1 ଇନି ଆସର୍ଡା ଡକୋ ତିଆତେ ଆଜନନା ଆସନ୍‌ ଞେନ୍‌ଡମ୍‌ ସର୍ଡାତନାୟ୍‌ ଗାମ୍‌ଲେ ଗବ୍‌ରିଜିଲନାୟ୍‌; ଆରି ଗିୟ୍‌ବା, କେନ୍‌ଆତେ ଜାୟ୍‌ ସୁକ୍କାତଡ୍‌ କାଜାନ୍‌ । 2 ଞେନ୍‌ କନିୟ୍‌ବରନ୍‌ ବର୍ରନାୟ୍‌, "ତିଆତେ ବାୟାଡମ୍‌," ସର୍ଡାନ୍‌ ଆବର୍ନେ ବର୍ରନାୟ୍‌, "ତିଆତେ ଇନି ଲୁମେ ?" 3 ଞେନ୍‌ ଏଙ୍ଗାଲେ ଗାସାଲ୍‌ଲୋଙନ୍‌ ଡଅଙ୍‌ଞେନ୍‌ ଗବ୍‌ରିଲାୟ୍‌ ଆରି ରୁଆଙନ୍‌ ଆଜାୟ୍‌ତା ମନ୍‌ରାଅନଞ୍ଜି ଆମେଙ୍‌ମତ୍ତାନ୍‌ ଇନି ଆଲନୁମ୍‌ ମନଙ୍‌, କେନ୍‌ଆତେ ଅନ୍‌ରଙ୍‌ ଜନାଇଞନ୍‌ ଜାୟ୍‌ ଏଙ୍ଗାଲେ ଏର୍‌ଗିଆନନ୍‌ ଞମ୍‌ରମ୍‌ତାୟ୍‌, କେନ୍‌ଆତେ ଅମଜିଞେନ୍‌ ସାୟ୍‌ଡଙ୍‌ଲାୟ୍‌, କେନ୍‌ ଆସମୟ୍‌ ଜାୟ୍‌ ମନଲୋଙ୍‌ଞେନ୍‌ ଗିଆନଲୋଙନ୍‌ ଡଅଙ୍‌ଞେନ୍‌ ତଙରନ୍‌ ଅବ୍‌ତୁଲିଁୟ୍‌ । 4 ଞେନ୍‌ ଞେନ୍‌ଡମନ୍‌ ଆସନ୍‌ ସୋଡ଼ା ସୋଡ଼ା କାବ୍ବାଡ଼ାନ୍‌ ଲୁମ୍‌ଲାୟ୍‌; ଞେନ୍‌ ଅସିଂଙଞ୍ଜି ଅବ୍‌ଜାଡାଲାୟ୍‌; ଞେନ୍‌ ଗୋଗୋୟ୍‌ଡମ୍‌ ଦ୍ରାକ୍ୟାକୋତ୍ତାନ୍‌ ଅବ୍‌ଜାଡାଲାୟ୍‌; 5 ଞେନ୍‌ ଆସନ୍‌ ତରଙ୍‌ଆନ୍ନା କୋତ୍ତାଞ୍ଜି ତୁବ୍‌ଲାୟ୍‌; ତି ତେତ୍ତେ ଅଡ଼୍‌କୋ ଆ ଜଅ ଆରଜତେନ୍‌ ଆ ରାନୁବ୍‌ଜି ଗୁଲାୟ୍‌; 6 ଞେନ୍‌ ଅରାନୁବନ୍‌ ଆବାୟ୍‌ ଆ ପନବ୍‌ଡାବ୍‌ କିନ୍‌ରେଙ୍‌ଲୋଙନ୍‌ ଡାଆନ୍‌ ଆ ରନୁଡ୍ଡା ଆସନ୍‌ ବଣ୍ତାନ୍‌ ଅବ୍‌ଗାୟ୍‌ଗାୟ୍‌ଲା; 7 ଞେନ୍‌ ଅଗୋୟ୍‌ କମ୍ୱାରିମରନ୍‌ ଡ କମ୍ୱାରିବଜନ୍‌ ଞିଲାୟ୍‌ ଆରି ଅସିଂଙ୍‌ଲୋଙ୍‌ଞେନ୍‌ କନୋଡନ୍‌ ଆଡ୍ରେଏଞ୍ଜି ଆ କମ୍ୱାରିମର୍‌ଜି ଡକୋଏଞ୍ଜି; ଜିରୁସାଲମ୍‌ଲୋଙ୍‌ ଆନା ଆନା ଞେନ୍‌ ସିଲଡ୍‌ ଆମ୍ମୁଙ୍‌ ଡକୋଲଞ୍ଜି ଆନିଞ୍ଜି ସିଲଡ୍‌ ଅଗୋୟ୍‌ କିମେଡନ୍‌ ଡ ମେଣ୍ଡା ଜନ୍ତୁଞ୍ଜି ଞେନ୍‌ଆତେ ଡକୋଏନ୍‌ । 