1 Itɨgwa, Mʉyahudi ʉkete kɨntʉ kɨɨ nɨkɨkɨlɨnkɨe kʉ awa nɨshanga Ayahudi? Ang'wɨ kʉtalwa kiganda ikʉaɨɨlya ntʉni? 2 Ee ingɨ tai kʉtula Wɨmʉyahudi ɨkʉaɨɨlya! Itunda aʉapee hanza Ayahudi impola yakwe. 3 Yɨkatula ʉlɨ gwa anga itule Ayahudi nɨang'wɨ shanga ahʉɨɨli? Itɨɨ, ikani nɨlanso lɨkʉsasha Itunda waleke kʉhʉɨɨlwa? 4 Shangaʉ! Matungo ɨhi Itunda wɨsaga wakʉhʉɨɨlwa nɨ antʉ, palʉng'wɨ nʉkʉtula ɨana aantʉ ɨhi ateele. Anga nɨyandɨkile kɨna

"Lʉkani lɨhi nʉkʉligitya ingɨ yatai,

nʉ mʉʉlamʉlwi ʉewe wɨhuma."

5 Ingɨ, anga itule ʉʉbɨ witʉ ʉkʉlagɨɨla kɨna Itunda witʉma ɨtai ntilɨ, kʉlʉngeʉlɨ gwa? Itɨɨ! Kʉlʉnge Itunda ʉkete igazone anga wakʉpɨsɨɨlye? Apa kʉtambʉla kɨʉntʉ. 6 Shangaʉ! Anga aɨyitule Itunda shanga mʉnyatai, aɨʉzehuma ʉlɨ kʉʉlamʉla ʉnkʉmbigʉlʉ.

7 Anga ɨze ʉsese kɨateele kɨatenda antʉ ang'wɨ ahume kʉona kɨna Itunda mʉnyatai, antʉ nɨanso akulongoleka kʉmʉkʉlya, itungo ɨlɨ kʉnɨkɨ ikɨlɨ kʉlamʉlwa kɨna kitʉma mɨlandʉ? 8 Ingɨ itendile anga kʉlʉnga, "Kitʉme nɨmabɨɨ kʉhume kʉlija nɨmaza?" Antʉ ang'wi ɨkʉtunja kʉlʉnga kɨna ga nʉsese kʉmanyisilyeʉ. Nɨakʉtambʉla itɨ akʉlamʉlwa anga mʉʉbɨ wao.

9 Ʉsese kʉlʉnge ʉlɨgwa? Itɨɨ, ʉsese nɨkɨ Ayahudi kɨazane kʉkɨla ɨantʉ nɨshanga Ayahudi? A! a! Kʉnsoko nakondya kʉmʉɨla ʉng'wandyo kɨna Ayahudi nɨantʉ nɨshanga Ayahudi ɨhi ɨkaɨwe nɨmɨlandʉ. 10 Anga ʉandɨkwa wang'wi Itunda nʉʉandɨkilwe.

"Kʉtile mʉntʉ wɨhi nʉwitʉma aya nagombekile kʉng'wi Itunda,

11 kʉtilɨ anga mʉntʉ wɨhi nʉkete ɨmahala,

ang'wɨ nʉwimʉkʉlya Itunda.

12 Antʉ ɨhi amʉlekile Itunda,

kʉtilɨ mʉntʉ wɨhi nʉwitʉma makani natakɨwe ni Itunda,

kʉtilɨ nʉyʉ nʉng'wɨ ga

13 Ilakalao impyani niibɨɨla nɨshanga ituhɨɨwe,

mʉ lʉlɨmɨ izʉe ʉteele,

mʉ mɨlomo ɨtambʉla nkani nimbɨ anga ʉhʉngʉ nʉwa nzoka.

14 Mʉmɨlomoao ɨtambʉla nkani yawizumi nʉkʉaalya mʉnkolo niya antʉ.

15 Antʉ awa apepeele kʉabʉlaga antʉ ang'wɨ,

16 ga yɨhi nɨenda ɨkanza maintʉ nʉkʉalekela antʉ sʉka,

17 shanga amanyile kishiɨ nɨ antʉ aʉya matiliga.

