1 Ntyatɨ ntendo yane anga ʉnene nɨntyatile intendo yang'wa Kilisito.

2 Nʉmʉlʉmbɨɨye kʉnsoko mʉmakani anyu ɨhi nɨmʉkʉtenda mʉnkɨmbʉkile ʉnene hangɨ mʉtyatile ʉmanyisi naɨnʉmʉmanyisilye. 3 Ingɨ ndoilwe mʉlɨnge kɨna ʉ Kilisito ingɨ itwe la mɨtʉnja, nʉ mitʉnja ɨngɨ itwe la mʉsʉngʉ wakwe, ni Itunda ɨngɨ itwe lang'wa Kilisito. 4 Itɨ gwa, mitʉnja wɨhi nʉkʉlompa ang'wɨ nʉkʉtanantya impola yang'wi Itunda kʉnʉ wazeʉkunɨkɨe itwe lakwe nʉwanso ʉmʉdalahile ʉKilisito. 5 Nʉ mʉsʉngʉ nʉkʉlompa ang'wɨ nʉkʉtanantya impola yang'wi Itunda shanga kʉnʉ wazeʉkʉnɨkɨe itwe lakwe mʉsʉngʉ nʉwanso ʉmʉdalahile ʉmʉgoha wakwe, nʉkʉtenda itɨ wɨhanga mʉsʉngʉ nʉzue ing'ʉlyʉ. 6 Mʉsʉngʉ nɨshanga ʉkʉnɨkɨe itwe lakwe, bahu wazule isingi lakwe. Ingɨ mɨnyala kʉ mʉsʉngʉ kʉteng'wa isingi yakwe ang'wɨ kʉzulwa, bahu wakʉnɨkɨle itwe lakwe. 7 Shanga inonee ʉmitʉnja kʉkunɨkɨla itwe lakwe, kʉnsoko nʉwanso ingɨ mpyani ang'wi Itunda hangɨ wɨlagɨɨla ʉkʉlʉ wang'wi Itunda. Ingɨ ʉmʉsʉngʉ wɨlagɨɨla ʉkʉlʉ nʉwa mitʉnja, kʉnsoko ng'wenso ʉkenkile ikʉlyo nɨla mitʉnja, 8 kʉnsoko Itunda shanga aɨʉmʉʉmbile ʉmitʉnja kʉpuma kʉ mʉsʉngʉ, ingɨ ʉmʉsʉngʉ aɨʉʉmbilwe kʉpuma kʉ mitʉnja. 9 Hangɨ mitʉnja shanga aɨʉʉmbilwe kʉnsoko akʉmʉaɨɨlya mʉsungʉ, ingɨ ʉmʉsʉngʉ aɨʉʉmbilwe kʉnsoko akʉmʉaɨɨlya mitʉnja. 10 Kʉnsoko nanso nɨ kʉnsoko ang'wa malaɨka, yɨyo ndogoelyo ʉmʉsʉngʉ wakunɨkɨla itwe lakwe, yitule kɨlɨngasɨɨlyo kang'wa malaɨka nʉmolɨ kʉng'wakwe. 11 Nɨitɨ ga, mʉng'wi Isekʉlʉ mʉsʉngʉ ʉmʉsanilye mitʉnja, nʉ mitʉnja ʉmʉsanilye mʉsʉngʉ. 12 Anga ʉmʉsʉngʉ naɨʉmbilwe kʉpuma kʉ mitʉnja, ʉlʉkʉlʉ nʉ mitʉnja wɨtugwa nʉ mʉsʉngʉ, ingɨ maintʉ ɨhi ɨpuma kʉng'wi Itunda.

13 Lamʉli nyenye. Itɨɨ, inoneene ʉmʉsʉngʉ kʉmʉlompa Itunda shanga ɨze ʉkunɨkɨe itwe lakwe? 14 Itɨɨ, shanga taine kʉʉpumoo kʉmanyisigwe kɨna mɨnyala kʉ mitʉnja kʉtʉla nɨnsingi nkʉlʉ, 15 Ingɨ kʉ mʉsʉngʉ kʉtula nɨnsingi nkʉlʉ ingɨ ikʉlyo kʉng'wake. Mʉsʉngʉ ʉpewe nsingi nkʉlʉ ingɨ kʉkunɨkɨla itwe lakwe. 16 Mʉntʉ wɨhi anga walete nkʉngʉmi kʉ nkani nɨntambʉe, itɨ gwa, mʉntʉ nʉwanso nʉwalɨnge kɨna ʉsese kɨagila ntendo nanso, hangɨ antʉ nɨamʉhʉɨɨe Itunda kɨtendaʉ.

