ଇଫ୍ରୟିକ୍ ନୁ ମନଃଶିୟଙ୍କ୍ ଯାକୁବନ୍ ଆଶିର୍ବାଦ୍
1 ଆୱ୍ ସାରେ ଗଟନାତେ ପେର୍କେ ବେନ ଯୋଷେପ୍ତିଙ୍କ୍ କାବୁର୍ ଇସ୍ କେତ୍ତଣ୍ଡ୍; ଉଡ଼ା, ମି ବାବାଲ୍ ଦୁକାତେ ମିନ୍ଦେଣ୍ଡ୍; ଆସୁଟ୍ ଅଣ୍ଡ୍ ନିଜର୍ ଇର୍ୱୁଡ଼୍ ମାର୍କ୍ ମନଃଶି ନୁ ଇଫ୍ରୟିମ୍ତିଙ୍କ୍ ତଡ଼୍ ଅତ୍ତଣ୍ଡ୍। 2 ଆସୁଟ୍ ବେନ ଯାକୁବ୍ତିଙ୍କ୍ କେତ୍ତଣ୍ଡ୍, ଉଡ଼ା, ନି ମାର୍ ଯୋଷେପ୍ ନି ଗାରେ ୱାସ୍ମିନ୍ଦେଣ୍ଡ୍; ଆସୁଟ୍ ଯାକୁବ ନିଜେତିଙ୍କ୍ ଶକ୍ତିମାଡ଼ି ପାଟ୍ତେ ପଡ଼୍ୟେତ୍କଞ୍ଚ୍ ତେଦି କୁଦ୍ତଣ୍ଡ୍। 3 ଆସୁଙ୍କ୍ ଯାକୁବ ଯୋଷେପ୍ତିଙ୍କ୍ କେତ୍ତଣ୍ଡ୍, କିଣାନ୍ ଦେଶ୍ତାଗ୍ ଲୂସ୍ ପେଦେର୍ତେ ପଡ଼ିୟ୍ତାଗେ ସର୍ବଶକ୍ତିମାନ୍ ପରମେଶ୍ୱର୍ ନାକିଙ୍କ୍ ଦର୍ଶନ୍ ଇସ୍ ଆଶିର୍ବାଦ୍ ମାଡ଼ି ଇଦ୍ କେସ୍ ମାତ୍ତଣ୍ଡ୍, 4 ଉଡ଼ା, ମାମେ ନିକିଙ୍କ୍ ପ୍ରଜାନଡ଼୍ ନୁ ନାର୍ଗେପିଲୁଡ଼୍ ମାଡ଼ିତମ୍ ନୁ ନିଆଗାକଞ୍ଚ୍ ୱେର୍ ୱେର୍ ନାରୁଡ଼୍ସମାଜ୍ ତିଆର ମାଡ଼ିତମ୍, ମେଣ୍ଡେ ନି ବବିଷ୍ୟତ୍ତେ ପିଲୁଡ଼୍ତିଙ୍କ୍ ଯୁଗ୍ଯୁଗ୍ ଆଇନା ଅଦିକାର୍ତେ ମାଇଦିଙ୍କ୍ ଇ ଦେଶ୍ ଇଦ୍ତମ୍।
5 ବାତେଙ୍କ୍ଇତ୍କେ ମିସର୍ ଦେଶ୍ତାଗେ ନି ଗାରେ ନାନ୍ ୱାଦାନ୍ ମୁନେ ନି ବେନ୍ ଇର୍ୱୁଡ଼୍ ମାର୍କ୍ ମିସର୍ ଦେଶ୍ତାଗେ ଜନ୍ମ ଆସ୍ ମାତ୍ତଡ଼୍, ଅଡ଼୍ ନାୱଡ଼୍ ଆଦ୍ତଡ଼୍; ରୁବେନ୍ ନୁ ଶିମିୟନ୍ ଲେକାମ୍ ଇଫ୍ରୟିମ ନୁ ମନଃଶି ନାୱଡ଼୍ ଆଦ୍ତଡ଼୍ । 