1 హిజ్కియా రజ్జ లేంబిని సొద్దొ బర్సత అస్సూరురజ్జ సన్హెరీబు యూదా దేసత హద్దుయఁ కోడ్డయఁ మన్ని గాడయఁ బర్రెతి లెక్కొ జుజ్జుత ఏవఅఁతి ఆబ్రొమించితెసి. 2 డాయు ఏవసి రబ్సాకేను లాకీసు గాడటి యెరుసలేముత మన్ని హిజ్కియా రజ్జ లెక్కొ కజ్జ కోస్కతి హీహఁ పండతసి. ఏవసి రేవు జియ్యుత మన్ని కొర్ను బంద డొంగ దరి వాతెసి. 3 ఎచ్చెటిఎ హిల్కీయా మీరెఎసి, రజ్జ ఇల్లుతక్కి కజ్జసి ఎల్యాకీము, సాస్త్రి సెబ్నా, రాజొమి ఆస్తి ఆకతి హుక్కొమిగట్టసి, ఆసాపు మీరెఎసి యోవాహు ఏవరి తాణ హచ్చెరి. 4 ఎచ్చెటిఎ రబ్సాకే ఏవరితొల్లె ఇల్లెకి ఇచ్చెసి. "హిజ్కియాతొల్లె ఈ హాడ్డ వెహ్దు, గొప్పరజ్జఆతి అస్సూరురజ్జ నన్నఅఁ ఇంజిహిఁ వెస్తము ఇంజతెసి, ఏనఅఁతక్కి జికెల నీను నమ్మతి? 5 జుజ్జ కత్తత నీ ఒణ్పు, నీ బల్లొమి ఆడ్డెఎ. అంబఅరి తోడుతొల్లె నా లెక్కొ వాహింజి? 6 నల్గితి గర్కి ఎల్లెతిఆతి ఐగుప్తు లెక్కొ ఆదారొమిఆహిఁ మంజి ఆఎకి! అంబఅరివ ఏదణి లెక్కొ గేడితిహిఁ ఏది ఏవణి కెయ్యుత కుత్తినె. ఐగుప్తు రజ్జ జికెల ఎల్లెతసిఎ. 7 మా మహపురుఆతి యెహోవఇఁ నమ్మకొడ్డిమన్నొమి ఇంజిహిఁ ఇంజెరికి? ఏ యెహోవ ఎత్తుఆతి టాంగాణ, పూజపిండయఁఆఎకి హిజ్కియా ఏవసి యెరుసలేముత మన్ని ఈ పూజపిండ దరి దెహెఁ మీరు పూజయఁ కియ్యలివల్లె ఇంజిహిఁ యూదాతరకి, యెరుసలేమురకి హెల్లొ హీతె? 8 ఇంజహఁ నా కజ్జసి ఆతి అస్సూరు రజ్జతొల్లె పందొమి కిమ్ము. రీ మాణెక గుర్రొమికతక్కి సరిఆతి గుర్రొమిక నీ తాణ మచ్చిహిఁ వెస్తము, నాను ఏవఅఁతి నింగె హియ్యఇఁ. 9 నా కజ్జసి సేబగట్టరి తాణటి ఊణ నాయుఁతి రో హుక్కొమిగట్టసి నీను అజ్జికియ్యలిఆడ్డికి? రత్తాని, మణిసిణి పండినెసి ఇంజిహిఁ ఐగుప్తు లెక్కొ ఆస ఇట్టితికి? 10 ఇచ్చివ యెహోవ హెల్లొ ఈ దేసతి నొస్టొకియ్యలితక్కి నాను వాతెఎఁ ఇంజకొడ్డితికి? ఆఎ, ఈ దేసమి లెక్కొ కోస్కతొల్లె వాహఁ ఇదఅఁతి నొస్టొ కిమ్ము ఇంజిహిఁ యెహోవ నంగె హెల్లొహిత్తెసి." 11 ఎచ్చెటిఎ ఎల్యాకీము, సెబ్నా, యోవాహుయఁ రబ్సాకేతొల్లె "మాంబు నీ సేబగట్టతొమి. మంగె సిరియా బాస పుంజెఎమనొమి ఏదఅఁతక్కి దయకీహఁ ఏ బాసత జోలితెసి. సుట్టుకోడ్డ లెక్కొ మన్ని లోకుతక్కి అర్దొమిఆనిలెహెఁ యూదుయఁ బాసత జోలఅని" ఇంజిహిఁ ఇచ్చెరి. 