1 ତାନ୍‌ପେର୍କେ ଯାକୁବ ତାନ୍‌ ମାର୍‌କିଡ଼୍‌କ୍‌ କାର୍ଙ୍ଗି କେତ୍‌ତଣ୍ଡ୍‌, ମିଡ଼୍‌ ଅଣ୍ଡୟ୍‌ ଆଗେ ଆୟ୍‌ମୁଟ୍‌; ଶେଷ କାଲାତେ ମି ପର ବାତେ ଗଟେମ୍‌ ଆଦ୍‌ତେ, ଆଦ୍‌ ମିକିଙ୍କ୍‌ କେତୁତାନ୍‌। 2 ହୋ ଯାକୁବ୍‌ତେ ମାର୍‌କିଡ଼ି, ଅଣ୍ଡୟ୍‌ଆଗେ ଆସ୍‌ କେଞ୍ଜାଟ୍‌ ନୁ ମି ବାବାଲ୍‌ ଇସ୍ରାଏଲ୍‌ତେ ବାକ୍ୟ କେଞ୍ଜାଟ୍‌। 3 ହୋ ରୁବେନ୍‌, ନିମେ ନା ପ୍ରତମ୍‌ତେ ପୁଟ୍‌ତେନନି ମାର୍, ନା ବପୁତେ ନୁ ନା ଶକ୍ତିତେ ପ୍ରତମ୍‌ତେ କାୟା; ମେଣ୍ଡେ ମହିମାତେ ବେଡ଼୍‌ୟନି ନୁ ପରାକ୍ରମତେ ବେଡ଼୍‌ୟନି। 4 ନିମେ ମିଡ଼୍‌ୟାନ୍‌ ଏର୍‌ଦେ ଲେକାମ୍‌, ନିୟାଦ୍‌ ବେଡ଼୍‌ୟାଦ୍‌ ମାନ; ଇତ୍କେ ନିମେ ନିଜର୍‌ ବାବାଲ୍‌ ପାଟି ମାତ୍‌ତାଗ୍‌ ଆତ୍‌ତିନ୍‌; ଆଲାଇତ୍କେ ଆଦିଙ୍କ୍‌ ନିମେ ଅପବିତ୍ର ମାଡ଼ୁତିନ୍‌; 5 ଶିମିୟନ୍‍ ନୁ ଲେବି ଇର୍‌ୱୁଡ଼୍‌ ସାଙ୍ଗଡ଼୍‌; ଅଡ଼୍‌ ସାରେଦାମ୍‌ ଯୁଦ୍‌ ମାଡ଼ାନଙ୍କ୍‌ ଅଡ଼ାୱୁ ସୁରି ପେସ୍ପିତଡ଼୍‌। 6 ହୋ ନା ଜିୱୁନ୍‌, ଅଡ଼ାଦ୍‌ ମିଞ୍ଜିମାନ୍ଦାନ୍‌ ଆଦେଶ୍‌ତାଗ୍‌ ଅସ୍‌ମାଟ୍‌; ହୋ ନା ଗୌରବ୍‌, ମିଡ଼୍‌ ଅଡ଼୍‌ ମିଟିଙ୍ଗ୍‌ତାଗେ କାୟ୍‌ଲ୍‌ମାଟ୍‌; ବାତେଙ୍କ୍‌ଇତ୍କେ ଅଡ଼୍‌ କପାମ୍‌ତେ ନାରୁଙ୍କ୍‌ ଆୱୁକ୍‌ତଡ଼୍‌ ନୁ ନିଜର୍‌ଇଚ୍ଛାତେ ଗଡ୍‍କିନ୍‌ ତକାଙ୍କ୍‌ ନାଡ଼୍‌କ୍‌ତଡ଼୍‌। 