1 yeg belceSSer elmlek emensi δ emeqqar y elf seg imeqqernes yesw ezzeθensen ecrab. 2 w elweqθ elli ykan belceSSer ymeddi g ecrab, yeĎleb eseddaγen elmeεεuwn n uwreγ d elfeTTeθ elli yessufeγθ daddes nebuwxeδneSSer seg elheykel elli g urceliym bac e yesw essis nette d imeqqernes d elwecunes timeTTutines. 3 eyendeγ yeHDer elmeεεuwn n uwreγ elli yemsuwfeγ seg elheykel n rebbi eswen essis elkul, 4 swiyn ecrab sebHen y elYilahaθ n uwreγ d elfeTTeθ d enHas d uzzal d elluH d elkurδ.

5 elweqθes effeγen iDuDan n efuws n elεebδ tari ezzaθ n elgaz f erriys n elHiyĎ n elqSer n elmlek, w elmlek ynedzi y efus elli yθari. 6 yembeddel uδmes yeθqelleq egget yefcel erεcen ifednes, 7 ynabe s eSSuwθ yeεle e suδfen imejuwsiyyen d imunejmen d elεuqqal. yen elmlek y elεuqqal g babel:<<elli e yeqre θiraye yfesrit e yireD edbac sellerjwan, d teglet n uwreγ g θexrumtes, yeTTef elblaSeθ teθθalet g elmemlxeθ.>> 8 elweqθes eδfen elεuqqal elkul, w eliged Hette iyjen essisen e yeqre θiraye ziyγ e ttifesser y elmlek. 9 yerni elqleq n elmlek belceSSer yeθbeddel uδmes, w imeqqernes eqelqen zaδe.

10 θesl yemmes n elmlek s elli yejre y elmlek d imeqqernes, taδef y tezeqqe n umensi ten:<<e θedreδ diyme ey elmlek eθeqelqec w eθeθHeyrec. 11 g elmemlexθex eryaz δiys erruwH n iqeddiysen, w g liyyam n daddex ufiyn γers elfehm d eδke d elHikmeθ tebhe m elHikmeθ n elYilaheθ. heδake εlac δaddex elmlek nebuwxeδneSSer yegiθ emeqqer n iseHHaren d imejuwsiyyen d iεerrafen d imunejmen. 12 danyal wah isemmaθi elmlek belTecaSSer γers elHekmeθ d elεaqel δ emeqqar g umiyri n lelγaz d efesser n tirjiyθin, w ture nabeθi bac e xifesser θiraye>>.

13 eyendeγ yaseδ danyal twali elmlek, yennes elmlek:<<endre δ cex danyal elli yuseδ seg bni yehuwδa elli w emmerhnen elli yuγeδten dadde elmlek seg yehuwδa? 14 esliyγ elli δiyx erruwH n lerbuwb, w yemmaf δiyx elfehm d eδke d elHekmeθ δ temeqqerθ. 15 uδefen tweliyw elεuqqal d imejuwsiyyen bac e yeqran θiraye usinc e yennen f efesres w elgeddenc. 16 yemenni esliyγ elli cex etgeddeδ efesser d emiyri n elmecakel, w ture iδekan eθgeddeδ e yθeqriyδ θiraye tendi f ufesres e θirDeD edbac s ellerjwan d teglet n uwreγ g θexrumtex, teTfeδ elblaSeθ teθθalet g elmemlxeθ.>>

17 yen danyal ezzaθ n elmlek:<<edj ewcex y cex, tuwceδ elhδayex y elγiriyw. emme θiyre e xetteqriyγ enγax f ufesres: 18 ey elmlek, yuce erreb elεali y δaddex nebuwxeδneSSer elmelx elkul d elquwweθ d elmejδ d elεez. 19 w s elqewθes elli rebbi yucayes ykan ecceεb elkul d ellummaθ elkul d elluγaθ elkul θukkaδen essis, w ykan yneq elli yexs yedj elli yexs, ysuwli elli yexs ysuggez elli yexs. 20 emme max i yeqSaH ules texyab ennefses yeθjebber yeggez seg elεerc n elmelxes yemmekkes felles eljlales, 21 yemgelleb seg jar leεbaδ yeδwel m elhayceθ, yeεmer d iγyal n essewweθ, yeč elHciyc m ifunasen yellexs elbeδnes s enneδweθ n esme, elmi yessen elli erreb elεali iθuč essulTeθ f elmemlxeθ n leεbaδ yHuT felles elli yexs. 22 w cex e belceSSer memmis, reγm elli fibalek s kul ciy elterric elbalex, 23 emme θqameδ elxecmex f erreb n esme, teγδeδ twalix elmeεεuwn n elheykeles tesweδ δiys ecrab cex d imeqqernex d elwecunex d timeTTuθinex xeddeminex. tsebHeδ y lerbuwb n elfeTTeθ d uwreγ d enHas d uzzal d elluH d elkurδ, w netteθ elli eltnedzi w eltsel w eltessiyn. emme erreb elli g efuses erruHex d ibriδnex elkul etεeĎmec. 24 heδakeεlac yuzenex efusδiyn elli turiyex θiraye. 25 w θah θiyre elli temmari: mena mena teqiyl w fersiyn 26 mena elmeεneha yemmeHseb εlexaTer erreb yeHseb leyyam n elmelxex ysuqaθen. 27 teqiyl elmeεneha temmuwzen εlexaTer erreb yuzenex s elmiyzan teffeγeδ δ ennaqez. 28 fersi elmeεneha temzuwn εlexaTer erreb eyzun elmemlexθex jar maday d fares:

29 yeĎleb belceSSer e DirDen y danyal edbac s ellerjwan d teglet n uwreγ g θexrumtes nebenti eθθaleθ g elmemlxeθ.

30 g iDes yemmeneγ belceSSer elmlek n ibebiliyyen. 31 yureθ elmemlxeθ daryuws elmadiy, w nette δ emmis n eθniyn w settiyn esne.