Cânticos 7

അഭിനന്ദനത്തിൻ്റെ വിവരണം

മണവാളൻ

1 അല്ലയോ പ്രഭുകുമാരീ, ചെരിപ്പിട്ടിരിക്കുന്ന നിന്‍റെ കാൽ എത്ര മനോഹരം!

നിന്‍റെ ഉരുണ്ട നിതംബം സമർത്ഥനായ ശില്പിയുടെ പണിയായ ഭൂഷണം പോലെ ഇരിക്കുന്നു.

2 നിന്‍റെ നാഭി, വൃത്താകാരമായ പാനപാത്രം പോലെയാകുന്നു;

അതിൽ, കലക്കിയ വീഞ്ഞ് ഇല്ലാതിരിക്കുന്നില്ല;

നിന്‍റെ ഉദരം താമരപ്പൂ ചുറ്റിയിരിക്കുന്ന

ഗോതമ്പുകൂമ്പാരംപോലെ ആകുന്നു.

3 നിന്‍റെ സ്തനം രണ്ടു മാൻകുട്ടികൾക്ക് സമം ഇരട്ടപിറന്ന കലമാനുകൾക്കു സമം.

4 നിന്‍റെ കഴുത്ത് ദന്തഗോപുരംപോലെയും

നിന്‍റെ കണ്ണ് ഹെശ്ബോനിൽ ബാത്ത് റബ്ബീം വാതില്‍ക്കലെ കുളങ്ങൾപോലെയും

നിന്‍റെ മൂക്ക് ദമാസ്കസിന് നേരെയുള്ള

ലെബാനോൻ ഗോപുരംപോലെയും ഇരിക്കുന്നു.

5 നിന്‍റെ ശിരസ്സ് കർമ്മേൽപോലെയും

നിന്‍റെ തലമുടി രക്താംബരംപോലെയും ഇരിക്കുന്നു;

രാജാവ് നിന്‍റെ അളകങ്ങളാൽ ബദ്ധനായിരിക്കുന്നു.

6 പ്രിയേ, പ്രേമഭോഗങ്ങളിൽ നീ എത്ര സുന്ദരി,

നീ എത്ര മനോഹരി!

7 നിന്‍റെ ശരീരാകൃതി പനയോടും

നിന്‍റെ സ്തനങ്ങൾ മുന്തിരിക്കുലയോടും സദൃശം!

8 "ഞാൻ പനമേൽ കയറും;

അതിന്‍റെ കുലകൾ പിടിക്കും" എന്നു ഞാൻ പറഞ്ഞു.

നിന്‍റെ സ്തനങ്ങൾ മുന്തിരിക്കുലപോലെയും

നിന്‍റെ മൂക്കിന്‍റെ വാസന നാരങ്ങയുടെ വാസനപോലെയും ആകട്ടെ.

9 നിന്‍റെ ചുംബനം അധരങ്ങളില്‍ക്കൂടിയും ദന്തങ്ങളില്‍ക്കൂടിയും

താഴെക്കിറങ്ങുന്ന മേല്ത്തരമായ വീഞ്ഞ്. *7:9 നിന്‍റെ ചുംബനം അധരങ്ങളില്‍ക്കൂടിയും ദന്തങ്ങളില്‍ക്കൂടിയും താഴെക്കിറങ്ങുന്ന മേല്ത്തരമായ വീഞ്ഞ്. നിന്‍റെ അണ്ണാക്ക് മേല്ത്തരമായ വീഞ്ഞ്

മണവാട്ടി

10 അത് എന്‍റെ പ്രിയന് മൃദുപാനമായി

അധരത്തിലും പല്ലിലും കൂടി കടക്കുന്നതും ആകുന്നു.

11 ഞാൻ എന്‍റെ പ്രിയനുള്ളവൾ;

അവന്‍റെ ആഗ്രഹം എന്നോടാകുന്നു.

12 പ്രിയാ, വരിക; നാം വെളിമ്പ്രദേശത്ത് പോകുക;

നമുക്ക് ഗ്രാമങ്ങളിൽ *7:12 ഗ്രാമങ്ങളിൽ കാട്ടുപുഷ്പങ്ങള്‍ക്കിടയില്‍ ചെന്നു രാപാർക്കാം.

അതികാലത്ത് എഴുന്നേറ്റ് മുന്തിരിത്തോട്ടങ്ങളിൽ പോയി

മുന്തിരിവള്ളി തളിർത്ത് പൂ വിടരുകയും

മാതളനാരകം പൂക്കുകയും ചെയ്തുവോ എന്നു നോക്കാം;

അവിടെവച്ച് ഞാൻ നിനക്കു എന്‍റെ പ്രേമം തരും.

13 ദൂദായിപ്പഴം സുഗന്ധം വീശുന്നു;

നമ്മുടെ വാതില്ക്കൽ സകലവിധ വിശിഷ്ടഫലവും ഉണ്ട്;

എന്‍റെ പ്രിയാ, ഞാൻ നിനക്കായി പഴയതും പുതിയതും സംഗ്രഹിച്ചിരിക്കുന്നു.