1 Itungo ɨlɨ, anyandʉgʉ ane, ndoilwe kʉmʉkɨmbʉsha Nkani Nza izo naɨnʉmʉtanantɨɨye nʉnyenye mɨkaigomba, kʉlʉlo longoleki kishiɨ nʉkʉityata. 2 Nkani Nza izi naɨnʉmʉtanantɨɨye ingɨ aɨnzɨla ang'wi Itunda kʉmʉguna. Mʉtakɨwe kʉlongoleka kʉihʉɨɨla inkani niyanso. Anga mʉileke kʉityata, mʉkʉtula mʉhʉɨɨe nakanda.

3 Ndogoelyo ʉnene aɨnʉmʉmanyisilye makani anga naɨmanyisigwe, aɨnʉmʉmanyisilye ɨkʉlʉ kʉʉlʉ kɨna ʉKilisito aɨʉkule kʉnsoko amɨlandʉ itʉ anga Wandɨkwa wang'wi Itunda nʉwandɨkilwe, 4 kɨna aɨʉɨkilwe mʉkɨbɨɨla nʉ lʉhikʉ nʉla kataatʉ wɨkiʉka, 5 nɨ kɨna aɨwiambilye kʉng'wa Petelo nɨ panyambele wɨkiambya kʉ itʉmi ikʉmi na abɨɨlɨ. 6 Sʉnga wɨkiambya kʉ nkʉa ɨng'wɨ kʉ anyandʉgʉ nɨakɨile magana atano, nɨang'wɨao akɨlɨ amolɨ apanga ingɨ nɨang'wɨ akulee. 7 Panyambele wɨkiambya kʉng'wa Yakobo sʉnga wɨkiambya kʉitʉmi ɨhi.

8 Wɨkamalɨnkɨɨlya kiambya kʉng'wane naɨntuile anga mʉng'enya nʉpee mahikʉ akʉtugwa. 9 Ndogoelyo ʉnene nɨmʉniino lʉkʉlʉ mʉ itʉmi. Kʉtambʉla itɨ kʉnsoko shanga aɨnonee kitangwa nɨ mitʉmi, aɨnɨagilye antʉ nɨamʉhʉɨɨe Itunda. 10 Ingɨ kʉ ʉkende wang'wi Itunda naile anga itɨ nɨ nɨlɨ, nʉ ʉkende wakwe nʉmpee shanga ʉkʉlimɨla nakanda. Ʉnene nitʉmile mʉlɨmo kʉkɨla antʉ ɨhi, ingɨ shanga nene nɨnitʉmile, ʉwʉ ʉkende nɨnkendepilwe ni Itunda wenso witʉma mʉlɨmo palʉng'wɨ nʉnene. 11 Itɨ gwa, anga itule nene nɨtanantya ang'wɨ atule itʉmi nɨangɨɨza wawo ɨtanantya, hʉlyo, ʉsese kɨatanantɨlya antʉ lʉkani lʉlo lʉʉlo, hangɨ ɨkɨ kɨkɨ nɨmʉkɨhʉɨɨe.

12 Itungo ɨlɨ, anga ɨze kʉtanantilye kɨna ʉKilisito aɨwiʉkigwe ang'wɨ anyu ahumile ʉlɨ kʉlʉnga kɨna kʉtilɨ anga wiʉkigwa? 13 Anga ɨze kʉtilɨ anga wiʉki ʉgwa nʉ Kilisito shanga aɨwiʉkile, 14 Anga ɨze ʉKilisito shanga aɨwiʉkile, itɨ gwa, ʉtanantyi witʉ wanakanda nʉ ʉhʉɨɨli witʉ wanakanda. 15 Nʉsese kʉʉgaza nʉkʉtula kɨakʉɨɨli aʉtele pang'wi Itunda, ndogoelyo kʉmʉtanantɨɨye antʉ kɨna Itunda aɨʉmiʉkilye ʉKilisito. Hangɨ anga ɨze tai kʉtilɨ nʉwiʉkigwa, itɨgwa Itunda shanga aɨʉmiʉkilye ʉKilisito. 16 Ingɨ anga itule tai antʉ nɨakulee shanga iʉkigwa, nʉyo ʉKilisito shanga aɨwiʉkile. 17 Hangɨ anga ize ʉKilisito shanga aɨʉiʉkigwe, ʉhʉɨɨli wanyu wanakanda, mʉkɨlɨ mʉmolɨ mʉmɨlandʉ anyu. 18 Nɨ antʉ naɨamʉhʉɨɨe ʉKilisito nɨakule yʉkʉtula alimɨee lʉkʉlʉ. 19 Anga ɨze ʉsʉmbɨɨlyi witʉ mʉng'wa Kilisito ingɨ kʉnsoko a likalo nʉla mihɨɨ, itɨ gwa, ʉsese kɨ antʉ akʉaisɨligwa kʉkɨla antʉ ɨhi mihɨɨ.

