1 ଞେନ୍‌ କେନ୍‌ ଅଡ଼୍‌କୋନ୍‌ ଆସନ୍‌ ମନଞେନ୍‌ ତିୟ୍‌ଲେ ସାୟ୍‌ଡଙ୍‌ଲାୟ୍‌; ଡରମ୍ମମରନ୍‌ ଡ ଗିଆନମରନ୍‌, ଆରି ଆ କାବ୍ବାଡ଼ାଞ୍ଜି ଇସ୍ୱରନ୍‌ ଆସିଲୋଙ୍‌ ଡକୋ; ବନ୍‌ଡ ଡନୁଙ୍‌ୟମନ୍‌ ଅଡ଼େ ଏଡ଼ୁର୍‌ମଡନ୍‌, ତିଆତେ ମନ୍‌ରାନ୍‌ ଅଜ୍ଜନାଏ; ତି ଅଡ଼୍‌କୋନ୍‌ ଆମୁକ୍କାବାଞ୍ଜି ଡକୋ । 2 ଅଡ଼୍‌କୋନ୍‌ ଆବିସୟ ଅଡ଼୍‌କୋ ମନ୍‌ରାନ୍‌ ଆଡଅଙ୍‌ ଆବସରିନ୍‌ ଗଟେତେ; ଡରମ୍ମମରନ୍‌ ଡ ଏର୍‌ଡରମ୍ମମରନ୍‌, ମନଙ୍‌ମରନ୍‌ ଡ ଏର୍‌ମନଙ୍‌ମରନ୍‌, ମଡ଼ିର୍‌ମରନ୍‌ ଡ ଏର୍‍ମଡ଼ିର୍‍ମରନ୍‌; ଅନମଙ୍‌ମରନ୍‌ ଡ ଏର୍‌ଅନମଙ୍‌ମରନ୍‌, ଅଡ଼୍‌କୋଞ୍ଜି ଆସନ୍‌ ଆବୟନ୍‌ ଆତନଙଡ୍‌ ଗଟେତେ; ମନଙ୍‌ମରନ୍‌ ଏଙ୍ଗାଲେ, ଇର୍ସେମରନ୍‌ ତିଅନ୍ତମ୍‌; ଆରି, ପର୍ମାଡ଼ାମରନ୍‌ ଏଙ୍ଗାଲେ, ପର୍ମାଡ଼ାନ୍‌ ଆବ୍ରତଙ୍‌ତେନ୍‌ ଆମନ୍‌ରା ତିଅନ୍ତମ୍‌ । 3 ଓୟୋଙନ୍‌ ଆଜାୟ୍‌ତା ଅଡ଼୍‌କୋନ୍‌ ଆ କାବ୍ବାଡ଼ାଲୋଙ୍‌ ଇର୍ସେନ୍‌ ଡକୋ; ଅଡ଼୍‌କୋଞ୍ଜି ଆମଙ୍‌ବା ଆବସରିନ୍‌ ଆ ତନଙଡ୍‌ ଜିର୍ତାୟ୍‌, ଡିଅଙ୍ଗା ଡିନ୍ନା ମନ୍‌ରାଞ୍ଜି ଅମେଙ୍‌ତଜି ଡିୟ୍‌ତେ ଡିନ୍ନା ଆମନଲୋଙଞ୍ଜି ବରିୟ୍‌ ପେଲ୍ଲାନ୍‌ ଡ ଉଲ୍ଲୁନ୍‌ ଡକୋ, ଆରି ତିଆତିକ୍କି ଆନିଞ୍ଜି ଆରବୁମରଞ୍ଜି ଆମଙ୍‌ବା ଜିର୍ତଜି । 