1 ନିଜେ ଯୋଷେପ୍ ତାନ୍ ଲୋତ୍‌ତେ ମୁକ୍ୟାଙ୍କ୍‌ ଆଦେଶ୍‌ ଇତ୍‌ତଣ୍ଡ୍‌, ଇ ନାରୁଡ଼୍‌ ବସ୍କାନାଗ୍‌ ବେସର୍‌ କାଦି ପୟ୍‌ତିତା, ଆସ୍କ୍ ବର୍ତ୍ତି ମାଡ଼ିମୁଟ୍‌, ମେଣ୍ଡେ ସାରେତଡ଼୍‌ ଡାବ୍‌କ୍ ସାରେତଡ଼୍ ବସ୍କାନ୍‌ ପର ୱାଟାଟ୍‌। 2 ମେଣ୍ଡେ ସୁଦୁନନ୍ ବସ୍କାତାଗ୍‌ ତାନ୍‌ କାଦି ଆସାନ୍ ଡାବ୍‌କ୍‌କିନ୍‌ ତଡ଼୍ ମାୟାଦ୍‌ ଗିନ୍‌, ଆ ରୁପା ଗିନ୍ ୱାଟାଟ୍‌। ଆସୁଟ୍ ଅଣ୍ଡ୍ ଯୋଷେପ୍‌ ଗଟ୍‌ତେ ଲେକାମ୍‌ ମାଡ଼୍‌ତଣ୍ଡ୍। 3 ମେଣ୍ଡେ ନାର୍କୁକ୍ ଆଦାନ୍‌ ୱେଲେ, ଅଡ଼୍ ଗଦକିନ୍ ତଡ଼୍ ଆତ୍‌ତଡ଼୍‌। 4 ମେଣ୍ଡେ ନଗର୍‌ତେକଞ୍ଚ୍‌ ପେୟ୍‌ସ୍ ନାର୍ଗେ ଦୁର୍‌ ଆନ୍‌ୱେ ୱେୟ୍‌, ଯୋଷେପ୍‌ ତାନ୍‌ ଲୋତ୍‌ତେ ମୁକ୍ୟାଙ୍କ୍‌ କେତ୍‌ତଣ୍ଡ୍‌, ନିମେ ତେଦି ଆ ନାରୁଡ଼୍‌ ପେର୍କେ ପେର୍କେ ମିରିଆଞ୍ଜ୍‌ ଅଡ଼୍‌ ତଡ଼୍‌ ପୟିସ୍‌ କେଲ୍‌ମ୍‌, ମିଡ଼୍‌ ସାୟେ ମାଡ଼ାନ୍‌ ବାଦୁଲ୍‌ତେ ବାତେଙ୍କ୍‌ କାରାପ୍‌ ମାଡ଼୍‌ତିଡ଼୍ ? 5 ମା ପ୍ରବୁ ବେନିନେ ଉନ୍ତଣ୍ଡ୍‌ ନୁ ଆଦିନ୍‌ ତଡ଼୍‌ ପାଞ୍ଜି ଉଡ଼ାନାଦ୍‌ ୱେର୍‌ ମାଡ଼ିତଣ୍ଡ୍‌, ଆ ଗିନେ ବାତେ ଇଦ୍‌ ଆୟ ? ଇସତ୍‌ ପାଡ଼୍‌ୟିଦେ ସେଙ୍ଗେ ମିଡ଼୍ ଦଷ୍ ମାଡ଼ି ମିନ୍ଦେଡ଼ି।