7 ଅଡ଼ାଦ୍‌ କପାମ୍‌ ଅବିଶାପ୍‌ ଆୟି, ବାତେଙ୍କ୍‌ଇତ୍କେ ଆଦ୍‌ ନାର୍ଗେ ମାତ୍‌ତା; ଅଡ଼ାଦ୍‌ କୋପ ଅବିଶାପ୍‌ ଆୟି, ବାତେଙ୍କ୍‌ଇତ୍କେ ଆଦ୍‌ ନାର୍ଗେ ମାତ୍‌ତେ; ନାନ୍‌ ଯାକୁବତେ ପିଲୁଡ଼୍‌ତିଙ୍କ୍‌ ବାଗ୍‌ ମାଡ଼ିତାନ୍‌ ନୁ ଇସ୍ରାଏଲ୍‌ ଦେଶ୍‌ତେ ଲୋପେ ୱେର୍‌ ୱେର୍‌ ମାଡ଼ିତାନ୍‌। 8 ହୋ ଯିହୁଦା, ନି ଦାଦାଲଡ଼୍‌ ନିକିଙ୍କ୍‌ ପ୍ରଶଂସା ମାଡ଼ିତଡ଼୍‌; ନି କାୟ୍‌ ନି ଶତ୍ରୁଡ଼୍‌ ବଣ୍ଡ୍‌କେତ୍‌ ପର ମାନ୍ତ୍‌ତେ; ନି ବାବାନ୍‌ ପିଲା ନିକିଙ୍କ୍‌ ମଡ଼୍‌କିତଡ଼୍‌। 9 ଯିହୁଦାଲ୍‌ ଲେୟେ ଡୁୱ୍‌ ଇନା ହୋ ମାର୍ରିନ୍‌ ନିମେ କଡ଼୍‌ମାୱୁ ଆୱୁକି ପାଡ଼୍‌କନ୍‌ ତେଦିୱାତ୍‌ତେ ଅଣ୍ଡ ମାଡ଼୍‌କ୍‌ତଣ୍ଡ, ଅଣ୍ଡ ସିଂହ ନୁ କୁଡ଼୍‌ ଡ଼ୁୱ୍‌ ପାଟ୍‌ତେ ବେନ ସାମଲା ମାଡ଼୍‌ତଣ୍ଡ ବେନ୍‌ ଆଦିଙ୍କ୍‌ ତେତିତଣ୍ଡ୍‌ ? 10 ଶୀଲୋତେ ଆଗମନ୍‌ ହେୱ୍‌ନା ଯିହୁଦାନାଗାଙ୍କ୍‌ ରାଜଦଣ୍ଡ ନୁ ଅନାଦ୍‌ ଡେକେତ୍‌ ଲୋପେ ବିଚାର୍‌କର୍ତ୍ତାନ୍‌ ଡୁଡ୍‌ ଆନ୍‌ନ; ଅନ୍‌ ଗାରେ ନାରୁଡ଼୍‌ ଆଦେଶ୍‌ତେ ସ୍ୱିକାର୍‌ ମାଡ଼ିତଡ଼୍‌। 11 ଅଣ୍ଡ୍‌ ଅଙ୍ଗୁର୍‌ଟଣ୍ଡେ ଗାରେ ନିଜେତ୍‌ ଗଦତିଙ୍କ୍‌ ନୁ ଲେକେତ୍‌ ଦ୍ରାକ୍ଷାଟଣ୍ଡାନ୍‌ ଗାରେ ନିଜର୍‌ ଗଦକିଙ୍କ୍‌ ତଃସିଦ୍‌ତିଡ଼୍‌; ଅଣ୍ଡ୍‌ ଦ୍ରକ୍ଷାରସ୍‌ତେ ନିଜେତ୍ ଉତ୍ତରିୟ ସିଲେ ନୁ ଦ୍ରକ୍ଷାରସ୍‌ତେ ନିଜର୍‌ କେର୍‌ତେ ଚିଲେ ନର୍‌ତିନ୍‌। 12 ଅନାଦ୍‌ କଣ୍ଡା ଦ୍ରକ୍ଷାରସ୍‌ତେ ନେତୁର୍‌ରଙ୍ଗ୍‌ ଆଦ୍‌ତେ, ପାଲ୍‌ତେ ଅନାଦ୍‌ ପାଲ୍‌କ୍‌ ଶ୍ୱେତରଙ୍ଗ୍‌ ଆଦ୍‌ତେ। 13 ସବୂଲୂନ୍‌ ସମୁଦ୍ର ବନ୍ଦର୍‌ତାଗେ ମାନ୍ତ୍‌ତିନ୍‌ ନୁ ଅଣ୍ଡ୍‌ ଜାହାଜ୍‌ତେ ରମାନ୍‌ ପଡ଼ିୟେ ଆଦ୍‌ତା; ମେଣ୍ଡେ ସୀଦୋନ୍‌ ହେୱ୍‌ନା ଅନାଦ୍‌ ଅଦିକାର୍‌ତେ ସୀମା ଆଦ୍‌ତେ। 