ଯିହୁଦାଲ୍ ନୁ ତାମର୍
1 ଆ ସମୟ୍ତେ ଯିହୁଦାଲ୍ ତାମ୍ ଦାଦାଲଡ଼୍ ଗାରେ ଅଦୁଲ୍ଲମୀୟ ହୀରା ପେଦେର୍ତେ ଅର୍ତୁଣ୍ଡ୍ ନାରୁନ୍ ଗାରେ ଆତ୍ତଣ୍ଡ୍। 2 ଆଗେ ଶୂୟ ପେଦେର୍ତେ ବେନ୍ଆଇ କିଣାନୀୟ ଯିହୁଦା ନାରୁନ୍ତେ ଅଣ୍ଡୟ୍ ପିକ୍ତିଙ୍କ୍ ଉଡ଼ି ତାଂକିଙ୍କ୍ ପେଣ୍ଡୁଲ୍ ଆସ୍ ତାନ୍ତଡ଼୍ ଉଞ୍ଜ୍ତଣ୍ଡ୍। 3 ଆଦିଙ୍କ୍ ଆଦ୍ ଡଙ୍କେତ୍ ଆସ୍ ମାର୍ ଜନ୍ମ ମାଡ଼୍ତାଙ୍କ୍ ଆଦ୍ ଅନ୍ ପେଦେର୍ ଏର ୱାଟ୍ତେ। 4 ଆଦ୍ ମେଣ୍ଡନ୍ ଦାମ୍ ଡଙ୍କେତ୍ ଆତ୍ତାଙ୍କ୍, ଆଦ୍ ମାର୍ ଜନ୍ମ ମାଡ଼ି ଅନ୍ ପେଦେର୍ ଓନନ୍ ୱାଟ୍ତେ। 5 ମେଣ୍ଡନ୍ଦାମ୍ ଡଙ୍କେତ୍ ଆତ୍ତାଙ୍କ୍, ଆଦ୍ ମାର୍ ଜନ୍ମ ମାଡ଼ି ଅନ୍ ପେଦେର୍ ଶେଲା ୱାଟ୍ତେ। ଇନ୍ ଜନ୍ମ ସମୟ୍ତେ ଯିହୁଦାଲ୍ କଷୀବତାଗ୍ ମାତ୍ତଣ୍ଡ୍।
6 ଆ ଯିହୁଦାଲ୍ ତାମର୍ ପେଦେର୍ ତେ ଅଣ୍ଡୟ୍ ପିକ୍ତିଙ୍କ୍ ତାସ୍ ତାନ୍ ବେଡ଼ିୟ୍ ମାର୍ ଏରନ୍ ତଡ଼୍ ତାଂକିଙ୍କ୍ ପେଣ୍ଡୁଲ୍ ମାଡ଼୍ତଣ୍ଡ୍। 7 ମାତ୍ରମ୍ ଯିହୁଦାନ୍ ବେଡ଼ିୟ୍ ମାର୍ ଏର ସଦାପ୍ରବୁନ୍ ମୁନେ ଦୁଷ୍ଟ ମାତ୍ତଣ୍ଡ୍; ଆଦିଙ୍କ୍ ସଦାପ୍ରବୁ ଅଂକିଙ୍କ୍ ଆୱୁକିତ୍ତଣ୍ଡ୍। 8 ଆସୁଟ୍ ଯିହୁଦାଲ୍ ଓନନ୍ତିଙ୍କ୍ କେତ୍ତଣ୍ଡ୍, ନିମେ ନି ଦାଦାନ୍ ମୁତେନ୍ତ ମାନ୍ ନୁ ତାନ୍ ପର ଏର୍ୱୁଣ୍ଡ୍ ପାଡ଼୍ୟି ମାଡ଼ି ଦାଦାଲଡ଼୍ ପିଲୁଡ଼୍ ଜନ୍ମ ମାଡ଼ା। 