1 ଆମ୍ୱେଞ୍ଜି ଇସ୍ୱରନ୍‌ ଆସିଂଙ୍‌ ଏଜିର୍ତେନ୍‌ ଆଡିଡ୍‌ ଅସିବେନ୍‌ ଡ ଅଜଙ୍‌ବେନ୍‌ ଆବୟ୍‌ଲେ ଡକୋବା; ଇନିଆସନ୍‌ଗାମେଣ୍ତେନ୍‌ ଉଲ୍ଲୁମରଞ୍ଜି ଅନମଙନ୍‌ ଆ ସୋରୋପ୍ପାୟ୍‌ ଆପାଲ୍‌ତେଙ୍‌ ଅମ୍‌ଡଙ୍‌ଲେ ଅବ୍‌ଡମ୍‌ନେନ୍‌ ମନଙ୍‌; ବନ୍‌ଡ ଆନିଞ୍ଜି ମନଙ୍‌ତଡନ୍‌ ଆକାବ୍ବାଡ଼ା ଏଲୁମ୍‌ତାୟ୍‌ ଗାମ୍‌ଲେ ଅଃଜ୍ଜନାଏଜି । 2 ଆମ୍ୱେନ୍‌ ଏବର୍ତନ୍‌ ଆମ୍ମୁଙ୍‌ ଇୟମ୍‌ଲେ ବର୍ନାବା ଆରି ଇସ୍ୱରନ୍‌ ଆତେମଡ୍‌ଲୋଙ୍‌ ଇନ୍ନିଙ୍‌ ଆବର୍ନେ ଆସନ୍‌ ଉଗର୍‌ବେନ୍‌ ଅବ୍‌ତାଡ଼ନ୍‌ ବର୍ଡଙ୍‌ନେ; ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ ରୁଆଙ୍‌ଲୋଙନ୍‌ ଡକୋ ଆରି ଆମ୍ୱେନ୍‌ ପୁର୍ତିଲୋଙନ୍‌ ଡକୋଜି; ତିଆସନ୍‌ ବର୍ନେବେନ୍‌ ଅସୋୟ୍‌ ଡେଏତୋ । 3 ଇନିଆସନ୍‌ଗାମେଣ୍ତେନ୍‌ ଗୋଗୋୟ୍‌ କାବ୍ବାଡ଼ାନ୍‌ ଆନିୟମ୍‌ଲୋଙ୍‌ ଗୁମ୍‌ନ୍ତେତେ; ଆରି ଅଗୋୟ୍‌ ବର୍ନେଲୋଙନ୍‌ ଉଲ୍ଲୁମରନ୍‌ ଆସର୍ରଙ୍‌ ଅନ୍ତମ୍‌ ଡେତେ । 4 ଆମ୍ୱେନ୍‌ ଇସ୍ୱରନ୍‌ ଆମଙ୍‌ବା ଏବାସାଲନ୍‌ଡେନ୍‌, ତିଆତେ ତନିୟନ୍‌ ଆସନ୍‌ ଏଅବ୍‌ଡିଙ୍‌ଡଙ୍‌ନେ; ଇନିଆସନ୍‌ଗାମେଣ୍ତେନ୍‌ ଉଲ୍ଲୁମରଞ୍ଜି ଆମଙ୍‌ଲୋଙ୍‌ ଇସ୍ୱରନ୍‌ ଅଲଡୟ୍‌ଜେ; ଆମ୍ୱେନ୍‌ ଇନିଜି ଏବାସାତନ୍‌, ତିଆତେ ତନିୟନ୍‌ କରୋଡାଡଙ୍‌ବେନ୍‌ । 5 ବାସାଲନ୍‌ ଏର୍ତନିୟନ୍‌ ଆପାଲ୍‌ତେଙ୍‌ ଆମ୍ୱେନ୍‌ ଏବାସାଲନ୍‌ଡେନ୍‌ ମନଙ୍‌ । 6 ବର୍ନେବାତ୍ତେ ଡଅଙ୍‌ନମ୍‌ ଇର୍ସେ ତଙର୍‌ଗଡ୍‌ ଆଜନିର୍‌ ଆସନ୍‌ ତିୟ୍‌ଡଙ୍‌; ଅଡ଼େ କେନ୍‌ଆତେ ଆଡ଼ଲିଁୟ୍‌ ଗାମ୍‌ଲେ ପାଙ୍‌ଲଙ୍‌ବର୍‌ମରନ୍‌ ଆତେମଡ୍‌ଲୋଙ୍‌ ଏବର୍‌ଡଙ୍‌ନେ; ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ ସରଙ୍‌ଲୋଙ୍‌ବେନ୍‌ ବରାବ୍‌ଡାଲେ ଅସିନମ୍‌ ଆକାବ୍ବାଡ଼ା ଅମୋସାତେ ? 7 ଇନିଆସନ୍‌ଗାମେଣ୍ତେନ୍‌ ଅଗୋୟ୍‌ ଗନୁମ୍‌ତେନ୍‌ ଡ ଅଗୋୟ୍‌ ବର୍ନେନ୍‌ କାଜାନ୍‌, ବନ୍‌ଡ ଆମନ୍‌ ଇସ୍ୱରନ୍‌ଆଡଙ୍‌ ବତଙ୍‌ବା ।

