ଆରାମ୍ ବଇ 7

ଏର୍‍ମୁଃତାନାଦ୍‌

1 ଅନନ୍ତର ସଦାପ୍ରବୁ ନୋହଙ୍କ୍‍ କେତ୍‍ତଣ୍ଡ୍‍, ନିମେ ମି ପରିବାର୍‍ତଡ଼୍‍ ଜାହାଜତାଗ୍‍ ଅସାଟ୍‍; ବାତେଙ୍କ୍‍ଇତ୍କେ ଇ କାଲାତେ ନାରୁଡ଼୍‍ ଲୋପେଙ୍କ୍‍ ମାମ୍‌ମେ ମା ମୁନେ ନିକିଙ୍କ୍‍ ଦାର୍ମିକ୍‌ ଉଡ଼ିମିନ୍ଦେମ୍‍। 2 ମେଣ୍ଡେ ପୃତିବିତାଗ୍‍ ବଂଶ ରକ୍ଷା ମାଡ଼ାନ୍‍ ମାଇଦିଙ୍କ୍‍ ସାରେତାୱିନ୍‍ ଶୁଚି ପଶୁଜାତିତେ ସାତ୍‍ ସାତ୍‍ ପତ୍‌ ଡାଡେ ନୁ ସାରେତାୱିନ୍‍ ଅଶୁଚି ପଶୁଜାତିତେ ଅଣ୍ଡୟ୍‌ ଅଣ୍ଡୟ୍‌ ପତ୍‌ ଡାଡେ; 3 ସାରେ ଲେକେତ୍‌ ପିଟ୍‌ଜାତିତେ ସାତ୍‌ ସାତ୍‌ ପତ୍‌ ଡାଡେ ନି ତଡ଼୍‌ ଅୟ୍‌ମ୍‌। ବାତେଙ୍କ୍‌ଇତ୍କେ ମେଣ୍ଡନ୍‌ଦାମ୍‌ ଇଦ୍‌ ପୃତିବୀତାଗ୍‌ ପିଲୁଡ଼୍‌ ମାଡ଼ାନଙ୍କ୍‌ ସାରେପ୍ରକାର୍‌ ପିଟେ ନୁ ନାରୁଡ଼୍‌କ୍‌ ଜିୱେ ନେଃୱିଡ଼୍‌। 4 ବାତେଙ୍କ୍‍ଇତ୍କେ ସାତ୍‍ ଦିନାତେ ପେର୍କେ ମାମ୍‌ମେ ଚାଲିଶ୍‌ପାୟାଲ୍‌ ଚାଲିଶ୍‌ନାର୍କା ପୃତିବିତାଗ୍‍ ୱାନ୍‍ ରୟ୍‍ସ୍‍ ବାତେ ମାମେ ତିଆର୍‌ ମାଡ଼ିମିନ୍ଦେମ୍‌ ସାରେ ଜିୱାକିଙ୍କ୍‍ ନଷ୍ଟ ମାଡ଼ିତାନ୍‌ । 5 ନୋହ ସଦାପ୍ରବୁନ୍‍ ଆଦେଶ୍‌ ଅନୁସାରେ ସାରେ ପାଡ଼ିୟ୍‌ ମାଡ଼୍‍ତଣ୍ଡ୍‍।

