1 ମୁନେଙ୍କ୍‍ ପରମେଶ୍ୱର ସ୍ୱର୍ଗ ନୁ ପୃତିବିତିଙ୍କ୍‍ ତିଆର୍‍ ମାଡ଼୍‍ତଣ୍ଡ୍‍। 2 ପୃତିବି ଚିମ୍‌ଚାମ୍‌ ନୁ ବାତେଇଲକଟ ମାତ୍‌ତା, ମେଣ୍ଡେ କୁଇଙ୍ଗ୍‍ମାନ୍ଦାନ୍‍ ଏର୍‍ଦେ ପର ଇକାଡ଼୍‍ ମାତ୍‌ତା; ମେଣ୍ଡେ ପରମେଶ୍ୱରତେ ଆତ୍ମା ଏର୍‍ଦେ ପର ଉଡ ମାତ୍‍ତେ । 3 ତାନ୍‌ପେର୍କେ ପରମେଶ୍ୱର କେତ୍‍ତଣ୍ଡ୍‍, ୱେୟିସ୍‍ ଆୟି; ଆସୁଟେ ୱେୟିସ୍‍ ଆତ୍‌ତେ । 4 ମେଣ୍ଡେ ପରମେଶ୍ୱର ୱେୟ୍‍ସ୍‍ତିଙ୍କ୍‍ ଉଡ଼୍‍ତଣ୍ଡ୍‍ ଯେ ଆଦ୍‌ ଲେକେତ୍‍; ଆସୁଟ୍‍ ପରମେଶ୍ୱର ଇକାଡ଼୍‍ତାଗାଙ୍କ୍‍ ୱେୟ୍‍ସ୍‍ତିଙ୍କ୍‍ ୱେର୍‍ ମାଡ଼୍‍ତଣ୍ଡ୍‍ । 5 ମେଣ୍ଡେ ପରମେଶ୍ୱର ୱେୟ୍‍ସ୍‍ସିନ୍‍ ପେଦେର୍‍ ପାୟାଲ୍‍ ନୁ ଇକାଡ଼୍‍ତେ ପେଦେର୍‍ ନାର୍କା ଇତ୍‍ତଣ୍ଡ୍‍ । ଆସୁଟ୍‍ ମୁଲ୍‍ପୁଟ୍ ନୁ ନାର୍କକ୍‍ ଆସ୍‍ ପ୍ରତମ୍‌ ଦିନାମ୍‍ ଆତ୍‌ତେ ।

6 ଆସୁଙ୍କ୍‌ ପରମେଶ୍ୱର କେତ୍‍ତଣ୍ଡ୍‍, ଏର୍‌ଦେ ଲପେ ବାତେଇଲକଟ ମାତ୍‌ତେ ଏର୍‍ଦିଙ୍କ୍‍ ରେଣ୍ଡ୍‍ ବାଗ୍‍ ମାଡ଼ି । 7 ଆଦ୍‍ଲେକାମ୍‍ ପରମେଶ୍ୱର ବାତେଇଲ୍‌ୱାଦ୍‌ ତିଆର୍‍ ମାଡ଼ି ବାତେଇଲ୍‌ୱେ ପରତ୍‍ ଏର୍‍ ନୁ ମଦଲ୍‌ତେ ଏର୍‍ଦିଙ୍କ୍‍ ୱେର୍‍ ମାଡ଼୍‍ତଣ୍ଡ୍‍; ଆସୁଟ୍‍ ଆଦେଲେକାମ୍‌ ଆତ୍‌ତେ । 8 ମେଣ୍ଡେ ପରମେଶ୍ୱର ଆ ବାତେଇଲ୍‌ୱେ ପଡ଼ିୟେତ୍‌ ପେଦେର୍‍ ମାବ୍‍ ଇତ୍‍ତଣ୍ଡ୍‍ । ମେଣ୍ଡେ ମୁଲ୍‍ପୁଟ୍ ନୁ ନାର୍କକ୍‍ ଆସ୍‍ ରେଣ୍ଡ୍‍ ଦିନା ଆତ୍‌ତେ । 