ଏର୍ ମୁହୁତାନାଦ୍ ତେର୍ତେ
1 ପରମେଶ୍ୱର ନୋହଙ୍କ୍ ନୁ ଅନ୍ତଡ଼୍ ଜାହାଜ୍ତେ ପେର୍କେ ସାରେ ଜିୱାକ୍କିଙ୍କ୍ ଏର୍କେ ମାଡ଼ି ପୃତିବିତାଗ୍ ଗାଲ୍ ରହ୍ତଣ୍ଡ୍, ଆସୁଟ୍ ଏର୍ କମ୍ଆତ୍ତେ; 2 ବେଡ଼ିୟ୍ ସମୁଦ୍ରତେ ଏର୍ ମାନ୍ଦାନାଦ୍ ନୁ ମାବ୍ତାଦ୍ ଆର୍ ଆନ୍ତେ ବନ୍ଦ୍ ଆତ୍ତେ, ମେଣ୍ଡେ ମାବ୍ତାଗାଙ୍କ୍ ୱାନ୍ ବନ୍ଦ୍ ଆତ୍ତେ । 3 ଆସୁଟ୍ ପୃତିବିତାଗାଙ୍କ୍ ଏର୍ ପଙ୍ଗି ଶହେ ପଚାଶ ଦିନ୍ତେ ପେର୍କେ କମ୍ ଆତ୍ତେ । 4 ଆସୁଟ୍ ସାତ୍ ନେଲ୍ଞ୍ଜିନ୍ ସତର ଦିନାତେ ଆରାରାଟ୍ ମେଟେତ୍ ପର ଜାହାଜ ଅଟ୍କେମ୍ ଆସ୍ମାତ୍ତା 5 ଆଦେ ଲେକାମ୍ ଦଶ୍ ନେଲ୍ଞ୍ଜ୍ ଆୟ୍ନା ଏର୍ କେନ୍ କମ୍ ଆତ୍ତେ; ଆ ଦଶ ନେଲ୍ଞ୍ଜିନ୍ ମୁନ୍ନେତ୍ ଦିନ୍ ମେଟା ତନ୍ଦ୍ତା।
6 ମେଣ୍ଡେ ଚାଲିଶ ଦିନ୍ତେ ପେର୍କେ ନୋହ ତିଆର୍ ମାଡ଼୍ତେ ଜାହାଜ୍ତେ ଜର୍କା ତେର୍ସିତ୍ତଣ୍ଡ୍; 7 ନୁ ୱେରଡ଼୍ କାୱାର୍ତିଙ୍କ୍ ପାର୍ସ୍ପିତ୍ତଣ୍ଡ୍; ଆସୁଟ୍ ପୃତିବିତେ ଏର୍ ଇଡ଼୍କ୍ନା ଯାକ ଆଦ୍ ଇକ୍ ଆକ୍ ଉଡ୍ତେ। 8 ମେଣ୍ଡନ୍ ଦାମ୍, ନୋହ ବୁମ୍ତେ ଏର୍ କମ୍ଆଦାନାଦ୍ ବୁଜେମ୍ଆଦାନ୍ ମାଇଦିଙ୍କ୍ ୱେରଡ୍ ପାର୍ୱାତିଙ୍କ୍ ପାର୍ସ୍ପିତ୍ତଣ୍ଡ୍; 9 ଆସୁଟ୍ ପୃତିବି ଏର୍ଦେ ନିଣ୍ଡି ମାନ୍ନାଙ୍କ୍ ପାର୍ୱା ନିଜର୍ ପାଦାମ୍ ୱାଟାନ୍ ପଡ଼୍ୟ୍ ଦର୍କ୍ୱାଙ୍କ୍ ଜାହାଜ୍ତାଗ୍ ତାମ୍ ଗାରେ ମାଲ୍ସ୍ ୱାତ୍ତେ; ଆସୁଟ୍ ଅଣ୍ଡ୍ କାୟ୍ ଆସ୍ ତାଙ୍କ୍କିଙ୍କ୍ ପୟ୍ସ୍ ଜାହାଜ୍ତେ ଲପେ ନିଜର୍ ଗାରେ ତାତ୍ତଣ୍ଡ୍। 