1 Anga mʉntʉ wilee nʉ mʉlʉna ʉkʉgemaʉlɨ kʉmʉsemela kianza nɨla antʉ nɨshanga amʉhʉɨɨe Yesʉ nsuta nʉ kʉmʉsemela kʉ antʉ nɨamʉhʉɨɨe ʉ Yesʉi. Nɨkɨ waleke kʉmʉsemela mʉntʉ nʉwanso ntongela aantʉ nɨamʉhʉɨɨe Itunda? 2 Itɨɨ, shanga mʉlɨngilene kɨna ahʉɨɨli ang'wa Yesʉ akʉalamʉla antʉ aʉnkumbigʉlʉ? Anga ɨze antʉ aʉnkumbigʉlʉ ʉkʉlamʉlwa nʉnyenye, nɨkɨ shanga mʉkʉlamʉla makani nɨ manino? 3 Itɨɨ, shanga mʉlɨngile kɨna mʉkʉalamʉla ga nɨa malaɨka, mʉkʉleng'wa ʉlɨ kʉlamʉla makani nɨ manino na mahikʉ ɨhi? 4 Nɨmʉkete wilei mʉ makani anyu nɨ maniino, nɨkɨ mʉkisemela kʉ antʉ nɨshanga agombekile kʉ antʉ nɨamʉhʉɨɨe ʉ Yesʉi? 5 Hung'wi mɨnyala! Kʉlʉnge kʉtilɨ ga nʉyʉ nʉng'wɨ mʉng'wanyu nʉkete mahala nʉhumile kʉhunga makani na anyandʉgʉ nɨamʉhʉɨɨe ʉKilisito. 6 Kɨmɨkɨli kakwe, tai yatula wɨda mʉntʉ nʉmʉhʉɨɨe ʉ Yesʉi kʉmʉsemela mʉluna kianza nɨla antʉ nɨshanga ahʉɨɨe ʉ Yesʉi!

7 Kʉtai kisemela itɨ nyenye atilɨ ilɨngɨkile kɨna maleng'wa lʉkʉlʉ. Itɨɨ, nɨkɨ ʉnyenye mʉleke kʉgomba kʉtendeelwa ʉbɨ? Shanga bahune kʉhegeligwa ɨnsao yanyu? 8 Ingɨ kɨmɨkɨli kakwe, nyenye mʉkʉatendeela ʉbɨ, mʉkʉhegeligwa ɨnsao ahʉɨɨli ɨanyu! 9 Ang'wɨ itɨɨ, shanga mʉlɨngilene kɨna ɨantʉ nɨabɨ shanga akingɨla mʉ ʉtemi wang'wi Itunda. Antʉ nɨ asambo nɨ akʉlya adʉdʉ nɨ agoolya ang'wɨ agoha nɨigoolya agoha 10 nɨ antʉ nɨia nɨabɨ ankolo nɨagala ntʉlɨ nɨategetani nɨahegelani nɨanso ɨhi shanga akingɨla mʉ ʉtemi wang'wi Itunda. 11 Mʉng'wanyu nɨang'wɨ aɨmɨtendaʉ. Ingɨ itungo ɨlɨ witʉ kʉkɨɨla Isekʉlʉ ʉ Yesʉi Kilisito melisigwe ʉʉbɨ wanyu, maholanigwe nʉkʉaligwa kɨna magombeka pantongeela ang'wi Itunda kʉ lina lang'wi Isekʉlʉ ʉ Yesʉi Kilisito nʉkʉ Ng'wahʉ wang'wi Itunda

12 Mʉntʉ ʉhumile kʉlʉnga, "Ngombigwe kitʉma maɨntʉ ɨhi mʉndoewe." Ʉzaʉ, ingɨ shanga kɨntʉ kɨhi kɨza. Ngombile kɨna ngombigwe kitʉma maɨntʉ ɨhi mʉndoewe ingɨ shanga ngombile kʉtongwa nɨ kɨntʉ kɨhi. 13 Ʉhumile kʉlʉnga itɨ, "Indya ingɨ kʉnsoko anda, nɨnda kʉnsoko andya." Ʉzaʉ, ingɨ Itunda ʉkʉiheja yɨhi mʉbɨɨlɨ. Mʉɨlɨ nʉwa mʉntʉ shanga kʉnsoko aʉgoolya ingɨ kʉnsoko akʉmitʉmɨla Isekʉlʉ nʉng'wenso Isekʉlʉ ingɨ wɨlilaa ɨmɨɨlɨ itʉ nʉkʉmɨlɨsa. 14 Itɨ gwa, Itunda aɨʉmiʉkilye Isekʉlʉ Yesʉ, ʉkʉʉiʉla nʉsese kʉngulu yakwe.

15 Itɨɨ, shanga mʉlɨngilene kɨna ɨmɨɨlɨ anyu mapiliga amʉɨlɨ wang'wa Kilisito? Itɨɨ, mʉlɨye nihumile kʉhola mʉmʉɨlɨ wang'wa Kilisito nʉkʉtula mʉɨlɨ nʉwa mʉgoolyi? Shangaʉ! 16 Ndogoelyo, anga nɨmʉlɨngile, mʉntʉ wɨhi nʉɨwɨgoolya nʉ mʉgoolya wɨtula mʉɨlɨ ʉng'wɨ nʉng'wenso, anga niyandɨkilwe, "Nɨenso nɨabɨɨlɨ akʉtula mʉɨlɨ ʉng'wɨ." 17 Ingɨ kʉkamɨnkana nʉ Isekʉlʉ wɨtula nkolo ɨng'wɨ nʉng'wenso.

18 Itɨ gwa leki kʉgoolyi. Mɨlandʉ mɨʉya ɨhi mʉntʉ witʉma kʉnzi amʉɨlɨ wakwe, ingɨ mʉtʉ nʉwigoolya witʉma mʉlandʉ mʉmʉɨlɨ nʉwakwe. 19 Itɨɨ, shanga mʉlɨngilene ɨmɨɨlɨ anyu ingɨ nyʉmba aNg'wahʉ wang'wi Itunda nʉwishiɨ mʉ nkolo yanyu, naɨmʉpewe kʉpuma kʉng'wi Itunda? Itɨ gwa mɨɨlɨ anyu shanga anyu ingɨ nsao ang'wi Itunda. 20 Kʉnsoko aɨmʉgʉilwe kʉ nsao nɨnkʉlʉ. Kʉlʉlo tʉmɨli mɨɨlɨ anyu kikʉlyo lang'wi Itunda.