1 Itɨgwa kʉkolya, itɨɨ, Itunda waahitilene antʉ akwe? Shanga ʉahitile, ʉnene nɨ Mʉisilaeli ntugɨwe miele lang'wa Ibulahimu, mʉndʉgʉ ang'wa Benjameni. 2 Itunda shanga ʉahitile antʉ akwe naɨʉhoile kʉpuma ʉng'wandyo. Mʉkɨmbʉkile nɨyitambʉwe Mʉwandɨkwa wang'wi Itunda, nɨyimʉtambʉe ʉ Elia itungo naɨʉmʉlɨɨe Itunda kʉnsoko Aisilaeli. 3 Elia aɨʉlʉngile itɨ, "Isekʉlʉ, aabʉlaga amanga ako akumʉla nitekeelo nɨlako. Nasaga ʉnene du, nawo akʉhiya kʉmbʉlaga." 4 Itunda aɨʉmʉsʉkɨɨye ʉlɨ? "Aɨʉmʉɨɨe nkete antʉ ane elʉpu mʉpungatɨ nɨshanga amʉkʉiye mʉlʉngʉ Baali." 5 Itɨ gwa, nɨyɨlɨ nitungo ɨlɨ, kʉnsoko a ʉkende akolɨ akeehʉ nɨahoilwe ni Itunda kʉtula antʉ akwe. 6 Ingɨ ahoilwe kʉ ʉkende wang'wi Itunda, shanga kʉnsoko antendo yao. Anga ize ʉholanyi wakwe wazegoza ntendo niya antʉ, ʉkende shanga aɨʉzetula ʉkende hangɨ. 7 Kʉlʉnge ʉlɨ gwa? Kɨntʉ ɨkɨ nɨ Aisilaeli aɨɨkɨduma, shanga ɨkakɨlija, ingɨ awo naɨahoilwe ɨkalija. Aisilaeli aʉya nɨasagile ɨkatendwa aleke kʉlɨnga lʉkani lang'wi Itunda. 8 Anga niyandɨkilwe mʉ Mʉwandɨkwa wang'wi Itunda kɨna, "Itunda wkaatenda antʉ awa atule anga alae, hangɨ kʉpikɨɨla itungo ɨlɨ shanga ahumile kʉgoza na mihoao, ang'wɨ kija mʉakʉtyɨao." 9 Daudi nʉyo aɨʉlʉngile,

"Maloeelyaao nɨlɨtule itugwɨ lakʉaambisa,

agwe nʉkʉpɨsɨɨligwa.

10 Apokule kʉ miho apele kʉona,

igube kʉmɨgongo mʉlwago nʉla mahikʉ ɨhi."

11 Kʉitɨ kʉkolya hangɨ. Itɨɨ, Ayahudi kigazo lao agwɨe lʉkʉlʉne? Shangaʉ! Kʉkɨɨla igazo lao, antʉ nɨshanga Ayahudi akomowe, ingɨ Ayahudi ahume akʉaonela wɨlu. 12 Igazo nɨla Aisilaeli nɨitangwa Ayahudi lasakilye ʉkembetwa wɨdʉ kʉ ʉnkumbigʉlʉ, kʉlimansɨɨlya kʉng'wao kʉnsoko akʉleka makani a kɨnkolo yaletile ʉkembetwa ʉkʉlʉ kʉ antʉ nɨshanga Ayahudi. Itɨ gwa yigeelekile kɨna Ayahudi ɨdʉ anga amʉhʉɨɨle Itunda yɨkaleta ʉkembetwa ʉkʉlʉ kʉ antʉ nɨshanga Ayahudi.

13 Itungo ɨlɨ kʉmʉtambʉlya nyenye nɨshanga mɨ Ayahudi. Kʉnsoko ʉnene naile nɨmitʉmi kʉ antʉ nɨshanga Ayahudi, kiloelya ʉmʉlɨmo wane nʉwa kʉtanantya. 14 Nihume kʉatenda antʉ ihɨɨ ane amʉonele ʉnyenye wɨlu, kʉitɨ antʉ nɨang'wɨ nihume kʉaguna. 15 Kʉnsoko anga itule kʉhitwa kʉng'wao yasakilye antʉ amahɨɨ atule ahʉmbaʉya ang'wi Itunda, yɨkatula ʉlɨ antʉ awa anga agombwe ni Itunda? Antʉ nɨakule ɨkiʉka!

16 Anga itule ntonge amʉkate ɨɨkilwe kʉnsoko ang'wi Itunda, mʉkate wɨhi ʉkʉtula waɨkwa pang'wi Itunda, mɨli amʉtɨ anga ɨtule ɨɨkilwe kʉnsoko ang'wi Itunda, nɨntambɨ ga yɨkʉtula yaɨkwa pang'wi Itunda 17 Ingɨ anga itule ntambɨ ying'wɨ niya mʉzeitʉni yatemilwe, pa ʉtemelwa nʉwanso ibabigwe ntambɨ niya mʉzeitʉni nʉwa mʉwɨɨ. Ʉnyenye nɨshanga mɨ Ayahudi ingɨ nyenye mɨ ntambɨ niya mʉzeitʉni, itungo ɨlɨ nʉnyenye mihanjaa mʉlikalo nʉlʉza nʉla Aisilaeli. 18 Itɨ gwa, mʉleke kʉadalaha antʉ nɨatemilwe anga ntambɨ. Hangɨ, mʉkiloelya ntʉni, kɨmbʉki shanga nyenye mʉambɨɨe itina, ingɨ itina lyenso lɨmʉambɨɨe ʉnyenye.