8 ଆନ୍ନିଙ୍‌ ଆରାଜ୍ୟଲୋଙ୍‌ ଡୋଲୟ୍‌ମରନ୍‌ ଆଡଅଙ୍‌ ଜନୁରୁନ୍‌, ଅରିର୍ସୋୟମ୍‌ଡାନ୍‌ ଆ ପନ୍‌ସୁଆତି ଡ ଅନିୟାନ୍‌ ଆନମେ ଏଗିଜେନ୍‌ ଡେନ୍‌, ତିଡେନ୍‌ ତି ଆ ବିସୟଲୋଙ୍‌ ସାନ୍ନି ଡେଡଙ୍‌ବେନ୍‌; ଇନିଆସନ୍‌ଗାମେଣ୍ତେନ୍‌ ସୋଡ଼ାଗଡ୍‌ମରନ୍‌ ଆନିନ୍‌ ଆତୋଣ୍ତୋ ଆ ସୋଡ଼ାଗଡ୍‌ମର୍‌ ଗିୟ୍‌ତେ ଡ କେନ୍‌ ବାଗୁଞ୍ଜି ଆତୋଣ୍ତୋ ବ ସୋଡ଼ାମର୍‌ ଡକୋ । 9 ଆରି, ପୁର୍ତିନ୍‌ ଆ ଜଅ ଅଡ଼୍‌କୋ ମନ୍‌ରାନ୍‌ ଆସନ୍‌; ବସେଙନ୍‌ ବାତ୍ତେ ରାଜାନ୍‌ ଆମନକୁନ୍‌ ଜନ୍‌ରୋମନ୍‌ ତର୍ତୁମ୍‌ତେ । 10 ଅଙ୍ଗା ଆମନ୍‌ରା ତଙ୍କାନ୍‌ ଡୁଙ୍‌ୟମ୍‌ତେ, ତି ଆ ତଙ୍କା ବାତ୍ତେ ଅବ୍ବୋଓଏ; ଅଡ଼େ ଅଙ୍ଗା ଆମନ୍‌ରା ଗନମାଙନ୍‌ ଡୁଙ୍‌ୟମ୍‌ତେ, ଆନିନ୍‌ ଆରନ୍ନା ଆନବ୍‌ଗୋଗୋୟ୍‌ଲୋଙ୍‌ ଅସୟୁମେ; କେନ୍‌ଆତେ ଜାୟ୍‌ କାଜାନ୍‌ । 11 ଆରନ୍ନା ଗୋଗୋଜେନ୍‌ଡେନ୍‌ ଜନୋମ୍‌ମରନ୍‌ ଜାୟ୍‌ ଗୋଗୋୟ୍‌ତେ; ତିଆସନ୍‌ ଅମଡ୍‌ଡମ୍‌ଞେନ୍‌ ଆଗନିୟ୍‌ ଅମ୍‌ରେଙ୍‌ଲେ ସାଉକାରନ୍‌ ଇନି ଆ ଲାବ ? 12 କାବାଡ଼ାମରନ୍‌ ଅସୋୟ୍‌ ଡ ଗୋଗୋୟ୍‌ ଜୋମେନ୍‌ଡେନ୍‌ ଆନିନ୍‌ ମନଙ୍‌ ଡିମଡ୍‌ତେ, ବନ୍‌ଡ ଗମାଙ୍‌ମରନ୍‌ ଆନର୍ଜେଲୋଙ୍‌ ଆନିନ୍‌ ଆଙ୍ଗିୟ୍‌ଜା ମନଙ୍‌ ଅଡିମଡେ । 13 ଓୟୋଙନ୍‌ ଆଜାୟ୍‌ତା ବବ୍ରନ୍ତଙନ୍‌ ଆ ପନବ୍‌ରଡ୍‌ ଞେନ୍‌ ଗିୟ୍‌ଲାୟ୍‌ ଡ, ଗମାଙ୍‌ମରନ୍‌ ଆନିନ୍‌ ଆନର୍ଜେନ୍‌ ଆ ତନର୍ତୁମନ୍‌ ବାତ୍ତେ ପବ୍‌ରଡ୍‌ଡମ୍‌ତନ୍‌; 14 ଆରି, କରମ୍ମାତଡନ୍‌ ବାତ୍ତେ ତି ଅଡ଼୍‌କୋନ୍‌ ଆନର୍ଜେ ରସମ୍‌ତେ; ଆରି, ଆନିନ୍‌ କୋଡନେନ୍‌ ଡେନ୍‌, ଆସିଲୋଙନ୍‌ ଇନ୍ନିଙ୍‌ ଅଡ୍‌କୋଏ । 