9 ମାତ୍ରମ୍ ଆ ପିଲୁଡ଼୍ ନିୟାଦ୍ ଆୟ, ଇଦ୍ ବୁଜେମ୍ ଆସ୍ ଓନନ୍ ଦାଦାନ୍ ମୁତେନ୍ତ କାଇଲାନ୍ କାଲାତେ ଦାଦାଲଡ଼୍ ପିଲୁଡ଼୍ ଜନ୍ମ ମାଡ଼ାନ୍ ଇଚ୍ଛା ଇଲ୍ୱେ ବୁମ୍ତାଗ୍ ବିର୍ଜ ୱିଡ଼ିସ୍ତଣ୍ଡ୍। 10 ତାନ୍ ଇଦ୍ ରକମ୍ତେ ପାଡ଼୍ୟି ସଦାପ୍ରବୁନ୍ ମୁନେ କାରାପ୍ ମାତ୍ତେ; ଆଦିଙ୍କ୍ ଅଣ୍ଡ୍ ଆଦିଙ୍କ୍ ଆନ୍ତେ ଆୱୁକିତ୍ତଣ୍ଡ୍। 11 ଆସୁଟ୍ ଯିହୁଦାଲ୍ ତାନ୍ ମାରିନ୍ ମୁତେଙ୍କ୍ ତାମର୍ତିଙ୍କ୍ କେତ୍ତଣ୍ଡ୍, ନା ମାର୍ ଶେଲାଲ୍ ବେଡ଼ିୟ୍ ଆୟ୍ୱା ଜାକ ନିମେ ରାଣ୍ଡିନି ଆସ୍ ନି ବାବାଲଡ଼୍ ଲୋନ୍ ଆଞ୍ଜ୍ ମାନ୍; ବାତେଙ୍କ୍ଇତ୍କେ ଅଣ୍ଡ୍ ଆଲ୍ସ୍ତଣ୍ଡ୍, ଉମ୍ଭକି ଦାଦାଲଡ଼୍ ଲେକାମ୍ ଶେଲା ଆନ୍ତେ ଡଲିତଣ୍ଡ୍। ଆଦିନ୍ ମାଇଦିଙ୍କ୍ ତାମର୍ ବାବାଲଡ଼୍ ଲୋନ୍ ଆଞ୍ଜ୍ ମାତ୍ତେ।
12 ମେଣ୍ଡେ ନାର୍ଗେ ଦିନାତ୍ ପେର୍କେ, ଶୂୟର୍ତେ ପିକିର୍ ଯିହୁଦାନ୍ ମୁତେ ଡଲ୍ତେ; ତାନ୍ ପେର୍କେ ଯିହୁଦାଲ୍ ସାନ୍ତ୍ଵନା ଆସ୍ ଅଦୁଲ୍ଲମୀୟ ହୀରା ପେଦେର୍ତେ ସାଙ୍ଗଡ଼୍ ତଡ଼୍ ତିମ୍ନାତାଗ୍ ତାନ୍ ମେଣ୍ଡାନ୍ ଜାଟେଲି କୟ୍ଦାନଡ଼୍ ଗାରେ ଆତ୍ତଣ୍ଡ୍।
13 ଆସୁଟ୍ ବେନ ଅର୍ତୁଣ୍ଡ୍ ତାମର୍ତିଙ୍କ୍ କାବୁର୍ ଇସ୍ କେତ୍ତଣ୍ଡ୍, ଉଡ଼ା, ମି ମାମାଲ୍ ତାନ୍ ମେଣ୍ଡେତ୍ ଜାଟେଲି କୟ୍ଦାନ୍ ମାଇଦିଙ୍କ୍ ତିମ୍ନାତା ଆଞ୍ଜମିନ୍ଦେଣ୍ଡ୍। 14 ଆସୁଟ୍ ତାମର୍ ରାଣ୍ଡିଲ୍ ସିଲେ ଏସି ଆବରକଚିଲେ ଉଡ଼୍ସି ନିଜ୍ତିଙ୍କ୍ ମୁସ୍ସି ତିମ୍ନାତେ ଆର୍ଦେ ଗାରେ ଐନମର ନେଙ୍ଗାନ୍ ପଡ଼୍ୟ୍ତାଗ୍ କୁଦି ମାତ୍ତେ; ବାତେଙ୍କ୍ଇତ୍କେ ଆଦ୍ ଉଡ଼୍ତେ, ଶେଲାଲ୍ ବେଡ଼ିୟ୍ ଆତ୍କେବା ତାନ୍ ତଡ଼୍ ତାନ୍ ପେଣ୍ଡୁଲ୍ ଆୟ।
