ରାଜାନ୍ଆଡଙ୍ ମାନ୍ନେବା
1 ଗିଆନମରନ୍ ଅନ୍ତମ୍ ଆନା ଡକୋ ? ଆରି ଗରାମ୍ଗାମଞ୍ଜି ଆଜନନା ଆସନ୍ ଆନା ଡକୋ ? ଗିଆନନ୍ ମନ୍ରାନ୍ ଆମୁକ୍କା ଅବ୍ସର୍ଡାତେ ଆରି ମୁକ୍କାନ୍ ଆ ରଡୋବର୍ ଅବ୍ତାନ୍ନେତେ ।
2 ଆମନ୍ ରାଜାନ୍ ଆ ବନାଁୟ୍ବର୍ ମାନ୍ନେଆ, ଞେନ୍ ବର୍ତନାୟ୍, ଆମନ୍ ଇସ୍ୱରନ୍ ଆତେମଡ୍ଲୋଙ୍ ଆ ସରିବ୍ଡଜେନ୍ ଆସନ୍ ତିଆତେ ଲୁମା । 3 ରାଜାନ୍ ଆମୁକ୍କାବା ସିଲଡ୍ ଡୁଙ୍ଲନ୍ ଆଜନିର୍ ଆସନ୍ ତଣ୍ତ୍ରାଡଙମ୍; କାଜାନ୍ ଆବର୍ନେ ଆସନ୍ ଡନେଡାଲେ ତନଙ୍ଡଙେ; ଇନିଆସନ୍ଗାମେଣ୍ତେନ୍ ଇନି ଆଇସୁମନ୍, ଆନିନ୍ ତିଆତେ ଲୁମ୍ତେ । 4 ଇନିଆସନ୍ଗାମେଣ୍ତେନ୍ ରାଜାନ୍ ଆବର୍ନେ ରନପ୍ତିଡମ୍, ଆରି, ଆମନ୍ ଇନି ଲୁମ୍ତେ, କେନ୍ଆତେ ଆନିନ୍ଆଡଙ୍ ଆନା ବର୍ରେ ରପ୍ତିଏ ? 5 ଅଙ୍ଗା ଆମନ୍ରା ରାଜାନ୍ ଆ ବନାଁୟ୍ବର୍ ମାନ୍ନେତେ, ଆନିନ୍ ଏରାମ୍ମୁୟ୍ ଡକୋତନ୍, ଇନିଆସନ୍ଗାମେଣ୍ତେନ୍ ଗିଆନମରନ୍ ଆ ମନ ସମୟନ୍ ଡ ପନ୍ସୁଆତିନ୍ ଜନାତେ; 6 ଇନିଆସନ୍ଗାମେଣ୍ତେନ୍ ଅଡ଼୍କୋନ୍ ଆବର୍ନେ ଆସନ୍ ସମୟନ୍ ଡ ପନ୍ସୁଆତିନ୍ ଡକୋ; ଡେଲୋଜନଙ୍ଡେନ୍ ମନ୍ରାନ୍ ଆ ଡୁକ୍କ ଆନିନ୍ ଆସନ୍ ଜବ୍ର ଅସୁଡାଡମ୍; 7 ଇନିଆସନ୍ଗାମେଣ୍ତେନ୍ ଇନି ଗଟେତେ, ତିଆତେ ଆନିନ୍ ଅଃଜ୍ଜନାଏ ଆରି ଏଙ୍ଗାଗୋ ଆତନଙଡ୍ ଗଟେତେ, କେନ୍ଆତେ ଆନିନ୍ଆଡଙ୍ ଆନା ଅବ୍ଜନାଲେ ରପ୍ତିଏ ? 8 ତନଙ୍ୟମନ୍ ଡଙ୍ଲେ ଆଡନକ୍କୋ ଆସନ୍ ତନଙ୍ୟମନ୍ ଆତୋଣ୍ତୋ ଆନ୍ନିଙ୍ ଆ ମନ୍ରା ବୋର୍ସାନ୍ ଅବୟ୍ତଡ୍; ଅଡ଼େ ରନବୁ ଡିନ୍ନାନ୍ ଆତୋଣ୍ତୋ ଆନିନ୍ ଇନ୍ନିଙ୍ ବୋର୍ସାତଡ୍; ତି ଆଜୁଜ୍ଜେ ସିଲଡ୍ ଏଅମ୍ରେଙ୍ଡଙ୍; ତିଅନ୍ତମ୍ ପେଲ୍ଲାନ୍ ପେଲ୍ଲାମରନ୍ଆଡଙ୍ ଡୋବ୍ଲେ ଅରପ୍ତିଏ ।
