1 Kʉlʉlo gwa anyandʉgʉ ane, kʉnsoko Itunda wakɨaisa kɨkʉlʉ, kʉminena kʉ ʉkende wakwe, pumi ʉnyenye akola kʉmitumɨla Itunda, mʉtule anga ipolyo nipanga, ipolyo nɨlakʉmʉloeelya Itunda. Ɨyɨ yɨyɨ nzɨla anyu natai nakʉmʉkʉlya Itunda. 2 Mʉleke kʉsɨga anga antʉ a mʉʉnkʉmbigʉkʉlʉ ʉwʉ, ingɨ Itunda wamʉpiʉɨlye masɨgo anyu atule mapya. Pang'wanso papo mʉkʉhuma kʉlɨnga aya nʉmaloilwe Itunda nʉ kʉlɨnga ʉlʉkani nʉlʉza.

3 Kʉ ʉkende nɨmpewe ni Itunda, kʉmʉɨla ʉnyenye mɨhi, leki kʉsɨgi kɨna ʉnyenye mɨaza kʉkɨla nɨmʉtakɨwe kʉtula. Masɨgo anyu mʉ ʉhʉɨɨli akepe anga mʉntʉ wɨhi nʉpewe ni Itunda. Migeme ʉnyenye nɨmɨlɨ kʉ ʉhʉɨɨli Itunda nʉmʉpee. 4 Kʉnsoko anga ʉmʉɨlɨ nʉʉkete mapiliga ɨdu, shanga mapiliga ɨhi itʉma mʉlɨmo ʉng'wɨ. 5 Nʉ sese ga palʉng'wɨ nʉkʉtula kɨdʉ, kʉkɨɨla Kilisito kaile kɨmʉɨlɨ ʉng'wɨ, wɨhi mʉng'witʉ ingɨ ipiliga kʉ mʉya. 6 Ingɨ kʉkete ipegwa yɨdʉ nɨkʉpewe. Mʉntʉ nʉkete ngulu akɨpegwa ka ʉmanga nʉwatende anga ʉhʉɨɨli wakwe nʉwɨlɨ. 7 Mʉntʉ nʉkete kɨpegwa ka kitʉma mʉlɨmo wang'wi Itunda nʉwitʉme. Mʉntʉ nʉkete kɨpegwa ka kʉmanyisa nʉwamanyise, 8 mʉntʉ nʉpewe ʉhumi wakʉsɨja aʉya, nʉwasije ɨaʉya, mʉntʉ nʉmʉkende kʉapa antʉ maintʉ nʉwa ape, mʉtongeeli nʉwakagupe kʉatonga aʉya, nʉyʉ nʉwa kɨaisa nʉwaaisɨɨlye aʉya kʉ ʉlowa.

9 Mʉleke kilowa kʉteele. Mʉbɨpɨlwe makani ɨhi nibɨ, komanɨɨlyi ikani niza. 10 Milowe mɨhi kɨnyandʉgʉ, mʉntʉ wɨhi wamʉsɨgɨɨle ʉmʉya nʉkʉmʉkʉlya. 11 Leki kʉkatapi kitʉma mʉlɨmo wang'wi Itunda. Ingɨ mitʉme kʉ nkolo ɨng'wɨ. 12 Kʉsʉmbɨɨlya kʉng'wanyu itule kʉʉlowa, mʉtule nʉʉlowa mʉlwago lanyu, mʉlongoleke kʉmʉlompa Itunda mahikʉ ɨhi. 13 Aaɨɨlyi ɨantʉ nɨamʉhʉɨɨe itunda anga nyenye, asɨngɨɨlyi ageni kʉ ʉlowa.

14 Mʉlompi Itunda waakembete antʉ nɨakʉmaja ʉnyenye, mʉlompi Itunda waakembete hangɨ waleke kʉazumi. 15 Iloi palʉng'wɨ nawa nɨiloile, lɨli palʉng'wɨ nawa nɨakʉlɨla. 16 Mʉlikalo lanyu milɨnge mɨhi. Leki kilolyi, ihanji nɨantʉ ɨhi. Hangɨ leki kilolyi kɨna mʉmanyile intʉ yɨhi.

17 Mʉntʉ anga wamʉtendeele ʉbɨ, mʉleke kʉmalya. Ingɨ mʉkagupe kitʉma makani antʉ nɨɨ kɨna maza. 18 Itʉmi lɨhi nɨmʉhumile kitʉma, mʉtule nɨmatiliga nɨantʉ ɨhi. 19 Anyandʉgʉ ane, leki kʉmalyi, ingɨ mʉlekeli Itunda ikani nɨlanso, kʉnsoko yaandɨkilwe Mʉwandɨkwa wang'wi Itunda, Isekʉlʉ ʉlʉngile itɨ, "Ʉmalyi ingɨ mʉlɨmo wane, nene kʉmalya." 20 Kimɨkɨɨli kakwe, yandɨkilwe kɨna "Mʉlʉgʉ wako anga ize mʉnyanzala, mʉpe indya walye, nʉyʉ nʉhumilwe nyota mʉpe mazɨ, wang'we, anga ʉtende itɨ ʉkʉhung'wa mɨnyala." 21 Leka kʉlemigwa nʉʉbɨ, ʉlemya ʉʉbɨ kʉ ʉkende.