15 ଆସୁଟ୍ ଯିହୁଦାଲ୍ ତାକିଂଙ୍କ୍ ଉଡ଼ି ଦାଃରିଲ୍ ଜ୍ଞାନ ମାଡ଼୍ତଣ୍ଡ୍, ବାତେଙ୍କ୍ଇତ୍କେ ଆଦ୍ ମକମ୍ ମୁସ୍ସି ମାତ୍ତେ। 16 ଆଦିନ୍ ମାଇଦିଙ୍କ୍ ଅଣ୍ଡ୍ ଆର୍ଦେ ଗାରେ ତାନ୍ ଗାରେ ଆଞ୍ଜ୍ ମାରିନ୍ ମୁତେଙ୍କ୍ ଏଞ୍ଚ ପାର୍ୱେକଟ କେତ୍ତଣ୍ଡ୍, ନିବେଦନ ମାଡ଼ୁତାନ୍, ନି ପାକେ ନାକିଙ୍କ୍ ଆଦାଙ୍କ୍ ଇମ୍ ଆସୁଟ୍ ତାମର୍ କେତ୍ତେ, ନିମେ ନା ପାକେ ୱାତ୍ତ୍କେ ବାତ୍ ଇଦ୍ତିନ୍ ? 17 ଅଣ୍ଡ୍ କେତ୍ତଣ୍ଡ୍, ମାନ୍ଦେତାଗାଙ୍କ୍ ଅଣ୍ଡୟ୍ ମେଣ୍ଢ୍ପିଲା ରୟ୍ସିଦ୍ତାନ୍ ତାମର୍ କେତ୍ତେ, ଆଦ୍ ରହ୍ନା ଯାକ ନାକିଙ୍କ୍ ବାତ୍ ବାନ୍ଦେ ଇଦ୍ତି ?
18 ଯିହୁଦାଲ୍ କେତ୍ତଣ୍ଡ୍, ବାତେ ବାନ୍ଦେ ଇଦ୍ତାନ୍ ? ତାମର୍ କେତ୍ତେ, ନିୟାଦ୍ ଇଦ୍ ନାୟାଦ୍ ନୁ ନୁଲ୍, ମେଣ୍ଡେ କାୟ୍ଦେ ଟେଙ୍ଗ୍। ଆସୁଟ୍ ଯିହୁଦାଲ୍ ତାଂକିଙ୍କ୍ ଅଣ୍ଡ୍ ସାରେ ଇସ୍ ତାନ୍ ଗାରେ ଆତ୍ତଣ୍ଡ୍, ଆସୁଟ୍ ଆଦ୍ ଅନ୍ତଡ଼୍ ଡଙ୍କେତ୍ ଆତ୍ତେ। 19 ଆସୁଙ୍କ୍ ତାମର୍ ତେଦି ଆତ୍ତେ, ମେଣ୍ଡେ କେର୍ତେ ସିଲେ ବାଦ୍ଲା ମାଡ଼ି ରାଣ୍ଡିମୁତେନ୍ ଚିଲେ କେର୍ତେ।