17 Itungo ɨlɨ nɨnongolekile kʉmʉlagɨɨlya, shanga kʉmʉlʉmbɨɨlya lʉkʉlʉ, kʉnsoko nɨmʉkʉtankana kʉmʉkʉlya Itunda mʉkenditʉma makani nɨmabɨ kʉkɨla makani nɨmaza. 18 Ng'wandyo lʉkʉlʉ, nigulye kɨna mʉʉtankani wanyu nʉwa kʉmʉkʉlya Itunda mɨkendatula kikʉngʉma, makani aya nɨnigulye nihʉɨɨe kɨna nang'wɨ atai. 19 Kʉnsoko amasɨgo anyu nkʉngʉmi ɨhumile kʉpumɨla, ingɨ yigeeleke antʉ nɨagombekile kʉng'wi Itunda. 20 Anga mʉtankane kʉmʉkʉlya Itunda, ingɨ shanga mɨtankana anga iloelya lang'wi Isekʉlʉ nʉlɨtakɨe. 21 Kʉndogoelyo nɨmʉkʉlya, kɨla mʉntʉ witengeela indya yakwe wazeʉakuɨe mʉgongo ɨaʉya, hangɨ anga yitule ang'wɨ anyu ahumilwe nzala isaga nɨnzalaao, kʉnʉ nɨang'wɨ azelya nʉkʉng'wa kʉpikɨɨla kʉgala. 22 Itɨɨ, shanga mʉhumilene kʉlya nʉ kʉng'wa kʉmatolanyu? Ang'wɨ, mʉadalahilene antʉ nɨamʉhʉɨɨe Itunda nʉkʉahumya mɨnyala antʉ nɨagila anga kɨntʉ? Nʉmʉɨlɨ ʉlɨ? Nʉmʉlʉmbɨlyene? Kʉtilɨ. Kʉ ntendo ɨyɨ shanga kʉmʉlʉmbɨɨlya.

23 Ndongoelyo ʉnene aɨnanʉnkʉe kʉpuma kʉng'wi Isekʉlʉ imalagɨɨlyo naɨnʉmʉpee, kɨna ʉtikʉ ʉwo naɨʉpumigwe Isekʉlʉ Yesʉ, aɨʉhoile ʉmʉkate, 24 wɨkamʉsongelya Itunda, wɨkaʉega, wɨkalʉnga, "Ʉwʉ wʉwʉ mʉɨlɨ wane nʉʉpumigwe kʉnsoko anyu. Mʉzetendaʉ kʉnkɨmbʉka ʉnene." 25 Kʉ itɨ, naɨalya wɨkahola kɨkombe kadibai wɨkalʉnga, "Ɨkɨ kɨkombe kilago nipya nɨlɨkigeeleka kɨna tai mʉsakami ane nɨkʉhunʉka kʉnsoko anyu. Mʉzetendaʉ kʉnkɨmbʉka ʉnene."

26 Ndogoelyo nɨmʉkʉlya ʉmʉkate ʉwʉ nʉkʉng'wela kɨkombe ɨkɨ mʉlongolekile mʉkʉatanantɨlya antʉ nɨangɨɨza kʉpikɨɨla nʉzɨɨzɨza, kɨna ʉKilisito aɨʉkule kʉnsoko anyu. 27 Kʉlʉlo mʉntʉ wɨhi nʉkʉlya ʉmʉkate ʉwʉ ang'wɨ kʉng'wela ɨkɨkombe kang'wi Isekʉlʉ mʉshanga ʉtakɨwe, ʉkʉtula nigazo nɨlakʉtenda mʉlandʉ kʉmʉɨlɨ nɨ sakami ang'wi Isekʉlʉ. 28 Itɨ gwa, mʉntʉ wɨhi wikolenkeelye hanza mʉnkolo, papogwa walye ʉmʉkate nʉwanso nʉkʉng'wela ɨkɨkombe nɨkanso. 29 Kʉnsoko mʉntʉ nʉkʉlya nʉkʉng'wa shanga waze ʉlɨngile ɨndogoelyo aʉkamantani wakwe nʉmʉɨlɨ wang'wi Isekʉlʉ, ʉkʉtula walya nʉkʉng'wa ʉlamʉlwi wakwe. 30 Yɨyo nsoko mʉng'wanyu nɨang'wɨ nɨshanga amʉhʉɨɨe Itunda hangɨ alwae kɨnkolo nɨaʉya akulee kɨnkolo. 31 Anga aɨze kikolenkeeye kɨsa hanza ʉsese Itunda shanga aɨʉze kʉpɨsɨlya itɨ. 32 Ingɨ nɨkʉʉlamʉlwa ni Isekʉlʉ, kʉʉmanyisigwa, ingɨ kʉhʉge kʉlamʉlwa palʉng'wɨ nɨ antʉ amihɨɨ.

33 Kʉlʉlo, anyandʉgʉ ane, nɨmʉkʉlya miloelya lang'wi Isekʉlʉ milindɨɨle. 34 Anga itule ʉkolɨ mʉntʉ ʉlemeeigwe nzala, nʉwalye hanza kitolakwe, ingɨ anga mʉtankane palʉng'wɨ mʉleke kʉsasha kʉlamʉlwa. Ingɨ makani nasagile anga nɨze kʉlɨngasa iza.