1 ଯୋଷେପ୍‌ତିଙ୍କ୍‌ ମିସରିୟ ଦେଶ୍‌ତା ତାତ୍‌ତାଙ୍କ୍‌, ଫାରୋନ୍‌ ଅର୍‌ତୁଣ୍ଡ୍‌ ଦାସ ଇତ୍କେ, ମିସ୍ରିୟ ପୋଟୀପର୍‌ ପେଦେର୍‌ତେ ସେନାପତି, ତାମ୍‌ ତାସ୍‌ମାନ୍ଦାନ୍‌ ଇଶ୍ମାଏଲିୟଡ଼୍‌ ଆଗାଙ୍କ୍‌ ଯୋଷେପ୍‌ତିଙ୍କ୍‌ ଆସି ଅତ୍‌ତଣ୍ଡ୍‌। 2 ମାତର୍‌ ସଦାପ୍ରବୁ ଯୋଷେପ୍‌ ତଡ଼୍‌ ମାତ୍‌ତଣ୍ଡ୍‌, ଆଦିଙ୍କ୍‌ ଅଣ୍ଡ୍‌ ବାଗ୍ୟବାନ୍‌ ମାତଣ୍ଡ୍‌; ମେଣ୍ଡେ ଅଣ୍ଡ୍‌ ତାନ୍‌ ମିସ୍ରିୟ ମାଲିକ୍‌ ଲୋତ୍‌ତାଗ୍‌ ମାତଣ୍ଡ୍‌। 3 ଆଗାକଞ୍ଚ୍‌ ସଦାପ୍ରବୁ ତାନ୍‌ ତଡ଼୍‌ ମିନ୍ଦେଣ୍ଡ୍‌ ନୁ ଅଣ୍ଡ୍‌ ବେନ୍‌ ବେନ୍‌ ପାଡ଼୍‌ୟି ମାଡ଼୍‌ତଣ୍ଡ୍‌, ସଦାପ୍ରବୁ ଯୋଷେପ୍‌ ଅନ୍‌ କାୟ୍‌ଦେ କଞ୍ଚ୍‌ ଆୱ୍‌ ସାରେ ସିଦ୍ଦ ମାଡ଼ୁତଣ୍ଡ୍‌, ଇଦ୍‌ ତାମ୍‌ ମାଲିକ୍‌ ଉଡ଼୍‌ତଣ୍ଡ୍‌। 4 ଆଦିଙ୍କ୍‌ ଯୋଷେପ୍‌ ତାନ୍‌ କଣ୍ଡେତେ ଅନୁଗ୍ରହ ପାହେମ୍‌ ଆସ୍‌ ତାନ୍‌ ସେବାତେ ନିଯୁକ୍ତ ଆତ୍‌ତଣ୍ଡ୍‌, ମେଣ୍ଡେ ଅଣ୍ଡ୍‌ ଯୋଷେପ୍‌ତିଙ୍କ୍‌ ତାନ୍‌ ଲୋତ୍‌ତେ ବେଡ଼ିୟଣ୍ଡ୍‌ ମାଡ଼ି କାୟ୍‌ଦେକଞ୍ଚ୍‌ ସାରେ ସମର୍ପଣ ମାଡ଼୍‌ତଣ୍ଡ୍‌। 5 ଇଦ୍‌ ଲେକାମ୍‌ ଅଣ୍ଡ୍‌ ଯୋଷେପ୍‌ତିଙ୍କ୍‌ ତାନ୍‌ ଲୋନ୍‌ ନୁ ସାରେ ଲେଙ୍ଗ୍‌ ଅଧ୍ୟକ୍ଷ ମାଡ଼୍‌ତେ ଦିନାକଞ୍ଚ୍‌ ସଦାପ୍ରବୁ ଯୋଷେପ୍‌ତେ ସେଙ୍ଗେ ଆ ମିସ୍ରିୟ ନାରୁନ୍‌ ଲୋତ୍‌ତେ ପର ଆଶିର୍ବାଦ୍‌ ମାଡ଼୍‌ତଣ୍ଡ୍‌; ମେଣ୍ଡେ ଲୋନ୍‌ ନୁ ୱାୟାନାଗ୍‌ ସାରେ ସମ୍ପଦ ପର ସଦାପ୍ରବୁନ୍‌ ଆଶିର୍ବାଦ୍‌ ଆତ୍‌ତେ। 