యెసయ 32

నీతిగట్టసిఆతి రో రజ్జ

1 ఇదఅఁతి, వెంజు! రో నీతిగట్టసిఆతి రజ్జ రాజొమితి లేంబినెసి. హుక్కొమిగట్టరి నాయొమితొల్లె లేంబిన్నెరి. 2 ఏవరితాణ ప్రెతి రొఒసి గాలి వేనటి డుగ్గమన్ని టాయులెహెఁ, తుపానుత డుగ్గమన్ని టాయులెహెఁ మన్నెసి. పాడుజాడత ఊట, వాహితి దేసత హియ్యెడిఆని కజ్జ కొట్టవల్లిలెహెఁ మన్నెసి. 3 ఎచ్చెటిఎ సినికిన్నరి కణ్క కాణలెహెఁ మన్నొఒ. వెన్నరి కీర్క నెహిఁకి వెన్ను. 4 నోకినోకి తాకినెరి తెల్వితొల్లె జాగ్రెత ఒణ్పిఆనెరి. బెబ్డలెహెఁ జోలినసి నెహిఁకి జోలిఆడ్డినెసి. 5 ముర్కొగట్టణఇఁ నీఎఁటి గౌరొమికిఒసి ఇంజిహిఁ వెస్తెరి. నాడిగట్టసి హాడ్డవెనఅఁగట్టి మణిసి ఇంజిహిఁ వెస్తెరి. 6 ముర్కొగట్టసి ముర్కొ హాడ్డయఁ జోలినెసి. ఏవణి హిఁయఁ లగ్గెఎతి పాయిఁ, మాప్రు కమ్మయఁ పాయిఁ ఒణ్పిమన్నె. ఏవసి యెహోవఇఁ పాయిఁ దోహొయఁ జోలినెసి. ఏవసి హక్కితొల్లె మన్నరి దరి రాందతి రెజ్జకొడ్డినెసి. ఏస్కితొల్లె మన్నరి దరిటి ఏయుతి కొడ్డినెరి. 7 నాడిగట్టణి కమ్మయఁ లగ్గెఎతి కమ్మయఁలెహెఁ మఁణ్బిను. కర్మగట్టరి సరిఆతయి ఇంజిహిఁ వెస్తిహిఁ, కర్మగట్టరఇఁ నొస్టొకియ్యలితక్కి ఏవసి బొంకుయఁతొల్లె డహ్రిఆతెసి. 8 ఇచ్చిహిఁ రో గౌరొమిగట్టసి గౌరొమిఆతి కమ్మయఁ ఒణ్పినెసి. ఏవసి కిత్తి కమ్మయఁ బకిటి ఏవసి నిన్నెసి.

యెరుసలేముతి డొండొకిన్నయి ఓడె జీణకిన్నయి

9 సుక్కుఆతి బత్కు బత్కిమన్ని అయస్కతెరి, నింగహఁ నా హాడ్డయఁ వెంజు. అస్సులిఎ మన్ని మాస్కతెరి, నా హాడ్డయఁ వెంజు. 10 ఓరొ బర్స, కొచ్చెక దిన్నయఁతక్కి మీ నమ్మకొము మఁణ్బెఎ. నిచ్చెఎ మన్ని అస్కతెరి, ద్రాక్సఅర్న నొస్టొఆనె. ద్రాక్సపట్క ఇజ్జొ తచ్చలిఆఒ. 11 సుక్కుఆతి బత్కు బత్కిమన్ని అయ్యస్కతెరి, డగ్గఅదు. తమ్మి లెక్కొ నమ్మకొము గట్టి అయస్కతెరి, అజ్జఅదు. ఏవరఇఁ మీ హెంబొరిక హుక్హఁ నాగ్డఆదు. మీ టిడ్డెలితక్కి వెల్ల హెంబొరి దొస్సకొడ్డదు. 12 రాఁహఁఆతి సొబ్బయఁ కోసొమి, పొఒలొఆతి ద్రాక్స టోటయఁ కోసొమి మీరు డీదెరి. 13 నా లోకు బూమిత హాప్కదుప్పయఁ, జాండుదుప్పయఁ పడ్డఆను. పర్బుఆని గాడత రో దిన్న రాఁహఁ నెంజహఁ ఇల్కాణ జికెల ఇల్లెకి మఁణ్బినె. లెక్కొటి ఆత్మ వాని పత్తెక, 14 రజ్జ ముక్కెనిగాడతి పిహ్నెరి. లోకు మన్ని గాడ లోకు హిల్లఅలెహెఁ మారితె. హోరు, పావుయఁ కజ్జమేడయఁ ఎచ్చెలవ పావూణ మఁణ్బిను. ఏవి జాడ లొట్టిపిట్టయఁ బస్సఆని టాయులెహెఁ, కోడ్డియఁ మెయ్యిని టాంగలెహెఁ మఁణ్బిను. 15 ఇచ్చిహిఁ ఆత్మ వాని పత్తెక ఇల్లెకి ఆహిమన్నె డాయు పాడుజాడ సత్తొవి బూమిలెహెఁ మారినె. బూమి నెహిఁ అర్నతి హియ్యనె. 16 ఎచ్చెటిఎ నాయొమి పాడుజాడత మన్నె. నెహిఁకి కంబిని బూమిత నీతి మఁణ్బినె. 17 నీతి సాంతితి హియ్యనె. నీతితక్కి కాలెఎతి నిమ్మది నమ్మకొమివానె. 18 నా లోకు సాంతిగట్టి టాయుత, ఏనిలోడహిల్లగట్టి ఇల్కాణ బత్కినెరి. 19 సమ్మ ఆజియఁ రీతు పాడుజాడ నొస్టొఆనటి గాడ పూర్తినంగ హేడితె. 20 మీ తాణ ఏయు వారుయఁ దరి బిచ్చ ఉహ్హిహిఁ, ఎంబఅఁ తమ్మి కోడ్డియఁని, గ్డాదెయఁని మెయ్యలి హిన్నసి కొర్మొగట్టసి.