ଇସ୍ହାକ୍ତେ ସେଙ୍ଗେ ମୁତେ
1 ଆ ସମୟ୍ତେ ଅବ୍ରାହାମ୍ ମୁୟ୍ତଣ୍ଡ୍ ନୁ ଗାଟି ବୟସ୍ ଆସ୍ ମାତ୍ତଣ୍ଡ୍, ମେଣ୍ଡେ ସଦାପ୍ରବୁ ଅବ୍ରାହାମ୍ତିଙ୍କ୍ ସାରେ ବିଷୟ୍ତେ ଆଶିର୍ବାଦ୍ ମାଡ଼ିମାତ୍ତଣ୍ଡ୍। 2 ଆଦିଙ୍କ୍ ଅବ୍ରାହାମ୍ ନିଜର୍ ଲୋତ୍ତେ ସାରେ ପାଡ଼୍ୟିଦେ ବିଷୟ୍ ମୁୟ୍ତେ ଦାସ୍ତିଙ୍କ୍ କେତ୍ତଣ୍ଡ୍, ନାନ୍ ଅନୁରଦ୍ ମାଡ଼ୁତାନ୍, ନିମେ ନା କୁରୃକ୍ତାଗ୍ କାୟ୍ ୱାଟା; 3 ନାନ୍ ସ୍ୱର୍ଗ ମର୍ତ୍ତ୍ୟତେ ସଦାପ୍ରବୁ ପରମେଶ୍ୱରତେ ପେଦେର୍ତେ ନିକିଙ୍କ୍ ପ୍ରମାଣ ମାଡ଼ୁତାନ୍ ଯେ, ବେନ୍ କିଣାନୀୟ ନାରୁଡ଼୍ ଲୋପେ ନାନ୍ ମାଞ୍ଜ ମିନ୍ଦେନ୍, ନିମେ ଅଡ଼୍ ଲୋପେଙ୍କ୍ ନା ମାରିନ୍ ପେଣ୍ଡୁଲ୍ତେ ସେଙ୍ଗେ ବେନ୍ ବା ପିକ୍ତିଙ୍କ୍ ଗ୍ରହଣ ମାଡ଼୍ମା। 4 ମାତ୍ରମ୍ ନିମେ ମା ଦେଶ୍ତେ କୁଟ୍ମାମ୍ତେ ଗାରେ ଆଞ୍ଜ୍ ନା ମାର୍ ଇସ୍ହାକ୍ତେ ସେଙ୍ଗେ ପିକିର୍ତିଙ୍କ୍ ତାତିତିନ୍।
5 ଆସୁଟ୍ ଆ ଦାସ ଅଂକିଙ୍କ୍ କେତ୍ତଣ୍ଡ୍, ବେସୁଙ୍କ୍ ବେନ୍ ଆୟ୍ ପିକିର୍ ନା ତଡ଼୍ ଇ ଦେଶ୍ତା ୱାଦାନ୍ ମାଇଦିଙ୍କ୍ ସାୟେମ୍ ଆୟ, ଆଲାଇତ୍କେ ବେନ୍ ଦେଶ୍ତାଗାଙ୍କ୍ ନିମେ ୱାସ୍ମିନ୍ଦେନି, ଆ ଦେଶ୍ତା ନି ମାରିଙ୍କ୍ ଅଦ୍ତାନ୍ ?
