1 Itɨɨ, ʉnene nɨmʉtungwane? Itɨɨ, mʉlɨngile kɨna ʉnene nɨmitʉmi nɨ kɨna aɨnʉmʉine ʉ Yesʉi Isekʉlʉ witʉ? Itɨɨ, ʉnyenye shanga aɨnʉmʉmanyisilyene mʉmʉhʉɨɨle Isekʉlʉ? 2 Palʉng'wɨ nɨ kɨna antʉ ang'wɨ ahitile kɨna ʉnene nɨ mitʉmi, ingɨ ʉnyenye mʉgombile kɨna ʉnene nɨ mitʉmi. Kʉnsoko ʉnyenye mʉmʉhʉɨɨe ʉKilisito kɨko kɨlɨngasɨɨlyo kɨna ʉnene nɨmitʉmi wang'wi Isekʉlʉ.

3 Kʉ antʉ nɨanihitile ʉnene kilongola itɨ. 4 Itɨɨ, shanga kʉgombigwene ʉsese kʉpegwa indya nɨ kɨng'wegwa? 5 Itɨɨ, shanga izane ʉsese kendania mʉhɨnzo nʉ mʉsʉngʉ wane nʉmʉhʉɨɨe Itunda anga itʉmi nɨangɨza nʉ Petelo nɨ aheu ang'wi Isekʉlʉ nɨɨtenda. 6 Ang'wɨ ʉnene Paʉlo nʉ Balinaba ʉdu nɨkʉtakɨwe kitʉma mɨlɨmo kʉhume kʉlija maintʉ akiaɨɨlya kʉhume kishiɨ? 7 Mʉnyambita kɨ nʉwenda kʉmbita kʉ nsao yakwe? Mʉlɨmi kɨ nʉɨtemela mʉgʉnda nʉwa mɨzabibʉ wahite kʉlya inkali yakwe? Nyenyu nʉɨdɨma idale lamɨtugo waleke kʉng'wa imaele?

8 Itɨɨ, kʉligitya makani aya kɨʉntʉne? Itɨɨ, malagɨɨlyo ang'wi Itunda naɨʉmʉpee Musa shanga atambʉe ʉne? 9 Yandɨkilwe mʉmalagɨɨlyo ang'wi Itunda naɨʉmʉpee Musa, "Leka kʉmɨtungɨlya ng'ombe mʉlomo itungo nʉʉkʉpʉla." Itɨɨ, nɨkʉʉtambʉla inkani izi, kʉlʉnge Itunda ʉsɨgile ɨng'ombe dune? 10 Itɨɨ, Itunda nʉligitilye itɨ shanga aɨʉkʉsɨgile nʉ sesene? Yandɨkilwe ɨtai kʉnsoko itʉ, kʉnsoko mʉntʉ nʉkʉlɨma nʉ mʉntʉ nʉkʉpʉla, ɨhi nɨ itʉmeʉ ahʉɨɨle kɨna akʉtepanigwa nzepwa. 11 Anga ɨze ʉsese kʉmʉtanantɨɨye lʉkani lang'wi Itunda, itɨɨ, shanga kʉtakɨwe kʉlija kɨntʉne nɨka kʉʉaɨɨlya kɨmʉɨlɨ anga ndya niing'wegwa kʉpuma kʉng'wanyu? 12 Anga ɨze antʉ ang'wɨ mʉkʉaɨɨlya, haɨ ʉsese gwa, shanga kʉtakɨwene kʉaɨɨligwa kʉkɨla antʉ nɨanso?

Ingɨ ʉsese shanga kʉdaiye nɨkʉtakɨwe kʉtendeelwa nʉnyenye. Kɨmɨkɨɨli kakwe kigigimɨɨye mʉ maintʉ ɨhi ingɨ kʉleke kʉgilya Nkani Nza niyang'wa Kilisito kʉtanantigwa. 13 Itɨɨ, shanga mʉlɨngilene kɨna antʉ nɨitʉmɨla Mʉnyʉmba ang'wi Itunda ɨlyaa mʉmo, hangɨ antʉ awo nɨitʉmɨla mitekeelo omoelwa kʉpuma mʉmasongelyo napumigwe? 14 Isekʉlʉ aɨʉlagɨye angaʉ, atanantya Nkani Nza alye kʉkɨɨla mʉlɨmo wʉwo.

