1 Ʉsese nɨkakomile mʉʉhʉɨɨli kʉtakɨwe kʉaaɨɨlya antʉ nɨaʉhʉɨɨli ʉniino ahume ʉlwagolao. Kʉleke kikela ʉsese du ingɨ kʉakele nɨantʉ angɨza. 2 Mʉntʉ wɨhi ʉtakiwe wamʉaɨɨlye mʉnyandʉgʉ wakwe kʉ ʉkende kitʉma makani nɨ maza ingɨ nʉyo wahume kizenga mʉʉhʉɨɨli. 3 Kʉnsoko ʉ Kilisito nʉyo shanga aɨwitʉmile makani akʉamʉaɨɨlya ʉng'wenso, ingɨ aɨwitʉmile makani anga nɨyandɨkile, "Ʉkunkwi nɨakʉkunkile ʉewe nʉnene ga aɨnkunkilwe." 4 Kʉnsoko makani ɨhi naɨandɨkilwe pa kalɨ Mʉwandɨkwa wang'wi Itunda, aɨandɨkilwe kʉʉmanyisa ʉsese. Wandɨkwa nʉwanso akʉʉaɨɨlya kʉgimya mʉ lwago litʉ nʉ kʉʉkomelyaa nkolo, ingɨ kʉlindɨɨle ɨzekʉgimilye. 5 Itunda nʉwɨpoelya nkolo nʉkʉʉtenda kʉgimye. Itungo ɨlɨ kʉlompa kɨna, wamʉkembete mʉtule mɨpalʉng'wɨ, kʉnsoko mʉkitʉma makani ʉ Kilisito Yesʉ naɨwitʉmile. 6 Sʉnga ʉnyenye mɨhi anga mihangʉɨle palʉng'wɨ, kʉ nkolo ɨng'wɨ nʉ kʉ lʉli lʉng'wɨ mʉkʉmʉkulya Itunda, nɨtata wang'wi Isekʉlʉ witʉ Kilisito.

7 Itɨ gwa, misɨngɨɨlye ʉnyenye, kʉnsoko ikʉlyo lang'wi Itunda anga Kilisito nʉyo naɨʉmʉsɨngɨɨye ʉnyenye. 8 Kʉnsoko kʉmʉɨla kɨna ʉ Kilisito aɨmitʉmɨkɨe Ayahudi wahume kʉlagɨɨla ɨtai kɨna Itunda, nilapo Itunda naɨʉatambʉɨe agʉkʉ itʉ lɨkondanɨɨle, 9 nɨ itɨ ga antʉ nɨshanga Ayahudi ahume kʉmʉkʉlya Itunda kʉnsoko aʉʉkende wakwe. Anga niyandɨkile Mʉwandɨkwa wang'wi Itunda,

"Kʉlʉlo kʉʉkʉlya palʉng'wɨ nɨ antʉ nɨshanga Ayahudi,

Kɨmba mɨmbo aʉkʉlʉ nʉwa ʉhumi wako."

10 Hangɨ yandɨkilwe itɨ,

"Iloi, ʉnyenye nɨshanga mɨ Ayahudi, iloi palʉng'wɨ nɨ Antʉ ang'wi Itunda."

11 Nɨ hangɨ,

"Ʉnyenye antʉ mɨhi nɨshanga Mɨayahudi, mʉkʉlyi Itunda,

ʉnyenye antʉ mɨhi, mʉkʉlyi Itunda!"

12 Hangɨ Isaya mʉmanga wang'wi Itunda aɨʉlɨɨye itɨ,

"Mʉntʉ ʉng'wɨ kʉpuma miɨele lang'wa Yese ʉzɨɨza,

nʉyo ʉzɨɨza atema antʉ amahɨɨ ɨhi.

nɨantʉ nɨshanga Ayahudi

azemʉsania kɨna ʉkʉaguna."

13 Papo Itunda nʉwakʉhʉɨɨlwa, nʉwamʉpe ʉlowa nɨmatiliga kʉpuma mʉ ʉhʉɨɨli wanyu, ʉlindɨɨli wanyu nɨzemʉgimilye ʉhume kongeeleka kʉ ngulu niya Ng'wahu Ng'welʉ.

