1 Kʉlʉnge ʉlɨ gwa? Itɨɨ, kʉlongoleke kitʉma mɨlandʉ ingɨ ʉkende wang'wi Itunda ʉhume kongeeleke? 2 A, a! Ʉsese kakule mʉ mɨlandʉ kʉʉlongoleka ʉlɨ hangɨ kikiɨ mʉ mɨlandʉ? 3 Ang'wɨ, mʉlɨngile kɨna ʉsese naɨ kʉbadisigwe kaile kɨpalʉng'wɨ nʉ Kilisito Yesʉ, aɨkʉbadisigwe mʉnsha akwe. 4 Naɨkʉbadisigwe aɨkʉkamantanile nʉyo mʉnsha akwe, kɨkaɨkwa palʉng'wɨ nʉyo, ingɨ anga ʉ Kilisito naɨwiʉkigwe kʉngulu yɨdʉ niyang'wa Tata, nʉsese ga kʉlongoleke kishiɨ mʉlikalo nʉlʉpya.

5 Kʉnsoko, anga ʉsese kakamɨnkana nʉyo mʉnsha anga ʉng'wenso, nɨitɨ ga kakamɨnkana nʉyo mʉwiʉki anga ʉng'wenso naɨwiʉkile. 6 Kʉlɨngile kɨna ʉntʉ witʉ nʉwa kalɨ aɨʉkule nʉkʉkong'wa mʉmʉsalaba palʉng'wɨ nʉ Kilisito, ingɨ ngulu akitʉma mɨlandʉ ɨleke kʉaja hangɨ, ʉsese kʉhege mʉ ʉtʉng'wa nʉwa mɨlandʉ. 7 Kʉnsoko mʉntʉ wɨhi nʉkule itɨ, watungʉɨlwa nʉ kʉtula kʉlɨ nɨ mɨlandʉ. 8 Itɨ gwa, angaitule aɨkʉkule palʉng'wɨ nʉ Kilisito, kʉhʉɨɨe kɨna kɨkishiɨ palʉng'wɨ nʉyo. 9 Anga kʉlɨnge kɨna Kilisito wiʉkigwe shanga ʉkʉsha hangɨ, ɨnsha shanga ɨkʉmʉlemya hangɨ. 10 Kilisito naɨʉkule, aɨʉkule kang'wɨ du, wɨkamɨlemya ɨngulu amʉlandʉ, itungo ɨlɨ wishiɨ mʉpanga nʉ likalo lakwe lɨmʉloeeye Itunda. 11 Itɨ gwa nʉnyenye ga mʉtakɨwe mione kɨna makule mʉ makani a mɨlandʉ, ingɨ mione mɨshiɨ palʉng'wɨ ni Itunda kʉmʉhʉɨɨla ʉ Kilisito Yesʉ.

12 Kʉlʉlo mʉleke kʉgomba mɨlandʉ mʉmɨɨlɨ anyu nɨkuza, hangɨ mʉleke kʉkela kɨlakulaku ka mʉɨlɨ. 13 Ang'wɨ mʉleke kʉpumya mɨɨlɨ anyu kʉtula kɨntʉ kakitʉmɨla ʉbɨ nɨ mɨlandʉ, nsuta nɨ itɨ, ipumyi ʉnyenye kʉng'wi Itunda anga antʉ naɨakʉle nʉkiʉkigwa, ipumyi ʉnyenye kʉng'wi Itunda kʉnsoko kitʉma namʉloile Itunda. 14 Intɨ gwa, ingɨ mʉlandʉ shanga ʉkʉmʉlemya hangɨ, kʉnsoko malagɨɨlyo magila anga ngulu kʉng'waanyu, ingɨ mʉkolɨ mʉ ʉkende wang'wi Itunda.

15 Itɨ gwa, kʉlʉnge ʉli? Itɨɨ, kitʉme mɨlandʉ, kʉnsoko kɨkʉtilɨ mʉ ngulu niya malagɨɨlyo, ingɨ kʉkolɨ mʉ ʉtemi nʉwa ʉkende wang'wi Itunda ne? A, a! 16 Mʉlɨngile kɨna anga mipumye ʉnyenye kʉtula mɨatʉʉng'wa nʉ kʉmija mʉntʉ, maina mɨatʉʉng'wa atai kʉ mʉntʉ nʉanso. Hangɨ anga mipumye ʉnyenye kʉtula mɨatʉʉng'wa amɨlandʉ mpelo anyu mʉkʉsha, ingɨ anga mipumya ʉnyenye kʉmija Itunda mpelo anyu mʉkʉgombeka kʉng'wi Itunda. 17 Itungo ɨlɨ nʉmʉlʉmbile Itunda palʉng'wɨ nɨ kɨna ɨkalɨ aɨmɨatʉʉng'wa a mɨlandʉ, mʉkete lwijo kʉng'wi Itunda mʉnkolo yanyu kʉ ʉmanyisi naɨ mʉmanyisigwe. 18 Aɨmkomowe mʉ ʉtʉʉng'wa nʉwa mɨlandʉ, maile mɨatʉng'wa akitʉma aya nʉmaloilwe Itunda. 19 Ndigitilye nʉnyenye kʉmpyani a mʉtʉʉng'wa ingɨ mʉhume kʉninga nɨkʉtambʉla. Pakalɨ aɨ miatʉʉng'wa amɨlandʉ naɨmɨpumilye ʉnyenye kʉtula kɨntʉ kakitʉmɨla makani nɨmabɨ, nɨmɨlandʉ anyʉ aɨɨdʉ ikɨlo. Ʉʉgwa nitungo ɨlɨ mʉtakɨwe mɨpumye kʉng'wi Itunda mʉtule mɨatʉʉng'wa kʉnkani yang'wi Itunda, mʉhʉme kitʉma makani nagombekile kʉng'wi Itunda.

20 Naɨmʉkɨlɨ mɨatʉʉng'wa amɨlandʉ shanga aɨmɨsɨga kitʉma naamʉloeeye Itunda. 21 Itungo ɨlɨ, mapantɨkile ntʉni kʉ makani aya nɨmʉkʉmaone minyala itungo ɨlɨ? Mpelo a makani aya ingɨ ɨnsha. 22 Ingɨ itungo ɨlɨ malekewe mʉʉtʉng'wa nʉwa mʉmɨlandʉ maina mɨitʉmi ang'wi Itunda, itungo ɨlɨ maile mɨitʉmi ang'wi Itunda, kɨpegwa kanyu ingɨ maile mɨantʉ ang'wi Itunda. 23 Kʉnsoko, anga witʉme mɨlandʉ ʉlɨnge kɨna ʉkʉsha, anga witʉme namʉloeye Isekʉlʉ Kilisito. Kipegwa kang'wi Itunda ingɨ ʉpanga nʉwa kalɨ na kalɨ.