1 ఏ దిన్నత యెహోవ కెయ్యుతొల్లె తని పిప్పెలి అహ్నెసి. ఏ పిప్పెలి గొప్పగట్టయి, వాదురిగట్టయి. కజ్జ రాచ్చుతి, మొసలి అంగతొల్లె వాణతి "లేవియాతానుతి" ఏవసి డొండొకిన్నెసి. వంక తిర్విహిఁ, హజ్జిమన్ని రాచ్చుతి డొండొకిన్నెసి. ఏ సమ్దురి జీవితి ఏవసి పాయినెసి. 2 ఏ దిన్నత కంబితి ద్రాక్స టోటతి పాయిఁ కేర్దు. 3 యెహోవ ఇన్ని నానుఎ ఏదఅఁతి జీణకిహిమఇఁ. కాలెఎ ఏదఅఁతక్కి ఏయు వాక్హిమఇఁ. ఏదఅఁతక్కి అంబఅసివ నొస్టొకిఅన లాఅఁయఁ మద్దెన కాపు కాచ్చిమఇఁ. 4 నంగె నీఎఁ కోప ఏనఅఁ హిల్లెఎ. రో వేల హాప్కదుప్పయఁ మార్క నొయ్యితిహిఁ జుజ్జొ కిత్తిలెహెఁ ఏవఅఁతి నప్పఅరేటు నోకిత తాకిఇఁ. బర్రె కల్పహఁ హూడ్డిఇఁ. 5 ఇల్లెకి ఆఅన మంజలి ఇచ్చిహిఁ ఏవరి నా జీణతాణ వయ్యలివల్లె. నాతొల్లె జోల్కిఅయ్యలివల్లె. ఏవరి నాతొల్లె ఒప్పకొడ్డలివల్లె. 6 వాని ఏ దిన్నత యాకోబు హీరు ఏపఆనె. ఇస్రయేలు లోకు మొగ్ల ఆహఁ దాలినెరి. ఏవరి బూమి బర్రె నెంజినెరి. 7 యెహోవ ఇస్రయేలుయఁ సెత్రయఁని వేతిలెహెఁ ఇస్రయేలుతరఇఁ వేనసికి? తని సెత్రుయఁని పాయితిలెహెఁ ఇస్రయేలుయఁని పాయినెసికి? 8 నీను ఎల్లెకిఁ కిఅతి. కొచ్చెక డొండొకిత్తి. వేరెతి దేసాణ ఇస్రయేలుఇఁ పండితి. వేడహోపుటి కజ్జ గాలి వావికిహఁ ఏవరఇఁ పేర్హి. 9 యాకోబు కిత్తి పాపుతక్కి ఇల్లెకి కెమా ఆహిమన్నె. ఏది ఏవసి కిత్తనితక్కి జీతొమితక్కి వాని పొఒలొ. సుద్దవల్లితి గుండ కిత్తిలెహెఁ ఏవసి పూజపిండ వల్కాని గండ్ర గండ్రకిన్నెసి. అసేరా ప్ణేఁకా తంబొమిక, దుప్పప్రొత్ని మండియఁ ఓడె మన్నొఒ. 10 ఎల్లెకిఁఎ సుట్టుకోడ్డయఁ మన్ని గాడ పాడుజాడఆనె. బస్సఆని టాంగ మణిసియఁ హిల్లఅ పాడుజాడయఁ ఆను. ఎంబఅఁ పడ్డడాల్క మెయ్యిను. ఏవి ఎంబెఎ హుంజహఁ మార్క కొమ్మాని మెయ్యిను. 11 ఏ కొమ్మయఁ వాయహఁ రీను. ఇయ్యస్క వాహఁ ఏవఅఁతొల్లె హిచ్చుడహ్నరి. ఏనఅఁతక్కి ఇచ్చిహిఁ ఈ లోకు తెల్విగట్టరి ఆఎ. ఇంజహఁ ఏవరి రచ్చిగట్టసి ఏవరి లెక్కొ కర్మఆఒసి. ఏవరఇఁ కిత్తి ఏవసి ఏవరఇఁ దయ తొఁఒసి. 12 ఏ దిన్నత యెహోవ హొట్టిమన్ని యూప్రటీసు నది తాణటి ఐగుప్తు వారు పత్తెక ఏవరఇఁ కూలియఁ నూర్పినిలెహెఁ నూర్పినెసి. ఇస్రయేలు లోకుఆతి మిమ్మఅఁ రొఅసిలక్క కూడ్డికియ్యనెసి. 13 ఏ దిన్నత కజ్జ తీత్రి సాడి వెఁణ్బిఆహిమన్నె. అస్సూరు దేసత నొస్టొఆహిమన్నరి, ఐగుప్తుత పంగతవాతి ఏవరి వెండె వానెరి. యెరుసలేముత మన్ని సుద్దు కజ్జహోరుత మన్ని యెహోవఇఁ ఆరాదనకిదెరి.