6 ବାତେଙ୍କ୍‌ଇତ୍କେ ଅଣ୍ଡ୍‌ ଯୋଷେପ୍‌ତେ କାଇଦାଗ୍‌ ତାନ୍‌ ସାରେ ସ୍ୱର ଇଦ୍‌ପୁଟୁଙ୍କ୍‌ ବଜ୍‌ ଇଦ୍‌ତଣ୍ଡ୍‌, ଯେ ତାନ୍‌ ତିନ୍ଦାନାଦ୍‌ ନୁ ମେଣ୍ଡେ ବାତ୍‌ବା ବିଷୟ୍‌ତେ ଅୟଣ୍ଡ୍‌। ଯୋଷେପ୍‌ ଲେକାମ୍‌ ଅଣ୍ଡ୍‌ ସୁନ୍ଦର୍‌ ନୁ ସାୟେ ତନ୍ଦ ମାତ୍‌ତଣ୍ଡ୍‌।

7 ମେଣ୍ଡେ ଆ ଗଟନାତ୍‌ ପେର୍କେ ତାନ୍‌ ପ୍ରବୁନ୍‌ ମୁତେ ଯୋଷେପ୍‌ତେ ପର କଣ୍ଡା ୱାଟାଙ୍କ୍‌ ପସ୍ପ୍‌ତେ; ଆସୁଟ୍‌ ଅଂକିଙ୍କ୍‌ କେତ୍‌ତେ, ନିମେ ନା ତଡ଼୍‌ ଉଞ୍ଜା। 8 ମାତର୍‌ ଯୋଷେପ୍‌ ଅସ୍ୱିକାର୍‌ ମାଡ଼ି ତାନ୍‌ ପ୍ରବୁନ୍‌ ମୁତେଙ୍କ୍‌ କେତ୍‌ତଣ୍ଡ୍‌, ଉଡ଼ା, ଇ ଲୋନ୍‌ ନା ଅଦିକାର ବାତା ମିନ୍ଦେ, ନା' ପ୍ରବୁ ଆଦିନ୍‌ ବିଷୟ ଅୟଣ୍ଡ୍‌, ଅଡ଼୍‌ ନା କାଇଦାଗ୍‌ ତାନ୍‌ ସାରେ ବିଷୟ୍‌ ସମର୍ପଣ ମାଡ଼ିମିନ୍ଦେଣ୍ଡ୍‌। 9 ଇ ଲୋନ୍‌ ନାକିଙ୍କ୍‌ ଆନ୍‌ ବେଡ଼୍‌ୟଣ୍ଡ୍‌ ବେନ ଇଲେଣ୍ଡ୍‌; ନିକ୍‌ ୱିଡ଼୍‌ସି ନା ପର ମେଣ୍ଡେ ବାତେବା ମନା ଇଲେ। ବାତେଙ୍କ୍‌ଇତ୍କେ ନାନ୍‌ ବେଦ୍ ପୁଟୁଙ୍କ୍‌ ଇସ ବେଡ଼୍‌ୟି ଦୁଷ୍ଟତା ନୁ ପରମେଶ୍ୱର୍‌ତେ ବିରୁଦ୍ଦ୍‌ତେ ପାପ୍‌ ମାଡ଼୍‌ ପାର୍‌ୱନ୍‌ ? 10 ମାତର୍‌ ଆ ମୁତେ ଦିନାଲ୍‌ ଦିନାଲ୍‌ ଯୋଷେପ୍‌ତିଙ୍କ୍‌ ଇଦ୍‌ ପୁଟୁଙ୍କ୍‌ କେତୁତ୍‌; ମାତ୍ର ଯୋଷେପ୍‌ ତାନ୍‌ ତଡ଼୍‌ ଉଞ୍ଜାନ୍‌ ମାଇଦିଙ୍କ୍‌ କି ତାନ୍‌ ଗାରେ ମାନ୍ଦାନଙ୍କ୍‌ ଇଚ୍ଛା ମାଡ଼କଟ ମାତ୍‌ତଣ୍ଡ୍‌।

