1 kul iyjen yettemmen elli yesuwε nette δ elmesiyH, yemmaru seg rebbi, elli yexs daddeθne ayexs memmis zade. 2 w nečin nessen elli nexs idrari n rebbi max enebδe nexs rebbi w nxeddem s elewSiyyeθes. 3 δ wahen exse n rebbi: enexδem s elewSiyyeθes. w elewSiyyeθes elteδqilnec, 4 εelexaTer elli yemmaru g rebbi iγelleb g edduwnyeθ. w emmenenne nette δeγlab n edduwnyeθ. 5 δ wiyn eyeγleb edduwnyeθ? kan δ elli yettemmen elli yesuwε δ memmis n rebbi.

6 wahen elli yuseδ nette δ yesuwε elmesiyH, yuseδ s amen d iδemmen, muc s amen berk emma s amen d iδemmen. w erruwH netteθ elli eθecheδ s elmesiyH. 7 w ellan tlaθe δ eccuwhhaδ: 8 erruwH d amen d iδemmen, w letlaθe δ imeθfahmen. 9 kan neqbel echaδeθ n leεbaδ, echaδeθ n rebbi ekber. w θahen δ echaδeθ n rebbi f memmis. 10 elli yettemmen g memmis n rebbi γers echaδetdiyn. elli elyettemmenc g rebbi eθyer δ elkaδeb, εelexaTer elyemminc g echaδeθ elli yucit y memmis. 11 w echaδeθ δ tahen: rebbi yuceyane eddar y diyme, w eddare g memmis. 12 elli γers efrux γers eddar, elli elγrec memmis n rebbi elγrec eddar diyme.

13 ettarye g wahen y xenwem elli ettemnem g ellesem n memmis n rebbi, bac e θesnem elli γerwem eddar y diyme. 14 w δ tahen eθθiqθenne δiys: max eneĎleb Haje eθwate enniyyeθ n rebbi, eysel. 15 w iδekan nessen elli nette ysel diyne g elli eneĎleb elkul, enessen elli δenawi elli neĎlebθ s γers.

16 elli eyzer essiywem enjes yetteg g elγeldeθ eltneqqec, yelzem eyeĎleb seg rebbi bac e syuwc eddar. usinc esyuwc. wahen y iyh elli ettegen g elγeldaθ enneqnec. emma telle elγeldeθ tneq, exenneqqerac ezzalleθ f elxaĎrensen. 17 kul ege δ elγaleδ δ elγeldeθ, emma ellaneθ elγeldaθ enneqnec. 18 nessen elli kul iyjen yemmaru g rebbi elyettegc elγeldaθ, elli yemmaru g rebbi yetεus felles w eccer eligeddec esyeqreb.

19 nessen elli nečin seg rebbi, w elli edduwnyeθ elkul seddu elquwweθ n eccer. 20 w nessen elli memmis n rebbi yuseδ w yuceyane efham bac e nessen essis elHeq. w nečin g elHeq, g memmis yesuwε elmesiyH. δ wahen rebbi mbelHeq d eddar diyme. 21 idrariw, erreθ elbalennum seg leSneb.