4 ବନ୍‌ଡ ଅଙ୍ଗା ଆ ମନ୍‌ରା ଆମେଙ୍‌ମରଞ୍ଜି ଆମଙ୍‌ଲୋଙ୍‌ ଆମାୟ୍‌ନେ ଡକୋ, ଆରି ଆରାସାନେନ୍‌ ଡକୋ; ଇନିଆସନ୍‌ଗାମେଣ୍ତେନ୍‌ ଆରବୁ ସିଅଁକିଡନ୍‌ ସିଲଡ୍‌ ଆମେଙ୍‌ କିନ୍‍ସଡନ୍‍ ମନଙ୍‌ । 5 ଆମେଙ୍‌ମରଞ୍ଜି ରବୁତଲେନ୍‌ ଗାମ୍‌ଲେ ଜନାତଜି; ବନ୍‌ଡ ଆରବୁମରଞ୍ଜି ଇନ୍ନିଙ୍‌ ଅଃଜ୍ଜନାଏଜି, ଆନିଞ୍ଜି ଓଞୋଲ୍‌କୁଜନ୍‌ ଇନ୍ନିଙ୍‌ ଅଞାଙେଜି; ଇନିଆସନ୍‌ଗାମେଣ୍ତେନ୍‌ ଆନିଞ୍ଜିଆଡଙ୍‌ ଅନିଃୟମନ୍‌ ଆରି ଅଡେଏଜି । 6 ଏଙ୍ଗାଲେ ଆନିଞ୍ଜି ଆ ଡନୁଙ୍‌ୟମନ୍‌, ତିଅନ୍ତମ୍‌ ଆନିଞ୍ଜି ଆ ଏଡ଼ୁର୍‌ମଡନ୍‌ ଡ ଇସ୍କତାନ୍‌ ଗୁରୁଡ୍ଡେତେ; ଅଡ଼େ ଓୟୋଙନ୍‌ ଆଜାୟ୍‌ତା ଇନି ଅଡ଼୍‌କୋନ୍‌ ଆଲନୁମ୍‌ ଡେତେ ଆନିଞ୍ଜି ଆଙ୍ଗିୟ୍‌ଜା ଆତନୁବଞ୍ଜି ଅଡ୍‌କୋଏ । 7 ଆମ୍ୱେନ୍‌ ରମ୍ମଙ୍‌ ଆ ତଙର୍‌ଗଡ୍‌ ଜିର୍ବା, ସର୍ଡାଲନ୍‌ ରମ୍ମଙ୍‌ ଆଜନୋମ୍‌ ଜୋମ୍‌ବା ଆରି ମଅଁୟ୍‌ଲନ୍‌ ରମ୍ମଙ୍‌ ଆ ଦ୍ରାକ୍ୟାଡାନ୍‌ ଗାବା; ଇନିଆସନ୍‌ଗାମେଣ୍ତେନ୍‌ ଇସ୍ୱରନ୍‌ କାବ୍ବାଡ଼ାନମ୍‌ଜି ଜାଲେ ସାଡେନ୍‌ନି । 8 ସିନ୍‌ରିନମ୍‌ ଆଏଡ଼ର୍‌ ଜେଏ ଡକୋଏତୋ ଆରି ଅବବ୍ବ୍‌ଲୋଙ୍‌ନମ୍‌ ଆଏଡ଼ର୍‌ ମିଞଲନ୍‌ ଡକୋଏତୋ । 9 ଇସ୍ୱରନ୍‌ ଓୟୋଙନ୍‌ ଆଜାୟ୍‌ତା ଆମନ୍‌ଆଡଙ୍‌ କାଜ୍ଜାନ୍‌ ଆନମେଙ୍‌ ଡିଅଙ୍ଗା ଡିନ୍ନା ତିୟ୍‌ଲମ୍‌, ତି କାଜ୍ଜାନ୍‌ ଆନମେଙ୍‌ ଡିନ୍ନାଲୋଙ୍‌ନମ୍‌ ଅଡ଼୍‌କୋ ଡିନ୍ନାନ୍‌ ଡନୁଙ୍‌ୟମ୍‌ବୟଞେନ୍‌ ସରିନ୍‌ ସର୍ଡାଲନ୍‌ ଡକୋନା; ଇନିଆସନ୍‌ଗାମେଣ୍ତେନ୍‌ ଆମେଙ୍‌ଇଙନ୍‌ ଡ ଓୟୋଙନ୍‌ ଆଜାୟ୍‌ତା ଆମନ୍‌ ଡିଅଙ୍ଗା କାବ୍ବାଡ଼ାତନ୍‌, ତି କାବ୍ବାଡ଼ାଲୋଙ୍‌ନମ୍‌ କେନ୍‌ଆତେ ଅବୟ୍‌ ବନ୍ତାନମ୍‌ । 