20 Ingɨ kʉlʉ kʉʉlʉʉ, ʉKilisito wiʉkigwe, ng'wenso wang'wandyo kʉ antʉ nɨakule nɨaziiʉkigwa. 21 Ndogoelyo anga ɨnsha naɨzile mʉ antʉ kʉkɨɨla kʉ mʉntʉ ʉng'wɨ, ʉlʉkʉlʉ nʉ kiʉka yisakigwe nʉ mʉntʉ ʉng'wɨ. 22 Anga ɨantʉ ɨhi nɨɨkuza nakʉsakigwa nʉ Adamu, itɨʉ lʉkʉlʉ antʉ ɨhi akiʉkigwa nakʉsakigwa nʉ Kilisito. 23 Ingɨ kɨla mʉntʉ ʉkiʉka kʉ matungo akwe. Kilisito hanza, ʉgwa nawa nɨang'wa Kilisito itungo ʉ Kilisito nʉɨkɨza. 24 Papo gwa itungo lampelo lɨkʉpika nʉ Kilisito nʉkʉlimansɨɨlya atemi nʉʉhumi ningʉlʉ. Sʉnga ʉKilisito ʉkʉmʉpa ʉtemi Itunda nɨ Tata wakwe. 25 Ndogoelyo ʉKilisito ingɨ ʉtakɨwe wateme hanza kʉpikɨɨla Itunda nʉwɨkalemya alʉgʉ akwe ɨhi nʉkʉatema. 26 Mʉlʉgʉ nʉkʉmalɨnkɨɨlya kʉlimansɨligwa ingɨ nsha. 27 Wandɨkwa wang'wi Itunda wandɨkilwe, "Itunda ʉɨkile maintʉ ɨhi mʉʉtemi wakwe." Ingɨ Wandɨkwa wandɨkilwe kɨna, "Maintʉ ɨhi aɨkilwe mʉʉtemi wakwe" ingɨ tai kɨna Itunda dʉ nɨshanga ʉkʉteng'wa nʉ Kilisito, kʉnsoko Itunda ng'wenso ʉmʉpee ʉKilisito maintʉ nanso wamateme. 28 Ingɨ maintʉ ɨhi anga ateng'we nʉ Kilisito, papo gwa nʉ Kilisito ʉkitemya kʉng'wi Itunda, kʉlʉnga itɨ Itunda ʉkʉtula mʉtemi mʉkʉlʉ nʉwa intʉ yɨhi.

29 Anga ize kʉtilɨ wiʉki, itɨ, antʉ awo nɨakʉbadisigwa kʉnsoko ashi asʉmbɨɨye akʉlija kɨntʉ kɨɨ? Anga ɨze ɨashi shanga iʉkigwa, yakɨgwa kʉbadisigwa kʉnsoko antʉ nɨanso? 30 Nʉsese nɨkɨgwa kʉitwala mʉʉlʉgʉ matungo ɨhi? 31 Anyandʉgʉ, ʉnene kigidɨɨe nɨnsha mahikʉ ɨhi! Nisanilye kʉnsoko anyu nɨ mʉmʉhʉɨɨe ʉKilisito Yesʉ Isekʉlʉ witʉ kɨko kɨkʉnsasha ntanantye ɨkani ɨlɨ. 32 Anga ɨze ɨmasɨgo ane amihɨ, ʉne kikʉa niikalɨ niitaki ʉko kʉ Epeso aɨyɨze nzaɨlya ntʉni? Anga ɨze ɨashi shanga akʉiʉka, ʉgwa, "Kʉlye nʉkʉng'wa kʉnsoko mʉdaʉ kʉʉsha."

33 Leki kikongi! Ʉhʉmbashʉya nɨ antʉ nɨabɨ ikanza ntendo ninza." 34 Hʉgʉki! Mandye kʉsɨɨgɨla nɨmaza mʉpele kitʉma ɨmɨlandʉ kʉnsoko nɨang'wɨ mʉng'wanyʉ shanga amʉlɨngile Itunda. Itɨ kʉmʉɨla ingɨ mɨnyala ikʉlʉ kʉng'wanyu.

35 Ingɨ ʉmʉntʉ ʉhumile kʉkolya, "Antʉ nɨakulee azeiʉkigwa ʉlɨ? Azetula nɨmɨɨlɨ ɨʉlɨ? 36 Nanso makolyo akɨpʉngʉ! Anga ʉtemele ɨmbeʉ anga ɨhite kʉsha shanga ɨkuhelʉka. 37 Wɨtemela mbeʉ, ɨtule ngano ang'wɨ mbeʉ ngɨza, ingɨ shanga mʉmea nʉwigela. 38 Itunda wɨpumisa mɨmea anga mʉtakɨe kʉpuma mʉmbeʉ niyanso.

39 Iʉmbwa yɨhi ingɨ yikete mɨɨlɨ, ingɨ mɨɨlɨ nanso shanga impyani, mɨɨlɨ aana antʉ ingɨ impyani, ni mɨɨlɨ aikalɨ ingɨ mɨngɨza, ninyʉnyi mɨngɨza nɨmɨɨlɨ ansamaki mɨngɨza.