6 ଆସୁଟ୍ ଅବ୍ରାହାମ୍ କେତ୍ତଣ୍ଡ୍, ଇଲେ; ନା ମାରିଙ୍କ୍ ବେସୁଙ୍କ୍ ଆଗ୍ ଅୟ୍ମା। 7 ବାତେଙ୍କ୍ଇତ୍କେ ବେନ୍ ସ୍ୱର୍ଗତେ ସଦାପ୍ରବୁ ପରମେଶ୍ୱର ନାକିଙ୍କ୍ ବାବାନ୍ ପରିବାର୍ ନୁ ଜନ୍ମଦେଶ୍ ଲୋପେଙ୍କ୍ ତାସ୍ ମିନ୍ଦେଣ୍ଡ୍ ନୁ ନା ତଡ଼୍ ତିର୍ୟି ମିନ୍ଦେଣ୍ଡ୍, ମେଣ୍ଡେ ମାମେ ମି ପିଲୁଡ଼୍ତିଙ୍କ୍ ଇ ଦେଶ୍ ଇଦ୍ତମ୍ ଇଞ୍ଜ ପ୍ରମାଣ ମାଡ଼ିମିନ୍ଦେଣ୍ଡ୍, ଅଣ୍ଡ୍ ନି ମୁନେ ଅନ୍ ଦୂତ ରହ୍ତିତଣ୍ଡ୍; ଆସୁଟ୍ ନିମେ ନା ମାରିନ୍ ପେଣ୍ଡୁଲ୍ତେ ମାଇଦିଙ୍କ୍ ଆଗାକଞ୍ଚ୍ ଅଣ୍ଡୟ୍ ପିକ୍ତିଙ୍କ୍ ତାତିତନ୍। 8 ବେସୁଙ୍କ୍ ଆ ଦେଶ୍ତାଗାଙ୍କ୍ ବେନ୍ଆୟି ପିକିର୍ ୱାଦାନ୍ ମାଇଦିଙ୍କ୍ ସାୟେମ୍ ଆୟ, ଆଲାଇତ୍କେ ନିମେ ନା ଇ ପ୍ରାମାଣକଞ୍ଚ୍ ମୁକ୍ତ ଆଦ୍ତିନ୍; ମାତ୍ରମ୍ ନିମେ ନା ମାରିଙ୍କ୍ ଆ ଦେଶ୍ତା ଅୟ୍ମା। 9 ଆସୁଟ୍ ଆ ଦାସ୍ ତାନ୍ ପ୍ରବୁ ଅବ୍ରାହାମ୍ତେ କୁରୃତାଗ୍ କାୟ୍ ୱାଟି ଆ ବିଷୟ୍ତେ ପ୍ରମାଣ ମାଡ଼୍ତଣ୍ଡ୍।
10 ଆ ଦାସ୍ ତାନ୍ ପ୍ରବୁନ୍ ଉଟ୍କିଙ୍କ୍ ଲୋପେଙ୍କ୍ ଦଶ୍ଟାନ୍ ଉଟ୍କ୍ ନୁ ତାନ୍ ପ୍ରବୁନ୍ ସାରେ ପ୍ରକାର୍ତେ ଲେକେତ୍ ଜିନିଷ୍ କାୟ୍ଦେ ପୟ୍ସ୍ ଆଞ୍ଜ୍ ଅରାମନହରୟିମ୍ ଦେଶ୍ତେ ନାହୋର୍ ନଗର୍ତା ଆତ୍ତଣ୍ଡ୍ । 11 ତାନ୍ପେର୍କେ ମୁଲ୍ପୁଟ୍, ବେନ୍ ସମୟ୍ତେ ପିକି ଏର୍ ତରାଙ୍କ୍ ୱାଦ୍ତା, ଆ ସମୟ୍ତେ ଅଣ୍ଡ୍ ନଗର୍ତେ ବାୟ୍ଦେ ନୂୟ୍ଦେ ଗାରେ ଉଟ୍କିଙ୍କ୍ ପାଡ଼୍ସ୍ପ୍ତଣ୍ଡ୍। 