20 ତାନ୍ପେର୍କେ ଯିହୁଦାଲ୍ ଆ ମୁତେନାଗାଙ୍କ୍ ବାନ୍ଦେ ଜିନିଷ୍ ଅଦାନ୍ ମାଇଦିଙ୍କ୍ ତାନ୍ ଅଦୁଲ୍ଲମୀୟନ୍ ସାଙ୍ଗ ଇରାନ୍ତଡ଼୍ ମେଣ୍ଢ୍ପିଲା ରୟ୍ସିତ୍ତଣ୍ଡ୍, ମାତ୍ରମ୍ ଅଣ୍ଡ୍ ତାଂକିଙ୍କ୍ ଉଡ଼୍ପାର୍ୱଣ୍ଡ୍ ଆତ୍ତଣ୍ଡ୍। 21 ଆଦିଙ୍କ୍ ଅଣ୍ଡ୍ ଆଗେତ୍ ନାରୁଡ଼୍କ୍ ପାଚାରା ମାଡ଼୍ତଣ୍ଡ୍, ଐନମ ଆର୍ଦେ ଗାରେ ବେନ୍ ଦାଃରିଲ୍ ମାତ୍ତେ, ଆଦ୍ ବେକେ ? ଅଡ଼୍ କେତ୍ତଡ଼୍, ଇଗେ ବେନ୍ ବା ଦାଃରିଲ୍ ମାନ।
22 ତାନ୍ପେର୍କେ ଯିହୁଦାନ୍ ଗାରେ ମାଲ୍ସ୍ ଆଞ୍ଜ୍ କେତ୍ତଣ୍ଡ୍, ନାନ୍ ତାଂକିଙ୍କ୍ ଉଡ଼୍ ପାର୍ୱନ୍ ଆତ୍ତାନ୍, ମେଣ୍ଡେ ଆଗେତ୍ ନାରୁଡ଼୍ ଆନ୍ତେ କେତ୍ତଡ଼୍, ଇ ପଡ଼ିୟ୍ତାଗ୍ ବେନ୍ ବା ଦାଃରିଲ୍ ମାନ।
23 ତାନ୍ପେର୍କେ ଯିହୁଦାଲ୍ କେତ୍ତଣ୍ଡ୍, ତାନାଗ୍ ବାତା ମିନ୍ଦେ, ଆଦ୍ ଆୱିଙ୍କ୍ ନେଃୱି, ମାନା ବାତେଙ୍କ୍ ସିଗ୍ ଆଦ୍ତାଡ଼୍ ? ଉଡ଼ା, ନାନ୍ ଇ ମେଣ୍ଢ୍ପିଲା ରହ୍ତାନ୍, ମାତ୍ରମ୍ ନିମେ ତାଂକିଙ୍କ୍ ଉଡ଼୍ପାର୍ୱିନ୍ ଆତ୍ତିନ୍।
24 ମେଣ୍ଡେ ମୁଣ୍ଡ୍ ନେଲ୍ଞ୍ଜିନ୍ ପେର୍କେ ବେନମାତି ଯିହୁଦାଙ୍କ୍ କେତ୍ତଣ୍ଡ୍, ନି ମାରିନ୍ ମୁତେ ତାମର୍ ବ୍ୟବିଚାରିଣିଲ୍ ଆସ୍ମିନ୍ଦେ; ମେଣ୍ଡେ ବ୍ୟବିଚାର୍ତେ ସେଙ୍ଗେ ଆଦ୍ ଡଙ୍କେତ୍ ଆସ୍ ମିନ୍ଦେ। ଆସୁଟ୍ ଯିହୁଦାଲ୍ କେତ୍ତଣ୍ଡ୍, ତାଂକିଙ୍କ୍ ବାୟ୍ଦେତାସ୍ କିସ୍ତାଗ୍ ପଡ଼୍ସିମୁଟ୍।
25 ଆସୁଙ୍କ୍ ତାଂକିଙ୍କ୍ ବାୟ୍ଦେ ତାତ୍ତାଙ୍କ୍, ତାମ୍ ମାମାନ୍ ଗାରେ କେସ୍ ରହ୍ତେ, ଇ ସାରେ ଜିନିଷ୍ ବେନନାୱ୍, ଆ ନାରୁନ୍ ତଡ଼୍ ନାନ୍ ଡଙ୍କେତ୍ ଆତ୍ତାନ୍। ମେଣ୍ଡେ କେତ୍ତେ, ଇୱ୍ ନାୟାୱୁ ନୁଲ୍ ମେଣ୍ଡେ ଡୁଡ୍ ବେନନାଦ୍ ? ଆଦ୍ ଏଞ୍ଚି ଉଡ଼ା।