6 ଯଷେପତେ ଦାସଡ଼୍‌ ଗଟି ମାନେମ୍‌ ଆସ୍‌ ଗରାତ୍‌ ପର ତାରି ଅଡ଼୍‌ ଅଡ଼୍‌କିଂଙ୍କ୍‌ ତଲ୍‌ତଡ଼୍‌ ଅଡ଼୍‌ ପୟିସ୍‌ ଇ ସାରେ ଗଟି କେତ୍‌ତଣ୍ଡ୍‌। 7 ଆସୁଟ୍‌ ଅଡ଼୍ କେତ୍‌ତଡ଼୍, ମା ପ୍ରବୁ ବାତେଙ୍କ୍ ଇସତ୍‌ ଗଟି କେତୁତଣ୍ଡ୍‌ ? ନି ଦାସ ଇସତ୍‌ ପାଡ଼ିୟ୍‌ ମାଡ଼ାନାଦ୍‌ ଦୁରାମ୍‌ ମାନି। 8 ଉଡ଼ାଟ୍‌, ନିଜର୍‌ ନିଜର୍‌ ବସ୍କାନ୍‌ ପର ମୁନେଙ୍କ୍‌ ଅନ୍‌ ଦାମ୍‌ ବେନ୍‌ ଡାବ୍‌ ଦର୍ସ୍କି ମାତ୍‌ତମ୍‌; ଆୱିଙ୍କ୍‌ ମାମେ କିଣାନ୍‌ ଦେଶ୍‌ତାଗାଙ୍କ୍‌ ମେଣ୍ଡନ୍‌ଦାମ୍‌ ନି ଗାରେ ତାତ୍‌ତମ୍‌; ଆଲାଇତ୍କେ ବେଦ୍‌ପୁଟୁଙ୍କ୍‌ ନି ପ୍ରବୁନ୍‌ ଲୋତ୍‌ତେ କଞ୍ଚ୍‌ ସୁନାନୁ ରୂପା ଡଙ୍ଗିତମ୍ ? 9 ନି ଦାସଡ଼୍ ଲୋପ୍‌ ବେନନାଗେ ଆଦ୍‌ ଦର୍କିତ୍‌, ଅଣ୍ଡ୍ ଡଲିଣ୍ଡ୍, ମେଣ୍ଡେ ମାମେ ଆନ୍ତେ ପ୍ରବୁନ୍ ଦାସ ଆଦ୍‌ତମ୍।

10 ଆସୁଟ୍‌ ଅଣ୍ଡ୍‌ କେତ୍‌ତଣ୍ଡ୍‌, ସାୟ୍, ମି ଗଟ୍‌ତେ ଲେକାମ୍‌ ଆୟି; ବେନନାଗାକଞ୍ଚ୍‌ ଆଦ୍‌ ଦର୍କିତ୍, ଅଣ୍ଡ୍‌ ମା ଦାସ ଆଦ୍‌ତଣ୍ଡ୍‌, ମାତ୍ର ବାଗାତଡ଼୍‌ ଦାସିଆୟଡ଼୍‌। 11 ଆସୁଟ୍‌ ଅଡ଼୍ ସାଙ୍ଗେ ସାଙ୍ଗେ ବୁମ୍‌ତାଗ୍‌ ନିଜର୍ ନିଜର୍‌ ବସ୍କା ରେୟ୍‌ସ୍ ସାରେତଡ଼୍ ନିଜର୍ ନିଜର୍‌ ବସ୍କା ଲେତାଙ୍କ୍ ପସ୍ପ୍‌ତଡ଼୍। 12 ଅଣ୍ଡ୍‌ ଲୋତ୍‌ତେ ମୁକ୍ୟାଲ୍‌ ବେଡ଼୍‌ୟନାଗାକଞ୍ଚ୍‌ ଆରାମ୍‌ ମାଡ଼ି ସୁଦୁନନାଗ୍‌ ହେୱ୍‌ନା ମେହ୍ଃକ୍‌ତଡ଼୍‌; ମେଣ୍ଡେ ବିନ୍ୟାମିନ୍‌ତେ ବସ୍କାକଞ୍ଚ୍‌ ଆ ଗିନ୍‌ ଦର୍କ୍‌ତା। 13 ଆସୁଟ୍‌ ଅଡ଼୍‌ ନିଜର୍‌ ନିଜର୍‌ ଚକା ଇକ୍‌ତଡ଼୍, ମେଣ୍ଡେ ସାରେ ଗଦ ପୟିସ୍‌ ନଗର୍‌ତା ଆତ୍‌ତଡ଼୍‌।

