1 w max engeddec eneθHemmel exθer, nqerrer enraje weHδane g eθiyne. 2 nazen Timuθawes yewweθne w elli yxeddem iδne g elxeδmeθ n erreb y encar n elmesiyH. nuzenti bac e xenyθebbet yqewweyawem g eliman, 3 bac e liredjeε Hed s eεaniye. xenyum biδkum tessenem elli wah δ elmexθubenne. 4 max i nkan γerwem nxebrawem elli δenεane s elεδab. ySar wah belHeq emmax i θesnem. 5 heδake εlac uzenγawem max elgeddexc eθHemle bac e sne elHal n elimenewwem, bac e lyetkunc ibliys yeγweyawem iDaε etteεbenne.

6 w ture yerjeε timutawes seg γerwem, yeγδane lexbar ibehhayen f elimenewwem d elmHebθewwem. w yxebrane elli xenyum diyme tferHem max exentesfekrem, w texsem exentezrem emmax i nexs nečin exennezr. 7 heδakeεlac ey ewmaθen, yeδwel elimenewwem yečejjeε δiyne g elHeznenne d elwjeyεenne elkul. 8 yeHlewane eddar meδemkum θebtiyn g elmesiyH. 9 nečin nferreH essiywem egget ezzaθ n errebbenne, w max enged enecxer erreb f elferHe elli yuceyenexθi essiywem? 10 nečin nĎelleb δiys deggiδ d dugges bac e xennezr usinc enkemmel essen elli δ ennaqez g elimenewwem.

11 eneĎleb seg errebbenne d deddaθne d seyyedne yesuwε elmesiyH eymiyr ebriδ ezzeθenne bac e neHDer tweliwwem. 12 w eneĎleb seg elmesiyH ayedj elmHebθewwem y beεDkum d leεbaδ elkul e θerni teqwe m elmHebθenne y xenyum. 13 usinc e yθebbet ulewnewwem bac e θkuwnem δ eTTuhhar ezzaθ n rebbi deddeθne max edyas seyyedne yesuwε elmesiyH d iqeddisnes elkul.