19 Ingɨ mʉhumile kʉlʉnga, "Ntambɨ aɨyitemilwe kʉnsoko ʉnene nihume kʉbabigwa pang'wanso." 20 Niituleʉ, aɨatemilwe naʉgila ʉhʉɨɨli, ingɨ ʉewe wɨmɨkile mʉhʉɨɨli wako. Leka kilolya, ingɨ imɨke ɨzewikeiye. 21 Kʉnsoko Itunda shanga aɨʉaaisɨɨye Ayahudi nɨimpyanigwe nintambɨ naɨitongee kʉpumɨɨla ʉng'wandyo, itɨɨ, ʉkʉmʉaisɨɨlyane ʉnyenye? 22 Kolwi gwa, Itunda mʉkende hangɨ mʉtaki. Nʉwanso mʉtaki kʉ antʉ nɨɨmʉgazɨlya, hangɨ mʉkende kʉng'wako anga itule ʉkʉlongoleka kitʉma makani nʉmaloilwe, ang'wɨ shangaʉ nʉewe ga ʉkʉteng'wa. 23 Nɨ Ayahudi ga anga atulye nʉkʉhʉɨɨla hangɨ Itunda, akʉsʉkigwa hangɨ mitina, kʉnsoko Itunda ʉkete ʉhumi nʉwa kʉababya hangɨ. 24 Ʉnyenye antʉ nɨshanga mɨ Ayahudi, kʉpuma ɨkalɨ mɨhanga ʉ mʉzeituni nʉwa mʉwɨɨ, ingɨ mhegigwe kʉng'wanso, mababigwe mitina nɨla mʉzeituni nʉwa mʉkɨbʉʉlya ipande nɨshanga aɨlanyu. Ingɨ Ayahudi kʉʉpumo nɨanso wawo mʉzeituni nʉwa mʉkɨbʉʉlya, yikʉtula ipepele nangalʉ nɨanso kʉbabigwa hangɨ mitina nɨla mʉtɨ wao.

25 Anyandʉgʉ ane ndoilwe mʉlɨnge tai ɨyɨ nipihile mʉleke kiona mʉkete mahala ɨdʉ. Lʉgoha nʉla Ayahudi aɨkitungo iniino ʉdu, kʉpikɨɨla antʉ nɨshanga Ayahudi nɨakʉtula amʉhɨɨla Itunda. 26 Papo antʉ akʉ Isilaeli ɨkakomolwa, anga nʉandɨkile Ʉwandɨkwa wang'wi Itunda,

"Mʉkomoli ʉzile kʉpumɨɨla kʉ Sayuni

nʉyo ʉkʉahegelya ʉ mʉlandʉ nɨatugɨwe mʉng'wa Yakobo.

27 "Ɨlɨ lɨlɨ ilago lane nɨnzɨzaɨka nɨenso

itungo nɨnzeheja mɨlandʉao."

28 Kʉnsoko Ayahudi akʉhita Mpola Ninza,Ayahudi aɨle alʉgʉ ang'wi Itunda, ingɨ kʉnsoko kɨpegwa kanyu nɨshanga mɨ Ayahudi. Ingɨ kʉnsoko aɨahoilwe, akɨlɨ ɨkɨhʉmbashuya ni Itunda kʉnsoko agʉkʉao. 29 Kʉnsoko Itunda anga wakondye kʉapa ɨantʉ ɨkɨpegwa kakwe nʉahole, shanga wɨkʉa ngali kɨna nɨkɨ ʉtendile itɨ. 30 Pakalɨ ʉnyenye nɨshanga Mɨayahudi naɨmamʉpɨlʉkile Itunda, ingɨ itungo ɨlɨ mʉaisɨɨgwe kʉʉkende wakwe ʉdu kʉnsoko aʉpɨlʉki nʉwa Ayahudi. 31 Itɨ gwa, kʉnsoko aʉaisɨɨligwa nɨmʉkembetilwe ʉnyenye, Ayahudi ɨmʉpɨlʉka Itunda, itungo ɨlɨ nawo ga asɨngɨɨlya ʉaisɨɨligwa wang'wi Itunda. 32 Kʉnsoko Itunda waatungile antʉ ɨhi kigazo lao nɨlakʉhita kʉmʉkʉlya nʉwanso wahume kʉaaisɨɨlya ɨhi.

33 Kolwi. Itunda ingɨ mʉgolɨ kʉ nsao yɨdʉ ikɨlo, mahala nʉ ʉlɨngi wakwe ʉgila mpelo! Kʉtilɨ nʉhumile kʉganʉla makani nʉkʉmalamʉla Itunda, Kʉtilɨ nʉhumile kʉganʉla Itunda nʉkʉhiya kitʉma makani akwe! 34 Wandɨkwa wang'wi Itunda ʉlʉngile.

"Nyenyu naɨʉlɨngile masɨgo ang'wi Isekʉlʉ?

Ang'wɨ nyenyu nʉhumile kʉmʉsɨja?

35 Ang'wɨ nyenyu naʉtongee kʉmʉpa hanza Itunda kɨntʉ kɨhi,

wahume kʉsʉkɨɨligwa kɨntʉ nɨkanso?"

36 Kʉnsoko intʉ yɨhi ipumile kʉng'wakwe, intʉ yɨhi yimolɨ kʉʉhumi wakwe hangɨ kʉnsoko akwe, ng'wenso nʉwapegwe ʉkʉlʉ wɨhi ɨkalɨ na kalɨ! Tai ituleʉ niituleʉʉ.