11 ଅନ୍‌ଦିନ୍‌ ଯୋଷେପ୍‌ ନିଜର୍‌ ପାଡ଼୍‌ୟିଦେ ସେଙ୍ଗେ ଲୋତ୍‌ ଲୋପେ ଆତ୍‌ତଣ୍ଡ୍‌, ମେଣ୍ଡେ ଲୋତ୍‌ତେ ଚାକର୍‌ତିଙ୍କ୍‌ ୱିଡ଼୍‌ସି ବେନ ଆଗେ ଇଲକଟ ମାତ୍‌ତଣ୍ଡ୍‌। 12 ଆଦିଙ୍କ୍‌ ଆଦ୍‌ ଯୋଷେପ୍‌ତେ ଚକ୍‌ତିଙ୍କ୍‌ ପୟିସ୍‌ ନା ତଡ଼୍‌ ଉଞ୍ଜ୍‌ ଇଞ୍ଜ ଲାଗାଲାଗି ମାଡ଼ମାତ୍‌ତେ; ମାତ୍ର ଯୋଷେପ୍‌ତାନ୍‌ କାଇଦାଗ୍‌ ଅନାଦ୍‌ ଚକ୍‌କେ ୱିଡ଼୍‌ସି ବାୟିଦେ ମିର୍‌ତଣ୍ଡ୍‌। 13 ବେସୁଙ୍କ୍‌ ଆ ମୁତେ ଯୋଷେପ୍‌ତିଙ୍କ୍‌ ତାନ୍‌ କାୟ୍‌ଦେ ଅନାଦ୍‌ ଚକ୍‌କେ ୱିଡ଼୍‌ସି ବାୟିଦେ ମିରାନାଦ୍‌ ଉଡ଼ି, 14 ଆସୁଟ୍‌ ଆଦ୍‌ ନିଜର୍‌ ଲୋତ୍‌ତେ ନାରୁଡ଼୍‌କ୍‌ କାର୍ଙ୍ଗି କେତ୍‌ତେ, ଉଡ଼ାଟ୍‌, ଆଦ୍‌ ମାନ୍‌ତଡ଼୍‌ ଗେନ୍ଦିରି ମାଡ଼ାନ୍‌ ସେଙ୍ଗେ ଅର୍‌ତୁଙ୍କ୍‌ ଏବ୍ରିୟଙ୍କ୍‌ ତାସ୍‌ମିନ୍ଦେଣ୍ଡ୍‌; ଅଣ୍ଡ୍‌ ନା ତଡ଼୍‌ ଉଞ୍ଜାନ୍‌ ମାଇଦିଙ୍କ୍‌ ଲୋପେ ନା ଗାରେ ୱାସ୍‌ ମାତ୍‌ତଣ୍ଡ୍‌; ଆସୁଟ୍‌ ନାନ୍‌ ଗାଟି ଲେଙ୍ଗ୍‌ତେ କାର୍ଙ୍ଗ୍‌ତାନ୍‌; 15 ନାୟାଦ୍‌ ଗାଟି ଲେଙ୍ଗ୍‌ତେ କାର୍ଙ୍ଗାନାଦ୍‌ କେଞ୍ଜି ଅଣ୍ଡ୍‌ ତାନ୍‌ ଚକ୍‌କା ନା ଗାରେ ୱିଡ଼୍‌ସିସ୍‌ ବାୟିଦେ ମିର୍‌ତଣ୍ଡ୍‌।

16 ମେଣ୍ଡେ ଆଦ୍‌ ମୁତେ ତାନ୍‌ ମୁଦ୍‌ପାଲ୍‌ ଲୋନ୍‌ୱାନା ଯାକ ଆ ଚକ୍‌ତିଙ୍କ୍‌ ତାନ୍‌ ଗାରେ ନେଃସ୍‌ ମାତ୍‌ତେ। 17 ଆସୁଙ୍କ୍‌ ଆଦ୍‌ତାନ୍‌ ମୁଦ୍‌ପାଙ୍କ୍‌ ଆ ଗଟ୍‌ ଅନୁସାରେ କେତ୍‌ତେ, ନିମେ ବେନ୍‌ ଏବ୍ରିୟ ଦାସଙ୍କ୍‌ ମାନ୍‌ ଗାରେ ତାସ୍‌ମିନ୍ଦେନି, ଅଣ୍ଡ୍‌ ନା ତଡ଼୍‌ ଅୟିରାଣ୍‌ ମାଡ଼ାନ୍‌ ସେଙ୍ଗେ ନା ଗାରେ ୱାସ୍‌ ମାତ୍‌ତଣ୍ଡ୍‌; 18 ମେଣ୍ଡେ ନାନ୍‌ ଗାଟି ଲେଙ୍ଗ୍‌ହେତି କାର୍ଙ୍ଗ୍‌ତାଙ୍କ୍‌ ଅଣ୍ଡ୍‌ ନା ଗାରେ ଇ ଚକ୍‌କା ୱିଡ଼୍‌ସି ବାୟିଦେ ମିର୍‌ତଣ୍ଡ୍‌।