10 ମେଣ୍ଡେ ସାତ୍ ଦିନ୍ ଲେଟ୍ ମାଡ଼୍ତେ ପେର୍କେ ଅଣ୍ଡ୍ ଆ ପାର୍ୱାତିଙ୍କ୍ ମେଣ୍ଡନ୍ଦାମ୍ ଜାହାଜ୍ତାଗାଙ୍କ୍ ପାର୍ସ୍ପିତ୍ତଣ୍ଡ୍; 11 ଆସୁଟ୍ ପାର୍ୱା ମୁଲ୍ପୁଟ୍ ତାନ୍ ଗାରେ ମାଲ୍ସ୍ ୱାତ୍ତେ; ମେଣ୍ଡେ ଉଡ଼ାଟ୍, ତାନ୍ ମୁକୁର୍ତାଗ୍ ଜୀତ ମାଡ଼େତ୍ ପୁଃନେ ଆକ୍ ମାତ୍ତେ; ଆସୁଟ୍ ପୃତିବିତେ ଏର୍ କମ୍ଆତ୍ତେ, ଇଦ୍ ନୋହ ପୁତ୍ତଣ୍ଡ୍। 12 ମେଣ୍ଡେ ସାତ୍ ଦିନ୍ ଲେଟ୍ ମାଡ଼ି ଅଣ୍ଡ୍ ଆ ପାର୍ୱାତିଙ୍କ୍ ମେଣ୍ଡନ୍ଦାମ୍ ପାର୍ସ୍ପିତ୍ତଣ୍ଡ୍, ମାତର୍ ଆଦ୍ ମେଣ୍ଡନ୍ଦାମ୍ ତାନ୍ ଗାରେ ମାଲ୍ସ୍ ୱାଡ଼।
13 ନୋହନ୍ ବୟସ୍ତେ ଛଅଶହ ଅଣ୍ଡୟ୍ ବର୍ଷ ପ୍ରତମ୍ ନେଲ୍ଞ୍ଜ୍ତେ ପ୍ରତମ୍ ଦିନ୍ତେ ପୃତିବୀ ପରକଞ୍ଚ୍ ଏର୍ ୱାସ୍ତେ; ଆସୁଟ୍ ନୋହ ଜାହାଜ୍ତେ ମୁର୍ସ୍ତିଙ୍କ୍ ତେୟ୍ସ୍ ଉଡ଼୍ତଣ୍ଡ୍, ବୁମ୍ତିଙ୍କ୍ ୱାସ୍ତାଦ୍ ଉଡ଼୍ତଣ୍ଡ୍। 14 ଆଦେପୁଟୁଙ୍କ୍ ରେଣ୍ଡ୍ ନେଲ୍ଞ୍ଜିନ୍ ସତାଇଶ ଦିନ୍ତେ ପୃଥିବୀ ୱାସ୍ତେ।
15 ତାନ୍ପେର୍କେ ପରମେଶ୍ୱର ନୋହଙ୍କ୍ କେତ୍ତଣ୍ଡ୍, 16 ନିମେ ନି ମୁତେ ନୁ ମାର୍କିଡ଼୍ ନୁ ମାର୍କିଡ଼୍ ମୁତେକିଙ୍କ୍ ତଡ଼େକ୍ ପୟ୍ସ୍ ଜାହାଜ୍ତାଗାଙ୍କ୍ ବାୟ୍ଦେ ପେଇସ୍ ଆନୁଟ୍। 17 ମେଣ୍ଡେ ନି ତଡ଼୍ ମାନ୍ଦାନ୍ ପଶୁ, ପିଟେ ନୁ ନେଲ୍ ମେୟାନ୍ ମେଟେତ୍ ସାରେ ଜିୱାକ୍ ବାୟ୍ଦେ ପୟ୍ସ୍ ଅୟ୍ମ୍; ଆୱ୍ ପୃତିବିତିଙ୍କ୍ ବର୍ତ୍ତି ମାଡ଼ି, ମେଣ୍ଡେ ପୃତିବିତାଗ୍ ପ୍ରଜାନଡ଼୍ ନୁ ନାର୍ଗେ ପିଲୁଡ଼୍ ଆୟି। 