14 ଇଷାଖର୍‌ ଗଦ ଲେକାମ୍‌, ଆଦ୍‌ ମେଣ୍ଢାନ୍‌ ଗୁଡ଼୍‌ସେତ୍‌ ଲୋପେ ଉଞ୍ଜିତେ; 15 ଅଣ୍ଡ ରମାନ୍‌ ପଡ୍‌ୟେତିଙ୍କ୍‌ ଲେକେତ୍‌ ନୁ ଦେଶ୍‌ତିଙ୍କ୍‌ ୱେଡ଼୍‌କେ ପଡ଼୍‌ୟି ଉଡ୍‌ତଣ୍ଡ୍‌ ଆଦିଙ୍କ୍‌ ଅଜନ୍‌ କାଞ୍ଜାନ୍‌ ମାଇଦିଙ୍କ୍‌ ଆଟ୍‌ ମଦଲ୍‌ ମାଡ୍‌ତଣ୍ଡ୍‌, ଦାସ ପାଡ୍‌ୟି ମାଡାଙ୍କ୍‌ ଦାସ୍‌ ଆତ୍‌ତଣ୍ଡ୍‌। 16 ଦାନ୍‌ ଇସ୍ରାଏଲ୍‌ତେ ୱେର୍‌ ୱେର୍‌ ପିଲୁଡ୍‌ ଲେକାମ୍‌ ଆସ୍‌ ନିଜର୍‌ ନାରୁଡ଼୍‌ ବିଚାର୍‌ ମାଡିତିନ୍। 17 ଦାନ୍‌ ଆର୍‌ଦାଗେ ମାନ୍ଦାନ୍‌ ଅଣ୍ଡୟ୍‌ ତାଡାତ୍‌ ଲେକାମ୍‌ ଆର୍‌ଦେଡ଼୍‌ ଅଣ୍ଡୟ୍‌ ୱିସାମ୍‌ ତାଡ଼ାମ୍‌ ଲେକାମ୍‌, ବାତ୍‌କି ଆଦ୍‌ ଗୁରାତ୍‌ ଡେକାଙ୍କ୍‌ କାସିତ୍‌। ଆଦିଙ୍କ୍‌ ଡ଼େକା ପେର୍‌କେ ଏସିଦ୍‌ତେ। 18 ହୋ ସଦାପ୍ରବୁ, ନାନ୍‌ ନି ପରିତ୍ରାଣତିଙ୍କ୍‌ କେପି ମିନ୍ଦେନ୍‌। 19 ଡଙ୍ଗାଲ୍‌ ମାନ୍ଦେ ଗାଦ୍‌ତିଙ୍କ୍‌ ଆକ୍ରମନ୍‌ ମାଡିତଡ୍‌; ମାତ୍ର ଅଣ୍ଡ୍‌ ପେର୍‌କେ ଅଡ଼କିଙ୍କ୍‌ ଆକ୍ରମନ୍‌ ମାଡିତଣ୍ଡ୍‌। 20 ଆଶେର୍‍ତାଗାଙ୍କ୍‌ ଗାଟିଲେକେତ୍‌ କାଦି ତିଆର୍‌ ଆଦ୍‌ତେ ଅଣ୍ଡ୍‌ ରାଜାଲଡ୍‌ ତିନ୍ଦାନ୍‌ କାଦି ଯୋଗାମାଡିତଣ୍ଡ୍‌। 21 ନପ୍ତାଲି ୱେର୍‌ୟକଟ୍‌ ମିରାନାଦ୍‌ କଡ୍‌ମାୱୁ ଲେକାମ୍‌, ଅଣ୍ଡ୍‌ ମନୋହର୍‌ ବାକ୍ୟ କେତିତଣ୍ଡ୍‌। 22 ଯୋଷେପ୍‌ କାୟା ଆଦାନ୍‌ ମାଡେତ୍‌ ଅଣ୍ଡ୍‌ ସିମ୍‌ସାମ୍‌ତେ ଜାଗେତାଗ୍‌ କାୟା ଆଦାନ୍‌ ମାଡ଼େତ୍‌ ଲେକାମ୍‌; ତାନାୱ୍‌ କମା ସାରେ ମୁନେତ୍‌ କାଲାତେ ମାଡିତ୍‌। 