14 ମେଣ୍ଡେ ଯିହୁଦାଲ୍‌ ନୁ ତାମ୍‌ ଦାଦାଲଡ଼୍‌ ଯୋଷେପ୍‌ତେ ଲୋନ୍‌ ଅସ୍‌ତଡ଼୍‌; ଯୋଷେପ୍‌ ଆ ସମୟ ଆଇନା ଆଗେ ମାତ୍‌ତଣ୍ଡ୍‌; ଆଦିଙ୍କ୍‌ ଅଡ୍ ଅନ୍ ମୁନେ ବୁମ୍‌ଦାଗ୍‌ ରାଲ୍‌ତଡ଼୍। 15 ଆସୁଟ୍‌ ଯୋଷେପ୍‌ ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ଇଲା ବେଦ୍‌ପୁଟୁଙ୍କ୍‌ ପାଡ଼ିୟ୍‌ ମାଡ଼୍‌ତିଡ଼୍‌ ? ମା ଲେକାମ୍‌ତେ ନାରୁମ୍‌ ଯେ ନିଜାମ୍‌ ପାଞ୍ଜି ମାଡ଼୍‌ପାର୍‌ଦ୍‌ତମ୍‌, ଇଦ୍‌ ବାତେ ନିମେ ପୁନ୍‌ୱିନ୍‌ ?

16 ଆସୁଟ୍‌ ଯିହୁଦାଲ୍‌ କେତ୍‌ତଣ୍ଡ୍‌, ମାମେ ପ୍ରବୁନ୍ ମୁନେ ମେଣ୍ଡେ ବାତେ ଉତ୍ତର୍‌ ଇଦ୍‌ତମ୍ ? ମେଣ୍ଡେ ବାତେ ଗଟ୍‌ କେତିତମ୍‌ ? ବା ବେଦ୍‌ପୁଟୁଙ୍କ୍ ମାକିଙ୍କ୍‌ ଦଷ୍ ଇଲକଟ ମାଡ଼ିତମ୍‌ ? ପରମେଶ୍ୱର୍‌ ନି ଦାସଡ଼୍ ବୁଲ୍ ତୟ୍‌ସ୍‌ ମିନ୍ଦେଣ୍ଡ୍; ଉଡ଼ା; ମାମେ ବେନନାଗାକଞ୍ଚ୍ ଗିନ୍‌ ଦର୍କି ମିନ୍ଦେଣ୍ଡ୍, ସାରେତମ୍‌ ପ୍ରବୁନ୍‌ ଦାସ ଆଦ୍‌ତମ୍‌।

17 ଆସୁଟ୍‌ ଯୋଷେପ୍‌ କେତ୍‌ତଣ୍ଡ୍‌, ଇସତ୍‌ ପାଡ଼ିୟ୍‌ ମାୟାଗାକଞ୍ଚ୍‌ ଦୁର୍‌ ଆୟି; ବେନନାଗାକଞ୍ଚ୍‌ ଗିନ୍‌ ଦର୍କି ମିନ୍ଦେ, ଅଣ୍ଡ୍‌ ମା ଦାସ ଆଦ୍‌ତଣ୍ଡ୍‌; ମାତ୍ରମ୍‌ ମିଡ଼୍ ସାୟେ ବାବାନ୍‌ ଗାରେ ମାଲ୍‌ସ୍‌ ଆନୁଟ୍‌।

