1 Ndoilwe ʉnyenye mʉmʉlɨnge ʉmʉlʉna witʉ nʉwa kɨsʉngʉ ʉ Poibe nɨɨza mitʉmi nʉwa ahʉɨɨli ang'wa Yesʉ nɨa kʉ Kenkilea. 2 Kʉlompa, mʉsɨngɨɨlyi kʉnsoko ʉmʉhʉɨɨe Isekʉlʉ anga nɨɨsɨngɨɨligwa itʉmi ang'wi Itunda. Mʉaɨɨlyi kɨntʉ kɨhi nʉɨkamʉlompa, kʉnsoko nʉwanso ɨza mʉkende kʉ antʉ ɨdʉ nʉnene ga.

3 Alamʉshi a Pilisika nʉ Akila, itʉmi ɨane mʉ mʉlɨmo wang'wa Kilisito Yesʉ. 4 Antʉ nɨanso aponee ʉneneaʉ kʉsha kʉnsoko ane. Antʉ awa akʉsongeeligwa, shanga kʉng'wane du, ingɨ ga nʉ kʉ antʉ nɨ ahʉɨɨli ang'wa Yesʉ kʉpuma kʉ antʉ nɨshanga Ayahudi. 5 Alamʉshi ahʉɨɨli ang'wa Yesʉ nɨɨtankana kʉ matolao.

Namʉkɨlyi nʉ mʉhʉmbamɨane ʉ Epaineto nɨ mʉntʉ wang'wandyo kʉmʉhʉɨɨla ʉ Kilisito Yesʉ kihɨɨ a Asia. 6 Namʉkɨlyi nʉ Malia, nʉwitʉmile mʉlɨmo kʉngʉlu kʉnsoko anyu. 7 Alamʉshi nɨ a Andiloniko nʉ Yunia antʉ awa ingɨ Aisilseli ɨane aɨkʉtungilwe palʉng'wɨ nʉ nene mʉkadulumʉ, antʉ nɨanso akumʉkile nangalʉ kʉ itʉmi, hangɨ aɨantongee ʉnene kingɨla mʉ ʉ Kilisito.

8 Mʉlamʉshi nʉ mʉhʉmbamɨane Ampiliato, mʉntʉ nʉwanso ingɨ mʉhangʉ wang'wi Isekʉlʉ. 9 Mʉlamʉshi nʉ Ʉlibano mitʉmi palʉng'wɨ nʉ nene mʉng'wa Kilisito, mʉlamʉshi nʉ mʉhʉmbamɨane ʉ Sitakisi. 10 Mʉlamʉshi nʉ Apele, naɨʉgemilwe nʉ kigeela kɨna ʉhʉɨɨwe nʉ Kilisito. Alamʉshi nɨ antʉ amʉ nyumba ang'wa Alisitobulo. 11 Mʉlamʉshi ʉ Helodiana Mʉyahudi mɨane, nɨ antʉ amikoe lang'wa Nalikisi nɨɨmʉhangʉ mʉng'wi Isekʉlʉ.

12 Alamʉshi a Tilupena nʉ Tiluposa asʉngʉ nɨakitʉma mʉlɨmo wang'wi Isekʉlʉ, hangɨ mʉlamʉshi nʉ mʉhʉmbamɨane nʉwa kɨsʉngʉ ʉ Pelisisi nʉɨtʉmile makani ɨdʉ kʉnsoko ang'wi Isekʉlʉ. 13 Mʉlamʉshi nʉ Lupo, nɨmankata kʉ mʉlɨmo wang'wi Isekʉlʉ, nʉ nyinya, nɨɨza iya wane ga. 14 Alamʉshi a Asunkilito nʉ Pilegoni nʉ Helime nʉ Patiloba nʉ Helima nɨanyandʉgʉ ɨhi nɨɨpalʉng'wɨ nɨenso. 15 Alamʉshi nɨ a Pilologo nʉ Yulia nʉ Nelea nʉ mʉluna wakwe nʉwa kɨsʉngʉ nʉ Olimpa palʉng'wɨ nɨ antʉ ɨhi nɨeisigwe ni Itunda nɨine nɨenso.

