1 Itɨ gwa, mʉhʉmbamɨane, anga ɨze ʉewe wɨapɨsɨɨlya ɨako, shanga ʉhumile kilongoola, anga itule ʉewe wɨ nyenyu. Kʉnsoko aya nʉwɨapɨsɨɨlya nɨang'wɨ yayo yayoo nʉewe witʉma 2 Kʉlɨngile kɨna ʉlamʉlwi wang'wi Itunda watai kʉ antʉ nɨituma makani anga nanso. 3 Itɨgwa ʉewe mʉhʉmbamɨane nʉwɨapɨsɨɨlya awa nɨitʉma makani anga nanso, kʉnʉ nʉewe ʉzituma yayo yaayo, itɨɨ ʉsɨgile kɨna Itunda shanga ʉkʉʉpɨsɨɨlya ne? 4 Ang'wɨ ʉdalahile ʉkende wang'wi Itunda nisʉmbɨɨlyo lakwe nʉigigimɨɨlyi wakwe, shanga ʉlɨngile kɨna ʉkende wakwe ʉloilwe ʉewe ʉhume kila itʉnʉ ʉleke ɨmɨlandu ako nʉkʉmʉpɨlʉkɨla Itunda? 5 Kʉnsoko lʉgoha mʉhitile kʉleka ɨmɨlandʉ, kʉlʉlo mʉkiɨkɨlya ʉpɨsɨɨligwa kʉlʉhikʉ nʉlanso angalɨpike itungo Itunda nʉkʉpɨsɨɨlya kʉ taiane. 6 Lʉhikʉ nʉlanso ng'waamʉntʉ wɨhi ʉzepegwa ni Itunda kʉtyata mʉntendo yakwe mʉyɨlɨ. 7 Antʉ nɨakomanɨɨye kʉtenda nɨmaziza, nɨakʉduma ʉkʉlʉ nʉkʉlʉ nʉ likalo nɨshanga lɨkaɨlɨka Itunda ʉkʉapa ʉpanga nʉwa kalɨ na kalɨ. 8 Ingɨ kʉ antʉ nɨangɨza nɨiloilwe ɨenso du, nɨatyatɨla makani nɨmabɨɨ amahitile ɨmakani atai, akʉmʉsasha Itunda watake nʉyo ʉkʉapɨsɨɨlya mʉitakɨwe. 9 Lʉkigela lwago nʉ ʉwai kʉ antʉ ɨhi nɨɨtenda nɨmabɨɨ. Ʉkandɨɨlya kʉ Ayahudi atyatwe ga nɨantʉ nɨshanga Ayahudi. 10 Ingɨ gwa Itunda ʉkʉsasha antʉ awa nɨɨtenda nɨmaza akʉligwe atule nɨ matiliga, ʉkandɨɨlya kʉ Ayahudi atyatwe nɨ antʉ nɨshanga Ayahudi. 11 Kʉnsoko Itunda wɨkʉɨɨla mʉntʉ wɨhi nʉkʉlamʉla.

12 Antʉ ɨhi nɨshanga Ayahudi nɨɨtenda mɨlandʉ palʉng'wɨ nʉkʉtula shanga azealɨngile kɨna akʉbunanga malagɨɨlyo ang'wi Itunda naɨʉmʉpee ʉ Musa akʉlimansɨɨligwa anga ɨmalagɨɨlyo nalagɨɨye. Nɨ Ayahudi nɨɨtenda mɨlandʉ azealɨngile kɨna akʉbunanga malagɨɨlyo ang'wi Itunda naɨʉmʉpee ʉ Musa akʉlamʉlwa anga ɨmalagɨɨlyo nalagɨɨye. 13 Kʉnsoko shanga antʉ nɨija malagɨɨlyo ɨgombwa ni Itunda, ingɨ antʉ nɨakete ʉlwijo nʉkʉtenda malagɨɨlyo ɨgombwa kɨna akete taiane. 14 Kʉnsoko antʉ nɨshanga Ayahudi nɨagila malagɨɨlyo, kʉtongwa nɨ masɨgoao pɨhi itʉma ntendo niya malagɨɨlyo nalagɨɨye, enso akʉtula ngele a malagɨɨlyo palʉng'wi nʉkʉtula shanga alɨngile malagɨɨlyo. 15 Likalo lao ligeelekile kɨna nsʉla amalagɨɨlyo aandɨkilwe mʉnkolo yao. Masɨgoao akʉtanantya makani yayo, ng'waao nkʉa ying'wɨ ɨsemelwa nɨ masɨgoao, nkʉa ying'wɨ iakʉɨɨla. 16 Kʉlʉlo, kʉtyata Nkani Nza izi nɨkʉtanantya, ʉʉgwa izetula lʉhikʉ ni Itunda nʉkʉlamʉla makani akɨnkunku na anaantʉ kʉkɨɨla Kilisito Yesʉ.