18 ଆସୁଟ୍‌ ଯିହୁଦାଲ୍‌ ଗାରେ ଆଞ୍ଜ୍‌ କେତ୍‌ତଣ୍ଡ୍‌, ପ୍ରବୁ, ନି ଇ ଦାସତିଙ୍କ୍‌ ପ୍ରବୁନ୍‌ କେୱ୍‌ଦାଗ୍‌ ଅଣ୍ଡ୍‌ପଦ୍‌ ଅନୁରୋଦ ମାଡ଼ାଙ୍କ୍‌ ଅନୁମତି ଇମ୍‌ ନୁ ନି ଦାସନ୍‌ ପର କପାମ୍‌ ଗାଟି ଆୟ୍‌ମା; ବାତେଙ୍କ୍‌ଇତ୍କେ ନିମେ ଫାରୋନ୍‌ ଲେକାମ୍‌। 19 ପ୍ରବୁ ତାନ୍‌ ଦାସଡ଼୍‌କ୍‌ ପାଚ୍ରାମାଡ଼ି ମାତ୍‌ତଣ୍ଡ୍‌, ମି ବାବାଲ୍‌ ନୁ ତାମୁଣ୍ଡ୍‌ ମିନ୍ଦେଣ୍ଡ୍‌ କି ? 20 ଆସୁଟ୍‌ ମାମେ ପ୍ରବୁଙ୍କ୍‌ ଉତ୍ତର୍‌ ଇସ୍‌ ମାତ୍‌ତମ୍‌, ମା ବାବାଲ୍‌ ମିନ୍ଦେଣ୍ଡ୍‌, ଅଣ୍ଡ୍ ମୁୟ୍‌ତେ ନାରୁଣ୍ଡ୍‌; ଅଣ୍ଡ୍‌ ମୁୟ୍‌ତେୱେଲେ ଅର୍ତୁଣ୍ଡ୍‌ ମାର୍‌ ମିନ୍ଦେଣ୍ଡ୍‌, ଅଣ୍ଡ୍‌ ଅର୍ତୁଣ୍ଡ୍‌ ସୁଦୁନଣ୍ଡ୍; ମାତ୍ର ଅନ୍‌ ତଡ଼୍‌ ମାନ୍ଦାନଣ୍ଡ୍‌ ଡଲିମିନ୍ଦେଣ୍ଡ୍‌, ଅଣ୍ଡେ କେ ତାମ୍‌ ୟାୟାନ୍‌ ସାର୍‌ତିଙ୍କ୍‌ ଆନ୍‌ ସୁଦୁନ୍‌ ମାର୍‌; ଆଦିଙ୍କ୍‌ ତାମ୍‌ ବାବାଲ୍‌ ଅଂକିଙ୍କ୍‌ ପ୍ରେମ ମାଡ଼୍‌ତଣ୍ଡ୍‌। 21 ଆଦିଙ୍କ୍‌ ନିମେ ଇ ଦାସଡ଼୍‌କିଙ୍କ୍‌ କେସ୍‌ମାତ୍‌ତିନ୍‌, ମିଡ଼୍‌ ଅଂକିଙ୍କ୍‌ ନା ଗାରେ ତାଡ଼ାଟ୍‌, ନାନ୍‌ ଅଂକିଙ୍କ୍‌ ନିଜର୍‌ କଣ୍ଡାନେ ଉଡ଼ିତାନ୍‌। 22 ଆସୁଟ୍‌ ମାମେ ପ୍ରବୁଙ୍କ୍ କେସମାତ୍‌ତମ୍‌, ଆ ମୁୟିତେ ବାବାଙ୍କ୍‌ ୱିଡ଼ିସ୍‌ ପାର୍‌ୱଣ୍ଡ୍‌; ଅଣ୍ଡ୍‌ ତାମ୍‌ ବାବାଙ୍କ୍‌ ୱିଡ଼୍‌ସି ୱାତ୍‌ତ୍କେ, ବାବାଲ୍‌ ଡଲି ଆଦ୍‌ତଣ୍ଡ୍‌ । 23 ଆସୁଟ୍‌ ନିମେ ଇ ଦାସଡ଼୍‌କିଙ୍କ୍ କେତ୍‌ତିନ୍‌, ମି ତଡ଼୍ ସୁଦୁନଣ୍ଡ୍‌ ତାମୁଣ୍ଡ୍‌ ୱାଡ଼କଟ ମାତ୍କେ, ମିଡ଼୍ ମେଣ୍ଡେ ନା ମକମ୍‌ ଉଡ଼୍‌ ପାର୍‌ୱିଡ଼୍‌।

