulya Isekʉlʉ witʉ Yesʉ Kilisito. 9 Itunda ingɨ watai, nʉwanso naɨ ʉmitangile mʉtule palʉng'wɨ nʉng'waakwe ʉ Yesʉi Kilisito Isekʉlʉ witʉ.

10 Anyandʉgʉ ane, kʉminena kʉʉhumi wang'wa Yesʉ Kilisito Isekʉlʉ witʉ, kɨna mʉzigombya mʉnkani yɨhi nɨmʉkitambʉɨla, leki kʉtemanʉki, mʉtule nisɨgo lɨng'wɨ nʉ wigombyi ʉng'wɨ. 11 Ahʉɨɨli ɨane, mbɨɨwe nɨantʉ kʉpuma mikoe lang'wa Kɨloe, yigelekile kɨhenga kɨna ɨkolɨ nkʉngʉmi mʉng'wanyu. 12 Nigulye mʉkikʉngʉma itɨ, kɨla mʉntʉ ʉkʉtambʉla yakweʉ. Ʉmʉya ʉkʉlʉnga, "Ʉnene nʉmʉkee Paʉlo," Ʉmʉya ʉkʉlʉnga, "Ʉnene nʉmʉkee Apolo," Ʉmʉya ʉkʉlʉnga, "Ʉnene nʉmʉkee Petelo," nʉ mʉya ʉkʉlʉnga, "Ʉnene nʉmʉkee Kilisito." 13 Itɨɨ, ʉ Kilisito ʉtemanʉkile maumbɨ maumbɨne? Itɨɨ, Paʉlo ng'wensone aɨʉkonontewe mʉmʉsalaba kʉnsoko anyu? Itɨɨ, aɨmʉbadisigwe mʉtule mɨamanyisigwa ang'wa Paʉlo ne?

14 Nʉmʉsongeeye Itunda kɨna, shanga aɨnʉmʉbadisilye mʉntʉ wɨhi mʉng'wanyu ingɨ aɨnɨabadisilye a Kilisipo nʉ Gayo du. 15 Kʉlʉlo kʉtilɨ mʉntʉ wɨhi nʉhumile kʉlʉnga ʉbadisigwe kʉtula mʉmanyisigwa wane. 16 Itʉnʉ nakɨmbʉka, aɨmbadisilye antʉ a mikoe lang'wa Sitepwano, ingɨ shanga nkɨmbʉkile kɨna aɨmbadisilye mʉntʉ mʉngɨɨza wɨhi. 17 Kʉnsoko ʉ Kilisito shanga aɨʉndagɨɨye kʉbadisa, ingɨ aɨʉndagɨɨye kʉtanantya Nkani Nza, hangɨ ntanantye ɨze shanga nzaɨigwe nʉ ʉlɨngi nʉwa antʉ, ntendile kʉnsoko ngulu ansha ang'wa Kilisito mʉ mʉsalaba ɨleke kʉgʉmanɨɨligwa.

18 Kʉnsoko lʉkani nʉlansha ang'wa Kilisito mʉmʉsalaba ingɨ ikani lakɨpʉngʉ kʉantʉ awa nɨamolɨ mʉʉlimɨli, ʉsese nɨkʉgunɨkile ʉlʉkani nʉlanso ingɨ ngulu yang'wi Itunda niyakʉʉguna ʉsese. 19 Kʉnsoko wandɨkwa wang'wi Itunda nʉwandɨkilwe,

"Kʉagazangɨlya anyamahala ɨmahalao

kʉluanga ʉlɨngi nʉwalɨngi."

20 Ʉkolɨpɨ mʉntʉ nʉkete mahala? Ʉkolɨpɨ mʉntʉ nʉlɨngile malagɨɨlyo? Ʉkolɨpɨ nʉ mankata nʉwankʉngʉmi kʉ matungo aya? Mahala a antʉ amʉʉnkumbigʉlʉ ʉwʉ Itunda ʉailye kɨna ʉpʉngʉ ʉtilɨ.