8 ଞେନ୍‌ ରୁପାନ୍‌ ଡ ସୁନାନ୍‌, ଆରି ତରଙ୍‌ଆନ୍ନା ରାଜାନ୍‌ ତରଙ୍‌ଆନ୍ନା ଆ ରାଜ୍ୟ ସିଲଡ୍‌ ମଡ଼ଗାରାନ୍‌ ଆନର୍ଜେ ତର୍ତୁମ୍‌ଲାୟ୍‌; ଡଅଙ୍‌ଞେନ୍‌ ଆମଲବ୍‌ନୟ୍ ଆସନ୍‌ କନନ୍‌ମରନ୍‌ ଡ କନନ୍‌ବଜଞ୍ଜି ଞାଙ୍‌ଲାୟ୍‌, ଆରି ମନ୍‌ରାନ୍‌ ଆଇସୁମ୍‌ ଅନ୍ତମ୍‌ ଞେନ୍‌ ଆସନ୍‌ ଗୋଗୋୟ୍‌ଡମ୍‌ ସନ୍ନାବଜଞ୍ଜି ଞାଙ୍‌ଲାୟ୍‌ । 9 ଓଓ, ଞେନ୍‌ ସୋଡ଼ାମର୍‌ ଡକୋଲିଁୟ୍‌, ଆରି ଜିରୁସାଲମ୍‌ଲୋଙ୍‌ ଆନା ଆନା ଞେନ୍‌ ସିଲଡ୍‌ ଆମ୍ମୁଙ୍‌ ଡକୋଲଞ୍ଜି ଆନିଞ୍ଜି ସିଲଡ୍‌ ଞେନ୍‌ ସୋଡ଼ାମର୍‌ ଡକୋଲିଁୟ୍‌, ଆରି ବୁଡ୍ଡିଞେନ୍‌ ଆଙ୍ଗିୟ୍‌ ଅନସୋୟ୍‌ଲୋ । 10 ଆରି, ଅମଡ୍‌ଞେନ୍‌ ଇନି ଗିୟ୍‌ଲେ ଇସୁମେନ୍‌ ତିଆତେ ଅଡଙ୍‌ଡଙ୍‌ଲାୟ୍‌; ଉଗ୍ଗର୍‌ଞେନ୍ ଆ ସର୍ଡା ଆସନ୍‌ ଇନ୍ନିଙ୍‌ଜା ଅଡଙ୍‌ଡଙ୍‌ଲାୟ୍‌, ଇନିଆସନ୍‌ଗାମେଣ୍ତେନ୍‌ ଅଡ଼୍‌କୋ କାବ୍ବାଡ଼ାନ୍‌ ଆସନ୍‌ ଉଗ୍ଗର୍‌ଞେନ୍‌ ସର୍ଡାଏନ୍‌; ଆରି, ଅଡ଼୍‌କୋ କାବ୍ବାଡ଼ାଞେନ୍‌ ଆସନ୍‌ କେନ୍‌ଆତେ ବନ୍ତାଞେନ୍‌ ଡକୋଏନ୍‌ । 11 ସିଲଡ୍‌ତ୍ତେ ଅସିଞେନ୍‌ ଅଙ୍ଗା ଅଡ଼୍‌କୋନ୍‌ ଆକାବ୍ବାଡ଼ା ଡ ଅଙ୍ଗା ଅଙ୍ଗା ଆ କାବ୍ବାଡ଼ାଲୋଙ୍‌ ଞେନ୍‌ ମଙ୍ଗାଲିଁୟ୍‌, ତିଆସନ୍‌ ଞେନ୍‌ ଆଙାଙ୍‌ଲାୟ୍‌; ଆରି, ଗିୟ୍‌ବା, ଅଡ଼୍‌କୋନ୍‌ ଏର୍‌ମନଙ୍‌ ଆରି ରିଙ୍ଗେନ୍‌ ଗଙ୍‌ଲେ ଆ ଞରମ୍‌ତବନ୍‌ ଅନ୍ତମ୍‌, ଆରି ଓୟୋଙନ୍‌ ଆଜାୟ୍‌ତା ଇନ୍ନିଙ୍‌ ଲାବ ତଡ୍‌ ।