10 ଇନିଜନଙ୍‌ ଆକାବ୍ବାଡ଼ା ଅସିନମ୍‌ ଲନୁମନ୍‌ ଲଡୟ୍‌ତେ, ତିଆତେ ବୋର୍ସାନମ୍‌ ବାତ୍ତେ ଲୁମା; ଇନିଆସନ୍‌ଗାମେଣ୍ତେନ୍‌ ଆମନ୍‌ ଅଙ୍ଗା ଆଡ୍ରକୋନେବା ଜିର୍ତେ, ତି ଆ ମସାନ୍ନିଲୋଙ୍‌ ଇନ୍ନିଙ୍‌ ଆ କାବ୍ବାଡ଼ା, ଅଡ଼େ ଅନିଃୟମନ୍‌, ଅଡ଼େ ପଡ଼େନେନ୍‌, ଅଡ଼େ ଗିଆନନ୍‌ ଅବୟ୍‌ତଡ୍‌ । 11 ଞେନ୍‌ ୟର୍ରନ୍‌ ଓୟୋଙନ୍‌ ଆଜାୟ୍‌ତା ଗିୟ୍‌ଲାୟ୍‌ ଡ, ଜବ୍ର ଅପ୍ପୁଡ୍‌ ଆରୁର୍ତେନ୍‌ ଆମନ୍‌ରା ଆଏଡ଼ର୍‌ ଅଃଜ୍ଜିନୟେ, ଅଡ଼େ ବୋର୍ସା ସିପ୍ପାୟଞ୍ଜି ଆଏଡ଼ର୍‌ ଅଃଜିନୟେଜି, ଅଡ଼େ ଗିଆନମରଞ୍ଜି ଆଏଡ଼ର୍‌ ତର୍ତୁମ୍‌ଲେ ଅନମେଙେଜି, ଅଡ଼େ ବୁଡ୍ଡିମରଞ୍ଜି ଆଏଡ଼ର୍‌ ଅନର୍ଜେଏଜି, ଅଡ଼େ ପଣ୍ତିତମରଞ୍ଜି ଆଏଡ଼ର୍‌ ଅଃଞାଙେଜି, ବନ୍‌ଡ ଅଡ଼୍‌କୋଞ୍ଜିଆଡଙ୍‌ ଏର୍‌ମନଙ୍‌ କରମ୍ମାନ୍‌ ତନଙ୍‌ତେ । 12 ଇନିଆସନ୍‌ଗାମେଣ୍ତେନ୍‌ ମନ୍‌ରାନ୍‌ ଆ ରନବ୍ବୁ ଡିନ୍ନାନ୍‌ ଅଜ୍ଜନାଏ; ଏଙ୍ଗାଲେ ଜାଲଲୋଙନ୍‌ ଞନମନ୍‌ ଆଡ୍ରେତେଞ୍ଜି ଆୟଜି ଅନ୍ତମ୍‌ ଆରି ଏଙ୍ଗାଲେ ଅନ୍ତିଡଞ୍ଜି ପାସଲୋଙନ୍‌ ଞନମନ୍‌ ଡେତଜି, ତିଅନ୍ତମ୍‌ ମନ୍‌ରାଅନଞ୍ଜି ଜାୟ୍‌ ଏରବ୍ବୋମଙ୍‌ଡାଗୋ ଆ ତନଙଡ୍‌ଲୋଙ୍‌ ଞନମନ୍‌ଡାତଜି ।