6 ମେଣ୍ଡେ ଇଡ଼୍ ପେର୍କେ ନି ବେନ୍ ପିଲା ଜନ୍ମ ଆଦ୍ତା, ଆୱ୍ ନିୟାୱ୍ ଆଦ୍ତା ନୁ ବେଡ଼ିୟ୍ ଦାଦାଲଡ଼୍ ପେଦେର୍ତେ ନିଜର୍ ନିଜର୍ ଅଦିକାର୍ତେ ବେଡ଼୍ୟେ ଆଦ୍ତଡ଼୍ । 7 ପଦ୍ଦନ୍ ଅରାମତାଗାଙ୍କ୍ କିଣାନ୍ ଦେଶ୍ତାଗେ ନାୟାଦ୍ ଆଗମନତେ କାଲାତେ ଇଫ୍ରଥାତେ ହେୱ୍ଦାନାଦ୍ ବେସର୍ ଜୁୟ୍ ମାନା ମାନା ରାହେଲ୍ ଆର୍ଦେ ନାଡ଼୍ମେ ନା ଗାରେ ଡଲ୍ତା; ଆସୁଟ୍ ନାନ୍ ଆଗେ ଇଫ୍ରାତାଗେ, ଇତ୍କେ, ବେତ୍ଲିହିମ୍ତେ ଆର୍ଦେ ସପେ ତାଂକିଙ୍କ୍ ସମାଦି ଇତ୍ତାନ୍।
8 ଯାକୁବ ଯୋଷେପ୍ତେ ମାର୍କିଡ଼୍କ୍ ଉଡ଼ି ପାଚାରା ମାଡ଼୍ତଣ୍ଡ୍, ଇଡ଼୍ ବେନଡ଼୍ ? 9 ଆସୁଟ୍ ଯୋଷେପ୍ ବାବାଙ୍କ୍ କେତ୍ତଣ୍ଡ୍, ଇଡ଼୍ ନା ମାର୍, ପରମେଶ୍ୱର୍ ଇଡ଼୍କିଙ୍କ୍ ଇ ଦେଶ୍ତାଗେ ନାକିଙ୍କ୍ ଇସ୍ମିନ୍ଦେଣ୍ଡ୍। ଆସୁଟ୍ ଯାକୁବ କେତ୍ତଣ୍ଡ୍, ଅନୁରଦ୍ ମାଡ଼ୁତାନ୍, ଇଡ଼୍କିଙ୍କ୍ ନା ଗାରେ ତାଡ଼ା, ନାନ୍ ଇଡ଼୍କିଙ୍କ୍ ଆଶିର୍ବାଦ୍ ମାଡ଼ିତାନ୍। 10 ଆ ସମୟ୍ତେ ଯାକୁବ ମୁୟ୍ତେ ଅବସ୍ଥାତେ କଣ୍ଡା ଉଡ଼୍ ପାର୍ୱାଙ୍କ୍ ଲେକେତ୍ ଉଡ଼୍ପାର୍ୱଣ୍ଡ୍। ଆଦିଙ୍କ୍ ଯୋଷେପ୍ ତାନ୍ ଗାରେଙ୍କ୍ ଅଡ଼୍କିଂଙ୍କ୍ ତାସିତ୍ତାଙ୍କ୍, ଅଣ୍ଡ୍ ଅଡ଼୍କିଂଙ୍କ୍ ଆଲିଙ୍ଗନ୍ ମାଡ଼ି ଚୁମା ଇତ୍ତଣ୍ଡ୍। 11 ମେଣ୍ଡେ ଇସ୍ରାଏଲ୍ ଯୋଷେପ୍ତିଙ୍କ୍ କେତ୍ତଣ୍ଡ୍, ନାନ୍ ଆଲ୍ସି ମାତ୍ତାନ୍, ନି ମକମ୍ ମେଣ୍ଡେ ଉଡ଼୍ପାର୍ୱନ୍; ମାତ୍ରମ୍ ଉଡ଼ା ପରମେଶ୍ୱର୍ ନି ପିଲୁଡ଼୍ ଆନ୍ତେ ନାକିଙ୍କ୍ ତଃତଣ୍ଡ୍। 12 ଆସୁଟ୍ ଯୋଷେପ୍ ବାବାନ୍ ରେଣ୍ଡ୍ କୁରୃକିନ୍ ନାଡ଼୍ମେ ଅଡ଼୍କିଂଙ୍କ୍ ଅସ୍ ନିଜେ ବୁମ୍ତାଗେ ମଡ଼୍କ୍ତଣ୍ଡ୍।
