ଅବ୍ରହାମ୍ ନୁ ଅବିମେଲକ୍
1 ଅବ୍ରାହାମ୍ ଆଗାଙ୍କ୍ ତିନ୍ଦେକାଇଦେ ପାକେତ୍ ଦେଶ୍ତା ଆଞ୍ଜ୍ କାଦେଶ୍ ନୁ ଶୂରତେ ନାଡ଼୍ମେତ୍ ପଡ଼୍ୟ୍ତାଗ୍ ମାଞ୍ଜ୍ ଗରାରତାଗ୍ ମାଞ୍ଜ ମାଡ଼୍ତଡ଼୍। 2 ମେଣ୍ଡେ ଅବ୍ରାହାମ୍ ନିଜର୍ ମୁତେ ସାରାନ୍ ବିଷୟ୍ତେ କେତ୍ତଣ୍ଡ୍, ଆଦ୍ ନା ହେଲାଡ଼୍; ଇତ୍କେ ଗରାରତେ ରାଜାଲ୍ ଅବିମେଲକ ନାରୁଡ଼୍କ୍ ରୟ୍ସ୍ ସାରାଙ୍କ୍ ଅତ୍ତଡ଼୍। 3 ଆସୁଟ୍ ନାର୍କା ପରମେଶ୍ୱର ସାପ୍ନା ତଡ଼୍ ମାଲିକ୍ ଗାରେ ୱାସ୍ କେତ୍ତଣ୍ଡ୍, ଉଡ଼ା; ନିମେ ଡଲିତିନ୍, ବାତେଙ୍କ୍ଇତ୍କେ ବେନ୍ ମୁତେଙ୍କ୍ ନିମେ ଅସ୍ ମିନ୍ଦେନି, ତାନ୍ ମୁଦ୍ପାଲ୍ ମିନ୍ଦେଣ୍ଡ୍।
4 ମାତ୍ର ଅବିମେଲକ ତାନ୍ତଡ଼୍ କାଇଲ୍ୱେକଟ୍ ମାତ୍ତାଙ୍କ୍ କେତ୍ତଣ୍ଡ୍, ହୋ ପ୍ରବୁ, ବେନ୍ ଦେଶ୍ତେ ନାରୁଡ଼୍ ଦୋଷ୍ ଇଲ୍ୱେ ନଡ଼୍, ଅଡ଼୍କିଙ୍କ୍ କି ନିମେ ଆୱ୍କିତି ? 5 ଅବ୍ରହାମ୍ ନିଜେ ନାକିଙ୍କ୍ କେଲକଟ ମାତ୍ତଣ୍ଡ୍ କି, ଆଦ୍ ନା ହେଲାଡ଼୍ ? ମେଣ୍ଡେ ଆ ମୁତ୍ତେ ନିଜେ କେତ୍ କି ଅଣ୍ଡ୍ ନା ତାମୁଣ୍ଡ୍; ଆଦିଙ୍କ୍ ମନ୍ଦେ ସରଳତା ନୁ କାୟ୍ଦେ ଦଷ୍ଇଲକଟ ନାନ୍ ଇ ପାଡ଼୍ୟି ମାଡ଼ି ମିନ୍ଦେନ୍।