15 ଏଙ୍ଗାଲେ ନନନ୍‌ ଆକମ୍ପୋଙ୍‌ଲୋଙ୍‌ ସିଲଡ୍‌ ଜିର୍ରାୟ୍‌, ତିଅନ୍ତମ୍‌ ଆଉର୍ଡିଜନ୍‌ ଆଜିର୍ରାଞନ୍‌ ଅନ୍ତମ୍‌ ୟର୍ତନେ, ତିଅନ୍ତମ୍‌ ଇନ୍‌ଲେନ୍‌ ଆଉର୍ଡିଜନ୍‌ ଜିର୍ତବୋ, ଆକ୍ରାବ୍ବାଡ଼ାଲନ୍‌ ଆସନ୍‌ ଆସିଲୋଙନ୍‌ ଇନ୍ନିଙ୍‌ ପାଙ୍‌ଲେ ଅରପ୍ତିଏ । 16 ଆରି, ଇନ୍‌ଲେନ୍‌ ଏଙ୍ଗାଲେ ଜିର୍ରାୟ୍‌ବୋ ତିଅନ୍ତମ୍‌ ଇନ୍‌ଲେନ୍‌ ଜିର୍ତବୋ, ଇନ୍‌ଲେନ୍‌ ରିଙ୍ଗେନ୍‌ ଗଙ୍‌ଲେ ଆଞନମ୍‌ ଅନ୍ତମ୍‌ କାବ୍ବାଡ଼ାତନେବୋ ବନ୍‌ଡ ତିଆତେ ଇନି ଆଲାବ ? 17 ଆରି, ଆନିନ୍‌ ଆମେଙ୍‌ମତ୍ତାନ୍‌ ଲୋଙଡ୍‌ଲୋଙନ୍‌ ଗାଗାତନେ, ଆରି ଆନିନ୍‌ ଜବ୍ର ବରାବ୍‌ତେ, ଆରି ଆନିନ୍‌ଆଡଙ୍‌ ଅସୁନ୍‌ ଡ ବନ୍‌ଡ୍ରାବନ୍‌ ଗଟେତେ । 18 ଗିୟ୍‌ବା, ଜନୋମନ୍‌ ଡ ଗନାନ୍‌ ଡ ଇସ୍ୱରନ୍‌ ଆତରିୟ୍‌ତେନ୍‌ ଆନମେଙ୍‌ ସିଲଡ୍‌ ମନ୍‌ରାନ୍‌ ଓୟୋଙନ୍‌ ଆଜାୟ୍‌ତା ଅଙ୍ଗା ଅଙ୍ଗା ଆକାବ୍ବାଡ଼ା ଲୁମ୍‌ତେ, ତି ଅଡ଼୍‌କୋନ୍‌ ଆ କାବ୍ବାଡ଼ାଲୋଙ୍‌ ଏରାମ୍ମୁୟ୍‌ ଆଡକୋନେ ଆସନ୍‌, କେନ୍‌ଆତେ ଆନିନ୍‌ ଆସନ୍‌ ମନଙ୍‌ ଡ ସର୍ଡାନ୍‌ ଗାମ୍‌ଲେ ଞେନ୍‌ ଗିୟ୍‌ଲାୟ୍‌; ଇନିଆସନ୍‌ଗାମେଣ୍ତେନ୍‌ କେନ୍‌ଆତେ ମା ଆବନ୍ତାନ୍‌ । 19 ଇସ୍ୱରନ୍‌ ଅଙ୍ଗା ଆ ମନ୍‌ରାଆଡଙ୍‌ ଅନର୍ଜେନ୍‌ ତିୟ୍‌ଲୋଙ୍‌ତିୟ୍‌ଲେ ତିଆତେ ଆ ବନୋଗ ଆସନ୍‌, ଆରି ଆବନ୍ତାନ୍‌ ଆଜନନା ଆସନ୍‌ ଆରି ଆ କାବ୍ବାଡ଼ାଲୋଙନ୍‌ ସର୍ଡାନେନ୍‌ ଆସନ୍‌ ରନପ୍ତିନ୍‌ ତିୟେନ୍‌ । କେନ୍‌ଆତେ ମା ଇସ୍ୱରନ୍‌ ଆତନିୟ୍‌ । 20 ଇନିଆସନ୍‌ଗାମେଣ୍ତେନ୍‌ ଆନିନ୍‌ ଆ ଡୋୟ୍‌ନ୍ନା ଅନମେଙ୍‌ ଡିନ୍ନାନ୍‌ ଅଡ଼୍‌କୋନ୍‌ ଆସନ୍‌ ଅଃନିୟମେ; ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ ଆ ଉଗର୍‌ଲୋଙନ୍‌ ଅବ୍‌ସର୍ଡାଲେ ଆନିନ୍‌ଆଡଙ୍‌ ଜାଲଙ୍‌ତେ ।