1 Anyandʉgʉ ane, aya naza mʉnkiye nɨa ipegwa, ndoilwe mʉlɨnge ipegwa niya Ng'wahʉ Ng'welʉ.

Ndoilwe mʉlɨnge iza makani aya. 2 Mʉlɨngile kɨna ʉnyenye naɨmʉkɨlɨ kʉmʉlɨnga Itunda, aɨmʉpembeseigwe nʉ kʉlimɨligwa nɨadʉdʉ nɨshanga apanga. 3 Kʉlʉlo, lɨngi kɨna mʉntʉ wɨhi nʉaɨigwe nʉ Ng'wahʉ Ng'welʉ shanga ʉhumile kʉlʉnga, "Yesʉ wazung'we!" Nɨ hangɨ kʉtilɨ mʉntʉ wɨhi nʉhumile kʉlʉnga, Yesʉ ingɨ Isekʉlʉ," anga waleke kʉaɨɨligwa nʉ Ng'wahʉ Ng'welʉ.

4 Hangɨ yikolɨ ipegwa nia kɨnkolo yɨdʉ, ingɨ yɨpumigwa nʉ Ng'wahʉ ʉng'wɨ. 5 Yikolɨ nzɨla yɨdʉ niya kʉmitʉmɨla, ingɨ kɨaɨɨligwa ni Isekʉlʉ ʉng'wɨ 6 Hangɨ yimolɨ nzɨla yɨdʉ niya kitʉma mʉlɨmo, ingɨ Itunda ʉng'wɨ nʉwɨkʉpeza ʉhumi kitʉme ɨmɨlɨmo kʉ antʉ ɨhi. 7 Kɨla mʉntʉ wɨaɨɨligwa nʉ Ng'wahʉ kitʉma mʉlɨmo ingɨ antʉ ɨhi ahume kiaɨɨlya. 8 Ndogoelyo Ng'wahʉ wɨmʉpa kɨla mʉntʉ mahala akʉtambʉla nkani ninza, ʉmʉya kʉtambʉla nkani niya ʉlɨngi. 9 Ng'wahʉ yʉyo yʉʉyo wɨmʉpeza mʉntʉ mʉya ʉhumi ʉkʉlʉ nʉwa kʉhʉɨɨla, hangɨ wɨmʉpeza mʉntʉ mʉya kɨpegwa ka kʉakomya antʉ. 10 Ng'wahʉ wɨmʉpeza mʉntʉ mʉya kɨpegwa nɨka kʉtenda mɨʉkʉɨlwa, nʉ mʉntʉ mʉya wɨmʉpeza ʉhumi nuwa kʉtanantya nkani kʉpuma kʉng'wi Itunda, nʉ mʉntʉ mʉya kʉilɨnga Ng'wahʉ nʉmʉbi nʉ Ng'wahʉ nʉwa tai, mʉntʉ mʉya kʉtambʉla ntambʉ ngeni, mʉntʉ mʉya kʉnononsola ntambʉ niyanso. 11 Makani aya ɨhi ingɨ mʉlɨmo nʉwa Ng'wahʉ yʉyo ʉng'wɨ du, Ng'wahʉ yʉyo wɨlamʉla wamʉpe ntʉni ʉmʉntʉ.

12 Anga mʉɨlɨ nɨɨza ʉng'wɨ nʉwenso ʉkete mapɨlɨga ɨdʉ, nɨmapɨlɨga nanso palʉng'wɨ nʉ kʉtula ɨdʉ, ingɨ mapiliga nanso ɨhi mʉɨlɨ ʉng'wɨ, ʉyɨlɨ mʉng'wa Kilisito. 13 Ndogoelyo ʉsese, anga kʉtule kɨ Ayahudi ang'wɨ antʉ andʉgʉ ngɨza, atʉʉng'wa ang'wɨ antʉ nɨidesile, kɨhi kʉbadisigwe kʉtule kɨmʉɨlɨ ʉng'wɨ kʉkɨɨla Ng'wahʉ ʉng'wɨ, nʉsese kɨkahunʉɨlwa Ng'wahʉ yʉyo ʉng'wɨ.

