୧ ପିତର୍‍ 5

ଇଶ୍ୱର୍‌ତେ ମାନ୍ଦ୍‍ମେଣ୍ଡା

1 ନାନେ ୱେରନ୍‍ ବୟସ୍ତେ ନାରୁଣ୍ଡ୍‍ ଇସାବ୍‍ତେ ମିୟାଦ୍ ମଣ୍ଡଲିତେ ବାଡ଼୍‍ୟେ ନେତାଲଡ଼୍‍କ୍ ବିନତି ମାଡ଼ି କେତୁତାନ୍ । କ୍ରିଷ୍ଟନ୍ ଦୁଃକାମ୍ କଷ୍ଟତାଗ୍‍ ନାନେ ୱେରନ୍ ସାକ୍ଷି ନୁ ଅନାଦ୍‌ ଗୌରବ୍ ପ୍ରକାଶ୍ ଆଦାନ୍ ସମୟତେ ନାନେ ଆଗେ ପାଲ୍‍କ୍‍ ଆଦ୍‍ତାନ୍ । 2 ✝୫:୨ ଯୋହନ୍‌ ୨୧:୧୫-୧୭.ଇଶ୍ୱର୍‍ ମୀଇ କାୟ୍‍ଦାଗ୍ ବେନ୍ ମାନ୍ଦ୍‍ ମେଣ୍ଢାନ୍‍ ଦ୍ୱାୟିତ୍ୱ ଇତ୍‍ତନ୍, ନାନ୍‍ ଅନୁରଦ୍‌ ମାଡ଼ୁତାନ୍, ମିଡ଼୍ ଇଚ୍ଛା ଇଲ୍‍ୱେ ଆଦ୍ ମାଡ଼କଟ୍ ସାର୍‍ଦେତେ ଅଡ଼୍‌‍କିଂଙ୍କ୍ ପଡ଼୍‍ପାଟ୍‍ । ଦନ୍ ଆଶାତେ ଆଦ୍‍ ମାଡ଼କଟ୍, ସାରେଦାମ୍ ସେବା ମନ୍ ତଡ଼୍‍ ମିୟାଦ୍ ଆଦ୍ ଦ୍ୱାୟିତ ମାଡ଼ାଟ୍‍ । 3 ମିଡ଼୍ ବେନଡ଼ାଦ୍ ଦ୍ୱାୟିତ ଆତ୍‍ତିଡ଼୍, ଅଡ଼୍‌ ପରୁ ଶାସନ୍‍ ମାଡ଼କଟ୍ ଅଡ଼୍‌ ସେଙ୍ଗେ ନିଜର୍‍ ଜିୱୁଣ୍ଡ୍‍ତାଗ୍ ଆଦର୍ଶ ତଅମୁଟ୍ ।