1 Anyandʉgʉ ane, itungo ɨlɨ nɨmʉgila nkankani mʉkʉlɨnga nɨkʉtambʉla, kʉnsoko kʉtambʉla nɨantʉ nɨalɨngile ɨmalgɨɨlyo. Malagɨɨlyo akete ngulu kʉ mʉntʉ nɨ mʉpanga. 2 Kʉmpyani mʉsʉngʉ nʉtɨnilwe ingɨ wɨza ʉkolɨ mʉkɨtungo ka ʉtɨnwi ka mʉgoha matungo ɨhi nʉ mʉgoha wakɨlɨ mʉpanga, ingɨ anga mʉgoha washe, mʉsʉngʉ nʉwanso wɨtungʉɨlwa nilagɨɨlyo nɨla witɨni. 3 Kʉlʉlo gwa mʉsʉngʉ nʉwanso anga watɨnwe nʉ mitʉnja mʉngɨza kʉnʉ mʉgohakwe ɨze mʉpanga, antʉ ɨmitanga mʉgoolyi. Ingɨ anga mʉgoha washe, mʉsʉngʉ nʉwanso wɨtula wagombigwa nilagɨɨlyo nɨla ʉtɨnwi, anga watɨnwe nʉ mitʉnja mʉngɨza antʉ shanga akʉmitanga mʉgoolyi. 4 Nʉnyenye ga anyandʉgʉ ane, malekewe kʉpuma mʉ malagɨɨlyo ang'wa Musa kʉkɨɨla mʉ mʉɨli wanyu nʉwa kalɨ naɨmʉkʉle palʉng'wɨ nʉ Kilisito. Itungo ɨlɨ maile mɨantʉ ang'wa Yesʉ kʉkɨɨla mʉwiʉki wakwe, ingɨ kʉhume kitʉma makani nɨmaza namʉloeye Itunda. 5 Kʉnsoko, naɨkishiɨ anga antʉ nɨishiɨ, nsʉla akitʉma mɨlandʉ kɨsakigwa nɨ malagɨɨlyo aɨkitʉma mɨlandʉ mʉ mɨɨlɨ itʉ, ʉsese kɨhi aɨkʉzeehiɨla mʉnsha. 6 Pakalɨ aɨkʉtungilwe mʉ ngulu a mɨlandʉ, ingɨ itungo ɨlɨ kakʉle palʉng'wɨ nʉ Kilisito, itɨ gwa kalekewe mʉgulu niya malagɨɨlyo. Itungo ɨlɨ shanga kʉmitʉmɨla Itunda kʉkɨɨla malagɨɨlyo akalɨ naandɨkilwe. ingɨ kʉʉmitʉmɨla Itunda anga ʉ Ng'wahʉ Ng'welʉ wang'wi Itunda nʉloilwe.

7 Itɨɨ, itungo ɨlɨ kʉlʉnge ʉlɨ, kʉlʉnge ɨmalagɨɨlyo mʉlandʉ ne? A, a! Ingɨ nɨkʉtilɨ malagɨɨlyo ʉnene shanga kʉlɨnga mʉlandʉ kɨntʉ kɨɨ? Kʉnsoko, shanga aɨnzelɨnga ʉbɨ nʉwa kʉawa kitʉ kɨɨ, anga ize shanga malagɨɨlyo alagɨɨye, "Leka kʉawa" 8 Ingɨ naɨnalɨnga malagɨɨlyo ang'wa Musa, papo ɨkasasha nsʉla mbɨ mʉnkolo ane. Kolwa, malagɨɨlyo ang'wa Musa anga ɨze kʉtilɨ mʉlandʉ wɨtula ʉgila anga ngulu. 9 Itungo lɨng'wɨ ʉnene naɨ nkɨlɨ kʉlɨnga malagɨɨlyo ang'wi Itunda aɨnishiɨ mʉndoewe. Ingɨ naɨ nɨngile malagɨɨlyo natakile, nɨkalɨnga kɨna nɨ mʉnyamɨlandʉ, 10 nɨkamanya kɨna malagɨɨlyo aɨaɨkilwe kʉsasha ʉpanga, kʉng'wane asakilye kʉlamʉlwe kʉnsha. 11 Kʉlʉlo mʉlandʉ wɨkankongela kʉkɨɨla malagɨɨlyo nanso, nʉkʉsasha namʉlwe kʉnsha. 12 Itɨɨ gwa ilɨngɨkile kɨna, malagɨɨlyo apembeeye kʉng'wi Itunda, kʉnsoko apembeeye kʉng'wi Itunda malagɨɨlyo nanso ingɨ maza hangɨ agombekile kʉng'wi Itunda. 13 Itɨɨ gwa, kʉlʉnge itɨ kɨntʉ nɨkɨza kɨsakilyene ʉnene namʉlwe kʉsha? A, a! Ingɨ, mʉlandʉ ʉhume kigeeleka kɨna mʉlandʉ, ʉkɨɨe kʉ nsha kʉheja ɨkɨ nɨkɨza. Kʉlʉlo kʉkɨɨla malagɨɨlyo nanso, mʉlandʉ wigeelekile kɨna ʉbɨ ikɨlo.

