മീഖാ 2

മനുഷ്യന്‍റെയും യഹോവയുടെയും പദ്ധതികൾ

1 കിടക്കയിൽ നീതികേട് നിരൂപിച്ച്

തിന്മ പ്രവർത്തിക്കുന്നവർക്ക് അയ്യോ കഷ്ടം!

അവർക്ക് പ്രാപ്തിയുള്ളതുകൊണ്ട്

പുലരുമ്പോൾ തന്നെ അവർ അത് നടത്തുന്നു.

2 അവർ നിലങ്ങൾ മോഹിച്ച് അതിക്രമത്താൽ അവ കൈവശപ്പെടുത്തുന്നു;

അവർ വീടുകൾ മോഹിച്ച് അവയെ പിടിച്ചെടുക്കുന്നു;

അങ്ങനെ അവർ പുരുഷനെയും അവന്‍റെ ഭവനത്തെയും,

മനുഷ്യനെയും അവന്‍റെ അവകാശത്തെയും പീഡിപ്പിക്കുന്നു.

3 അതുകൊണ്ട് യഹോവ ഇപ്രകാരം അരുളിച്ചെയ്യുന്നു:

"ഞാൻ ഈ ജനത്തിന്‍റെ നേരെ അനർത്ഥം നിരൂപിക്കുന്നു;

അതിൽനിന്ന് നിങ്ങൾ നിങ്ങളുടെ കഴുത്തുകളെ വിടുവിക്കുകയില്ല,

നിഗളത്തോടെ നടക്കുകയുമില്ല;

ഇത് ദുഷ്ക്കാലമല്ലയോ."

4 ആ നാളിൽ നിങ്ങളെക്കുറിച്ച് ഒരു പരിഹാസവാക്യം ചൊല്ലുകയും

ഒരു വിലാപം വിലപിക്കുകയും ചെയ്തു:

"നാം നശിച്ച്, നമുക്ക് പൂർണ്ണ സംഹാരം ഭവിച്ചിരിക്കുന്നു;

അവിടുന്ന് എന്‍റെ ജനത്തിന്‍റെ ഓഹരി മാറ്റിക്കളഞ്ഞു;

അവിടുന്ന് അത് എന്‍റെ പക്കൽനിന്ന് എങ്ങനെ നീക്കിക്കളയുന്നു!

വിശ്വാസത്യാഗികൾക്ക് അവൻ നമ്മുടെ വയലുകളെ വിഭാഗിച്ചുകൊടുക്കുന്നു"

എന്നു പറയും;

5 അതുകൊണ്ട് യഹോവയുടെ സഭയിൽ ഓഹരിമേൽ അളവുനൂൽ പിടിക്കുവാൻ

നിനക്ക് ആരും ഉണ്ടാകുകയില്ല.

6 "പ്രവചിക്കരുത്" എന്ന് അവർ പ്രവാചകന്മാരോട് പറയുന്നു;

ഇവയെക്കുറിച്ച് അവർ പ്രവചിക്കേണ്ടതല്ല;

അവരുടെ ആക്ഷേപങ്ങൾ ഒരിക്കലും തീരുകയില്ല.

7 "യാക്കോബ് ഗൃഹമേ, ഇതെന്തൊരു വാക്കാകുന്നു?

യഹോവ മുൻകോപിയോ?

അങ്ങനെയോ അവിടുത്തെ പ്രവൃത്തികൾ?

നേരായി നടക്കുന്നവന് എന്‍റെ വചനങ്ങൾ ഗുണകരമല്ലയോ?

8 ഒടുവിൽ ഇതാ, എന്‍റെ ജനം ശത്രുവായി എഴുന്നേറ്റിരിക്കുന്നു;

യുദ്ധവിമുഖന്മാരായി നിർഭയന്മാരായി കടന്നു പോകുന്നവരുടെ

വസ്ത്രത്തിന്മേൽനിന്ന് നിങ്ങൾ പുതപ്പ് വലിച്ചെടുക്കുന്നു.

9 നിങ്ങൾ എന്‍റെ ജനത്തിന്‍റെ സ്ത്രീകളെ

അവരുടെ സുഖകരമായ വീടുകളിൽനിന്ന് ഇറക്കിക്കളയുന്നു;

അവരുടെ പൈതങ്ങളോട് നിങ്ങൾ

എന്‍റെ മഹത്വം സദാകാലത്തേക്കും അപഹരിച്ചുകളയുന്നു."

10 "പുറപ്പെട്ടുപോകുവിൻ;

നാശത്തിന്, കഠിനനാശത്തിനു കാരണമായിരിക്കുന്ന മാലിന്യംനിമിത്തം

ഇത് നിങ്ങൾക്ക് വിശ്രാമസ്ഥലമല്ല."

11 വ്യാജാത്മാവിൽ നടക്കുന്ന ഒരുവൻ:

"ഞാൻ വീഞ്ഞിനെക്കുറിച്ചും മദ്യപാനത്തെക്കുറിച്ചും നിന്നോട് പ്രവചിക്കും"

എന്നിങ്ങനെ വ്യാജം പറഞ്ഞാൽ അവൻ

ഈ ജനത്തിന് ഒരു പ്രസംഗിയായിരിക്കും.

വിമോചനം വാഗ്ദാനംചെയ്യപ്പെടുന്നു

12 "യാക്കോബേ, ഞാൻ നിനക്കുള്ളവരെ എല്ലാം ചേർത്തുകൊള്ളും;

യിസ്രായേലിൽ ശേഷിപ്പുള്ളവരെ ഞാൻ ശേഖരിക്കും;

തൊഴുത്തിലെ ആടുകളെപ്പോലെ,

മേച്ചൽപ്പുറത്തെ ആട്ടിൻകൂട്ടത്തെപ്പോലെ ഞാൻ അവരെ ഒരുമിച്ചുകൂട്ടും;

ആൾപെരുപ്പം ഹേതുവായി അവിടെ വലിയ മുഴക്കം ഉണ്ടാകും.

13 തകർക്കുന്നവൻ അവർക്ക് മുമ്പായി പുറപ്പെടുന്നു;

അവർ തകർത്ത് ഗോപുരത്തിൽകൂടി കടക്കുകയും പുറപ്പെടുകയും ചെയ്യും;

അവരുടെ രാജാവ് അവർക്ക് മുമ്പായും

യഹോവ അവരുടെ നായകനായും നടക്കും."