12 ఇచ్చిహిఁ రబ్సాకే "ఈ హాడ్డయఁ వెస్సలితక్కిఎకి, నా కజ్జసి నన్నఅఁ నీ కజ్జసి దరితక్కి పండతెఎఁ? నీతొల్లె కల్హఁ తమ్మి సొంతె గోలితి తింజహఁ, తమ్మి ముడ్క గొస్సిమన్ని కోడ్డ లెక్కొ మన్ని ఏవరి తాణ జికెల పండితెసి ఆఎకి" ఇచ్చెసి. 13 యూదుయఁ బాసతొల్లె ఏవసి గట్టినంగ ఇల్లెకి ఇచ్చెసి. "గొప్పరజ్జఆతి అస్సూరు రజ్జ వెస్సీని హాడ్డయఁ వెంజు. 14 హిజ్కియా కెయ్యుత నాడిఆఅదు. మిమ్మఅఁ పిస్పికియ్యలితక్కి ఏవణి సెక్తి హాలెఎ. 15 ‘యెహోవ మమ్మఅఁ పిస్పికియ్యనెసి, ఈ గాడ అస్సూరు రజ్జ కెయ్యుత హెరెఎ’ ఇంజిహిఁ వెస్సీహిఁ హిజ్కియా మిమ్మఅఁ నమ్మికిహిఁ మంజనెసి. 16 హిజ్కియా వెస్తి హాడ్డ మీరు ఒప్పకొడ్డఅని. అస్సూరు రజ్జ వెస్సిమన్నయి ఏనఅఁ ఇచ్చిహిఁ, మీరు పంగత వాహఁ, నాతొల్లె కల్హఁకొడ్డహఁ. ఎచ్చెటిఎ మీతాణ ప్రెతి రొఒసి తని ద్రాక్స, అంజుర పాడేక తింజిహిఁ గొస్సిహిఁ మఁణ్బినెరి. తని కుహిఁత ఏయు గొస్సిహిఁ మఁణ్బినెరి. 17 ఏ డాయు నాను వాహఁ మీ దేసలెహెఁతి దేసతక్కి, ఇచ్చిహిఁ గోదుమయఁ, ద్రాక్సరస్స బెట్టఆని దేసతక్కి, రాంద, ద్రాక్సయఁ మాడయఁ మన్ని దేసత మిమ్మఅఁ ఓహిహజ్జఇఁ. యెహోవ మిమ్మఅఁ పిస్పికియ్యనెసి ఇంజిహిఁ వెస్సహిఁ హిజ్కియా మిమ్మఅఁ నాడి కిహిమన్నెసి. 18 నోనొబొర్నొ లోకు పేణ్కతాణ అంబఅసివ తని దేసతి అస్సూరు రజ్జ కెస్కటి పిస్పికియ్యతెసికి? హమాతు పేణ్కఆతెరి? 19 అర్పాదు పేణ్క ఏనఅఁతెరి? సెపర్వయీము పేణ్క ఏనఅఁఆతెరి? సోమ్రోను దేసతి మహపురు నా కెయ్యుటి పిస్పికియ్యతెసికి? 20 ఈ పేణ్కతాణ అంబఅసి ఇచ్చివ తని దేసతి నా కెయ్యుటి పిస్పికిహఁ మచ్చిదెఁ సమ్మ యెహోవ యెరుసలేముతి పిస్పికియ్యనెసి ఇంజకొడ్డలితక్కి?" ఇచ్చెసి. 21 ఇచ్చిహిఁ ఏవణకి జబాబు వెస్సలికూడెఎ ఇంజిహిఁ రజ్జ హెల్లొహియ్యలెఎ ఏవరి బదులి జోలఅతెరి. 22 రజ్జ ఇల్లుతి దొహ్నసి, హిల్కీయ మీరెఎసి ఆతి ఎల్యాకీము, సాస్త్రి సెబ్నా, రాజొమితి బూమితిఆక లెక్కొ హుక్కొమిగట్టసి, ఆసాపు మీరెఎసి యోవాహు తమ్మి హెంబొరిక గెస్స కొడ్డహఁ హిజ్కియా దరి వాహఁ రబ్సాకే జోలితి హాడ్డయఁ బర్రె పుఁణ్బికిత్తెరి.