3 कारण व्यभिचारिणी स्त्रीच्या ओठातून मध टिपकतो,

आणि तिचे तोंड तेलापेक्षा गुळगुळीत असते,

4 पण शेवटी ती दवण्यासारखी कडू आहे,

आणि दुधारी तलवारी सारखी धारदार होते.

5 तिचे पाय मृत्यूकडे खाली जातात;

तिची पावले सर्व मार्गात अधोलोकात लागतात.

6 म्हणून तिला जीवनाची नीट वाट सापडत नाही.

तिची पावले भटकतात, ती कोठे जाते हे तिला समजत नाही.

7 आणि आता, माझ्या मुलांनो, माझे ऐका;

माझ्या तोंडची वचने ऐकण्यापासून दूर जाऊ नका.

8 तू आपला मार्ग तिच्यापासून दूर राख, आणि तिच्या घराच्या दाराजवळ सुध्दा जाऊ नको.

9 गेलास तर तुझी अब्रू इतरांच्या हाती जाईल,

आणि तुझ्या आयुष्याची वर्षे क्रूरजनाच्या हाती जातील;