ପେଲ୍ଲାନ୍ ଡ ଡରମ୍ମନ୍
9 କେନ୍ ଅଡ଼୍କୋନ୍ ଞେନ୍ ଗିୟ୍ଲାୟ୍ ଆରି ଓୟୋଙନ୍ ଆଜାୟ୍ତା ଅଙ୍ଗା ଅଡ଼୍କୋନ୍ ଆ କାବ୍ବାଡ଼ା ଲନୁମନ୍ ଡେତେ, ସିଲଡ୍ତ୍ତେ ଞେନ୍ ଡାଲୁଡ୍ଲେ ଅମ୍ଡଙ୍ଲାୟ୍; ଆଙ୍ଗିୟ୍ ଆଙ୍ଗିୟ୍ ଅବୟ ମନ୍ରାନ୍ ଆନ୍ନାମରନ୍ ଆତୋଣ୍ତୋ ଏର୍ସୁକ୍କାନ୍ ଆନମେ ଆସନ୍ ରନପ୍ତିନ୍ ଡକୋତେ । 10 ଓଓ, ଞେନ୍ କେନ୍ଆତେ ଗିୟ୍ଲାୟ୍ ଡ; ପେଲ୍ଲାମରନ୍ ରବ୍ବୁଏନ୍ ଆରି ଆନିନ୍ଆଡଙ୍ ତନିଲନ୍ ଡେଏନ୍, ବନ୍ଡ ମନ୍ରାଞ୍ଜି ତି ମସାନ୍ନିନ୍ ସିଲଡ୍ ଆୟର୍ତନାଞଞ୍ଜି ଆଡିଡ୍ ଆନିଞ୍ଜିଆଡଙ୍ ସେଙ୍କେଏଞ୍ଜି । ଅଙ୍ଗା ଆମନ୍ରାଜି ତି ଆଗଡ଼ାଲୋଙ୍ ପରାନ୍ସାତିନ୍ ଆକାବ୍ବାଡ଼ା ଲୁମେଞ୍ଜି, କେନ୍ଆତେ ଜାୟ୍ କାଜାନ୍ । 11 ପରାନ୍ସାତ୍ତିନ୍ ଆ କାବ୍ବାଡ଼ାଜି ଆ ବିରୁଦଲୋଙ୍ ପନବ୍ରଡନ୍ ଲଜିର୍ ଅଡ୍ଡେଏନ୍ ଆସନ୍ ମନ୍ରାଅନଞ୍ଜି ଆ ଉଗର୍ ପରାନ୍ସାତ୍ତିନ୍ ଆ କାବ୍ବାଡ଼ାଜି ଆଲନୁମ୍ ଆସନ୍ ମଗାଡ୍ତଜି । 12 ଇର୍ସେମରନ୍ ବସଅ ତର ପରାନ୍ସାତ୍ତିନ୍ ଆ କାବ୍ବାଡ଼ାଜି ଲୁମ୍ଲେ ଅଗୋୟ୍ ଡିନ୍ନା ଅମେଙ୍ଲେ ଡକୋତନ୍, ଡେଲୋଜନଙ୍ ଞେନ୍ ଆଜାଡ଼ିନ୍ ଗାମ୍ଲେ ଜନାଲେ ରପ୍ତିତାୟ୍ ଡ, ଇସ୍ୱରନ୍ଆଡଙ୍ ଆମ୍ରାନ୍ନେତବନ୍ ଡ ଆବ୍ରତଙ୍ତେନ୍ ଆମନ୍ରାଜି ଆସନ୍ ସୁକ୍କା ଡେତେ; 13 ବନ୍ଡ ପେଲ୍ଲାମରଞ୍ଜି ଆସନ୍ ସୁକ୍କା ଅଡ୍ଡେଏଜି, ଆନମେଙଞ୍ଜି ଉମ୍ମୁଲନ୍ ଅନ୍ତମ୍, ଆରି ଆନିଞ୍ଜି ଅଗୋୟ୍ ଡିନ୍ନା ଅମେଙ୍ଲେ ଅଡ୍କୋନେଜି; ଇନିଆସନ୍ଗାମେଣ୍ତେନ୍ ଇସ୍ୱରନ୍ଆଡଙ୍ ଆନିଞ୍ଜି ଅବତଙେଞ୍ଜି । 