40 Ɨkolɨ ɨmɨɨlɨ akigʉlʉ nɨmɨɨlɨ amihɨ, ʉʉza nʉwa mɨɨlɨ akigʉlʉ mɨngɨza, nʉʉza nʉwa mʉɨlɨ nʉwa mihɨɨ ʉngɨza 41 Lyoa lɨkete ʉza wakwe, nʉ ng'weli ʉkete ʉza wakwe nɨ nzota ga yɨkete ʉza wakwe, nzota nizo yɨhutana kʉʉza wao.

42 Itɨ izetula kiʉki kʉashi atule apanga. Anga ɨmbeʉ, ʉmʉɨlɨ wɨhɨmbɨlwa mʉkɨbɨɨla ʉze ʉbɨɨ, ingɨ wiʉkigwa wɨze ʉza. 43 Wɨhɨmbɨlwa kʉ mɨnyala, wɨkaiʉkigwa kikʉlyo, wɨhɨmbɨlwa kʉ ʉlema, wɨiʉkigwa ʉze ʉkete ngulu. 44 Nʉkʉhɨmbɨlwa anga mʉɨlɨ ʉdu, nʉʉkʉiʉkigwa mʉɨlɨ nʉwa kɨnkolo. Ʉmolɨ ʉmʉɨlɨ anga nɨkɨʉona, hangɨ ʉmolɨ ʉmʉɨlɨ nʉwa kinkolo. 45 Ndogoelyo wandɨkwi wandɨkilwe itɨ, "Mʉntʉ nʉwa ng'wandyo ingɨ Adamu, aɨkɨʉʉmbwa naɨ kɨpanga," ingɨ ʉ Adamu nʉwa mpelo ingɨ Ng'wahʉ wang'wi Itunda nʉɨapeza ɨantʉ ʉpanga. 46 Ingɨ nʉɨtongela kʉng'wako shanga mʉɨlɨ nʉwakɨnkolo, ingɨ mʉɨlɨʉ, wɨkatyata ʉmʉɨlɨ nʉwa kɨnkolo. 47 Adamu nʉwa ng'wandyo aɨʉʉmbilwe kʉ malolo, kʉpuma pihɨ, mʉntʉ nʉwa kabɨɨlɨ aɨʉpumɨɨe kigʉlʉ. 48 Ɨhi nɨa amolɨ mihɨɨ ingɨ yimpyani nʉ mʉntʉ naɨʉʉmbilwe na malolo, awa nɨakigʉlʉ amolɨ anga ʉyʉ naɨʉpumɨɨe kigulu. 49 Anga nɨkimpyani nʉyʉ naɨ ʉʉmbilwe kʉ malolo, ʉlʉkʉlʉ kɨɨkimpyana nʉyʉ naɨʉpumile kigʉlʉ.

50 Itɨ gwa, anyandgʉ kʉlʉnga itɨ, ɨko nɨkɨzɨpigwe kʉmʉɨlɨ nɨ sakami shanga kɨkʉtula mʉʉtemi nʉwa ng'wi Itunda nɨkɨ nɨkɨbɨ shanga kɨkʉzɨpa.

51 Tegeli, nʉmʉɨle ʉnkunku, ʉsese shanga kʉʉsha nɨ kɨɨhi ingɨ kɨɨhi kʉkaɨlwa.

52 Matungo na mpembe ampelo, kitungo inino kʉtutya nʉkʉpɨtya, kʉnsoko idede nɨɨkalɨla ɨashi akʉiyʉkigwa atule apanga nʉsese kʉkaɨlwa. 53 Kʉnsoko kʉsinja ʉʉ nʉɨbɨpa ʉpele kʉbɨpa nʉwʉ nʉɨkuza ʉpele kʉsha. 54 Itɨ gwa, ʉmʉɨlɨ ʉyʉ nʉɨbɨpa nʉɨka tula shanga wɨbɨpa nʉyʉ nʉkza nɨka tula shangawakʉsha papogwa lʉkʉkondanɨɨla ʉlʉkani naɨlʉandɨkile, "Nsha alimansɨligwa ʉhumi wakondanɨɨla!"

55 Nsha, ʉhumi nʉwako ʉmolɨpɨ?

Ʉhumi nʉwako nʉwakʉaalya ʉmolɨpɨ?

56 Ʉwai wansha ingɨ mɨlandʉ nɨngulu amɨlandʉ ingɨ malagɨɨlyo. 57 Ingɨ kʉmʉsongelye Itunda nʉɨkʉpeza ʉhumi kʉkɨɨla kʉng'wi Isekʉlʉ witʉ ʉ Yesʉi Kilisito.

58 Itɨ gwa, anyandʉgʉ ane nɨnʉmʉloilwe mʉkome, mʉleke kʉhingiɨka mʉlongoleke kitʉma ʉmʉlɨmo wang'wi Isekʉlʉ mahikʉ ɨhi, kʉnsoko mʉlɨngile kɨna ʉlwago lanyu shanga nakanda mʉng'wi Isekʉlʉ.