1 elli neč ebedde iyδes qewwixθi εewnexθi g esukkas iglewwel seg elεehδ n daryuws elmaday.

2 w ture exenne f elHeq: tay tlaθe δ lemluwk δ eddasen g fares, w errabeε δ ykuwn eγnensen elkul egget, w max e yeθqewwe s elγnas, e yheyyej leεbaδ elkul f elmemlxeθ n elyunan. 3 w edyes elmlek δ imeθjebber eykuwn δ eSSulTan δ emeqqar usinc ayeg elli yexs. 4 w netteθ g elqewθes temeqqerθ e θerrez elmemlekθes θemzuwn y ecciyreθ lerbε n elqeεεeθ, w etkunc y ezzerriεθes w elγrec elquwweθ m qebl, w e tzuwnen y elγires.

5 w e yeθqewwe elmlek n eljenuwb, yemenni iyjen seg elquyyeδes e yeθqewwe felles usinc e yeθsellaT w e ykuwn eSSulTanes δ emeqqar. 6 w beεεeδ leεwam e θHalfen taseδ yellis n elmlek n eljenuwb y elmlek n elcemal bac e mSalHen, yemenni elqewθes etqimic w ezzerriεθes zaδe, usinc e θehlex netteθ d elli uγδenteθ d daddes d elli yeawent elweqθes.

7 w g elweqθdiyn edyes iyjen seg midnes eyawi emxan n δaddes usinc yaδef f eljiyc n elmlek n eccemal, usinc entyeγleb, 8 usinc eyawi leSnam n elYileheθensen elli emmegen s uzzal y miSr yawi elmeεεuwnensen elli yeγle seg elfeTTeθ d uwreγ. w e yebεeδ elmlek n eccemal lebHaD n leεwam. 9 usinc e yezHef elmlek n eccemal f elmemlxeθ n elmlek n eljenuwb, yemenni e yexser usinc e yerjeε y temurθes.

10 usinc e lemδen idrari n elmlek n eccemal eljiyc δ emeqqar, usinc e hejmen f elmlek n eljenuwb m eTTufan w g erjeεensen ehejmen f elεaSmeθ n elmlek n eljenuwb. 11 usinc e yeθγeccec elmlek n eljenuwb yeffeγ eyHareb elmlek n eccemal w reγm elli elmlek n eccemal edyaγ eljiyc δ emeqqer, emme e yexser. 12 w max e yerbeε e yeθkebber yenγ laluf, yemenni elyetqimiyc diyme yrebbeH. 13 usinc e yεaweδ elmlek n eccemal ayeg eljiyc ekber n eljiyc iglewwel w beεεeδ leεwam e yezHef s eljiyc δ emeqqar d elmeεεuwn egget. 14 w g elweqθdiyn eθmerδen egget δ leεbaδ f elmlek n eljenuwb, ekren ifellagen seg ecceεbex e Heqeqen erruYyeθ w etgeddenc. 15 usinc edyes elmlek n eccemal edyeγ eljiyc yHaSer elmdiyneθ egen ebriδ m eddehreθ s eccal e δefnas eHθellenteθ, w elyetbeddiyc ezzeθes eljiyc n eljenuwb Hette δ iryeznes ibhhayen, εlexaTer welγersenc elquwweθ bac e θwejhen. 16 usinc ayeg elmlek n eccemal g ecceεb n eljenuwb elli yexs, w elyetbeddi ezzeθes Hed, usinc edyes y temurθ tebehheyθ yehlext. 17 usinc e yemreq elmlek n eccemal s elqewθes elkul y elqeεεeθ n elεδuwwes, usinc emsemHen yuces yellis w g enniyθes e sifesseδ elmemlekθes, yemenni weδiyn elyetSerc. 18 w elbeεεeδ e yelhe s ecciyreθ n essaHel yawi essis egget, yemenni iyjen seg elquyyaδ e θyeqher yesbeddi, usinc e syekkes eθkebres. 19 usinc e yettelhe s leHsun n timures, yemenni e yuwDe w esetqimic ejjerreθ.