23 ୱିଲ୍‌ କାଡ଼୍‌ ପୟ୍‌ତାନଡ୍‌ ଅଂକିଙ୍କ୍‌ ଗାଟି ତିପାଲ୍‌ ଇସ୍‌ମିନ୍ଦେଡ୍‌, ମେଣ୍ଡେ ଅଂକିଙ୍କ୍‌ କାଡ଼୍‌ତେ ରେହ୍‌ଃସ୍‌ କଷ୍ଟ ମାଡିମିନ୍ଦେଡ୍‌, 24 ମାତ୍ର ଅନାଦ୍‌ ୱିଲ୍‌ ଡୁଟାଙ୍କ୍‌ ଆସ୍‌ ମାତ୍‌ତେ, ମେଣ୍ଡେ ଯାକୁବ୍‌ତେ ଶକ୍ତି ମାନ୍ଦାନଣ୍ଡ୍‌ ତାନ୍‌ ସେଙ୍ଗେ ଇସ୍ରାଏଲ୍‌ ପାଲକ ନୁ ଇଶ୍ୱର୍‌ ଲେକାମ୍‌ ରକ୍ଷା ମାଡ଼ାନଣ୍ଡ୍‌, 25 ଇଦି ମି ବାବାନ୍‌ ପରମେଶ୍ୱର୍‌ ବେନ ମିକିଙ୍କ୍‌ ଉପକାର୍‌ ମାଡ଼ିତଣ୍ଡ୍‌ ନୁ ସର୍ବଶକ୍ତିମାନ୍‌, ପରମେଶ୍ୱର ମିକିଙ୍କ୍‌ ଆଶିର୍ବାଦ୍‌ ମାଡ଼ିତଣ୍ଡ୍‌, ପରତ୍‌ ଆଶିର୍ବାଦ ତଡ଼୍‌ ନୁ ବୁମଦେ ନାର୍ଗେ ଏର୍‌ଦେ, ନାର୍ଗେ ଗଡ଼୍‌କ୍‌ ନୁ ପିଲାକିଙ୍କ୍‌ ଆଶିର୍ବାଦ ମାଡ଼ିତଣ୍ଡ୍‌, ଅନ୍‌ ତଡ଼୍‌ କାଇଦେ ବପୁ ଆଦ୍‌ତେ। 26 ନା ଆନିଦାଦିଡ୍‌ ଆଶିର୍ବାଦକଞ୍ଚ୍‌ ନି ବାବାନ୍‌ ଆଶିର୍ବାଦ୍‌ ନାର୍ଗେ; ଆଦ୍‌ ସାରେଦାମ୍‌ ମାନ୍ଦାନ୍‌ ମେଟେତ୍‌ ସୀମା ହେୱ୍‌ନା ଏକାମ୍‌ ଆଦ୍‌ତେ; ଆଦ୍‌ ଯୋଷେପ୍‌ ତାଲ୍‌ତାଗେ, ଇତ୍କେ ନିଜର୍‌ ଦାଦାନଡ୍ ଆଗାକଞ୍ଚ୍‌ ୱେର୍‌ ମାନ୍ଦାନ୍ ନାରୁନ୍ ତାଲ୍‌ତାଗ୍‌ ଆଦ୍‌ତେ। 27 ବିନ୍ୟାମିନ୍‌ ଅଣ୍ଡୟ ବୟଙ୍କାର୍‌ ଡୁୱୁ ଇନା ନାର୍କୁକ୍‌ ନୁ ମୁଲ୍‌ପୁଟ୍‌ ଆୱୁକି ଗ୍ରାସ ମାଡ଼୍‌ତଣ୍ଡ। 28 ଇଡ୍‌ ଇସ୍ରାଏଲତେ ବାରଟାନ୍‌ ଫିଲୁଡ୍‌; ଇଡ଼୍‌ ବାବାଲ୍‌ ଆଶିର୍ବାଦ୍‌ ମାଡାନ୍‌ ୱେଲେ ଇ ଗଟ୍‌ ସାରେ ନାରୁଡ଼୍‌କିଙ୍କ୍‌ ନାର୍ଗେ ନାର୍ଗେ ଆଶିର୍ବାଦ୍‌ ମାଡ୍‌ତଣ୍ଡ୍‌।