9 ଅନନ୍ତର ପରମେଶ୍ୱର କେତ୍‍ତଣ୍ଡ୍, ମାବ୍‍ତେ ନାଡ଼୍‍ମେତ୍‍ ସାରେ ଏର୍‍ ଅଣ୍ଡୟ୍‍ ପଡ଼ିୟ୍‍ତାଗ୍‍ ଗୁଡ଼ି ନୁ ମଦଲ୍‌ତେ ମାବ୍‌ ଆଇ; ଆସୁଟ୍‍ ଆଦ୍‍ଲେକାମ୍‍ ଆତ୍‌ତେ । 10 ମେଣ୍ଡେ ପରମେଶ୍ୱର ମଦଲ୍‌ତେ ପେଦେର୍‍ ପୃତିବି ନୁ ଏର୍‍ମାନ୍ଦାନାଦିନ୍‌ ପେଦେର୍‌ ସମୁଦ୍ର ଇତ୍‍ତଣ୍ଡ୍‍; ମେଣ୍ଡେ ପରମେଶ୍ୱର ଆଦିଙ୍କ୍‌ ଲେକେତ୍‍ ଉଡ଼୍‍ତଣ୍ଡ୍ । 11 ତାନ୍‍ପେର୍କେ ପରମେଶ୍ୱର କେତ୍‍ତଣ୍ଡ୍‍, ପୃତିବିତାଗ୍‌ ଲେତ୍‍ଗାଡ୍‍ ନୁ ସାୟେତ୍‍ ପେଡ଼େମ୍‍ ନୁ ୱିଜେ ମଡ଼୍‍ସ୍‍ ନାର୍ଗେ ନାର୍ଗେ ଜାତି ଅନୁସାତେ କାୟା ଆଦି କାୟାମାଡ଼ାକ୍‌ ବୁମ୍‍ତେ ପର ମଡ଼୍‌ୟି; ଆସୁଟ୍‍ ଆଦ୍‍ଲେକାମ୍‍ ଆତ୍‌ତେ । 12 ଇତ୍କେ, ପୃତିବିତାଗ୍‌ ଲେତ୍‍ଗାଡ୍‍ ନୁ ନାର୍ଗେ ନାର୍ଗେ ଜାତି ଲେକାମ୍‌ ୱିଜେ ମଡ଼୍‍ସ୍‍ ନୁ ନାର୍ଗେ ନାର୍ଗେ ଜାତି ଲେକାମ୍‌ ସାୟେତ୍‍ ୱିଜେତେ କାୟା ଆଦାନ୍‌ ମାଡ଼େ ତିଆର୍‍ ଆତ୍‌ତେ; ମେଣ୍ଡେ ପରମେଶ୍ୱର ଆଦିଙ୍କ୍‌ ଲେକେତ୍‍ ଉଡ଼୍‍ତଣ୍ଡ୍‍ । 13 ଆସୁଟ୍‍ ମୁଲ୍‍ପୁଟ୍ ନୁ ନାର୍କକ୍‍ ଆସ୍‍ ମୁଣ୍ଡ୍ ଦିନା ଆତ୍‌ତେ ।

14 ଅନନ୍ତର ପରମେଶ୍ୱର କେତ୍‍ତଣ୍ଡ୍, ଇକାଡ଼୍‍କଞ୍ଚ୍‍ ୱେୟ୍‍ସିଙ୍କ୍‍ ୱେର୍‍ ମାଡ଼ାନ୍ ମାଇଦିଙ୍କ୍‍ ମାବ୍‍ତାଗାଙ୍କ୍‌ ୱେୟିସ୍‌ ଆଦାନାଉ ତିଆର୍‍ ଆୟି; ମେଣ୍ଡେ ଆ ସାରେ ଚିହ୍ନେ, କାଲାମ୍‍, ଦିନାମ୍‍ ନୁ ହେଣ୍ଡେତ୍‍ ବିଷୟ୍ ଆୟି । 