14 Kʉlɨngile kɨna malagɨɨlyo ingɨ makani a kɨnkolo, ʉnene shanga nɨa kɨnkolo, nagʉigwe ntule mʉtʉʉng'wa mʉmɨlandʉ. 15 Shanga nɨngile nɨkitʉma, kʉnsoko ɨkɨ nɨndoilwe kitʉma shanga kitʉma, nɨkɨ nɨ nɨkɨbɨpɨwe kɨko kitʉma. 16 Anga ituleʉ, nzitʉma lɨlɨ nɨshanga lɨndoeye mʉnkolo ane, izeze ngombile kɨna ɨmalagɨɨlyo maza. 17 Itɨ gwa, shanga nene kitʉma nɨshanga nɨkɨloilwe, ingɨ mʉlandʉ nɨkolɨ mʉ ng'wane wʉwo witʉma aya nɨshanga nɨmaloilwe. 18 Kʉnsoko nɨngile kɨna kʉtilɨ ikanɨ lɨhi niza mʉng'wane, mʉ kɨʉntʉ kane. Kʉnsoko, palʉng'wɨ kɨna ndoilwe kitʉma nɨndoilwe, shanga nɨkitʉma. 19 Kʉnsoko ɨlɨ niza nɨ ndoilwe, shanga kitʉma, kɨmɨkɨɨli kakwe kitʉma yaya nɨmabɨ nɨshanga nɨndoilwe. 20 Itɨ gwa, anga itule ɨlɨ nɨshanga ndoilwe lɨlo kituma, ingɨ itendile kɨna shanga nene nitʉmile, ingɨ mʉlandʉ ʉwo nʉʉkolɨ mʉng'wane. 21 Kʉitɨ gwa, nalɨnga anga nihie kitʉma ikani niza, ingɨ nɨhanga kitʉma ʉbɨ. 22 Mʉnkolo ane nɨloeeye malagɨɨlyo ang'wi Itunda. 23 Ingɨ nalɨnga kɨna amolɨ malagɨɨlyo mangɨza ɨkikʉngʉma kitʉma mʉng'wane, malagɨɨlyo nɨ nsuta nɨ malagɨɨlyo namolɨ mʉ mahala ane. Itɨ gwa ɨntenda ntule nɨmʉtʉʉng'wa nʉwa mɨlandʉ nʉwitʉma mʉlɨmo mʉ mʉɨlɨ wane. 24 Ikani ɨlɨ lɨkʉndetela ʉkɨa, nyenyu ʉkʉnguna nihege mʉ mʉɨlɨ ʉwʉ nʉʉnihongilye mʉnsha? 25 Nʉ wakʉligwe Itunda kʉnsoko ang'wa Kilisito Yesʉ Isekʉlʉ wane! Itɨ ingɨʉ nɨlɨ.

Ʉnene nɨ ning'wene mʉ mahala ane kitʉma malagɨɨlyo ang'wi Itunda, ingɨ kɨmʉɨlɨ nɨhanga kitʉma mɨlandʉ.