14 ପୁର୍ତିଲୋଙନ୍ ଅବୟ ଆନ୍ନା କାଜାନ୍ ତନଙଡନ୍ ଡକୋ; ତି ଆ ତନଙଡ୍ ପେଲ୍ଲାମରଞ୍ଜି ଆସନ୍ ଗଟେତେ, ବନ୍ଡ ତିଆତେ ମଡ଼ିର୍ମରଞ୍ଜି ଞାଙ୍ତଜି, ଆରି ଇନି ଆ ତନଙଡ୍ ମଡ଼ିର୍ମରଞ୍ଜି ଆସନ୍ ତିଆତେ ପେଲ୍ଲାମରଞ୍ଜି ଆସନ୍ ତନଙଡନ୍ ଡେତେ, ଞେନ୍ ଜନାଲିୟ୍ ଡ, କେନ୍ଆତେ ଜାୟ୍ କାଜାନ୍ । 15 ସିଲଡ୍ତ୍ତେ ଞେନ୍ ସର୍ଡାଲନ୍ ସେଙ୍କେଲାୟ୍, ଇନିଆସନ୍ଗାମେଣ୍ତେନ୍ ଜନୋମନ୍ ଡ ଗନାନ୍ ଡ ସର୍ଡାନେନ୍ ଆପାଲ୍ତେଙ୍ ଓୟୋଙନ୍ ଆଜାୟ୍ତା ମନ୍ରାନ୍ଆଡଙ୍ ଆସନ୍ ଆରି ଇନ୍ନିଙ୍ ମନଙ୍ ଆବିସୟ୍ତଡ୍; ତିଆସନ୍ ଆନିନ୍ ଓୟୋଙନ୍ ଆଜାୟ୍ତା ଇସ୍ୱରନ୍ ଆତନିୟ୍ ଆନମେଙ୍ ଡିନ୍ନା ଅଙ୍ଗା ଅଙ୍ଗା ଆକାବ୍ବାଡ଼ା ଲୁମ୍ତେ, ତି ଅଡ଼୍କୋନ୍ ଆନିନ୍ଆଡଙ୍ ସଣ୍ତୋଙ୍ତେ । 16 ଅଙ୍ଗା ଆଡିନ୍ନା ଞେନ୍ ଗିଆନନ୍ ଆଗରାମ୍ଗାମ୍ ଆ ଜନନା ଆସନ୍ ଞେନ୍ ଏର୍ରାୟ୍ଗୋୟ୍ଲାୟ୍, ଡ ଇନି ପୁର୍ତିଲୋଙନ୍ ଆଗରଡ୍ଡେଲ୍ତେନ୍ ଆକାବ୍ବାଡ଼ା ଆଗନିୟ୍ ଡାଲୁଡ୍ଲେ ଅମ୍ଡଙ୍ଲାୟ୍ ଇନିଆସନ୍ଗାମେଣ୍ତେନ୍ ତମ୍ୱାତଗଲ୍ ଅଡ୍ଡିମଡେଞ୍ଜି ଆମନ୍ରାଜି ଡକୋ । 17 ତିଆଡିଡ୍ ଞେନ୍ ଇସ୍ୱରନ୍ ଅଡ଼୍କୋନ୍ ଆକାବ୍ବାଡ଼ା ଗିୟ୍ଲାୟ୍ ଡ, ମନ୍ରାନ୍ ଓୟୋଙନ୍ ଆଜାୟ୍ତା ଆଗରଡ୍ଡେଲ୍ତେନ୍ ଆକାବ୍ବାଡ଼ା ଞାଙ୍ଲେ ଅରପ୍ତିଏ; ଇନିଆସନ୍ଗାମେଣ୍ତେନ୍ ତିଆତେ ଆସନାୟ୍ ଆସନ୍ ମନ୍ରାନ୍ ଡିଅଙ୍ଗା କାବ୍ବାଡ଼ାଲନ୍ ଜନଙ୍ଡେନ୍ ତିଆତେ ଞାଙ୍ଲେ ଅରପ୍ତିଏ; ଆରି, ଗିଆନମରନ୍ ତିଆତେ ଜନନାନ୍ ଆସନ୍ ସିନ୍ତାଲନ୍ ଜନଙ୍ଡେନ୍ ସାୟ୍ଲେ ଅରପ୍ତିଏ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)