13 ତାନ୍ପେର୍କେ ଯୋଷେପ୍ ଆ ଇର୍ୱୁଡ଼୍କିଙ୍କ୍ ଅସ୍ ନିଜର୍ ତିନ୍କାୟ୍ଦେ ପାକେ ଇଫ୍ରୟିମ୍ତିଙ୍କ୍ ପୟିସ୍ ଇସ୍ରାଏଲ୍ତେ ଡେବ୍ ପାକେ ନୁ ଡେବ୍ କାଇଦାଗ୍ ମନଃଶିଙ୍କ୍ ପୟିସ୍ ଯାକୁବ୍ତେ ତିନ୍ ପାକେତ୍ କୁସ୍ପିତ୍ତଣ୍ଡ୍। 14 ଆସୁଟ୍ ଇସ୍ରାଏଲ୍ ନିଜର୍ ତିନ୍କାୟ୍ ଆସ୍ ସୁଦୁନନ୍ ଇଫ୍ରୟିମ୍ତେ ତାଲେତ୍ ପର ୱାଟ୍ତଣ୍ଡ୍, ମେଣ୍ଡେ ମନଃଶିତେ ତାଲେତ୍ ପର ଡେବ୍ କାୟ୍ ୱାଟ୍ତଣ୍ଡ୍, ଅଣ୍ଡ୍ ନିଜର୍ କାୟ୍ ଇଦ୍ ଲେକାମ୍ ଚାଲାମାଡ଼୍ତଣ୍ଡ୍; ବାତେଙ୍କ୍ଇତ୍କେ ମନଃଶି ପ୍ରତମ୍ତେ ଜନ୍ମ ଆସ୍ ମାତ୍ତଣ୍ଡ୍। 15 ତାନ୍ପେର୍କେ ଅଣ୍ଡ୍ ଯୋଷେପ୍ତିଙ୍କ୍ ଆଶିର୍ବାଦ୍ ମାଡ଼ି କେତ୍ତଣ୍ଡ୍, ବେନ ପରମେଶ୍ୱର୍ତେ ମୁନେ ନା ମୁନେତ୍ ଆନିଦାଦିଡ଼୍ ଅବ୍ରାହାମ୍ ନୁ ଇସ୍ହାକ୍ ଉଡ଼ି ମାତ୍ତଡ଼୍, ବେନ୍ ପରମେଶ୍ୱର୍ ଜନ୍ମକନ୍ ନେଣ୍ଡ୍ ଆୟ୍ନା ନାକିଙ୍କ୍ ପଡ଼୍ପି ମିନ୍ଦେଣ୍ଡ୍, 16 ବେନ୍ ଦୂତ୍ ସାରେ ଆପଦକଞ୍ଚ୍ ନାକିଙ୍କ୍ ମୁକ୍ତ ମାଡ଼ିମିନ୍ଦେଣ୍ଡ୍, ଅଣ୍ଡ୍ ଇ ପେକଡ଼୍କ୍ ଆଶିର୍ବାଦ୍ ମାଡ଼ିଣ୍ଡ୍; ଇଡ଼୍ ନା ପେଦେର୍ତେ ନୁ ମୁନେତ୍ ଆନିଦାଦିଡ଼୍ ଅବ୍ରାହାମ୍ ନୁ ଇସ୍ହାକ୍ତେ ପେଦେର୍ ବେଡ଼୍ୟାଦ୍ ଆୟି, ମେଣ୍ଡେ ଇଡ଼୍ ଦେଶ୍ତେ ଲୋପେ ବଡ଼େମ୍ ଆସ୍ ନାର୍ଗେ ନାରୁଡ଼୍ ଆୟିଡ଼୍।