12 ମେଣ୍ଡେ ଇ ପ୍ରାର୍ତନା ମାଡ଼୍ତଣ୍ଡ୍, ହୋ ନା କେସ୍ ମାନ୍ଦାନ୍ ଅବ୍ରାହାମ୍ତେ ସଦାପ୍ରବୁ ପରମେଶ୍ୱର, ଅନୁରଦ୍ ମାଡ଼ୁତାନ୍, ନେଣ୍ଡ୍ ନା ମୁନେ ଲେକେତ୍ ଏୱ୍ସା, ମେଣ୍ଡେ ନା ପ୍ରବୁ ଅବ୍ରାହାମ୍ତେ ପର ଦୟା ମାଡ଼ା। 13 ଉଡ଼ା, ନାନ୍ ଇ ନୂୟ୍ଦେ ଗାରେ ନିସ୍ ମିନ୍ଦେନ୍, ମେଣ୍ଡେ ଇ ନଗର୍ ବାସିଡ଼୍ତେ ପିକି ଏର୍ ଅଦାନଙ୍କ୍ ୱାସମିନ୍ଦେ; 14 ଆୱିନ୍ ଲୋପେଙ୍କ୍ ବେନ୍ ଆ ପିକ୍ତିଙ୍କ୍, ନିମେ ନି କୁଣ୍ଡ୍ ମଦଲ୍ ମାଡ଼ି ନାକିଙ୍କ୍ ଏର୍ ଉସ୍ପା, ପ୍ରବୁ ଇ ଗଟ୍ କେତ୍କେ ଆଦ୍ ଯଦି କେତିତେ, ଉନ୍, ନାନ୍ ନି ଉଟ୍କିଙ୍କ୍ ଆନ୍ତେ ଉସ୍ପିତାନ୍, ଆଲାଇତ୍କେ ଆଦ୍ ନି ଦାସ ଇସ୍ହାକ୍ ମାଇଦିଙ୍କ୍ ନିମ୍ ତିଆର୍ମାଡ଼୍ତେ ପିକିର୍ ଆୟି; ଆସୁଟ୍ ନିମେ ନା ମାଲିକ୍ତେ ପର ଦୟା ମାଡ଼ିମିନ୍ଦେନି, ଇଦ୍ ନାନ୍ ପୁନ୍ଦ୍ତାନ୍।
15 ଇ ଗଟ୍ କେଲ୍ନା କେଲ୍ନା ଅବ୍ରାହାମ୍ତେ ନାହୋର୍ ପେଦେର୍ତେ ତାମୁନ୍ତେ ମୁତେ ମିଲ୍କାତେ ମାର୍ ଯେ ବତୂୟେଲ୍, ତାନ୍ ପିକିର୍ ରିବିକା ହାଟ୍ତାଗ୍ କୁଣ୍ଡ୍ ପୟ୍ସ୍ ପେୟ୍ସ୍ ୱାତ୍ତେ। 16 ଆ ପିକିର୍ ଗାଟି ସୁନ୍ଦରିଲ୍ ନୁ ପେଣ୍ଡୁଲ୍ ଆୟ୍ୱାଦ୍, ମେଣ୍ଡେ ବେନ୍ ମାନେୟ୍ତେ କାଇଲ୍ୱେ ମାତ୍ତେ। ଆଦ୍ ନୂୟ୍ଦେ ଲୋପେ ଆଞ୍ଜ୍ କୁଣ୍ଡ୍ ବର୍ତ୍ତି ମାଡ଼ି ତେଦି ୱାଦୁତେ, 17 ଇଦ୍ ଲେକାମ୍ ସମୟ୍ତେ ଆ ଦାସ୍ ମିରି ଆଞ୍ଜ୍ ଆଦିନ୍ ସାଙ୍ଗେ ଉଡ଼ି ମେଣ୍ଡେ କେତ୍ତଣ୍ଡ୍, ନାନ୍ ଅନୁରଦ୍ ମାଡ଼ି କେତୁତାନ୍, ନି କୁଣ୍ଡ୍ତାଗାଙ୍କ୍ ନାକିଙ୍କ୍ ସୁଦୁର୍ ଏର୍ ଉନ୍ଦାଙ୍କ୍ ଇମ୍।
