1 Anyandʉgʉ ane, shanga aɨnʉmʉmanyisilye ʉnyenye anga antʉ nɨakete Ng'wahʉ wang'wi Itunda, ingɨ aɨnʉmʉmanyisilye ʉnyenye anga antʉ nɨagila Ng'wahʉ wang'wi Itunda anga ang'enya nɨadabʉ nɨakɨlɨ kʉmʉhʉɨɨla ʉKilisito. 2 Aɨkʉmʉmanyisa nkani nɨmpepeele kʉlɨngwa anga mʉsʉngʉ nʉkonsha ʉng'wana maele shanga aɨkʉmʉlɨsa ndya nɨnkaku, aɨntendile itɨ kʉnsoko aɨmʉkɨlɨ mʉhume kʉlya ndya ninkaku, nɨtungo ɨlɨ ga mʉkɨlɨ kʉhuma, 3 kʉnsoko ʉnyenye mʉkɨlɨ mʉtyatile ntendo niya mihɨɨ anga antʉ amihɨɨ ɨyɨ nɨatyatile. Itɨɨ, shanga taine kɨna mʉkɨlɨ mʉkete wɨlʉ nʉ wilei? Makani anga nanso akumʉʉe kɨna ʉnyenye mʉkɨlɨ mʉtyatile ntendo niya mihɨɨ, mʉtyatile ntendo niya antʉ amihɨɨ mʉkɨlɨ mʉlemigwe nɨ kɨlakulaku ka mʉɨlɨ. 4 Kʉnsoko ʉng'wɨanyu anga walʉnge, "Ʉnene nʉmʉkee Paʉlo," nʉmʉya walʉnge, "Ʉnene nʉmʉkee Apolo," Itɨɨ, nɨmʉkʉtambʉla makani anga nanso mʉkɨlɨ mʉkitʉma anga antʉ nɨshanga amʉhʉɨɨe Itunda.

5 Itɨɨ, ʉApolo nyenyu? Nʉ Paʉlo nyenyu? Apolo nʉ nene ingɨ kɨitʉmi ʉdu Itunda naɨʉkʉlagɨɨye kʉng'wanyu mʉhume kʉmʉhʉɨɨla ʉ Yesʉi Kilisito. Ʉsese kɨhi kitʉmile mʉlɨmo naɨkʉpewe ni Isekʉlʉ. 6 Ʉnene aɨntemee mbeʉ, nʉ Apolo wɨhɨla mazɨ, Itunda ingɨ ng'wenso ʉpumisilye nʉ kʉkʉlisa. 7 Ingɨ mʉntʉ nʉtemee mbeʉ, nʉ mʉntʉ nʉwɨhɨe mazɨ antʉ awa shanga kɨntʉ. Kɨkʉlʉ ingɨ Itunda nʉwɨpumisa mbeʉ nʉ kʉkʉlisa. 8 Mʉntʉ ʉyʉ nʉtemee nʉmʉntʉ ʉyʉ nʉwɨhɨla kʉtilɨ nʉmʉkɨlɨnkɨɨe ʉmʉya, antʉ awa ɨhi Itunda ʉkʉapa kɨnyamʉlɨmo kao anga mʉitʉmile. 9 Kʉndogoelyo nanso ʉnene nʉ Apolo ingɨ kʉitʉma mʉlɨmo wang'wi Itunda, nʉnyenye ingɨ mɨmʉgʉnda wakwe.

