1 Mʉntʉ nʉwakʉaɨlye ʉsese kɨitʉmi ang'wa Kilisito. Itunda ʉkʉlagɨɨye ʉsese kʉatambʉɨle antʉ mpola nɨakɨlɨ kʉɨlwa nʉ mʉntʉ wɨhi. 2 Mʉntʉ wɨhi nʉpewe ʉmʉlɨmo ʉwʉ nʉwa kʉtanantya antʉ mpola yang'wi Itunda ingɨ ʉtakɨwe kʉtula mʉhʉɨɨli. 3 Ʉnene ingɨ shanga nkee anga namʉlwe nʉnyenye kɨna nitumile mʉlɨmo ʉwʉ izane ang'wɨ ibɨne ang'wɨ namʉlwe nɨanza laantʉ, hangɨ ʉnene shanga kilamʉla. 4 Ʉnene shanga nsɨgile kɨna nɨmʉgila igazo lɨhi, ɨngɨ shanga kɨna nɨmʉgila imamala. Isekʉlʉ ng'wenso ʉkʉnamʉla. 5 Itɨ gwa, nakɨlɨ kʉpika matungo leki kʉmʉlamʉli mʉntʉ wɨhi, leki ipikɨɨle Isekʉlʉ nʉʉzɨɨzɨza. Nʉwanso ʉkʉpihʉla makani nɨmabɨ, nʉkigelya kɨhenga masɨgo amʉnkolo yaantʉ. Papo mʉntʉ wɨhi ʉkʉtula nʉlʉkumo lakwe kʉpuma kʉng'wi Itunda.

6 Anyandʉgʉ ane, makani aya nɨntambʉe nang'wa Apolo nɨmakani ane, ingɨ amʉaɨɨlye nʉkimanyisa, mʉlɨnge ndogoelyo antambʉ ɨyɨ, "Komanɨɨlyi aya naandɨkilwe." Anga mʉtende itɨ, mʉng'wanyu shanga ʉkigela mʉntʉ wɨhi nʉkiketela mʉntʉ ʉng'wɨ nʉkʉmʉdalaha ʉmʉya. 7 Nyenyu nʉkʉɨkile ʉewe ʉtule wɨmʉkʉlʉ? Kɨntʉ kɨ ʉewe nɨshanga ʉpewe ni Itunda? Anga ɨze ʉpewe, nɨkɨgwa nʉkiloelya anga kako?

8 Aligwa, Mʉkidaya mikʉtane? Mʉkidaya mɨagolɨne? Mʉkidaya mɨatemine kʉleka ʉsese? Bahu anga ɨze tai maile mɨatemi, ingɨ nʉsese ga kʉtule kɨatemi palʉng'wɨ nʉnyenye. 9 Nsɨgile Itunda ʉkʉtendile ʉsese nɨkɨitʉmi kʉtule kɨantʉ akʉdalahwa lʉkʉlʉ, anga antʉ nɨalamʉwe kʉbʉlagwa kʉnsoko kaina kɨantʉ akʉhekwa mʉnkumbigʉlʉ wɨhi ntongela amalaɨka nɨ antʉ. 10 Antʉ ɨdʉ akʉine ʉsese kɨapʉngʉ kʉnsoko akʉmitʉmɨla Kilisito, ingɨ ʉnyenye mɨanyamahala kʉkamɨnkana nʉ Kilisito! Ʉsese kɨagila ingulu, ʉnyenye mʉkete ingulu! Ʉnyenye mʉkʉkʉligwa, ʉsese kʉdalahilwe. 11 Sambʉ nʉyʉ, ʉsese kʉhumilwe nzala nɨnyota, kɨagila anga matugalo, kikumbile nkundi kɨagila anga ndalo, 12 hangɨ kʉiaja nʉkitʉma ɨmɨlɨmo kʉmɨkono itʉ. Anga kʉtʉkɨlwe, kɨka akembeta, anga kagigwe, kɨgimya, 13 anga kʉtungigwe kɨsʉkɨlya kʉ wininompyi. Itungo nɨlɨ antʉ akʉgeile anga mpaala mʉnkumbigʉlʉ, hangɨ kʉ mʉntʉ wɨhi ʉsese kɨmpaala!

14 Shanga kʉmʉandɨkɨla ɨmakani aya kʉnsoko akʉmʉhumya mɨnyala ʉnyenye, ingɨ kʉnsoko akʉmʉmanyisa ʉnyenye nɨmɨana ane nɨ nʉmʉloilwe. 15 Palʉng'wɨ nɨ kɨna mʉkete amanyisi maelupu nɨakʉmʉletela lʉkani lang'wa Kɨlisito, tata wanyu ingɨ ʉng'wɨ du. Ʉnene aɨnɨ tata wanyu mʉng'wa Kilisito kʉnsoko aɨnʉmʉletee Nkani Nza. 16 Kʉlʉlo kʉminena, tyati anga ʉnene nɨnɨtenda. 17 Yɨyo ndogoelyo nʉmʉlagɨɨye ʉTimoteo kʉng'wanyu, nʉwanso ingɨ ng'waane nɨnʉmʉloilwe hangɨ nʉgombekile mʉʉkamɨnkani ni Isekʉlʉ. Nʉwanso ʉkʉmʉkɨmbʉsha nzɨla nɨtyatile kʉ ʉkamɨnkani nʉ Kilisito, nzɨla nɨkɨmanyisa mʉ maumbɨ aantʉ nɨahʉɨɨli ang'wi Itunda.

18 Antʉ ang'wɨ mʉng'wanyu ainaɨlʉgoha ageile kɨna shanga nzile hangɨ kʉng'wanyu. 19 Ingɨ Isekʉlʉ anga walowe, kʉkaya kɨza kʉng'wanyu, papo kʉlowa kiloeela ʉnene shanga kʉlɨnga yaya nɨakʉtambʉla du ingɨ nʉ kʉlɨnga ngulu a ʉhʉɨɨli wao, nɨkɨ ga nɨahumile kitʉma. 20 Kʉndogoelyo ʉtemi wang'wi Itunda shanga wankani ntilɨ, ingɨ kishiɨ nʉ kʉtula ningulu yang'wi Itunda. 21 Itɨɨ, lamʉli nyenye? Nɨze kʉng'wanyu nʉmʉlangane, ang'wɨ nɨze nɨnkolo aʉlowa nʉ wininompyi?