18 Shanga amogapile Itunda."

19 Ʉsese kʉlɨngile kɨna makani ihɨ nɨtambʉlwa mʉ malagɨɨlyo atʉngile antʉ nɨatongilwe nɨmalagɨɨlyo, shanga ahumile kilongola kɨntʉ kɨhi, nʉ ʉnkʉmbigʉlʉ wɨhi ʉkolɨ mʉ ʉlamʉlwa wang'wi Itunda. 20 Kʉlʉlo kʉtilɨ ng'waa mʉntʉ nʉhumile kʉgombwa ni Itunda nʉambile malagɨɨlyo, malagɨɨlyo ingɨ kɨntʉ kakʉmʉkɨmbʉsha ʉdʉ mʉntʉ kɨna witʉma mʉlandʉ.

21 Ingɨ itungo ɨlɨ, nzɨla ang'wi Itunda kʉagomba ɨantʉ kʉtula aza aɨkilwe kɨhenga, hangɨ shanga kʉsania malagɨɨlyo. Malagɨɨlyo ang'wa Musa nʉ ʉandɨkwa nʉwa amanga ang'wi Itunda aɨɨtambʉla ikani ɨlɨ. 22 Nzɨla nanso nakʉagomba antʉ ingɨ kʉmʉhʉɨɨla ʉ Kilisito Yesʉ, Itunda wɨtenda itɨ kʉ antʉ ɨhi nɨatyatile tai, shanga wɨmʉkoma mʉntʉ wɨhi. 23 Antʉ ɨhi atendile mɨlandʉ aleka kʉkʉligwa ni Itunda. 24 Ingɨ gwa kʉ kɨpegwa ka ʉkende wang'wi Itunda, antʉ ɨhi ɨgombwa atule akende pang'wi Itunda kʉkɨɨla kʉkomolwa nʉ Kilisito Yesʉ. 25 Itunda aɨʉmʉpumilye ʉ Yesʉ ingɨ kʉsakami akwe, watule yiyo nzɨla akʉahegelya antʉ mɨlandʉao. Aʉtendile itɨ wahume kʉlagɨɨla kɨna nʉwanso mʉkende. Pakalɨ Itunda aɨmʉgimya shanga aʉkee mɨlandʉ a antʉ, 26 itungo ɨlɨ, matungo aya shanga ʉkʉleka mɨlandʉ a antʉ, ʉtendile itɨ nʉwanso wahume kʉlagɨɨla kɨna mʉkende. Kʉkɨɨla itɨ Itunda ng'wenso ʉkʉlagɨɨla ʉkende wakwe, hangɨ kɨna wɨmʉtenda mʉntʉ wɨhi wagombwe nʉng'wenso kʉkɨɨla Kilisito Yesʉ. 27 Kʉnsoko, kʉhumile kiketela kɨntʉ kɨɨ? Kɨagila nɨka kiketela! Kʉnɨkɨ? Itɨɨ, itule kʉnsoko antendone? A! a! Ingɨ kʉiketa kʉnsoko kʉmʉhʉɨɨe ʉ Yesʉ ʉdu. 28 Kʉlʉlo kaona kɨna Itunda wɨmʉgomba mʉntʉ kɨna mʉza kʉng'wakwe kʉkɨɨla kʉmʉhʉɨɨla Yesʉ, shanga kʉnsoko akʉtyata malagɨɨlyo nalagɨɨye. 29 Itɨɨ, Itunda iza wa Ayahudi ʉdune? Ang'wɨ shanga Itunda kʉ antʉ ɨhi? Ee, yʉyo Itunda nʉwa antʉ ɨhi. 30 Itunda ingɨ ʉng'wɨ, nʉyo ʉkʉaaɨlya Ayahudi ʉkʉagomba kɨna aza pang'waakwe kʉ ʉhʉɨɨli wao, nɨ antʉ ɨhi ga ʉkʉaaɨlya ʉkʉagomba kɨna aza pang'waakwe kʉ ʉhʉɨɨli wʉwo wʉʉwo. 31 Itɨgwa, nɨkʉʉlʉnga kʉmʉhʉɨɨle ʉ Yesʉ, itɨɨ nɨkʉʉtambʉla itɨ malagɨɨlyo ang'wa Musa akʉʉlyane ɨnsaɨlo? A! a! Anga kʉmʉhʉɨɨle ʉ Yesʉ kʉʉtenda makani aya malagɨɨlyo ang'wa Musa nalagɨɨye.