24 ଅନନ୍ତର୍ ମାମେ ନି ଦାସ ଯେ ମା ବାବାଲ୍‌, ଅନ୍‌ ଗାରେ ହେୱୁସ୍‌ ଅଂକିଙ୍କ୍‌ ପ୍ରବୁନ୍‌ ଇ ସାରେ ଗଟି କେତ୍‌ତମ୍‌। 25 ତାନ୍‌ପେର୍କେ ମା ବାବାଲ୍ କେତ୍‌ତଣ୍ଡ୍‌, ମିଡ଼୍ ମେଣ୍ଡନ୍‌ଦାମ୍‌ ଆଞ୍ଜ୍‌ ମାନ୍‌ ମାଇଦିଙ୍କ୍‌ ବେସର୍‌ କାଦି ଆସିତାଡ଼ାଟ୍‌। 26 ଆସୁଟ୍ ମାମେ କେତ୍‌ତମ୍‌, ଆଦ୍‌ ପାର୍‌ୱମ୍‌; ବେସୁଙ୍କ୍ ସୁଦୁନଣ୍ଡ୍‌ ତାମୁଣ୍ଡ୍‌ ମା ତଡ଼୍‌ ମାନ୍ତ୍‌ତଣ୍ଡ୍‌, ଆଲାଇତ୍କେ ଆଦ୍‌ ପାର୍ଦ୍‌ତମ୍; ବାତେଙ୍କ୍‌ଇତ୍କେ ସୁଦୁନଣ୍ଡ୍‌ ତାମୁଣ୍ଡ୍‌ ମା ତଡ଼୍ ଇଲକଟ ମାତ୍କେ, ମାମେ ଅନ୍‌ ମକମ୍‌ ଉଡ଼୍‌ ପାର୍‌ୱମ୍‌। 27 ଆସୁଟ୍‌ ନି ଦାସ ଯେ ନା ବାବାଲ୍‌, ଅଣ୍ଡ୍‌ ମାକିଙ୍କ୍‌ କେତ୍‌ତଣ୍ଡ୍‌, ମିଡ଼୍ ତ ପୁତ୍‌ତିଡ଼୍‌, ନା ଆ ମୁତେନାଗାକଞ୍ଚ୍‌ ମାତ୍ରମ୍‌ ରାୟେଲ୍‌କନ୍‌ ଇର୍‌ୱୁଡ଼୍‌ ମାର୍ର୍‌କ୍‌ ଆସ୍‌ ମାତ୍‌ତଡ଼୍। 28 ଅଡ଼୍‌ ଲୋପେଙ୍କ୍ ଅର୍ତୁଣ୍ଡ୍ ମାୟାଗାକଞ୍ଚ୍‌ ୱିଡ଼୍‌ସି ଆତ୍‌ତଣ୍ଡ୍‌, ଆସୁଟ୍‌ ମାମେ କେତ୍‌ତମ୍, ଅଣ୍ଡ୍ ନିଜାମ୍‌ ମେଟେତ୍‌ ଜିୱାକିନ୍‌ତଡ଼୍‌ ଦୁଙ୍କା ଦୁଙ୍କା ଆସ୍ ୱେର୍ ଆସ୍ ମିନ୍ଦେଣ୍ଡ୍; ମେଣ୍ଡେ ଆ ଦିନାକଞ୍ଚ୍‌ ମାମେ ମେଣ୍ଡେ ଅଂକିଙ୍କ୍ ଉଡ଼ମ୍‌। 29 ଇଞ୍ଜେ ମା ଗାରେକଞ୍ଚ୍‌ ଇକିଙ୍କ୍ ଅତ୍‌ତ୍କେ ବେସୁଙ୍କ୍ ଇକିଙ୍କ୍ ବାତ୍‌ବା ବିପଦ୍‌ ଗଟେମ୍‌ ଆତ୍କେ, ଆସୁଟ୍‌ ମିଡ଼୍ ମାକିଙ୍କ୍ ଦୁଃକତେ ଇ ୱିସ୍‌କିନାଗ୍‌ ରହ୍‌ତିତିଡ଼୍‌।