12 ତି ସିଲଡ୍‌ଲ୍ଲନ୍‌ ଞେନ୍‌ ଗିଆନନ୍‌, ବାୟାନ୍‌ ଡ ଏର୍‌ଗିଆନନ୍‌ ଆଗନିୟ୍‌ ଅବ୍‌ଜାଡାଲନାୟ୍‌; ଇନିଆସନ୍‌ଗାମେଣ୍ତେନ୍‌ ଅଙ୍ଗା ଆ ମନ୍‌ରା ରାଜାନ୍‌ ଆତିକି ଜିର୍ତାୟ୍‌, ଆନିନ୍‌ ଇନି ଏଙ୍ଗାନେ ? ଅଙ୍ଗାତେ ରାଜାଞ୍ଜି ପୁର୍ବାଃନ୍‌ ଲୁମେଞ୍ଜି ତିମା ଆତେ । 13 ସିଲଡ୍‌ତ୍ତେ ଞେନ୍‌ ଗିୟ୍‌ଲାୟ୍‌, ଏଙ୍ଗାଲେ ଲୋଙଡନ୍‌ ସିଲଡ୍‌ ସନାଆରନ୍‌ ମନଙ୍‌, ତିଅନ୍ତମ୍‌ ଏର୍‌ଗିଆନନ୍‌ ସିଲଡ୍‌ ଗିଆନନ୍‌ ମନଙ୍‌ । 14 ଗିଆନମରନ୍‌ ଆମଡ୍‌ ଆବବ୍‌ଲୋଙନ୍‌ ଡକୋତନ୍‌, ଆରି ଉଲ୍ଲୁମରନ୍‌ ଲୋଙଡ୍‌ଲୋଙନ୍‌ ବୁଲ୍ଲେତେ, ଡେଲୋଜନଙ୍‌ ଅଡ଼୍‌କୋ ମନ୍‌ରାନ୍‌ ଆସନ୍‌ ଆବୟନ୍‌ ତନଙଡନ୍‌ ଗଟେତେ, କେନ୍‌ଆତେ ଞେନ୍‌ ଗିୟ୍‌ଲାୟ୍‌ । 15 ଞେନ୍‌ ଅମଜିଲୋଙ୍‌ଞେନ୍‌ ଇୟମ୍‌ଲେ ବର୍ରନାୟ୍‌, "ଏଙ୍ଗାଲେ ଉଲ୍ଲୁମରନ୍‌ ଡେତଜି ତିଅନ୍ତମ୍‌ ଞେନ୍‌ ଆସନ୍‌ ଆବସରିନ୍‌ ତନଙଡନ୍‌ ଡେତେ; ତିଡେନ୍‌ ଞେନ୍‌ ଇନିବା ଅଗୋୟ୍‌ ଗିଆନମରନ୍‌ ଡେଲିଁୟ୍ ?" ସିଲଡ୍‌ତ୍ତେ ଞେନ୍‌ ମନ୍ନେ ମନ୍ନେ ଇୟମ୍‌ଲେ ବର୍ରନାୟ୍‌, କେନ୍‌ ମା କାଜାନ୍‌ । 16 ଇନିଆସନ୍‌ଗାମେଣ୍ତେନ୍‌ ଏଙ୍ଗାଲେ ଉଲ୍ଲୁମରନ୍‌, ତିଅନ୍ତମ୍‌ ଗିଆନମରନ୍‌ ମନ୍ନେନ୍‌ ଆଏଡ଼ର ଅଡ୍‌କୋଏ; ଇନିଆସନ୍‌ଗାମେଣ୍ତେନ୍‌ ପୁର୍ବାଃତେ ଅଡ଼୍‌କୋ ମନ୍‌ରାନ୍‌ କରୋଡାତଜି । ଓଓ ! ଉଲ୍ଲୁମରନ୍‌ ଏଙ୍ଗାଲେ ରବୁତେ, ଗିଆନମରନ୍‌ ଜାୟ୍‌ ତିଅନ୍ତମ୍‌ ରବୁତେ । 