6 ଆସୁଟ୍ ପରମେଶ୍ୱର ସ୍ୱପ୍ନ ତଡ଼୍ ଅଂକିଙ୍କ୍ କେତ୍ତଣ୍ଡ୍, ନିମେ ମନ୍ଦେ ସରଳତାତେ ଇ ପାଡ଼ିୟ୍ ମାଡ଼ିମିନ୍ଦେନି; ଇଦ୍ ମାମେ ପୁତ୍ତମ୍; ମେଣ୍ଡେ ମାମେ ଆନ୍ତେ ମା ବିରୁଦ୍ତେ ପାପ୍ ମାଡ଼ାଙ୍କ୍ ମିକିଙ୍କ୍ ମନା ମାଡ଼୍ତମ୍; ଆଦିନ୍ ସେଙ୍ଗେ ତାଂକିଙ୍କ୍ ଇଟାଙ୍କ୍ ମିକିଙ୍କ୍ ଇୱମ୍। 7 ଇତ୍କେ ଇଞ୍ଜେ ଆ ନାରୁନ୍ତେ ମୁତେଙ୍କ୍ ମାଲ୍ପିମୁଟ୍; ବାତେଙ୍କ୍ଇତ୍କେ ଅଣ୍ଡ୍ ବବିଷ୍ୟଦ୍ବକ୍ତାଲ୍, ଅଣ୍ଡ୍ ମି ମାଇଦିଙ୍କ୍ ପ୍ରାର୍ତନା ମାଡ଼ିତଣ୍ଡ୍, ଆସୁଟ୍ ମିଡ଼୍ ଗେଲ୍ସିତିଡ଼୍,ମାତର୍ ଯଦି ତାଂକିଙ୍କ୍ ମାଲ୍ପିୱିଡ଼୍, ଆଲାଇତ୍କେ ନିଜାମ୍ ମିଡ଼୍ ସାରେପରିବାର ଡଲିତିଡ଼୍, ଇଦ୍ ପୁଞ୍ଜ୍ମାନୁଟ୍।
8 ଅବିମେଲକ ମେଣ୍ଡନ୍ ଦିନେ ନାର୍କକ୍ ତେଦି ଦାସଡ଼୍କ୍ କାର୍ଙ୍ଗି ଇ ସାରେ ଗଟି ଅଡ଼୍ କେୱୁଦେ କେତ୍ତାଙ୍କ୍, ଅଡ଼୍ ଗାଟି ୱେର୍ତା । 9 ଆସୁଟ୍ ଅବିମେଲକ ଅବ୍ରାହାମ୍ତିଙ୍କ୍ କାର୍ଙ୍ଗି କେତ୍ତଣ୍ଡ୍, ନିମେ ମା ପର ଇଲା ବେଲା ବ୍ୟବହାର୍ ମାଡ଼୍ତି ? ନିମେ ଯେ ମାକିଙ୍କ୍ ନୁ ମା ରାଜ୍ୟତିଙ୍କ୍ ବେଡ଼ିୟ୍ ପାପ୍ ମାଡ଼୍ତି, ମାମେ ନି ବିରୁଦ୍ତେ ଇଦ୍ପୁଟୁଙ୍କ୍ ବାତ୍ ଦୋଷ୍ ମାଡ଼ିମିନ୍ଦେମ୍ ? ନିମେ ମା ପର ଦାୟିଇଲ୍ୱେ କାମ୍ ମାଡ଼୍ତି। 10 ଅବିମେଲକ ଅବ୍ରାହାମ୍ତିଙ୍କ୍ ମେଣ୍ଡେ କେତ୍ତଣ୍ଡ୍, ନିମେ ବାତ୍ ଉଡ଼ି ଇଦ୍ପୁଟୁଙ୍କ୍ କାମ୍ ମାଡ଼୍ତି ?
