ଞନଙ୍‌ଞଙ୍‌ବର୍‌ 6

1 ଓୟୋଙନ୍‌ ଆଜାୟ୍‌ତା ଞେନ୍‌ ଅବୟ ଡୁକ୍କଡମ୍‌ ଆବର୍ନେ ଗିୟ୍‌ଲାୟ୍‌, ଆରି ତିଆତେ ମନ୍‌ରାଞ୍ଜି ଆସନ୍‌ ଅରିର୍ସୋୟମ୍‌ଡାନ୍‌; 2 ଇସ୍ୱରନ୍‌ ଆନା ଆନାଆଡଙ୍‌ ଡିୟ୍‌ତେ ଆରନ୍ନା, ଗନମାଙନ୍‌ ଡ ପନେମେଙନ୍‌ ତିୟ୍‌ତେ ଡ, ଇନିଜି ଆନିଞ୍ଜି ଇସୁମ୍‌ତଜି ତିଆତେ ଆନିନ୍‌ ତିୟ୍‌ତେ, ଡେଲୋଜନଙ୍‌ଡେନ୍‌ ଆନିଞ୍ଜିଆଡଙ୍‌ ତିଲୋଙ୍‌ ସର୍ଡାନେନ୍‌ ଅଃତିୟେ, ବନ୍‌ଡ କେନ୍‌ଆତେ ଆନ୍ନାମରନ୍‌ ତିଆତେ ବୋଗତେ; କେନ୍‌ଆତେ ଏର୍‌ମନଙ୍‌ ଆରି ପରାନ୍‌ସାତ୍ତିନ୍‌ ଆ ଜାଲ ଅନ୍ତମ୍‌ । 3 ଅବୟ୍‌ ମନ୍‌ରାନ୍‌ ବସଅ ଅଅନନ୍‌ କୋଡ୍‌ଲେ ଅଗୋୟ୍‌ ବର୍ସେଙ୍‌ ଅମେଙ୍‌ଲେ ଡକୋଲନ୍‌ ରପ୍ତିଏନ୍‌ଡେନ୍‌, ବନ୍‌ଡ ଆ ପରାନ୍ନାନ୍‌ ଅସମୟ୍‌ ସୁକ୍କାତଡ୍‌ ଡେନ୍‌, ଆରି ଆନିନ୍‌ଆଡଙ୍‌ ତନିଲନ୍‌ ଅଡେଲୋଡେନ୍‌, ତିଡେନ୍‌ ଞେନ୍‌ ବର୍ତନାୟ୍‌, ତି ଆମନ୍‌ରା ଆର୍‌ପାୟ୍‌ ଜନମ୍ମୁ ଆଡ୍ରେନ୍‌ ଆଡିଡ୍‌ ଆ ରବୁଏନ୍‌ ଆରେସାସିୟ୍‌ ମନଙ୍‌; 4 ଇନିଆସନ୍‌ଗାମେଣ୍ତେନ୍‌ ତି ଆ ରବ୍ବୁ କନୋଡ୍‌ ପସିଜନ୍‌ ଆ ଓମାଡାନ୍‌ ଅନ୍ତମ୍‌ ଜିର୍ତାୟ୍‌ ଆରି ଲୋଙଡ୍‌ଲୋଙନ୍‌ ଜିର୍ତେ, ଆରି ଆଞୁମନ୍‌ ଲୋଙଡ୍‌ଲୋଙନ୍‌ ଞନୁମନ୍‌ ଡେତେ; 5 ଆରି, କେନ୍‌ ଆରେସାସିୟ୍‌ ଓୟୋଙନ୍‌ ଅଗିୟ୍‌ଲୋ କି ଅଃଜ୍ଜନାଲୋ; ଡେଲୋଜନଙ୍‌ଡେନ୍‌ କେନ୍‌ ଆରବୁ କନୋଡନ୍‌ ଆଡ୍ରେନ୍‌ ଆରେସାସିୟ୍‌ ତି ମନ୍‌ରାନ୍‌ ସିଲଡ୍‌ ଅଗୋୟ୍‌ ଲୋଲୋନେନ୍‌ ଞାଙ୍‌ତେ; 6 ଅଙ୍ଗା ଆମନ୍‌ରା ଆନିନ୍‌ ବାଗୁ ଅଜାର ବର୍ସେଙ୍‌ ଅମେଙ୍‌ଲେ ଡକୋଲନ୍‌ ନଜଙ୍‌ଡେନ୍‌ ଅଡ଼୍‌କୋଞ୍ଜି ପଙ୍‌ ଆବୟନ୍‌ ଆଡ୍ରକୋନେଲୋଙ୍‌ ଅଜିରେଜି ? 