29 ଆସୁଟ୍‌ ଯାକୁବ୍‌ ତାନ୍‌ ମାର୍‌କିଡ଼୍‌ ଆଦେଶ୍‌ ଇସ୍‌ କେତ୍‌ତଣ୍ଡ୍‌, ନାନ୍‌ ନିଜର୍‌ ନାରୁଡ୍‌ ତଡ୍‌ ଅଣ୍ଡୟ୍‌ତାଗ୍‌ ଗୁଡାନ୍‌ ମାଇଦିଙ୍କ୍‌ ଆଦୁତାନ୍‌, ନାନେ ବେସୁଙ୍କ୍‌ ଡଲିତାନ୍‌, ନା ଆନିଦାଦିଡ଼୍‌ ତଡ଼୍‌ ଇଫ୍ରୋଣତାଗ୍‌ ହିତ୍ତୀୟ ଜାଗେତାଗ୍‌ ସମାଦି ଇଦ୍‌ତିଡ଼୍‌। 30 ବାତେଙ୍କ୍‌ଇତ୍‌କେ ଅବ୍ରାହାମ୍‌ ସମାଦି ପଡ୍‌ୟେତ୍‌ ଅଦିକାର୍‌ତେ ମାଇଦିଙ୍କ୍‌ କିଣାନ୍‌ ଦେଶ୍‌ତାଗେ ମମ୍ରିତେ ମୁନେ ବେନ୍‌ ମକ୍‌ପେଲାତେ ୱାୟେତ୍‌ ହିତ୍ତୀୟ ଇଫ୍ରୋଣକଞ୍ଚ୍‌ ଆସି ମାତ୍‌ତଣ୍ଡ୍‌ ଆ ହେତୀୟ ଇପ୍ରୋଣତେ ୱାୟେତ୍‌ ପାଡ଼୍‌କ୍‌ ନା ଆନିଦାଦିଡ଼୍‌ ଗାରେ ନାକିଙ୍କ୍‌ ସମାଦି ଇମ୍‌। 31 ଆ ପଡ୍‌ୟେତାଗେ ଅବ୍ରାହାମ୍‌ତାଦ୍‌ ନୁ ତାନ୍‌ ମୁତେ ସାରାନ୍‌ ସମାଦି ଆସ୍‌ମିନ୍ଦେ, ମେଣ୍ଡେ ଆ ପଡ଼ିୟେତାଗେ ଇସ୍‍ହାକ୍‍ତେ ନୁ ତାନ୍‌ ମୁତେ ରିବିକାନ୍‌ ସମାଦି ଆସ୍‌ମିନ୍ଦେ, ମେଣ୍ଡେ ଆ ପଡ୍‌ୟିତାଗେ ନାନ୍‌ ଆନ୍ତେ ଲେୟାଙ୍କ୍‌ ସମାଦି ଇସ୍‌ମିନ୍ଦେନ୍‌। 32 ଆ ୱାୟ୍‌ତାଗେ ନୁ ପାଡ଼୍‌କ୍‌ ହିତ୍ତୀୟ ପିଲାକିନ୍‌ନାଗାଙ୍କ୍‌ ଆସି ମିନ୍ଦେନ୍‌, ଆଗେ ନାକିଙ୍କ୍‌ ସମାଦି ଇମୁଟ୍‌। 33 ଇଦ୍ ପୁଟୁଙ୍କ୍‌ ଯାକୁବ୍‌ ନିଜର୍‌ ମାର୍‌କିଡ୍‌କ୍‌ ଆଦେଶ୍‌ ଇଦାନାଦ୍‌ ତେର୍‌ତେ ପେର୍‌କେ, ପାଟ୍‌ତେ ପଡ୍‌ୟିତାଗେ ରେଣ୍ଡ୍‌ ଡେକା ଅଣ୍ଡୟାଗେ ମାଡି ଡଲ୍‌ତଣ୍ଡ୍‌ ନୁ ନିଜର୍‌ ନାରୁଡ୍‌ ଗାରେ ଗୁଡ୍‌ତଡ୍‌।