15 Ingɨ ʉnene nkɨlɨ kʉgema anga nɨkang'wɨ kʉlompa kɨntʉ kɨhi mʉmaintʉ nɨtakɨwe kʉtendeelwa, hangɨ shanga kʉandɨka itɨ nihume kʉtendeelwa nanso. Ingɨ bahu ʉnene nshe kʉkɨla mʉntʉ wangilye kikʉlya. 16 Ingɨ nɨkʉtanantya Nkani Nza shanga ntakɨwe kikʉlya kʉnsoko ntakɨwe kitʉma mʉlɨmo nʉwanso. Ʉkɨa wane anga ndeke kʉtanantya Nkani Nza. 17 Anga ntanantye mʉndoewe ʉnene, kʉdaya mpegwe kɨnyamʉlɨmo. Ingɨ kitʉma kʉnsoko mʉlɨmo wane nɨmpewe, yɨyɨ ndogoelyo Itunda ʉndagɨɨye nitʉme. 18 Kɨnyamʉlɨmo kane kɨntʉ kɨgwa? Kɨnyamʉlɨmo kane ingɨ kʉlija lyoma nɨlakʉtanantya Nkani Nza nakanda, ndekene kʉdaya ɨkɨnyamʉlɨmo kʉʉtanantyi nʉwa Nkani Nza.

19 Kʉlulo, palʉng'wɨ nʉkʉtula ʉnene shanga nʉmʉtʉng'wa nʉwa mʉntʉ wɨhi, nitendisilye kʉtula nɨmʉtʉng'wa nʉwa antʉ ɨhi ingɨ nihume kʉaaɨɨlya antʉ ɨdʉ amʉhʉɨɨla ʉKilisito. 20 Kʉ Ayahudi aɨnishiɨ anga nɨ Mʉyahudi ingɨ nɨaaɨɨlye Ayahudi amʉhʉɨɨle ʉKilisito, palʉng'wɨ nʉkʉlʉnga ʉnene shanga ntongilwe nɨmalagɨɨlyo, mambile malagɨɨlyoao, ingɨ nɨaɨɨlye awo nɨmolɨ mʉmalagɨɨlyo amʉhʉɨɨle ʉKilisito. 21 Nɨ antʉ nɨshanga Ayahudi, ʉnene aɨnimpyani nɨantʉ nɨanso, shanga aɨtyatile malagɨɨlyo, ingɨ nihume kʉaaɨɨlya antʉ nɨshanga Ayahudi. Ingɨ ndeke kʉsɨgɨɨlwa kɨna shanga ntyatile ɨmalagɨɨlyo ang'wi Itunda, kʉnsoko ntyatile malagɨɨlyo ang'wa Kilisito. 22 Kʉ antʉ nɨahimbɨ aɨnitendisilye anga nɨmʉhimbɨ ingɨ nɨaaɨɨlye antʉ nɨahimbɨ. Aɨntendile maintʉ ɨhi kʉ antʉ ɨhi ingɨ nihume kʉaguna antʉ ang'wɨ kʉnzɨla ɨyɨ.

23 Kitʉma nanso ɨhi kʉnsoko Ankani Nza, ingɨ ʉnene nɨahʉɨɨli ɨane kʉhume kʉsɨngɨɨlya ʉkembetwa nʉwa Nkani Nza. 24 Itɨɨ, shanga mʉlɨngilene kɨna mʉmiginso nʉwakʉmanka antʉ ɨhi ɨmanka mɨlugu, ingɨ mʉntʉ nʉtiganile yʉyo wɨpegwa ɨngala. Kʉlʉlo manki mʉatige ɨanyu mʉhume kʉpegwa ɨngala. 25 Amanki ihamba mahikʉ ɨdʉ nʉkiima maitʉ ɨdʉ ingɨ lʉhikʉ nʉlakitiga ahume kʉtigana, itenda itɨ kʉnsoko akʉpegwa ngala nɨbɨpa, ʉsese ingɨ kihamba mahikʉ ɨdʉ nʉkiima maitʉ ɨdʉ kʉpegwe ɨngala nɨshanga ɨbɨpa. 26 Kʉlʉlo mankile mɨlugu nsʉla ane kʉpegwa ngala, ʉgwa nɨkikʉa nkundi, shanga kikʉa kʉzegʉma nkundi mʉtilɨ anga mʉntʉ. 27 Ingɨ kʉaja ʉmʉɨlɨ wane nʉkiima makani nɨshanga atakɨwe, ingɨ anga nkondye kʉatanantɨlya antʉ Nkani Nza ndeke kʉhitwa pang'wi Itunda.