7 ମନ୍‌ରାନ୍‌ ଅଡ଼୍‌କୋନ୍‌ ଆକାବ୍ବାଡ଼ା ଆମୁକ୍କାନ୍‌ ଆସନ୍‌, ଡେଲୋଜନଙ୍‌ଡେନ୍‌ ଗାଗାଲନ୍‌ ଜାୟ୍‌ ଡେନ୍‌ ଆନିନ୍‌ ଆଡୋଲଜନ୍‌ ଆଇସ୍ସୁମ୍‌ ଅବରିଜେ । 8 ତିଆସନ୍‌ ଉଲ୍ଲୁମରନ୍‌ ସିଲଡ୍‌ ଗିଆନମରନ୍‌ ଇନି ଆଲାବ ? ଆରି, ଅଙ୍ଗା ଆ ଡୋଲୟ୍‌ମର୍‌ ଆମେଙ୍‌ମରଞ୍ଜି ଆତେମଡ୍‌ଲୋଙ୍‌ ମନଙ୍‌ ଅମେଙ୍‌ଲେ ଗୟେନ୍‌ ଜନଙ୍‌ଡେନ୍‌ ଇନି ଆଲାବ ? 9 ମନନ୍‌ ଆଇସୁମ୍‌ ଆପାଲ୍‌ତେଙ୍‌ ଅମଡନ୍‌ ବାତ୍ତେ ଆଗନିୟ୍‌ ମନଙ୍‌; କେନ୍‌ଆତେ ଜାୟ୍‌ କାଜ୍ଜାନ୍‌ ଆରି ରିଙ୍ଗେନ୍‌ ଗଙ୍‌ଲେ ଆଞନମ୍‌ ଅନ୍ତମ୍‌ । 10 ଇନିଜି ଅଡ଼୍‌କୋନ୍‌ ଆତନଙଡ୍‌ ଗଟେଏନ୍‌, ତିଆତେ ଆମ୍ମୁଙ୍‌ ମା ଅନବ୍‌ଞୁମନ୍‌ ଡେଏନ୍‌; ଆରି ଆନିନ୍‌ ମନ୍‌ରା ଗାମ୍‌ଲେ ଜନ୍ନା; ଆରି, ମନ୍‌ରାନ୍‌ ଆନିନ୍‌ଡମନ୍‌ ସିଲଡ୍‌ ଜବ୍ର ବୋର୍ସାମରନ୍‌ ସରିନ୍‌ ସଙ୍ଗତାଲେ ଅରପ୍ତିଏ । 11 କାଜାବରନ୍‌ ଅଗୋୟ୍‌ ଡକୋ, କେନ୍‌ଆତେ ମନ୍‌ରାନ୍‌ ଆସନ୍‌ ଇନି ଆଲାବ ? 12 କେନ୍‌ ଡୋୟ୍‌ନ୍ନା ଅନମେଙ୍‌ଲୋଙନ୍‌ ଇନି ଆଜନବ୍‌ ମନଙ୍‌ ତିଆତେ ଆନା ରପ୍ତି ଜନାଏ ? ଇନିଆସନ୍‌ଗାମେଣ୍ତେନ୍‌ ମନ୍‌ରାନ୍‌ ଆନମେଙ୍‌ ଉମ୍ମୁଲନ୍‌ ଅନ୍ତମ୍‌ ଜିର୍ତେ, ଆନିନ୍‌ ଆରବୁତେନ୍‌ ଆତିକ୍କି ଓୟୋଙନ୍‌ ଆଜାୟ୍‌ତା ଇନି ଆତନଙଡ୍‌ ଡେତେ ତିଆତେ ଆନିନ୍‌ଆଡଙ୍‌ ଆନା ଅବ୍‌ଜନାଏ ?