19 ଆସୁଟ୍‌ "ନି ଚାକର୍‌ ନା' ପ୍ରତି ଇଦ୍‌ଲେକାମ୍‌ ବ୍ୟବହାର୍‌ ମାଡ଼ିମିନ୍ଦେଣ୍ଡ୍‌," ତାନ୍‌ ମୁତେନ୍‌ ପାୟୁର୍‌କଞ୍ଚ୍‌ ଇ ଗଟ୍‌ କେଞ୍ଜି ଯୋଷେପ୍‌ତେ ପ୍ରବୁ ଗାଟି କପାମ୍‌ ଆତ୍‌ତଣ୍ଡ୍‌। 20 ମେଣ୍ଡେ ଯୋଷେପ୍‌ତେ ପ୍ରବୁ ଅଂକିଙ୍କ୍‌ ଅସ୍‌ ରାଜାଲଡ଼୍‌କ୍‌ ବନ୍ଦିମାଡ଼ି ନେଃତାନ୍‌ ପଡ଼୍‌ୟେତାଗେ ୱାଟ୍‌ତଣ୍ଡ୍‌; ଆସୁଟ୍‌ ଯୋଷେପ୍‌ ଆ ତାନାତାଗ୍‌ ମାତ୍‌ତଣ୍ଡ୍‌। 21 ମାତ୍ର ସଦାପ୍ରବୁ ଯୋଷେପ୍‌ତେ ତଡ଼୍‌ ମାତ୍‌ତଣ୍ଡ୍‌, ମେଣ୍ଡେ ଅନ୍‌ ପର ଦୟା ମାଡ଼ି ତାନାତାଗ୍‌ ରକ୍ଷାମାଡ଼ାନନ୍‌ କଣ୍ଡାନେ ଅଂକିଙ୍କ୍‌ ଅନୁଗ୍ରହ ପାତ୍ର ମାଡ଼୍‌ତଣ୍ଡ୍‌। 22 ଆସୁଟ୍‌ ଆ ତାନ୍‌ ରକ୍ଷାମାଡ଼ାନ୍‌ ବନ୍ଦିଲତ୍‌ତାଗ୍‌ ସାରେ ବନ୍ଦିନାରୁଡ଼୍‌ ଅଜନ୍‌ ଯୋଷେପ୍‌ତେ କାଇଦାଗ୍‌ ସମର୍ପଣ ମାଡ଼୍‌ତଣ୍ଡ୍‌; ମେଣ୍ଡେ ଅଡ଼୍‌ ବାତ୍‌ ମାଡ଼୍‌ତଡ଼୍‌, ଆଗେତ୍‌ ସାର୍‌ତିଙ୍କ୍‌ ମୁକ୍ୟାଲ୍‌ ଅଣ୍ଡ୍‌ ଆତ୍‌ତଣ୍ଡ୍‌। 23 ତାନା ରକ୍ଷା ମାଡ଼ାନଣ୍ଡ୍‌ ଯୋଷେପ୍‌ତେ କାୟ୍‌ଦେକଞ୍ଚ୍‌ ବାତ୍‌ ବା ବିଷୟ୍‌ତେ ଉଡ଼୍‌ତଡ଼୍‌, ବାତେଙ୍କ୍‌ଇତ୍କେ ସଦାପ୍ରବୁ ତାନ୍‌ ତଡ଼୍‌ ମାତ୍‌ତଣ୍ଡ୍‌; ମେଣ୍ଡେ ଅଣ୍ଡ୍‌ ବାତ୍‌ ମାଡ଼୍‌ତଣ୍ଡ୍‌, ସଦାପ୍ରବୁ ଆଦିଙ୍କ୍‌ ସିଦ୍ଦ ମାଡ଼୍‌ତଣ୍ଡ୍‌।