15 ମେଣ୍ଡେ ପୃତିବିତାଗ୍‍ ୱେୟିସ୍‍ ଇଦାନ୍‍ ମାଇଦିଙ୍କ୍‍ ମାବ୍‍ତାଗ୍‍ ଆ ୱେୟିସ୍‌ ଆଦାନାଉ ମାନି; ଆସୁଟ୍‍ ଆଦେ ଲେକାମ୍‍ ଆତ୍‌ତେ । 16 ଇଦ୍‍ ଲେକାମ୍‌ ପରମେଶ୍ୱର ପାୟାଲ୍‍ତିଙ୍କ୍‍ ଚାଲାମାଡ଼ାଙ୍କ୍‍ ଅଣ୍ଡୟ୍‍ ବେଡ଼୍‍ୟାଦ୍‍ ୱେୟିସ୍‍ ନୁ ନାର୍କାତିଙ୍କ୍‍ ଚାଲାମାଡ଼ାଙ୍କ୍‍ ତାଙ୍କ୍‍ଆନ୍‍ ସୁଦୁରାଦ୍‍ ୱେୟିସ୍‍, ଇୱୁ ରେଣ୍ଡ୍‌ ବେଡ଼ିୟେ ୱେୟ୍‌ସ୍,‌ ମେଣ୍ଡେ ଆନ୍ତେ ଉକାକିଙ୍କ୍‍ ତିଆର୍‍ ମାଡ଼୍‍ତଣ୍ଡ୍ । 17 ଆଦିଙ୍କ୍‌ ପରମେଶ୍ୱର ପୃତିବିତାଗ୍‍ ୱେୟିସ୍‍ ଇଦାନ୍‍ ମାଇଦିଙ୍କ୍‍ ନୁ ପାୟାଲ୍‍ ନୁ ନାର୍କେତ୍‍ ପର ଚାଲାମାଡ଼ାନ୍‍ ମାଇଦିଙ୍କ୍‍, 18 ମେଣ୍ଡେ ୱେୟ୍‍ସ୍‍ତିଙ୍କ୍‍ ଇକାଡ଼୍‍ତାଗାଙ୍କ୍‍ ୱେର୍‍ ମାଡ଼ାନ୍‍ ମାଇଦିଙ୍କ୍‍, ମାବ୍‍ତାଗ୍‍ ଆ ୱେୟିସ୍‌ ଆଦାନାଉ ତିଆର୍‍ ମାଡ଼୍‍ତଣ୍ଡ୍‍; ମେଣ୍ଡେ ପରମେଶ୍ୱର ଇୱ୍‍ ସାରେ ଲେକେତ୍‍ ଉଡ଼୍‍ତଣ୍ଡ୍‍ । 19 ଆସୁଟ୍‍ ମୁଲ୍‍ପୁଟ୍ ନୁ ନାର୍କକ୍‍ ଆସ୍‍ ନାଲୁ ଦିନା ଆତ୍‌ତେ ।

20 ତାନ୍‍ପେର୍କେ ପରମେଶ୍ୱର କେତ୍‍ତଣ୍ଡ୍‍, ଏର୍‍ ଗାଟିନାର୍ଗେ ଲେକାମ୍‍ ମେଟେତ୍‌ ଜିୱାକିନ୍‌ ପରୁ ଜନ୍ତୁ ଆୟି ନୁ ପୃତିବିତ୍‍ତେ ପର ମାବ୍‍ତାଗ୍‍ ପିଟେ ପାର୍‍ୱି । 21 ମେଣ୍ଡେ ପରମେଶ୍ୱର ବେଡ଼୍‍ୟାଦ୍‍ ତିମିକିକେ ଆସ୍‌ତାୱୁ ନୁ ନାର୍ଗେ ନାର୍ଗେ ଜାତି ଲେକାମ୍‍ ନାର୍ଗେ ଏର୍‍ଦେ ପଶୁ ନୁ ନାର୍ଗେ ନାର୍ଗେ ଜାତି ଲେକାମ୍‌ ପିଟେକିଙ୍କ୍‍ ତିଆର୍‍ ମାଡ଼୍‍ତଣ୍ଡ୍‍ । ପରମେଶ୍ୱର ଇୱ୍‍ ସାରେ ସାୟେ ଉଡ଼୍‍ତଣ୍ଡ୍‍ । 