16 Ilamʉshi nʉ nyenye ga kʉlagɨɨla kɨna miloilwe. Mʉlamʉkigwe nɨ antʉ ɨhi nɨamʉhʉɨɨe ʉ Kilisito.

17 Anyandʉgʉ ane, kʉminena mʉhʉgʉke nʉkʉahʉga antʉ nɨɨsasha wikomi mʉ ahʉɨɨli. Antʉ awa ihiya kʉkanza ʉhʉɨɨli nʉwa antʉ, nʉ kʉhita ʉmanyisi nɨmʉmanyisigwe. Ahʉgi antʉ nɨanso. 18 Kʉnsoko antʉ anga nɨanso shanga ɨmitʉmɨla ʉ Kilisito Isekʉlʉ witʉ, ingɨ iloeelya ɨenso. Kʉ nkani yao niimʉlyo nʉkʉtambʉla nkani niipepeelya yilimɨlya nkolo niya antʉ nɨshanga alɨngile makani nɨmabɨ. 19 Kʉnsoko, antʉ ɨhi ija ʉlwijo nʉla ʉhʉɨɨli wanyu mʉ Nkani Ninza, wɨhi kʉ makani nɨ maza nʉnene nɨloaa ikʉlʉ. Ingɨ ndoilwe mʉtule nɨ mahala akitʉma makani nɨmaza, mʉtule mɨagila magazo kʉ makani nɨmabɨ. 20 Itunda nʉɨleta matiliga nʉyo shanga ʉkʉtinia kʉmʉkʉangɨla ʉ Shetani pihɨ amɨgʉlʉ anyu nʉ kʉmʉhuma.

Ʉkende wang'wi Isekʉlʉ witʉ ʉ Kilisito ʉtule palʉng'wɨ nʉ nyenye.

21 Nɨ itɨga Timoteo mitʉmi mɨane ʉmʉlamʉkilye, nɨ Ayahudi ɨane a Lukio nʉ Yasoni nʉ Sosipateli nɨenso akʉmʉlamʉsha.

22 Nʉnene ga Telitio, nɨnandɨkile ibada ɨlɨ, nʉmʉlamʉkilye kʉ ʉhumi wang'wi Isekʉlʉ.

23 Gayo nɨmpikɨe mito lakwe, nɨahʉɨɨli ɨhi nɨɨtankanɨla kʉlompa pitolakwe, ʉmʉlamʉkilye. Elasito, mʉɨka mpia mʉ kɨsalɨ ɨkɨ, palʉng'wɨ nʉ heu witʉ Kwalito ɨhi amʉlamʉkilye. 24 Ʉkende wang'wi Isekʉlʉ witʉ Kilisito ʉtule palʉng'wɨ nʉnyenye mɨhi. Tai ituleʉ.

25 Itɨ gwa, itungo ɨlɨ kʉmʉkʉlye Itunda! Ng'wenso nʉhumile kʉmʉpa ingulu mʉ Mpola Ninza niang'wa Kilisito naɨntanantilye kʉng'wanyu. Makani nanso aɨkɨpihilwe kʉ myaka ɨdʉ nakɨile. 26 Ingɨ itungo ɨlɨ yaɨkwa kɨhenga kʉkɨɨla ʉandɨkwa nʉwa amanga nʉ kilagɨɨlyo lang'wi Itunda nʉwa kalɨ na kalɨ. Itungo ɨlɨ ingɨ wigeeleka kʉ antʉ ɨhi nɨshanga Ayahudi ahume kʉhʉɨɨla nʉkʉtula nʉ lwijo.

27 Itunda wing'wene nʉkete mahala ɨhi, nʉwakʉligwe kʉ ʉhumi wang'wa Kilisito nʉwa kalɨ na kalɨ. Tai ituleʉ.