18 ଆସୁଟ୍ ନୋହ ଅନ୍ ମୁତେ, ମାର୍କ୍ ନୁ ମାର୍କିଡ଼୍ ମୁତେକିଙ୍କ୍ ତଡ଼୍ ଜାହାଜ୍ତାଗାଙ୍କ୍ ପେୟିସ୍ ବାୟ୍ଦେ ୱାତ୍ତଡ଼୍; 19 ମେଣ୍ଡେ ହଜାର୍ ହଜାର୍ ପିଲୁଡ଼୍ ଜାତି ଲେକାମ୍ ସାରେ ପଶୁ, ସାରେ ମେଟେତ୍ ଜନ୍ତୁ ନୁ ସାରେ ପିଟେ ରକମ୍ତେ ସାରେ ନେଲ୍ ଆକାନ୍ ପ୍ରାଣି ଜାହାଜ୍ତାଗାଙ୍କ୍ ପେୟିସ୍ ୱାତ୍ତା।
ନୋହତେ ହୋମବଳି ଉତ୍ସର୍ଗ ମାଡ଼ାନାଦ୍
20 ତାନ୍ପେର୍କେ ନୋହ ସଦାପ୍ରବୁନ୍ ଉଦେଶ୍ତେ ଦୁପାମ୍ ବେଦି ତିଆର୍ ମାଡ଼୍ତଣ୍ଡ୍, ମେଣ୍ଡେ ସାରେ ପ୍ରକାର୍ତେ ଲେକେତ୍ ପଶୁ ନୁ ଲେକେତ୍ ପିଟେନ୍ ଲପେଙ୍କ୍ ବେସ୍କିଙ୍କ୍ ଅସ୍ ବେଦିତ୍ ପର ହୋମବଳି ଉତ୍ସର୍ଗ ମାଡ଼୍ତଣ୍ଡ୍। 21 ଆଗାଙ୍କ୍ ସଦାପ୍ରବୁ ଆଗେତ୍ ସାୟେତ୍ଗାବ୍ ତାସ୍ ମିକା ମନେ ମନେ କେତ୍ତଣ୍ଡ୍, ମାମ୍ମେ ନାରୁନ୍ ସେଙ୍ଗେ ମେଣ୍ଡେ ପୃତିବୀତିଙ୍କ୍ ଅବିଶାପ୍ ଇୱମ୍; ଯଦିବା ପିଲେତ୍ ତାଗାଙ୍କ୍ ନାରୁନ୍ ମନ୍ଦେ ଆଲ୍ସାନାଦ୍ କରାପ୍, ଇତ୍କେବା ମାମ୍ ବେଲା ମାଡ଼ି ମିନ୍ଦେମ୍, ଆଦେଲେକାମ୍ ମେଣ୍ଡନ୍ଦାମ୍ ବେସୁଙ୍କ୍ ବା ସାରେ ଜନ୍ତୁକିଙ୍କ୍ ନଷ୍ଟ ମାଡ଼ମ୍। 22 ମେଣ୍ଡେ ବେସୁଙ୍ଗ୍ଆନା ପୃଥିବୀ ମାନ୍ତେ, ଆସୁଙ୍ଗ୍ ୱିତାନ୍କୟ୍ଦାନ୍ ସମୟ୍, ଚାଲ୍ ନୁ ଏଦ୍, ମେଣ୍ଡେ ଏଦ୍ ନୁ ଚାଲ୍ କାଲାମ୍, ମେଣ୍ଡେ ପାୟାଲ୍ ନୁ ନାର୍କା, ଇୱୁ ରେଣ୍ଡ୍ ୱେରେ ଆୟ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)