26 ତାନ୍ପେର୍କେ ଆ ସାରେ ଜିନିଷ୍ ନାୟାୱୁ ଇଞ୍ଜ ପୁଞ୍ଜ୍ କେତ୍ତଣ୍ଡ୍, ଆଦ୍ ନାକିଙ୍କ୍ ଆନ୍ ଅଦିକ୍ ଦର୍ମିଷ୍ଟାଲ୍, ବାତେଙ୍କ୍ଇତ୍କେ ନାନ୍ ତାଂକିଙ୍କ୍ ନା ମାର୍ ଶେଲାଙ୍କ୍ ଇୱନ୍। ମାତ୍ରମ୍ ଯିହୁଦାଲ୍ ମେଣ୍ଡେ ତାନ୍ ଗାରେ ଆନ୍ନଣ୍ଡ୍।
27 ମେଣ୍ଡେ ତାମର୍ତେ ଜନ୍ମ ଆଦାନ୍ ସମୟ୍ ହେୱ୍ତାଙ୍କ୍, ତାନ୍ ଡଙ୍କେତ୍ ଲୋପେ କାୱ୍ଲେ ପିଲା ମାନ୍ଦାନାଦ୍ ଉଡ଼୍ତଡ଼୍। 28 ମେଣ୍ଡେ ଆଦ୍ ଜନ୍ମ ସମୟ୍ତେ ୱେରନ୍ ପେକାନ୍ କାୟ୍ ପେୟ୍ତା; ଆସୁଟ୍ ଦାସିଲ୍ ଅନ୍ ଆ କାଇଦିଙ୍କ୍ ସିନ୍ଦୁର୍ ରଙ୍ଗ୍ଦେ ନୁଲ୍ ତଃସ୍ କେତ୍ତେ, ଇଣ୍ଡ୍ ବେଡ଼୍ୟଣ୍ଡ୍। 29 ମାତ୍ରମ୍ ଅଣ୍ଡ୍ ତାନ୍ କାୟ୍ ଲାଗି ଅତ୍ତାଙ୍କ୍, ଉଡ଼ା, ତାନ୍ ତାମୁଣ୍ଡ୍ ବୂମ୍ତାଗେ ୱାତ୍ତଣ୍ଡ୍; ଆସୁଟ୍ ଦାସିଲ୍ କେତ୍ତେ, ନିମେ ବେଦ୍ ପ୍ରକାର୍ ନିଜର୍ ମାଇଦିଙ୍କ୍ ବେଦ ମାଡ଼ି ୱାତ୍ତିନ୍ ? ନିଆଗେ ଇ ବେଦ ଆୟି। ଆଦିଙ୍କ୍ ଅନ୍ ପେଦେର୍ ପେରସ୍ତେ ଅର୍ଥ ବେଦ ଆତ୍ତଣ୍ଡ୍। 30 ଆଦିନ୍ କାଇଦାଗ୍ ସିନ୍ଦୁର୍ରଙ୍ଗ୍ଦେ ନୁଲ୍ତଃତେ ତାମୁଣ୍ଡ୍ ବୁମ୍ତାଗେ ୱାତ୍ତାଙ୍କ୍, ଅନ୍ ପେଦେର୍ ସେରହ ଆତ୍ତେ।
/images/a/lTDTr17sdXbuk0Q46fQTo)
/images/a/a0208299-6f37-40a0-66e1-2576b9435f00)