14 Anyandʉgʉ ane, ʉnene nihʉɨɨe kɨna nʉ nyenye ga mɨakende, mɨamanyi, hangɨ mʉhumile kimanyisa ʉnyenye. 15 Ingɨ nkamatɨkile kʉmʉandɨkɨla makani ɨdʉ mibada ɨlɨ, nihume kʉmʉkɨmbʉsha makani kɨtʉʉnga. Ntendile itɨ kʉnsoko aʉkende wang'wi Itunda nʉmpee 16 kʉʉkende wang'wi Itunda ʉnene kʉtula nɨ mitʉmi wang'wa Kilisito Yesʉ kʉ antʉ nɨshanga Ayahudi. Ingɨ mʉlɨmo wane anga mʉpolyi kʉtanantya Nkani Nza yang'wi Itunda ingɨ antʉ nɨshanga Ayahudi ahume kʉtula ipolyo nɨlɨgombilwe ni Itunda, ipolyo nɨleigwe nʉ Ng'wahʉ Ng'welʉ. 17 Kʉlʉlo gwa, anga itule nɨhʉhangʉ nʉ Kilisito Yesʉ, nkete ʉhumi nʉwakiloelya ʉmʉlɨmo wane kʉnsoko ang'wi Itunda. 18 Shanga kʉgema kʉtambʉla kɨntʉ kɨʉya kɨhi kwaala ntambʉle ɨkɨ nʉ Kilisito Yesʉ nʉtendile kʉntʉmɨla ʉnene ingɨ antʉ nɨshanga Ayahudi ahume kʉtula nʉ lwijo kʉng'wi Itunda. Witʉmile itɨ kʉ nkani nɨntambʉe nʉ kʉ ntendo, 19 kʉ ngulu niya mampilʉ nɨ mɨʉkʉɨlwa, nʉ kʉngulu niya Ng'wahʉ Ng'welʉ. Itɨ gwa, kʉ mʉhɨnzo wane nkɨka yɨhi, kandɨɨlya kʉ Yelusalemʉ kʉpikɨɨla kʉ Ililiko, niitanantilye Mpola Ninza niyang'wa Kilisito Yesʉ anga niitakɨwe. 20 Isɨgo lane mahikʉ ɨhi laile nkɨka yɨhi nɨantʉ akɨlɨ kʉtanantɨligwa Mpola Ninza niyang'wa Kilisito, kʉtenda itɨ ingɨ ndeke kʉzenga pa mʉntʉ mʉngɨza nazawandya kʉzenga. 21 Ingɨ anga niyiandɨkile Mʉwandɨkwa wang'wi Itunda,

"Antʉ ɨhi nɨakɨlɨ kʉtanantɨligwa mpola yakwe akʉona,

nawaitɨ nɨakɨlɨ kija, akʉlɨnga."

22 Ɨyɨ yɨyɨ nsoko nkʉa yɨdʉ aɨngiigwe kɨza kʉng'wanyu. 23 Ingɨ kʉnsoko itungo ɨlɨ nakondya kitʉma ʉmʉlɨmo wane mpande yɨhi izi, nɨ itɨ ga myaka ɨdʉ aɨnkete nsʉla akɨza kʉng'wanyu, 24 nsɨgile nʉmʉone nɨnkolɨ mʉ mʉhɨnzo kenda kʉ Sipania, kikiɨ niloeelye kitungo ɨze kɨpalʉng'wɨ nʉ nyenye, hangɨ mʉnzaɨɨlye kʉntindɨkɨɨlya mpike kʉng'wanso. 25 Ingɨ itungo ɨlɨ nkɨlɨ nongoe kitʉma mʉlɨmo wang'wi Itunda kʉnsoko antʉ ang'wi Itunda nɨakoli kʉ Yelusalemʉ. 26 Kʉnsoko antʉ nɨamʉhʉɨɨli ʉ Yesʉ ʉko kʉ Makedonia nʉ kʉ Akaya alamʉe kʉhangʉlya nsao yao kʉaɨɨlya antʉ ang'wi Itunda nɨahimbɨ nɨakolɨ kʉ Yelusalemʉ. 27 Yialoeeye kʉtenda itɨ, ingɨ kʉ tai, nʉwanso mʉlɨmo wao kʉ antʉ nɨanso nɨakʉ Yelusalemu. Kʉnsoko antʉ nɨshanga Ayahudi asɨngɨɨlya ʉkembetwa nʉwa kɨnkolo nʉwa Ayahudi, nao ga atakɨwe kʉaaɨɨlya Ayahudi makani aʉhiɨlwa nʉwa kɨmʉɨlɨ. 28 Anga nkondye kitʉma ʉmʉlɨmo ʉwʉ nʉwa kʉataɨla ʉmʉhangʉ ʉwʉ nʉ ʉpumigwe kʉnsokoao, kʉmʉgendeela nʉnyenye nɨnongoe kʉ Sipania. 29 Nɨngile kɨna anga nɨze kʉng'wanyu Kilisito ʉkembetwa nangalʉ.

30 Itɨ gwa, anyandʉgʉ ane, kʉ ʉhumi wang'wi Isekʉlʉ witʉ ʉ Kilisito nʉkʉ ʉlowa nʉwiletwa nʉ Ng'wahʉ, kʉminena mihanje nʉnene kʉmʉlompa Itunda. 31 Lompi nihume kʉhega iza mʉ antʉ awo nɨa kʉ Ʉyahudi nɨshanga ahʉɨɨe, nʉ mʉlɨmo wane ʉhume kʉgombwa nɨ antʉ ang'wi Itunda nɨamoli kʉ Yelusalemʉ. 32 Ingɨ Itunda anga walowe nihume kɨza nʉ ʉlowa, niloeelye palʉng'wɨ nʉ nyenye. 33 Itunda nʉwɨleta matiliga nʉwatule palʉng'wɨ nʉ nyenye mɨhi! Tai ituleʉ.