Hangɨ ʉnyenye mɨnyʉmba ang'wi Itunda. 10 Kʉʉkende wang'wi Itunda nʉmpee ʉnene naina nɨang'wandyo kʉmʉletela mpola yang'wa Yesʉ anga mʉzengi nɨmʉkendegeeli nʉkʉhɨmba nʉkʉzenga mʉkuɨla, itungo ɨlɨ amanyisi angɨɨza akʉmanyisa mʉnkani niyanso anga mʉzengi mʉngɨɨza nʉkʉzenga mʉmʉkuɨla wʉwo. Itɨ gwa, mʉzengi wɨhi nʉwatule mʉkendegeeli nʉkʉzenga. 11 Kʉlʉlo kʉtɨlɨ anga mʉzengi mʉngɨza nʉhumile kʉhɨmba nʉkʉzenga mʉkuɨla ʉngɨza, kʉnsoko mʉkuɨla nʉwakondile kʉhɨmbwa nʉkʉzengwa ingɨ Yesʉ Kilisito. 12 Ingɨ anga mʉzengi nʉkʉzenga iza mʉ mʉkuɨla nʉwanso kʉ zahabu ang'wɨ kʉ nangʉ a Peza, ang'wɨ kʉ magwe ansaɨlo nkʉlʉ, mʉzengi nʉkʉzenga ibɨ wɨhanga anga mʉntʉ nʉkʉzengala mɨtɨ, ang'wɨ mapwa ang'wɨ matʉtʉ. 13 Mʉlɨmo nʉwa mʉntʉ wɨhi ʉkigeela anga nʉwɨlɨ lʉhikʉ nʉla kʉtulya ʉKilisito. Lʉhikʉ nʉlanso lʉzile nʉ moto, moto nʉwanso ʉkʉgema nʉ kigeelya ʉza nʉwa mʉlɨmo nʉwanso. 14 Anga ɨze mʉlɨmo nʉwa mʉntʉ nʉzengile mʉmʉkuɨla nʉwanso ʉkʉkɨɨligwa mʉ moto ʉleke kʉzigɨla, mʉntʉ nʉwanso ʉkʉpegwa kɨpegwa. 15 Ingɨ anga ɨze mʉlɨmo nʉwa mʉntʉ nʉzengile ʉkʉzigɨla, mʉntʉ nʉwanso shanga ʉkʉpegwa ɨkɨpegwa kakwe, ingɨ mʉntʉ nʉwanso ʉkʉgunwa anga mʉntʉ nʉwipʉlʉpʉtilye mʉ moto nʉwa ʉlamʉlwi.

16 Itɨɨ, shanga mʉlɨngilene kɨna ʉnyenye mɨnyʉmba ang'wi Itunda, hangɨ kɨna Ng'wahʉ wang'wi Itunda wishiɨ mʉng'wanyu? 17 Itɨ gwa, mʉntʉ anga wamɨgazanje ɨnyʉmba ang'wi Itunda, Itunda ʉkʉmʉgazanja. Kʉnsoko ɨnyʉmba ang'wi Itunda ɨbagʉwe kʉnsoko akwe, nɨnyʉmba ang'wi Itunda ingɨ ʉnyenye.

18 Leki kikongi. Mʉntʉ wɨhi nʉwiine ʉkete mahala mʉntendo niya mihɨɨ, bahu watule anga mʉpungʉ kʉnsoko wahume kʉlija mahala atai. 19 Ntambʉe itɨ kʉndogoelyo, mahala aantʉ amihɨɨ ɨyɨ ingɨ ʉpʉngʉ pang'wi Itunda. Kʉnsoko yandɨkilwe mʉ wandɨkwa wang'wi Itunda itɨ, "Itunda wɨaambisa anyamahala mʉ ʉhʉgu nʉwao." 20 Nɨ hangɨ yandɨkilwe mʉ wandɨkwa wang'wi Itunda, "Isekʉlʉ ʉlɨngile kɨna masigo aanyamahala shanga kɨntʉ." 21 Itɨ gwa, mʉntʉ nʉwaleke kiketela ntendo nɨantʉ akʉtenda. Kʉndogoelyo nɨanso ɨhi aɨkilwe ni Itunda kʉʉaɨɨlya ʉsese. 22 Leki kiketela makani nitʉmilwe itule Paʉlo ang'wi Apolo ang'wi Petelo ang'wɨ antʉ ɨhi mihɨɨ nʉ likalo nɨnsha nɨ makani ni itungo ɨlɨ makani napembilye, maintʉ aya ɨhi anyu, 23 ʉnyenye ingɨ mɨantʉ ang'wa Kilisito, nʉ Kilisito ingɨ wang'wi Itunda.