13 ଓୟୋଙନ୍‌ ଆଜାୟ୍‌ତା କେନ୍‌ ଅନ୍ତମ୍‌ ଆ ଗିଆନ ଞେନ୍‌ ଗିୟ୍‌ଲାୟ୍‌, ଆରି ତିଆତେ ଗନିୟ୍‌ଗିୟ୍‌ଲୋଙ୍‌ଞେନ୍‌ ସୋଡ଼ା ବର୍ନେନ୍‌ ଅବ୍‌ଡିସୟ୍‌ଲାୟ୍‌; 14 ଆଗରାମ୍‌ଗାମନ୍‌, ଅବୟ୍‌ ସନ୍ନା ଗଡ଼ାନ୍‌ ଡକୋଏନ୍‌; ତି ଆଗଡ଼ାଲୋଙ୍‌ ଅଗୋୟ୍‌ ମନ୍‌ରାନ୍‌ ଅଡ୍ଡକୋଲୋ; ଆରି, ଅବୟ ସୋଡ଼ା ରାଜାନ୍‌ ଜିର୍ରେ ତି ଗଡ଼ାନ୍‌ ଆ ବିରୁଦଲୋଙ୍‌ ଅବ୍‌ଗେଗେଏନ୍‌ ଆରି ତି ଗଡ଼ାନ୍‌ ଆ ବିରୁଦଲୋଙ୍‌ ସୋଡ଼ା ସୋଡ଼ା ମରେଲ୍‌ସିଂଙନ୍‌ ତୁବେନ୍‌ । 15 କେନ୍‌ ଅନ୍ତମ୍‌ ଆଡିଡ୍‌ ତି ଆଗଡ଼ାଲୋଙ୍‌ ଅବୟ ଡୋଲେୟ୍‌ ଗିଆନମରନ୍‌ ତେତ୍ତେ ଡକୋଏନ୍‌, ଆରି ତି ଆମନ୍‌ରା ଆ ଗିଆନନ୍‌ ବାତ୍ତେ ଗଡ଼ାନ୍‌ ଡୋବେନ୍‌; ଡେଲୋଜନଙ୍‌ଡେନ୍‌ ତି ଡୋଲେୟ୍‌ମରନ୍‌ଆଡଙ୍‌ ଆନ୍ନିଙ୍‌ ଅମନ୍ନେଲୋଜି । 16 ସିଲଡ୍‌ତ୍ତେ ଞେନ୍‌ ବର୍ରନାୟ୍‌, "ବୋର୍ସାନ୍‌ ସିଲଡ୍‌ ଆର୍ପାୟ୍‌ ଗିଆନନ୍‌ ମନଙ୍‌; ଡେଲୋଜନଙ୍‌ଡେନ୍‌ ଡୋଲେୟ୍‌ମରନ୍‌ ଆ ଗିଆନନ୍‌ ବନାସ୍ସେନ୍‌ ଡେତେ ଆରି ଆବର୍ନେନ୍‌ ଆନ୍ନିଙ୍‌ ଅନମ୍‌ଡଙେଜି ।" 17 ଉଲ୍ଲୁମରଞ୍ଜି ଆସାସନ୍‌ମର୍‌ଜି ଆବନାବ୍‌ବାବ୍‌ ସିଲଡ୍‌ ଆର୍ପାୟ୍‌ ଗିଆନମରନ୍‌ ଆ ସନୟୁବର୍‌ ଆନମ୍‌ଡଙ୍‌ ମନଙ୍‌ । 18 ଜୁଜ୍ଜେ ଞନମ୍‌ରମ୍‌ କଡ଼ିବନ୍‌ ସିଲଡ୍‌ ଆର୍ପାୟ୍‌ ଗିଆନନ୍‌ ମନଙ୍‌; ବନ୍‌ଡ ଅବୟ୍‌ ଇର୍ସେମରନ୍‌ ଅଗୋୟ୍‌ ସୁକ୍କାନ୍‌ ଅମୋସାତେ ।