20 usinc e yeTTef elbleSθes δwiyn eyazen ijen yetlemmeδ g eljezyeθ usiync e ySender elmejδ n elmemlxeθ, yemenni beεεeδ elweqθ iqSeyyer e yerrez menγiyr elfetneθ w la δ elHerb. 21 e yeTTef elbleSθes iyjen yemmeHqer liSelleHc y elmemlxeθ, yemenni eyawi elHukm s elHiyleθ d elquwweθ elweqθ elli leεbeδ imeTmanen. 22 usinc e ykesser eljiyc δ emmeqer m eTTufan, usinc emkesren ezzeθes w ayenγ errayes n ecceεb n elεaheδ. 23 w max ayeg iδes elεehδ eyxuwn, usinc e yali s lebHaD n leεbaδ. 24 w elweqθ n salem e yeHθel eljihaθ timuγniyyin n temurθ yeg elli eθeginc midnes w la δ lejdades. usinc e yferreq f eljmeεθes seg elli yiwiθ, usinc e yHeDDer imenes y uγari elmerreθ xlaf emme wah yetqimiyc kan elfetreθ. 25 usinc e yhajem elmlek n eljenuwb s eljiyc δ emeqqar. w elmlek n eljenuwb e θiHareb s eljiyc δ emeqqar w yeqwe egget, emme liθebbeθc εlexaTer leabeδ xlaf HeDDernas imenensen. 26 w elli θetten seg elmittes eθxuwnen, usinc e yerrez eljices emmuwθen essis egget. 27 emme lemluwke essen eqqiymen ulewnensen δ izeTTafen, esxerxsen elweqθ elli nihnin f elmiyδeθ icθ emme ennedjHenc. εlexaTer ellexerθensen temHedded. 28 usinc e yerjeε elmlek n eccemal y elqeεθes s eθθerweθ δ temeqqarθ, w g ules enniyyeθ tuHec f ecceεb n elεehδ imqeddes. usinc ayeg elli yexs y ecceεb yerjeε y elqeεθes.

29 w g elweqθ ellazem e yerjε elmlek n eccemal e yaδef y eljenuwb, emme e yeθbeddel elHal, 30 εlexaTer elflayek seg elγerb ehjemneθ fellas, e yukkeδ yerjeε δ imeθγeccec f ecceεb n elεehδ imqeddes yeg elli yexs. w g erjeεes e ySaHeb elli bεeδen f elεehδ imqeddes. 31 w edyes seg eljices elli eyδennes elHeSn imqeddes, yekkes θimeHreqθ n diyme, yeg enjaseθ d elxrab, 32 yessender s edwi yebhe elli e beεδen f elεaheδ, emme ecceεb elli yessen errebbes e θcededen g elmuεemeltensen iyδes. 33 w elli γersen elheqmeθ seg ecceεb e biynen ellemr y egget, yemenni e ĎuĎan seddu essiyf d elεefyeθ d elHebs d ennehb, y elmuddeθ. 34 w max e ĎuĎan e δafen δwiyn entiεawen kan lewse, w eδuwlen iδsen leεbaδ egget s enafeq. 35 usinc e ĎuĎan lebHaD seg elli γersen elheqmeθ w eykuwn ewDensen δ esbeb g neDDef elmi edyes elweqθ ellexxer elli yHeDDedθi rebbi.

36 w ayeg elmlek n eccamal elli yexs w e yeθreffeε f elYilahaθ elkul. yuθlay s elbaDel f erreb n elYilahaθ, w e yenjeH elmi edyes elweqθ n essuxT, alexaTer yqerrer erreb eθyeg. 37 w elyettesθeεrifc elmlek s erreb n midnensen w la s erreb elli exsnett timeTTuwθin, w la s Hette erreb εlexaTer eyeθεelle f elkul. 38 emme e ykerrem erreb n leHSuwn elli eθessinenc midnes, e θikerrem s uwreγ d elfeTTeθ d elHjer unfis. 39 usinc e yehjem f temur timHesnen elli qwan s ellesm n erreb uγrib, w elli eθeqblen e senyerni g elmejδ, w entiselleT f egget δ leεbaδ, w e yzuwn elqeεεeθ f elxeĎrensen δ errecweθ.

40 w max e yaweD elweqθ e θiHareb elmlek n eljenuwb, usinc e sedyas elmlek n eccemal s tikerriytin d elfursan d tiflak egget eyaδef lemdenes m ezzubεeθ yeHθelliθ yeθεeddet, 41 usinc e yaδef temurθ tebehheyθ wDaneθ lemden egget emme emneεneθ tiyh: eduwm d muwab d elquyyaD n elqeεεeθ n bniy εemmuwn. 42 w e yHuT eddu ifesnes egget d timuwre w elqeεεeθ n miSr eltmenneεc. 43 w e yγar f leknuwz n uwreγ d elfeTTeθ d kul ciy yeγle g miSr, w g ebriδes e θeθbεen ilibiyyen d ikuciyyen. 44 usinc e θerεben lexbar seg eccerq d eccemal, usinc e yeffeγ seg temurθ δ imeθγeccec egget bac e ydemmer egget δ leεbaδ. 45 usinc e yenSeb elximtes n elmlek jar elbHer d eddehreθ n elquds, usinc e yaweD elHeddes w eθineSSer Hed.