17 ସିଲତ୍ତେ ଞେନ୍‌ ଅନମେଙ୍‌ଞେନ୍‌ ଏଡ଼ୁର୍‌ମଡ୍‌ଲାୟ୍‌; ଇନିଆସନ୍‌ଗାମେଣ୍ତେନ୍‌ ଓୟୋଙନ୍‌ ଆଜାୟ୍‌ତା ଆତନୁବ୍‌ ଆକାବ୍ବାଡ଼ା ଞେନ୍‌ ଆସନ୍‌ ପରାନ୍‌ଡଣ୍ଡନ୍‌ ଡେଲିଁୟ୍; ଇନିଆସନ୍‌ଗାମେଣ୍ତେନ୍‌ ଅଡ଼୍‌କୋନ୍‌ ଏର୍‌ମନଙ୍‌ ଆରି ରିଙ୍ଗେନ୍‌ ଗଙ୍‌ଲେ ଆ ଞରମ୍‌ତବନ୍‌ ଅନ୍ତମ୍‌ ।

18 ଆରି, ଓୟୋଙନ୍‌ ଆଜାୟ୍‌ତା ଞେନ୍‌ ଅଙ୍ଗା ଅଙ୍ଗା ଆ କାବ୍ବାଡ଼ାଲୋଙ୍‌ ମଙ୍ଗାଲିଁୟ୍‌, ତି ଅଡ଼୍‌କୋନ୍‌ କାବ୍ବାଡ଼ାଞେନ୍‌ ଞେନ୍‌ ଏଡ଼ୁର୍‌ମଡ୍‌ଲାୟ୍‌; ଇନିଆସନ୍‌ଗାମେଣ୍ତେନ୍‌ ଅର୍ରସଣ୍ତୋଙ୍‌କୋଡ୍‌ଞେନ୍‌ ଆ ମନ୍‌ରାନ୍‌ ଆସନ୍‌ ତି ଅଡ଼୍‌କୋନ୍‌ ଅମ୍‌ରେଙ୍‌ଲେ ଜନିରନ୍‌ ଡେତେ । 19 ଆରି, ଆନିନ୍‌ ଗିଆନମରନ୍‌ ଅଡ଼େ ଉଲ୍ଲୁମର୍‌ ଡେତେ,କେନ୍‌ଆତେ ଆନା ଜନାଏ ? ଡେଲୋଜନଙ୍‌ ଓୟୋଙନ୍‌ ଆଜାୟ୍‌ତା ଇନି ଅଡ଼୍‌କୋନ୍‌ ଆକାବ୍ବାଡ଼ା ଞେନ୍‌ ଗିଆନନ୍‌ ଡ ମନଙ୍ଗାନ୍‌ ବାତ୍ତେ କାବ୍ବାଡ଼ାଲନାୟ୍‌ ତି ଅଡ଼୍‌କୋନ୍‌ ଲନୁମ୍‌ଞେନ୍‌ ଆନର୍ଜେ ଆନିନ୍‌ଆତେ ଡେତେ, କେନ୍‌ ମା କାଜାନ୍‌ । 20 ତିଆସନ୍‌ ଓୟୋଙନ୍‌ ଆଜାୟ୍‌ତା ଞେନ୍‌ ଅଙ୍ଗା ଅଙ୍ଗା ଆକାବ୍ବାଡ଼ା ଲୁମ୍‌ଲେ ମଙ୍ଗାଲିଁୟ୍‌, ତି ଅଡ଼୍‌କୋନ୍‌ ଆ ବିସୟଲୋଙ୍‌ ଉଗର୍‌ଞେନ୍‌ଆଡଙ୍‌ ଆନବ୍‌ମୁସୁକ୍କା ଉଲନାୟ୍‌ । 21 ଇନିଆସନ୍‌ଗାମେଣ୍ତେନ୍‌ ବମନ୍‌ରା ଗିଆନମରନ୍‌, ପଡ଼େନେନ୍‌ ଡ ଗନୟ୍‌ଗୟନ୍‌ ବାତ୍ତେ କାବ୍ବାଡ଼ାତନେ; ଡେଲୋଜନଙ୍‌ ଅଙ୍ଗା ଆ ମନ୍‌ରା ତିଆସନ୍‌ ଅଃକାବ୍ବାଡ଼ାନେ, ଆବନ୍ତାନ୍‌ ଆସନ୍‌ ଆନିନ୍‌ ତିଆତେ ଅମ୍‌ରେଙ୍‌ଲେ ଜିର୍ତେ । କେନ୍‌ ମା ଆତେ କାଜାନ୍‌ ଆରି ଜବ୍ର ପରାନ୍‌ସାତି । 