21 Itunda ingɨ mʉhʉgu. Antʉ shanga ahumile kʉmʉlɨnga Itunda ɨzeasanilye mahala akɨʉntʉ. Itunda ʉtʉmɨe lʉkani lang'wa Yesʉ kʉaguna antʉ. Lʉkani ʉlo anyamahala nɨalʉaɨɨye kɨna ʉpungu, antʉ nɨahʉɨɨe ʉlʉkani nɨkʉlʉtanantya ɨgunɨka. 22 Ayahudi aloilwe kɨlɨngasɨɨlyo ahume kʉhʉɨɨla, nɨ Ayunani akʉduma mahala ahume kʉhʉɨɨla. 23 Ingɨ ʉsese kʉʉmʉtanantya ʉ Kilisito naɨʉkomilwe mʉmʉsalaba, kʉ Ayahudi ikani ɨli ingɨ lɨkʉanaʉla, nʉ kʉ Ayunani ingɨ ʉpʉngʉ ʉtilɨ, 24 ingɨ kʉ antʉ awo nɨitangilwe ni Itunda atule Ayahudi ang'wɨ Ayunani, kʉ antʉ awa ʉ Kilisito ingɨ ngulu ang'wi Itunda hangɨ mahala ang'wi Itunda. 25 Kʉnsoko antʉ nɨkʉaɨɨye kɨna ʉpʉngʉ wang'wi Itunda, ingɨ kɨsanigwe kʉkɨla mahala akɨʉntʉ, nʉ ʉnementalu wang'wi Itunda, ingɨ ngulu kʉkɨla ngulu niya kɨʉntʉ.

26 Anyandʉgʉ ane, kɨmbʉki ɨlɨ kɨna Itunda naɨʉmitangile mʉtule mɨantʉ akwe, kisɨgo nɨla kɨʉntʉ aɨmʉaɨigwe kɨna ang'wɨ anyu mɨagila mahala. Antʉ ang'wɨ shanga aɨmʉkumʉkile kʉantʉ, antʉ ang'wɨ aɨmʉpumile mʉmakoe nɨmagila anga ʉhumi. 27 Ingɨ Itunda aɨʉaholanilye antʉ awa nɨantʉ aʉnkumbigʉlʉ aaiye kɨna apʉngʉ, ɨngɨ waahumye mɨnyala antʉ nɨakete ɨmahala. Hangɨ Itunda aɨʉaholanilye antʉ awa nɨantʉ aʉnkumbigʉlʉ aaine kɨna agila anga ngulu ingɨ waahumye mɨnyala antʉ nɨakete ingulu. 28 Itunda ʉaholanilye antʉ awa nɨahimbɨ hangɨ nɨadalahilwe nɨantʉ, antʉ nɨshanga akumʉkile, wahume kʉalagɨɨla antʉ awa nɨasanigwe ikʉlʉ kɨna shanga kɨntʉ. 29 Ʉtendile itɨ ingɨ mʉntʉ waleke kilolya ntongela ang'wi Itunda kɨna nʉwanso ingɨ ʉsanigwe. 30 Ingɨ Itunda ng'wenso ʉkʉkamɨnkanilye ʉnyenye nʉ Yesʉ Kilisito, Itunda ʉmʉtendile ʉ Kilisito Yesʉ watule mahala itʉ. Kʉkɨɨla Kilisito Yesʉ ʉsese kʉgombwe ni Itunda, kaile kɨantʉ ang'wi Itunda nɨkeigwe nʉkʉkomolwa mʉ mɨlandʉ. 31 Kʉlʉlo gwa, anga wandɨkwa wang'wi Itunda nʉwandɨkilwe, "Nʉloilwe kilolya, Nʉiloelye mʉlɨmo nʉwitʉmile Isekʉlʉ."