17 ଆସୁଟ୍ ଇଫ୍ରୟିମ୍ତେ ତାଲ୍ତାଗେ ବାବାନ୍ ତିନ୍କାୟ୍ଦିଙ୍କ୍ ଉଡ଼ି ଯୋଷେପ୍ ସନ୍ତୁଷ୍ଟ ଆୟ୍ୟଣ୍ଡ୍; ଆସୁଟ୍ ଇଫ୍ରୟିମ୍ତେ ତାଲେକଞ୍ଚ୍ ମନଃଶିତେ ତାଲେତାଗେ ଆଦ୍ ତିଆର୍ ମାଡ଼ାଙ୍କ୍ ବାବାନ୍ କାୟ୍ ତେୟ୍ସ୍ କେତ୍ତଣ୍ଡ୍, 18 ବାବା, ଇଦ୍ପୁଟୁଙ୍କ୍ ଆୟ, ଇଣ୍ଡ୍ ଆଦୁତଣ୍ଡ୍, ବେଡ଼୍ୟଣ୍ଡ୍, ଇନ୍ ତାଲେତାଗ୍ ତିନ୍କାୟ୍ ୱାଟା।
19 ମାତ୍ରମ୍ ତାମ୍ ବାବାଲ୍ କେଞ୍ଜକଟ କେତ୍ତଣ୍ଡ୍, ହୋ ବାବୁ; ଆଦ୍ ନାନ୍ ପୁତ୍ତାନ୍, ନାନ୍ ପୁତ୍ତାନ୍; ଅଣ୍ଡ୍ ଆନ୍ତେ ଅଣ୍ଡୟ୍ ଗୋଷ୍ଠି ଆଦ୍ତଣ୍ଡ୍ ନୁ ଅଣ୍ଡ ଆନ୍ତେ ମହାନ୍ ଆଦ୍ତଣ୍ଡ୍; ମାତ୍ରମ୍ ତାନ୍ ସୁଦୁନଣ୍ଡ୍ ତାମୁଣ୍ଡ୍ ଅନାଗାକଞ୍ଚ୍ ଅଦିକ୍ ବେଡ଼୍ୟଣ୍ଡ୍ ଆଦ୍ତଣ୍ଡ୍ ନୁ ଅନ୍ ପିଲୁଡ଼୍ ନାର୍ଗେ ବେଡ଼ିୟାଦ୍ ଗୋଷ୍ଟି ଆଦ୍ତା।
20 ଆ ଦିନ୍ ଅଣ୍ଡ୍ ଅଡ଼୍କିଂଙ୍କ୍ ଆଶିର୍ବାଦ ମାଡ଼ି କେତ୍ତଣ୍ଡ୍, ଇସ୍ରାଏଲ୍ ପିଲୁଡ଼୍ ଆଶିର୍ବାଦ୍ ମାଡ଼ାନ୍ ସମୟ୍ତେ ମି ପେଦେର୍ ପୟିସ୍ କେତିତଡ଼୍, ପରମେଶ୍ୱର୍ ମିକିଙ୍କ୍ ଇଫ୍ରୟିମ୍ ନୁ ମନଃଶି ଲେକାମ୍ ମାଡ଼ିଣ୍ଡ୍। ଇଦ୍ ଲେକାମ୍ ଅଣ୍ଡ୍ ମନଃଶିନାଗାକଞ୍ଚ୍ ଇଫ୍ରୟିମ୍ତିଙ୍କ୍ ମୁନେ ମାଡ଼୍ତଣ୍ଡ୍।
21 ମେଣ୍ଡେ ଯାକୁବ୍ ଯୋଷେପ୍ତିଙ୍କ୍ କେତ୍ତଣ୍ଡ୍, ଉଡ଼ା, ନାନ୍ ଡଲୁତାନ୍; ମାତ୍ରମ୍ ପରମେଶ୍ୱର୍ ମି ତଡ଼୍ ମାନ୍ତ୍ତଣ୍ଡ୍ ନୁ ମିକିଙ୍କ୍ ମେଣ୍ଡନ୍ଦାମ୍ ଦାଦଡ଼୍ ଦେଶ୍ତାଗେ ଅଦ୍ତଣ୍ଡ୍। 22 ନାନ୍ ନିଜର୍ ସାକୁ ନୁ ୱିଲ୍ତଡ଼୍ ଇମୋରିୟଡ଼୍ କାୟ୍ଦେ କଞ୍ଚ୍ ବେନ୍ ବାଗ୍ ପାହେମ୍ ଆସ୍ମିନ୍ଦେନ୍, ନି ଦାଦାନ୍ ଆନ୍ ଆୱ୍ ଅଦିକ୍ ବାଗ୍ ନିକିଙ୍କ୍ ଇତ୍ତାନ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)