22 ତିଡେନ୍‌ ଓୟୋଙନ୍‌ ଆଜାୟ୍‌ତା ମନ୍‌ରାନ୍‌ ଅଙ୍ଗା ଅଙ୍ଗା ଆ କାବ୍ବାଡ଼ାଲୋଙ୍‌ ଆରି ଉଗରନ୍‌ ଆସିନ୍ତାଲୋଙ୍‌ ମଙ୍ଗାତେ, ତି ଅଡ଼୍‌କୋନ୍‌ ସିଲଡ୍‌ ଆନିନ୍‌ ଇନି ଞାଙେ ? 23 ଇନିଆସନ୍‌ଗାମେଣ୍ତେନ୍‌ ଆଡିନ୍ନାନ୍‌ ଅଡ଼୍‌କୋନ୍‌ ଆ କାବ୍ବାଡ଼ାନ୍‌ ଡୁକ୍କଡମ୍‌ ଆରି ସନିନ୍ତାଡାନ୍‌; ତଗଲନ୍‌ ଜାୟ୍‌ ଆ ଉଗରନ୍‌ ଲୋଲୋନେନ୍‌ ଅଞାଙେ । କେନ୍‌ଆତେ ଜାୟ୍‌ ଏର୍‌ମନଙ୍‌ । 24 ଗାଗାନେନ୍‌ ଡ ଗାଡାନେନ୍‌ ଆରି ଆ କାବ୍ବାଡ଼ାନ୍ନେଲୋଙନ୍‌ ଆ ପରାନ୍ନାନ୍‌ଆଡଙ୍ ଆନବ୍‌ସର୍ଡା ଆପାଲ୍‌ତେଙ୍‌ ମନ୍‌ରାନ୍‌ ଆସନ୍‌ ଅଗୋୟ୍‌ ସୁକ୍କା ଆବିସୟ ଅବୟ୍‌ତଡ୍‌ । ଆରି ଞେନ୍‌ ଗିୟ୍‌ଲାୟ୍‌ ଡ କେନ୍‌ଆତେ ଇସ୍ୱରନ୍‌ ଆମଙ୍‌ ସିଲଡ୍‌ ଜିର୍ତାୟ୍‌ । 25 ଇନିଆସନ୍‌ଗାମେଣ୍ତେନ୍‌ ଞେନ୍‌ ସିଲଡ୍‌ ଆନା ଗୋଗୋୟ୍‌ ଗାଗାଲନ୍‌ ରପ୍ତିଏ ଅଡ଼େ ଜୋମ୍‌ଲେଗାଲେ ସର୍ଡାଲନ୍‌ ଡକୋଲନ୍‌ ରପ୍ତିଏ ? 26 ଇନିଆସନ୍‌ଗାମେଣ୍ତେନ୍‌ ଅଙ୍ଗା ଆ ମନ୍‌ରାଜି ଇସ୍ୱରନ୍‌ଆଡଙ୍‌ ଅବ୍‌ସର୍ଡାତଜି, ଆନିଞ୍ଜିଆଡଙ୍‌ ଆନିନ୍‌ ଗିଆନନ୍‌, ପଡ଼େନେନ୍‌ ଡ ସର୍ଡାନେନ୍‌ ତିୟ୍‌ତେ; ବନ୍‌ଡ ଆନିନ୍‌ ଇର୍ସେମରଞ୍ଜିଆଡଙ୍‌ ଅର୍ଜେନ୍‌ ଆତନର୍ତୁମ୍‌ ଡ ଆକନୁଡ଼ାୟ୍‌ ଆ କାବ୍ବାଡ଼ା ତିୟ୍‌ତେ । ବନ୍‌ଡ ଆନିନ୍‌ ଆନିଞ୍ଜି ଆନର୍ଜେନ୍‌ ଇସ୍ୱରନ୍‌ଆଡଙ୍‌ ଆରବ୍‌ସର୍ଡାତେଞ୍ଜି ଆମନ୍‌ରାଜିଆଡଙ୍‌ ତିୟ୍‌ତେ । କେନ୍‌ଆତେ ଜାୟ୍‌ ଏର୍‌ମନଙ୍‌ ଆରି ରିଙ୍ଗେନ୍‌ ଗଙ୍‌ଲେ ଆ ଞରମ୍‌ତବନ୍‌ ଅନ୍ତମ୍‌ ।