17 Nʉewe, itɨ? Ʉewe mʉkola widaya kɨna wɨ Mʉyahudi, ʉsanilye malagɨɨlyo nʉkʉhʉɨɨla kɨna wɨmʉntʉ wang'wi Itunda, 18 kʉkɨɨla kʉmanyisigwa nɨmalagɨɨlyo ang'wi Itunda, ʉhumile kitʉma makani natakɨwe kitʉng'wa, 19 ʉewe nʉkiona kɨna wɨmʉtongeeli waapoku hangɨ wɨlʉmʉlɨ kʉ antʉ nɨakolɨ mʉkiti, 20 ʉkiona kɨna wɨmʉmanyisi nʉwa apʉngʉ nɨ antʉ nɨshanga amanyile itai aʉhʉɨɨli. Kʉnsoko ʉkete ʉlɨngi nʉwamahala amalagɨɨlyo nanso. 21 Itɨ gwa ʉewe, wɨmanyisa ɨako, nɨkɨ shanga wimanyisa ʉewe? Ʉewe nʉwɨtanantya kɨna, "Leki kia," kʉnʉ ʉewe ʉkia? 22 Ʉkʉlʉnga, "Leki kʉgoolya," kʉnʉ ʉewe wɨgoolya? Ʉbɨpɨwe adʉdʉ aalʉngʉ kʉnʉ ʉewe wia maintʉ mʉnyʉmba niya kipoelya adʉdʉ aalʉngʉ? 23 Ʉewe wikumazʉsha kɨna ʉambile malagɨɨlyo ang'wi Itunda, itɨ shanga ʉinene kɨna wɨbunanga malagɨɨlyo nʉkʉtula wamʉdalaha Itunda? 24 Anga niyandɨkilwe Mʉʉandɨkwa wang'wi Itunda kɨna, "Kʉnsoko anyu Itunda wɨtʉkɨlwa nɨantʉ amahɨɨ mangɨza." 25 Kʉtalwa kiganda kʉng'wako yɨkʉtula yikete ndogoelyo anga ʉtyate malagɨɨlyo ang'wi Itunda. Ingɨ anga ʉbunange malagɨɨlyo ang'wi Itunda bahu aɨʉleke kʉtalwa kiganda. 26 Anga itule mʉntʉ nɨshanga ʉtawe kiganda ʉkitʉma mʉitakɨwe malagɨɨlyo, itɨ gwa kʉleka kʉtalwa kiganda kʉng'wakwe shanga ʉkʉaɨligwane kɨna ʉtawe kiganda? 27 Antʉ amahɨɨ mangɨza akʉʉlamʉla ʉewe nʉwɨ Mʉyahudi nʉbunangile ilagɨɨlyo, palʉng'wɨ nʉkʉtula ʉkete ʉandɨkwa nʉa malagɨɨlyo hangɨ ʉtawe kiganda, nɨanso atyatile malagɨɨlyo kʉnʉ shanga atawe kiganda. 28 Kʉlʉlo kʉlʉnge, mʉntʉ wɨhi nʉtugilwe nʉ Mʉyahudi ingɨ Mʉyahudi, ang'wɨ kʉtalwa kiganda nɨkatai shanga kɨntʉ ka kʉmʉtenda mʉntʉ watule Muyahudi. 29 Mʉyahudi nʉwatai ingɨ yuyo nɨ Mʉyahudi mʉnkolo, ingɨ nʉtawe kiganda mʉnkolo. Ɨlɨ ingɨ ikani la Ng'wahʉ Ng'welʉ, shanga ikani laʉandɨkwa nʉwa malagɨɨlyo. Mʉntʉ nʉwɨitɨ mʉgila anga ʉkʉlʉ kʉ antʉ ingɨ kʉng'wi Itunda.