6 ନୋହତେ ଛଅଶହ ବର୍ଷ ବୟସ୍‍ତେ ପୃତିବିତ୍‍ ପର ଏର୍‌ଃମୁତାନାଦ୍‌ ଆତ୍‌ତେ । 7 ଆଦିଙ୍କ୍‌ ଏର୍‌ମୁଃତାଗାଙ୍କ୍‍ ଗେଲ୍‍ସାନ୍‍ ମାଇଦିଙ୍କ୍‍ ନୋହ ନୁ ଅନ୍‍ ମୁତେ ମେଣ୍ଡେ ମାର୍‍କିଡ଼୍‍ ନୁ ମାର୍‍କିଡ଼୍‍ ମୁତେକି ଜାହାଜ୍‍ତାଗ୍‍ ଅସ୍‍ତା। 8 ମେଣ୍ଡେ ନୋହନ୍‍ ପ୍ରତି ପରମେଶ୍ୱରତେ ଆଦେଶ୍‌ ଅନୁସାରେ ଶୁଚି ନୁ ଅଶୁଚି ଜିୱାକ୍‌ ପିଟେ ନୁ ନେଲ୍‌ ଆକାନ୍‌ ମେଟେତ୍‌ ପଶୁ ଯୋଡ଼୍‌ ଯୋଡ଼୍‌ ଆସ୍‍ 9 ନୋହତେ ଗାରେ ଆଞ୍ଜ୍‌ ଜାହାଜତାଗ୍‍ ଅସ୍‍ତା। 10 ମେଣ୍ଡେ ଆ ସାତ୍‍ଦିନାତେ ପେର୍କେ ପୃତିବିତାଗ୍‌ ଏର୍‌ମୁଃତାନାଦ୍‌ ଆରାମ୍‌ ଆତ୍‌ତେ ।

11 ବେସୁଙ୍କ୍‌ ନୋହଙ୍କ୍‌ ଚଅଶହ ବର୍ଷଆସ୍‌ ମାନ୍ଦାନ୍‌ୱେଲେ, ରେଣ୍ଡ୍‌ ନେଲ୍‍ଞ୍ଜ୍‌ ସତ୍‌ରଦିନାତେ ବେଡ଼୍‍ୟାଦ୍‍ ସମୁଦ୍ରତେ ସାରେ ଏର୍‌ମାନ୍ଦାନ୍‌ ପେଟ୍‌ ଉରଙ୍ଗ୍‍ତା, ମେଣ୍ଡେ ମାବ୍‌ତେ ଆର୍‍ ସାରେ କୁଲା ଆତ୍‌ତେ । 12 ଆସୁଟ୍‍ ଚାଲିଶ୍‌ଦିନ୍‍ ଚାଲିଶ୍‌ନାର୍କେ ପୃତିବିତାଗ୍‌ ୱାନ୍‍ ୱାତ୍‍ତେ। 13 ଆ ଦିନାତେ ନୋହ, ମେଣ୍ଡେ ଶେମ ନୁ ହାମ ନୁ ଯେପତ୍‍ ପେଦେର୍‍ତେ ନୋହନ୍‍ ମାର୍‍କ୍, ମେଣ୍ଡେ ଅଡ଼୍‍ ତ ନୋହନ୍‍ ମୁତେ ନୁ ମୁଣ୍ଡ୍‍ ମାର୍‍କିଡ଼୍‍ ମୁତେ ଜାହାଜ୍‍ତାଗ୍‍ ଅସ୍‍ତା। 14 ମେଣ୍ଡେ, ସାରେ ଜାତିତେ ନାର୍‍ଦେ ନୁ ମେଟେତ୍‍ପଶୁ ନୁ ସାରେ ଜାତିତେ ମେଟେତ୍‌ ଜନ୍ତୁ ନୁ ସାରେ ଜାତିତେ ନେଲ୍‌ ଆକାନ୍‌ ଜନ୍ତୁ ନୁ ପାର୍‍ତାନ୍‍ ପିଟେ ଅନ୍‌ତଡ଼୍‌ ନେଙ୍ଗ୍‌ତା; 15 ଇତ୍କେ, ଜିୱେମାନ୍ଦାନ୍‌ ସାରେ ଲେକାତ୍ ଜିୱାକ୍‌ ଯୋଡ଼୍‌ ଯୋଡ଼୍‌ ଆସ୍‍ ନୋହନ୍‍ ଗାରେ ଆଞ୍ଜ୍‌ ଜାହାଜ୍‍ତାଗ୍‍ ଅସ୍‍ତା। 16 ପରମେଶ୍ୱରତେ ଆଦେଶ୍‌ ଲେକାମ୍‌ ସାରେ ପ୍ରକାର୍‍ତେ ଅଣ୍ଡ ଅଣ୍ଡ ପତ୍‌ ଡାଡେ ଅସ୍‍ତା; ଆସୁଟ୍‍, ସଦାପ୍ରବୁ ତାନ୍‍ ଗାରେତ୍‍ ଆର୍‍ଦିଙ୍କ୍‍ ବନ୍ଦ ମାଡ଼୍‍ତଣ୍ଡ୍‍।