18 ଆସୁଟ୍ ଆଦ୍ କେତ୍ତେ, ଆଦେଶ୍, ଉନ୍; ଇଲା କେସ୍ ଆଦ୍ ସିଟ୍ପାଟ୍ କୁଣ୍ଡ୍ କାଇଦାଗାଙ୍କ୍ ରେୟ୍ସ୍ ପ୍ରବୁଙ୍କ୍ ଉନ୍ଦାନଙ୍କ୍ ଇତ୍ତେ। 19 ମେଣ୍ଡେ, ଅଂକିଙ୍କ୍ ଏର୍ ଉସ୍ପ୍ତେ ପେର୍କେ କେତ୍ତେ, ଇତ୍କେ ନି ଉଟ୍କ୍ ସାରେ ଏର୍ ଉଞ୍ଜ୍ ତେର୍ସ୍ପ୍ନା ଜାକ ନାନ୍ ଏର୍ ତରିତାନ୍। 20 ଆସୁଟ୍ ଆଦ୍ ସିଟ୍ପାଟ୍ କୁଣ୍ଡକଞ୍ଚ କୁଣ୍ଡ୍ତାଗାଙ୍କ୍ ଏର୍ ତସ୍ସି ମେଣ୍ଡନ୍ଦାମ୍ ଏର୍ ତରାନ୍ ମାଇଦିଙ୍କ୍ ନୂୟ୍ଦେ ଗାରେ ମିରି ଆଞ୍ଜ୍ ସାରେ ଉଟ୍କିନ୍ ମାଇଦିଙ୍କ୍ ଏର୍ ତର୍ତେ। 21 ଆସୁଟ୍ ଆ ନାରୁଣ୍ଡ୍ ତାନ୍ ପର ଲେକେତ୍ ଉଡ଼ି ମାତ୍ତଣ୍ଡ୍; ମେଣ୍ଡେ ସଦାପ୍ରବୁ ଅନାଦ୍ ଆଦାନାଦ୍ ସଫଲ ମାଡ଼ିତଣ୍ଡ୍ କି ଇଲେ, ଆଦ୍ ପୁନ୍ଦାନ୍ ମାଇଦିଙ୍କ୍ କଟ ମାତ୍ତଣ୍ଡ୍।
22 ମେଣ୍ଡେ ଉଟ୍କ୍ ଏର୍ ଉସ୍ପ୍ତେ ପେର୍କେ ଆ ନାରୁଣ୍ଡ୍ ତାନ୍ ମାଇଦିଙ୍କ୍ ମସର୍ତାଗ୍ କେର୍ଦାନ୍ ମୁଦ୍ ନୁ ତାନ୍ କାୟ୍ଦେ ମାଇଦିଙ୍କ୍ ରେଣ୍ଡ୍ ସାୟେତ୍ ସୁନାତେ ଗାଜୁଲ୍ ଅସ୍ କେତ୍ତଣ୍ଡ୍, 23 ଅନୁରଦ୍ ମାଡ଼ୁତାନ୍, ଆ ଦାସ କେତ୍ତଣ୍ଡ୍ ନିମେ ବେନନ୍ ମାୟାଡ଼୍ତନି , ନାକିଙ୍କ୍ କେଲମ୍। ନି ବାବାନ୍ ଲୋନ୍ ମାକିଙ୍କ୍ ନାର୍କା ମାନ୍ଦାନ୍ ପଡ଼୍ୟ୍ ମିନ୍ଦେ କି ?
24 ଆସୁଟ୍ ଆଦ୍ ଉତ୍ତର୍ ଇତ୍ତେ, ନାହୋର୍ତେ ଡଙ୍କେତ୍କଞ୍ଚ୍ ମିଲ୍କାନାଗାଙ୍କ୍ ପୁଟ୍ତେ ମାର୍ ଯେ ବତୂୟେଲ୍, ନାନ୍ ଅନ୍ ମାୟାଡ଼୍। 25 ଆଦ୍ ମେଣ୍ଡେ କେତ୍ତେ, ମା ପିସିଲ୍ ନୁ ପଲେ ନାର୍ଗେ ମିନ୍ଦେ, ନାର୍କା ମାନ୍ଦାନ୍ ମାଇଦିଙ୍କ୍ ପଡ଼ିୟ୍ ମିନ୍ଦେ।
