యెసయ 56

మహపురు లోకు బర్రెయఁని అట్నకొడ్డినెరి

1 యెహోవ ఇల్లెకి వెస్సిమన్నెసి. "నా జీణ దరిఎ మన్నె. నా నీతి తొబ్బెఎ పుఁణ్బిఆనె. ఇంజహఁ నాయొమితి కిద్దు. నీతితొల్లె మంజు. 2 ఏ సొమన కిహిఁ సొత్తొఎ కిన్నసి కొర్మొగట్టసి. ఎల్లెతసి జోమిని దిన్నతి లగ్గెఎకిఅన ఏదఅఁతి కిన్నెసి. ఏని కీడు కిలొఒసి." 3 యెహోవఇఁ అనుసారొ తాకిహిఁ పయితిదేసతసి, "యెహోవ తప్పఅన నన్నఅఁ తని లోకు తాణటి పేర్హ పండినెసి" ఇంజకొడ్డలికూడెఎ. పెజ్జు "నాను వాయితి మార్నుతెఁ" ఇంజకొడ్డలికూడెఎ. 4 నాను నియొమికిత్తి జోమితి దిన్నతి కిహిహిఁ నంగె ఏవఅఁతి కోరకొడ్డిహిఁ నా నియొమితి ఆదారొమి కిహఁకొడ్డిని పెజ్జుయఁని పాయిఁ యెహోవ ఇల్లెకి వెస్సిమన్నెసి, 5 నా ఇజ్జొ, నా కోడ్డాణ రో బాగతి ఏవరకి హీఇఁ. మీర్క కిహఁ మాస్క కిహఁ నెహిఁ దోరు గౌరొమిక హియ్యఇఁ. ఏవఅఁతి ఎచ్చెలవ బాణఅయ్యలి ఆఎ. 6 జోమిని దిన్నతి లగ్గెఎకిఅన కిహిహిఁ నా నియొమితి ఆదారొమి కిహిహిఁ , యెహోవకి సేబగట్టరిఆతి యెహోవ దోరుతి జీవునోహిఁ ఏవణఇఁ పూజ కియ్యలితక్కి ఏవణి బకి ఆడ్డిని పంగతిదేసతరఇఁ నా సుద్దు కజ్జహోర్కటి తచ్చిహిఁ వాఇఁ. 7 నా ప్రాతన గుడిత ఏవరఇఁ రాఁహఁకిఇఁ. నా పూజపిండ లెక్కొ ఏవరి హిహిమన్ని హూడ్డితి పూజయఁ బలియఁ నంగె ఓప్కిఆను. నా గుడి బర్రె దేసతక్కి ప్రాతన గుడి ఆనె. 8 ఇస్రయేలుయఁతాణ ఒప్పఅతరఇఁ కూడ్డికిన్ని ప్రెబుఆతి యెహోవ మహపురు బోలు ఈదిఎ, "నాను కూడ్డికిత్తి ఇస్రయేలుతరి ఆఅన పంగతరఇఁ జికెల ఏవరి తాణ ఓఇఁ."

ఇస్రయేలుతి హావుఁతయఁ డొండొకిన్నయి

9 సొబ్బాణ జొంతొయఁ బర్రె! జాడతి అజ్జిహోపెతి జొంతొయఁ బర్రె! వాహఁ! తింజు! 10 ఏవరి కాపుగట్టరి బర్రెజాణ కాణగట్టరి. బర్రెజాణ తెల్విహిల్లఅఁగట్టరి. బర్రెజాణ మొస్కఅగట్టి మూగనెస్క. హుంజహఁ హప్నయఁ హేడ్నరి. ఇద్దటి ఇచ్చిహిఁ ఏవరకి హారెఎ ఇచ్చ. 11 ఏవరి రాందతక్కి కయిరిఆని నెస్క. ఎచ్చెక తిచ్చివ ఏవి బండిపంజొ. ఏవరి తెల్విహిల్లగట్టి కాపుగట్టరి. ఏవరి బర్రెజాణ తంగె ఇచ్చఆతి జియ్యుత హన్నెరి. బర్రెజాణ సొంతె లాబొమి కోసొమి పర్రనెసి. 12 ఏవరిలెహెఁ ఇన్నెరి "వాదు. ద్రాక్సకాడు, వెర్రిఆని కాడు గొహ్ను. విఎ నీంజు లెహెఁ మఁణ్బినె. ఓడె హారెఎ నెహిఁకి మఁణ్బినె."