14 Mʉɨlɨ shanga ipɨlɨga lɨng'wɨ du, ingɨ mapɨlɨga ɨdʉ. 15 Anga mʉgʉlʉ ʉlʉnge, "Kʉnsoko ʉnene shanga nɨ mʉkono, itɨ gwa ʉnene shanga nɨa mʉɨlɨ," Ingɨ kʉtambʉla itɨ, yɨkʉʉtenda mʉgʉlʉ ʉtule shanga ipɨlɨga lamʉɨlɨ. 16 Hangi anga ʉkʉtwɨ walʉnge, "Kʉnsoko ʉnene shanga nɨliho, kʉitɨ ʉnene shanga nɨa mʉɨlɨ," Ingɨ kʉntambʉla itɨ, yɨkʉtenda ʉkʉtwɨ watule shanga ipɨlɨga lamʉɨlɨ. 17 Angaɨze ʉmʉɨlɨ wɨhi aɨʉtule liho, aɨkʉziija ʉlɨ? Ang'wɨ ʉmʉɨlɨ wɨhi aɨʉtule kʉtwɨ, mʉntʉ aɨʉzenyunsha ʉlɨ? 18 Anga ɨze mapiliga ɨhi namʉɨlɨ aɨipɨlɨga lɨng'wɨ, mʉɨlɨ aɨze wɨkʉtilɨ, itɨ gwa Itunda aɨʉhongekee mʉmʉɨlɨ mapiliga aya ɨsa anga naɨʉloilwe. 19 Anga ɨze mʉmʉɨlɨ aɨyitule ipɨlɨga lɨng'wɨ, ʉmʉɨlɨ aɨʉzetula ʉlɨ? 20 Ingɨ tai kɨna, akolɨ mapiliga ɨdʉ, ʉmʉɨlɨ ingɨ ʉng'wɨ.

21 Itɨ gwa, ɨliho shanga lɨhumile kʉʉɨla ʉmʉkono, "Shanga nʉkʉloilwe ʉewe!" hangɨ itwe shanga lɨhumile kʉmɨɨla mɨgʉlʉ, "Shanga nʉkʉloilwe ʉewe." 22 Ingɨ kɨmɨkɨɨli kakwe, mapiliga aya nɨmanementalu, yayo akʉigwe nangulu mʉmʉɨlɨ, 23 hangɨ, mapiliga ayo nɨgee kɨna adalahilwe, yayo kʉmakʉiye nangalʉ, nɨmapiliga amʉɨlɨ nɨkʉsɨgile kɨna ɨhumania mɨnyala, yayo kʉmakʉiye nangulu, 24 mapiliga ang'wɨ nɨmaza, shanga itakile kʉimbwa kʉkendegeeli ʉkʉlʉ. Itunda ng'wenso ʉhongekee ʉmʉɨlɨ kɨɨsa wamakʉlye mapiliga nadalahilwe. 25 Ingɨ mʉɨlɨ ʉleke kʉtemanʉka, Itunda aɨʉloilwe mapiliga ɨhi iaalye palʉng'wɨ. 26 Anga ipɨlɨga lɨng'wɨ lɨaalɨke, mapiliga ɨhi yiaalɨka palʉng'wɨ nɨlyenso, ang'wɨ ipɨlɨga lɨng'wɨ lɨkʉligwe mapiliga ɨhi ɨlowa palʉng'wɨ nɨlyenso.

27 Itungo ɨlɨ ʉnyenye mɨhi mɨmʉɨlɨ wang'wa Kilisito, kɨla mʉntʉ ingɨ ipɨlɨga lamʉɨlɨ nʉwanso. 28 Mʉahʉɨɨli ang'wi Itunda, Itunda ʉɨkile kɨla ʉmʉntʉ palyoma lakwe, nɨang'wandyo itʉmi, nɨakabɨɨlɨ amanga, nɨakatatʉ amanyisi, sʉnga wɨkaaɨka nawa nɨakete ipegwa niyakitʉma imapɨlʉ, kʉakomya antʉ nɨahumile kʉaaɨɨlya aʉya, nɨantʉ nɨakʉaɨɨlya nʉ kʉatongeela antʉ nawa nɨa kʉligitya ɨntambʉ niya kɨgeni. 29 Itɨɨ, antu awa ɨhi itʉmine ang'wɨ amangane ang'wɨ amanyisine. Itɨɨ, antʉ ɨhi akete ʉhumi nʉwa kitʉma ɨmapɨlʉne, 30 ang'wɨ antʉ ɨhi akete ipegwa nia kʉkomya antʉne, ang'wɨ antʉ ɨhi akete ipegwa niya kʉtambʉla ntambʉ akɨgenine, ang'wɨ antʉ ɨhi akete ipegwa niya kʉnononsoola ntambʉne. 31 Itungo ɨlɨ longoleki kʉtula niipegwa niya Ng'wahʉ nɨmʉyiine kɨna ikʉlʉ mbele.

Nɨkɨza mbele ndoilwe kʉmʉlagɨɨla nzɨla ikʉlʉ nakʉlija ipegwa.