11 ଆସୁଟ୍ ଅବ୍ରାହାମ୍ କେତ୍ତଣ୍ଡ୍, ଇ ଦେଶ୍ତାଗ୍ ପରମେଶ୍ୱର୍ତେ ପର ସୁଦୁର୍ ବା ୱେର୍ଇଲେ; ଆଦିନ୍ ମାଇଦିଙ୍କ୍ ନାନ୍ ଆଲ୍ସ୍ତାନ୍, ଇଡ଼୍ ନା ମୁତେନ୍ ଲୋଭତେ ନାକିଙ୍କ୍ ଆୱ୍କିତଡ଼୍। 12 ଆଦ୍ ନା ହେଲାଡ଼୍, ଇଦ୍ ନିଜାମ୍, ବାତେଙ୍କ୍ଇତ୍କେ ଆଦ୍ ନା ବାବାନ୍ ମାୟାଡ଼୍, ୟାୟାନ୍ ମାୟାଡ଼୍ ଆୟ, ମେଣ୍ଡେ ଆଦ୍ ନା ମୁତ୍ତେ ଆତ୍ତେ । 13 ବେସୁଙ୍କ୍ ପରମେଶ୍ୱର ନାକିଙ୍କ୍ ବାବାନ୍ ଲୋତ୍କଞ୍ଚ୍ ଯେକା କାର୍ଙ୍ଗିଅତଣ୍ଡ୍, ଆସୁଟ୍ ନାନ୍ କେତ୍ତାନ୍, ନିମେ ନା ପର ଇଦ୍ ଦୟା ମାଡ଼ିତି, ମାମେ ବେନ୍ ବେନ୍ ପଡ଼୍ୟ୍ତାଗ୍ ଆଦ୍ତମ୍, ଆଦ୍ ଆଦ୍ ପଡ଼୍ୟିତାଗ୍ ନିମେ ନାକିଙ୍କ୍ ଦାଦାଲ୍ ଇଞ୍ଜ କେତିତିନ୍।
14 ଆସୁଟ୍ ଅବିମେଲକ ତାନ୍ମୁତେଙ୍କ୍ ସାରାଙ୍କ୍ ମାଲ୍ପିତ୍ତଣ୍ଡ୍ ମିକା, ମେଣ୍ଢା ନୁ ଗଡ୍କ୍ ନୁ ଦାସଦାସିଡ଼୍କ୍ ତାସ୍ ଅବ୍ରାହାମ୍ତିଙ୍କ୍ ଇତ୍ତଡ଼୍। 15 ଅବିମେଲକ ଅବ୍ରାହାମ୍ତିଙ୍କ୍ କେତ୍ତଣ୍ଡ୍, ଉଡ଼ାଟ୍, ମାୟାୱ୍ ଇ ସାରେ ଦେଶ୍ ନି ମୁନ୍ନେ ମିନ୍ଦେ, ନିକ୍ ବେଗ୍ ଇଚ୍ଛା, ଆଗ୍ ମାନ୍ଦ୍ ପାର୍ଦ୍ତି। 16 ମେଣ୍ଡେ ଅଣ୍ଡ୍ ସାରାଙ୍କ୍ କେତ୍ତଣ୍ଡ୍, ଉଡ଼ା, ମାମେ ମି ଦାଦାଙ୍କ୍ ହଜାର୍ ହଜାର୍ ଦୁଙ୍କା ରୁପା ଡାବୁକ୍ ଇତ୍ତମ୍; ଉଡ଼ା, ଆଦ୍ ନି ପର ଗଟେମ୍ଆତ୍ତେ ସାରେ ବିଷୟ୍ତେ ମାଇଦିଙ୍କ୍ ସାର୍ତଡ଼୍ କଣ୍ଡାନ୍ ମୁନ୍ନେ; ମିକିଙ୍କ୍ ମେଣ୍ଡେ ସାରେ ବିଷୟ୍ତେ ନି ପର ନ୍ୟାୟ ବିଚାର୍ ମାଡ଼୍ୱେୟ୍ତେ।
17 ତାନ୍ପେର୍କେ ଅବ୍ରାହାମ୍ ପରମେଶ୍ୱରତେ ଗାର୍ରେ ପ୍ରାର୍ତନା ମାଡ଼୍ତାଙ୍କ୍ ପରମେଶ୍ୱର୍ ଅବିମେଲକତିଙ୍କ୍ ନୁ ତାନ୍ ମୁତେଙ୍କ୍ ନୁ ତାନ୍ ଦାସିକିଙ୍କ୍ ସୁସ୍ଥ ମାଡ଼୍ତଣ୍ଡ୍; ଆସୁଟ୍ ଅଡ଼୍ ପିଲା ଜନ୍ମ ଆତ୍ତା ।
18 ବାତେଙ୍କ୍ଇତ୍କେ ଅବ୍ରାହାମ୍ତେ ମୁତେ ସାରାନ୍ ମାଇଦିଙ୍କ୍ ସଦାପ୍ରବୁ ଅବିମେଲକତେ ଲୋତ୍ତେ ନାଟାକିନ୍ ଗର୍ବ ବନ୍ଦ୍ ମାଡ଼ିମାତ୍ତଣ୍ଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)