17 ଅନନ୍ତର ଚାଲିଶ୍‍ ଦିନ୍‍ଯାକ ପୃତିବିତାଗ୍‍ ଏର୍‍ମୁଃତାନାଦ୍‌ ଆତ୍‌ତେ; ମେଣ୍ଡେ ଏର୍‍ ନାର୍ଗେ ଆସ ଆସ ଜାହାଜ ବୁମ୍‍ତିଙ୍କ୍‍ ୱିଡ଼୍‍ସି ଏର୍‌ଦାଗ୍‌ ଆଦାନଙ୍କ୍‌ ପସ୍ପତେ। 18 ମେଣ୍ଡେ ପୃତିବିତାଗ୍‍ ଏର୍‍ ନାର୍ଗେ ଆସ ଆସ ଜାହାଜ ଏର୍‍ ପର ଆଦୁତ୍‌ । 19 ପୃତିବିତ୍‍ ପର ଏର୍‍ ଗାଟି ଆସ ମାବ୍‍ତେ ମଦଲ୍‍ ସାରେ ଡେଙ୍ଗ୍‍ମାନ୍ଦାନ୍‍ ମେଟାକିଙ୍କ୍‍ ମିସ୍‍ତେ। 20 ତାନ୍‍ ପେର୍କେ ମେଟା ମୁଡ଼୍‍ନ୍ତା; ପନ୍ଦର କାୟ୍‍ ହେୱୁନା ଏର୍‍ ତେଦ୍‍ତେ। 21 ଆଦିଙ୍କ୍‌ ସାରେ ନେଲ୍‌ମେୟାନ୍‌ ପ୍ରାଣି, ଇତ୍କେ, ପିଟେ, ନାର୍‍ଦାୱ୍‍ ନୁ ମେଟେତ୍‍ପଶୁ ନୁ ପୃତିବିତାଗ୍‍ ତାକ ଉଡାନ୍‍ ମେଟେତ୍‌ ଜନ୍ତୁ ନୁ ସାରେ ନାରୁଡ଼୍‍ ଡଲ୍‌ତଡ଼୍‌, 22 ମେଣ୍ଡେ ୱାସ୍‍ତେ ବୁମ୍‌ତାଗ୍‌ ବେସ୍‍କ୍‍ ଜିୱାକିନ୍ ମସନାଗ୍‍ ଜିୱେତ୍‍ ମାତ୍‍ତେ, ସାରେ ଡଲ୍‍ତା। 23 ଆଦେ ଲେକାମ୍‍ ପୃତିବିତେ ସାରେ ପ୍ରାଣି ନଷ୍ଟ ଆତ୍‌ତା, ଇତ୍କେ, ନାରୁଡ଼୍‌, ପଶୁ, ମେଟେତ୍‌ ଜନ୍ତୁ, ପାର୍‌ତାନ୍‌ ପିଟେ, ସାରେ ପୃତିବିତାଗାଙ୍କ୍‍ ନଷ୍ଟ ଆଦ୍‌ତେ, ମାତର୍‌ ନୋହ ନୁ ଜାହାଜ୍‍ତାଗ୍‌ ମାନ୍ଦାନଡ଼୍‍ ସାରେତଡ଼୍‍ ଗେଲ୍‍ସ୍‍ତଡ଼୍‍। 24 ଆଦେ ଲେକାମ୍‍ ପୃତିବୀତାଗ୍‌ ଶହେ ପଚାଶ ଦିନ୍‍ ହେୱୁନା ଏର୍‍ଦାଗେ ମୁଡ଼୍‍ନ୍ଦି ମାତ୍‍ତେ।