30 ବାତେଙ୍କ୍‌ଇତ୍କେ ନି ଦାସ କେ ମା ବାବାଲ୍‌, ଅନ୍‌ ଗାରେ ନାନେ ଏୱ୍‌କେ, ମା ତଡ଼୍‌ ବେସୁଙ୍କ୍ ଇ ଲେୟଣ୍ଡ୍‌ ଇଲକଟ ମାନ୍ତ୍‌ତଣ୍ଡ୍‌, ଆଲାଇତ୍କେ ଲେୟଣ୍ଡ୍‌ ଇଲ୍‌ୱାଦ୍‌ ଉଡ଼ି ଅଣ୍ଡ୍‌ ସାଙ୍ଗେ ସାଙ୍ଗେ ଡଲି ଆଦ୍‌ତଣ୍ଡ୍‌ । 31 ଇତ୍କେ ଅନ୍‌ ଜିଉନ୍‌ ଇ ଲେୟନ୍‌ ଜିଉନ୍‌ତାଗ୍‌ ତଃତେ ଲେକାମ୍‌। ଆସୁଟ୍‌ ନି ଇ ଦାସଡ଼୍‌ ଦୁଃକତେ ପାଣ୍ଡ୍‌ତେ କେଲ୍‌କିନାଗେ ନି ଦାସ ମା ବାବାଙ୍କ୍‌ କବର୍‌ତା ରହ୍ଃତିତଣ୍ଡ୍‌। 32 ମେଣ୍ଡେ, ନି ଦାସ ନାନ୍‌, ନି ବାବାନ୍‌ ଗାରେ ଇ ଲେୟନ୍‌ ଲଗାମ୍‌ ଆସ୍‌ ମିନ୍ଦେଣ୍ଡ୍‌, ନାନ୍‌ ବେସୁଙ୍କ୍‌ ଅଂକିଙ୍କ୍‌ ନି ଗାରେ ତାଡ଼ନ୍‌, ଆଲାଇତ୍କେ ନାନ୍‌ ଜିଉନ୍‌ମାନା ଜାକ ବାବାନ୍‌ ଗାରେ ଦଷ୍‌ତନ୍‌ ଆଦ୍‌ତାନ୍‌। 33 ଆଦିଙ୍କ୍‌ ଅନୁରଦ୍‌ ମାଡ଼ୁତାନ୍‌, ପ୍ରବୁନ୍‌ ଗାରେ ଇ ଲେୟନ୍‌ ଲେକାମ୍‌ ନି ଦାସ ନାନ୍‌ ନି ଦାସ ଆସ୍‌ ମାନ୍ତ୍‌ତାନ୍‌, ମାତ୍ର ଇ ଲେୟଙ୍କ୍‌ ଦାଦାଲଡ଼୍‌ ତ ରୟ୍‌ସିମ୍‌। 34 ବାତେଙ୍କ୍‌ଇତ୍କେ ଇ ଲେୟଣ୍ଡ୍‌ ନା ତଡ଼୍‌ ଇଲକଟ ମାତ୍କେ, ନାନ୍‌ ବେଦ୍‌ ପୁଟୁଙ୍କ୍‌ ବାବାନ୍‌ ଗାରେ ଆଦ୍‌ ପାର୍ଦ୍‌ତାନ୍‌ ? ମେଣ୍ଡେ ବାବାଙ୍କ୍‌ ବେଦ୍‌ ବିପଦ୍‌ ଗଟେମ୍‌ ଆଦ୍‌ତେ, ଆଦ୍‌ ବେଲା ଉଡ଼୍‌ ପାର୍ଦ୍‌ତାନ୍‌ ?