1 w g ellexxer ey ewmaθen, eneĎleb essiywem neθrejjeyawem s ellesm n seyyedne yesuwε elmesiyH bac e θedrem s elli eyreDDe erreb, emmax i θeθεelmem essiyne w emmax i ttegem, erniθ eθqedmeθ g wah. 2 xenyum tessenem enSayeH elli nuceyewemten s ellemr n seyyedne yesuwε. 3 erreb yexs eθkuwnem y nette, heδakeεlac yelzem eθebεδem f ezne. 4 w kul iyjen essiywem ayedj elbeδnes δ eTTaher w δ ucriyf, 5 w eliθebbeεc eccehweθ m iberreniyyin elli ellessinenc erreb. 6 w elyetteθεeddi Hed essiywem f yewwas ziγ esyeg temuwHacθ g ellemre wah. w emmax nečin nεerfawem seg qebl n nebhawem eSbiyH, rebbi eyentqem s kul Hed ayeg eccer. 7 εlexaTer erreb yexθerane enkuwn muc δ imenzas emme enedder δ eTTuhhar. 8 emmale elli eyerfeD etteεliyme, elyerfiDc leεbaδ, emme yerfeD erreb elli yθučawem erruHes elqudus.

9 w xenyum etteHθejemc exennerye f elmHebθewwem y imumnen, εlexaTer erreb yεelmawem eθexsem beεDkum. 10 w sah xenyum texsem ewmaθen elli g meqduniye elkul. w nečin nexs eθegem wah exθer, 11 usinc eθeHrSem f eddar elεiyceθ δ terrayet, w etteddexlemc g lumuwr n elγirewwem, usinc eθexsbem erziwwem s elεerq n eljbinewwem emmax i xenεellem. 12 siyn exenneHθermen elli muc δ imumnen, w eθεemlem f Hed bac e yeSref fellawem.

13 w nexsawem eθesnem elli ySar y elli emmuwθen, bac e ltHeznemc m elli elγersenc eθmenni. 14 emmax nečin ntemmen elli yesuwε yemmuwθ yekker seg temettent, w entemmen zaδe δ entisikker erreb bac e ddasen iyδes elli emmuwθen w nihnin temnen essis. 15 nečin exenxebber s edwi elli yenni elmesiyH biyδe, nečin elli nedder max edyes, ensebbeqc elli emmuwθen. 16 εlexaTer ekren g ellewwel imumnen elli emmenen essis emmuwθen, elweqθes enabi eyeqwe w errayes n elmlayxe eynabe, w elbuwq eyexδem, w elmesiyH biyδe edyes seg esme. usinc 17 w elbeεεeδ enemmexĎef iδsen g esHab nečin elli nedder bac e nqabel elmesiyH g elhwe, w siyn enkuwn iyδes diyme. 18 emmale cejεeθ beεDkum s edwiye.