22 ମେଣ୍ଡେ ପରମେଶ୍ୱର ଆୱିଙ୍କ୍‍ ଆଶିର୍ବାଦ୍‌ ମାଡ଼ି କେତ୍‍ତଣ୍ଡ୍, ନାର୍ଗେମାନ୍ଦେ ନୁ ନାର୍ଗେ ପିଲୁଡ଼୍‍ ଆସ୍‍ ସମୁଦ୍ରତେ ଏର୍‍ଦିଙ୍କ୍‍ ବର୍ତ୍ତି ମାଡ଼ାଟ୍‍, ମେଣ୍ଡେ ପୃତିବିତାଗ୍‍ ପିଟେକି ନାର୍ଗେ ପିଲୁଡ଼୍‍ ଆୟି । 23 ଆସୁଟ୍‍ ମୁଲ୍‍ପୁଟ୍ ନୁ ନାର୍କକ୍‍ ଆସ୍‍ ଏଇଙ୍ଗ୍‍ ଦିନା ଆତ୍‌ତେ ।

24 ଅନନ୍ତର ପରମେଶ୍ୱର କେତ୍‍ତଣ୍ଡ୍‍, ପୃତିବିତାଗ୍‍ ନାର୍ଗେ ନାର୍ଗେ ଜାତି ଲେକାମ୍‌ ଜିୱାକ୍‌ ଆୟି, ଇତ୍କେବା, ନାର୍‍ଦେ ପଶୁ ନୁ ଆକାନ୍‌ ଜିୱାକ୍‌ ନୁ ନାର୍ଗେ ନାର୍ଗେ ଜାତି ଲେକାମ୍‌ ପୃତିବିତେ ମେଟେତ୍‍ପଶୁ ତିଆର୍‍ ଆୟି; ଆସୁଟ୍‍ ଆଦ୍‍ଲେକାମ୍‍ ଆତ୍‌ତା । 25 ଇଦ୍‍ ଲେକାମ୍ ପରମେଶ୍ୱର ନାର୍ଗେ ନାର୍ଗେ ଜାତି ଲେକାମ୍‌ ନାର୍‍ଦେ ପଶୁ ନୁ ନାର୍ଗେ ନାର୍ଗେ ଜାତି ଲେକାମ୍‌ ସାର୍ରେ ନେଲ୍‌ ମେୟାନ୍‌ ନୁ ଆକାନ୍‌ ଜିୱାକ୍‌ ତିଆର୍‍ ମାଡ଼୍‍ତଣ୍ଡ୍‍; ମେଣ୍ଡେ ପରମେଶ୍ୱର ଆୱ୍ ସାର୍ରେ ଲେକେତ୍‍ ଉଡ଼୍‍ତଣ୍ଡ୍‍ । 26 ଆସୁଟ୍‍ ପରମେଶ୍ୱର କେତ୍‍ତଣ୍ଡ୍‍, "ମାମ୍‌ମେ ମା ନିଜର୍‍ ମକମ୍‌ତେ ନୁ ନା ଲେକାମ୍‍ ନାରୁଣ୍ଡ୍‌ ତିଆର୍‍ ମାଡ଼ିତାନ୍‍ । ଅଡ଼୍‍ ଏର୍‍ଦେ କିକେତିଙ୍କ୍‍ ନୁ ପାର୍‍ତାନ୍‍ ପିଟେକିଙ୍କ୍‍ ନୁ ଜିୱାକ୍‌କିଙ୍କ୍ ନୁ ସାରେ ପୃତିବି ନୁ ବୁମ୍‍ତାଗ୍‍ ଆକାନାୱୁ ସାରେ ମେଟେତ୍‌ ଜିୱାକିନ୍‍ ପର ଅଦିକାର ମାଡ଼ିତଣ୍ଡ୍‍ ।" 