1 Nigulye mpola ni ya tai kɨna mʉng'wanyu ʉmolɨ ʉgoolya, hangɨ ʉgoolya nʉʉbɨ naɨ ʉkɨlɨ wɨgele mʉantʉ nɨshanga amʉmanyile Itunda. Ntambʉɨwe age mʉntʉ ʉng'wɨ mʉng'wanyu ʉmʉtɨnile ʉmʉsʉngʉ wang'wihe! 2 Kʉnɨkɨ mʉkiketa? Shanga mʉaalɨkile mʉnkolo nʉ kʉmʉheje mʉng'wanyu mʉntʉ nʉɨtenda makani nanso. 3 Nʉnene, shanga kɨpalʉng'wɨ nʉnyenye, nɨitɨga kɨnkolo nkolɨ palʉng'wɨ nʉnyenye, hangɨ, nakondya kʉmʉlamʉla mʉntʉ naza ʉtendile ikani ɨlɨ nɨlamɨnyala, aza nzeetenda ʉ anga azantule nkolɨ kʉko, 4 Matungo nɨmʉkilʉnda palʉng'wɨ kʉmʉkʉlya Isekʉlʉ witʉ ʉ Yesʉi, ʉnene nkolɨ palʉng'wɨ nʉnyenye mʉ Ng'wahʉ, kʉ ʉhumi wang'wi Isekʉlʉ witʉ ʉ Yesʉi, 5 mʉntʉ nʉwanso mʉkagɨɨli kʉng'wa Shetani waʉkʉe mʉɨlɨ wakwe, nkolo akwe ingɨ ɨhume kʉgunwa ʉlʉhikʉ nʉla kʉtulya Isekʉlʉ. 6 Wiketi wanyu ʉgila anga kɨntʉ kɨhi! Itɨɨ, shanga mʉlɨngilene kɨna amila nsheenyu ɨgasisa kɨgao kɨhi nɨka utu wangano? 7 Tendi nkolo yanyu yigombeke kʉng'wi Itunda kʉkɨɨla kʉmʉheja mʉntʉ nʉmʉbɨ mʉng'wanyu anga kʉheja amila mʉkɨgao ka utu wangano nʉʉkandilwe. Ingɨ mʉtule anga kɨgao kɨhi nɨka utu wangano nɨshanga kɨgasile. Ndogoeelyo Kilisito nɨɨza ng'waa nkolo witʉ nʉwa pasaka wapumigwa kʉtula ipolyo. 8 Kʉlʉlo itungo ɨlɨ kʉleke kʉnoneelya iloeelya nɨla Pasaka kʉ amila nakalɨ, amila namasɨgo mabɨ nʉkitʉma ʉbɨ. ingɨ kʉ mɨkate nɨshanga ɨgahɨigwe, nʉwanso wʉwo welʉ nʉwa kɨnkolo nɨtai.

9 Mitʉtʉ aɨnʉmʉandɨkɨe kʉ mahala ane kɨna mʉleke kihanja nɨagoolya. 10 Shanga ntambʉe kɨna kʉleka mʉleke kihanja nɨantʉ ɨhi mihɨɨ ɨyɨ anga nɨagoolya nɨantʉ nɨabɨ ankolo nɨateele hangɨ nɨɨkʉlya adʉdʉ. Ndogoelyo kʉtemanʉka nɨantʉ nɨanso ɨhi aza izeemʉsasha kʉhama lʉkʉlʉ mʉʉnkumbigʉlʉ ʉwʉ. 11 Naɨnɨkɨandɨkɨle ingɨ sɨkɨ, mʉleke kihanja nɨ antʉ nɨɨza ahʉɨɨli ang'wa Yesʉ anga ʉnyenye kʉnʉ agoolyi nɨ abɨ ankolo nɨ akʉlya adʉdʉ nɨ akinyɨli nɨ agala ntʉlɨ nɨ ateele. Antʉ anga nɨanso leki nʉkʉlɨzania.

12 Itɨɨ mʉlɨmo wane kʉalamʉla antʉ nɨshanga ahʉɨɨli ang'wa Yesʉ? Nɨanso Itunda ʉkʉalamʉla. Itɨɨ? ʉnyenye mʉgombigwene kʉalamʉla antʉ nɨakolɨ mʉ mʉhangʉ nʉwa ahʉɨɨli anga niyandɨkilwe, "Mʉheji ʉmʉntʉ nɨmʉbɨ mʉng'wanyu." 13 Mʉsensekelyi kʉlɨ mʉntʉ nɨmʉbɨ.