27 ବେଡ଼ିୟେ ପରମେଶ୍ୱର ନିଜର ମକମ୍‌ତେ ନାରୁଣ୍ଡ୍‌ ତିଆର୍‍ ମାଡ଼୍‍ତଣ୍ଡ; ପରମେଶ୍ୱରତେ ନିଜର୍‍ମକମ୍‌ତେ ଅଣ୍ଡ୍ ଅଂକିଙ୍କ୍‍ ତିଆର୍‍ ମାଡ଼୍‍ତଣ୍ଡ୍; ମାନେୟ୍‌ ନୁ ନାଟାଡ଼୍‍ ମାଡ଼ି ଅଣ୍ଡ୍ ଅଡ଼୍‍କିଙ୍କ୍‍ ତିଆର୍‍ ମାଡ଼୍‍ତଣ୍ଡ୍‍ । 28 ମେଣ୍ଡେ ପରମେଶ୍ୱର ଅଡ଼୍‍କିଙ୍କ୍‍ ଆଶିର୍ବାଦ୍‌ ମାଡ଼୍‍ତଣ୍ଡ୍; ମେଣ୍ଡେ ପରମେଶ୍ୱର ଅଡ଼୍‍କିଙ୍କ୍‍ କେତ୍‍ତଣ୍ଡ୍, ମାନ୍ଦେ ନୁ ନାର୍ଗେ ପିଲୁଡ଼୍‍ ଆୟ୍‍ମୁଟ୍‍, ମେଣ୍ଡେ ପୃତିବିତିଙ୍କ୍‍ ବର୍ତ୍ତି ମାଡ଼ାଟ୍‍ , ମେଣ୍ଡେ ଏର୍‍ଦେ କିକେ ନୁ ପାର୍‍ତାନ୍‍ ପିଟେ ନୁ ନେଲ୍‌ ମେୟାନ୍‌ ମେଟେତ୍‌ ଜିୱାକ୍‌କିନ୍‍ ପର ଅଦିକାର୍‍ ମାଡ଼ାଟ୍‍ । 29 ପରମେଶ୍ୱର ମେଣ୍ଡେ କେତ୍‍ତଣ୍ଡ୍‍, ଉଡ଼ାଟ୍‍, ମାମ୍‌ମେ ବୁମ୍‍ଦାୱ୍‍ ସାରେ ଟଣ୍ଡା ନୁ ସାରେ ପେଡ଼େକ୍‍ କାୟାଆଦାନ୍‍ ମାଡ଼ାକ୍‍ ମିକିଙ୍କ୍‍ ଇତ୍‍ତମ୍‍, ଆୱ୍‍ ମିୟାୱ୍‍ କାଦି ଆଦ୍‌ତା । 30 ମେଣ୍ଡେ ପୃତିବିତେ ସାରେ ପଶୁ ନୁ ପାର୍‍ତାନ୍‍ ପିଟେ ନୁ ନେଲ୍‌ ମେୟାନ୍‌ ମେଟେତ୍‌ ଜନ୍ତୁ, ଇ ସାରେ ଜିୱାକିନ୍‍ କାର୍‍ୱିନ୍‍ ସେଙ୍ଗେ ମାମ୍‌ମେ ସାରେ ଗାଡ୍‌ ଜିନିଷ୍‌ ଇତ୍‍ତମ୍‍; ଆସୁଟ୍‍ ଆଦ୍‍ଲେକାମ୍‍ ଆତ୍‌ତେ । 31 ପରମେଶ୍ୱର ନିଜେ ତିଆର୍‍ ମାଡ଼୍‍ତେ ସାରେ ଜିନିଷ୍‍ତିଙ୍କ୍‍ ଉଡ଼୍‍ତଣ୍ଡ୍‍, ମେଣ୍ଡେ ଉଡ଼ାଟ୍‍, ସାରେ ଗାଟି ଲେକେତ୍‍ । ଆସୁଟ୍‍ ମୁଲ୍‍ପୁଟ୍ ନୁ ନାର୍କକ୍‍ ଆସ୍‍ ଆରୁ ଦିନା ଆତ୍‌ତେ ।