26 ଆସୁଟ୍ ଆ ନାରୁଣ୍ଡ୍ ତାଲ୍ ମଦଲ୍ ମାଡ଼ି ସଦାପ୍ରବୁନ୍ ଉଦେଶ୍ତେ ମଡ଼୍କି ମେଣ୍ଡେ କେତ୍ତଣ୍ଡ୍, 27 ନା ମାଲିକ୍ ଅବ୍ରାହାମ୍ତେ ପ୍ରବୁ ପରମେଶ୍ୱର ଦନ୍ୟ ଆୟିଣ୍ଡ୍,ବାତେଙ୍କ୍ଇତ୍କେ ଅଣ୍ଡ୍ ନା ମାଲିକ୍ତେ ପର ଦୟା ନୁ ନିଜାମ୍ତେ ତାକାଙ୍କ୍ ଇଚ୍ଛା ମାଡ଼ଣ୍ଡ୍; ମେଣ୍ଡେ ସଦାପ୍ରବୁ ନାକିଙ୍କ୍ ନା ମାଲିକ୍ କୁଟ୍ମାମ୍ତେ ଲୋକିନା କାର୍ଙ୍ଗି ତାସ୍ ମିନ୍ଦେଣ୍ଡ୍।
28 ମେଣ୍ଡେ ଆ ପିକିର୍ ମିରିଆଞ୍ଜ୍ ତାମ୍ ୟାୟାନ୍ ଲୋତ୍ତାଗ୍ ମାନ୍ଦାନ୍ ନାରୁଡ଼୍କ୍ ଇ ଗଟ୍ କେଞ୍ଜ୍ପ୍ପତେ। 29 ମେଣ୍ଡେ ରିବିକାଙ୍କ୍ ୱେରଣ୍ଡ୍ ଦାଦାଲ୍ ମାତ୍ତଣ୍ଡ୍, ଅନ୍ ପେଦେର୍ ଲାବାନ୍; ଆ ଲାବାନ୍ ଆ ନାରୁନ୍ ଉଦେଶ୍ତେ ନୂୟ୍ଦେ ଗାରେ ମିର୍ତଣ୍ଡ୍। 30 ମେଣ୍ଡେ ଆ ନାରୁଣ୍ଡ୍ ନାକିଙ୍କ୍ ଇଲା ଗଟି କେତ୍ତଣ୍ଡ୍, ନିଜର ଏଲାଡ଼୍ ରିବିକାତେ ପାୟୁର୍କଞ୍ଚ୍ ଇଲା କେଞ୍ଜି ମେଣ୍ଡେ ଏଲାଡ଼୍ତେ ମୁଦ୍ ନୁ କାୟ୍ଦେ ଗାଜୁଲ୍ ଉଡ଼ି କେତ୍ତଣ୍ଡ୍, ଆ ମାନେୟିତେ ଗାରେ ଆତ୍ତେ, ମେଣ୍ଡେ ଅଂକିଙ୍କ୍ ନୂୟ୍ଦେ ଗାରେ ଉଟ୍କିନ୍ ତ ନିସ୍ ମାନ୍ଦାନାଦ୍ ଉଡ଼୍ତଣ୍ଡ୍, 31 ହୋ ସଦାପ୍ରବୁନ୍ ଆଶିର୍ବାଦ୍ପାହେମ୍ ଆତ୍ତେନନି, ଲୋପେ ୱାଡ଼ା, ନିମେ ବାତେଙ୍କ୍ ବାୟ୍ଦେ ନିସ୍ ମିନ୍ଦେନି ? ନାନ୍ ତ ଲୋନ୍ ନୁ ଉଟ୍କିନ୍ ମାଇଦିଙ୍କ୍ ପଡ଼ିୟ୍ ତିଆର୍ ମାଡ଼ିମିନ୍ଦେଣ୍ଡ।
32 ଆସୁଟ୍ ଆ ନାରୁଣ୍ଡ୍ ଲୋତ୍ତାଗ୍ ଅସି ଉଟ୍କିନ୍ ମୁଟ୍ତାଗ୍ ତଃତାୱ୍ ଲେଇସ୍, ଅଣ୍ଡ୍ ଆୱିଙ୍କ୍ ପିସିଲ୍ ନୁ ପଲେ ଇତ୍ତଣ୍ଡ୍, ମେଣ୍ଡେ ତାନ୍ ନୁ ତାନ୍ ସାଙ୍ଗଡ଼୍କ୍ ଡେକାନର୍ଦାନ୍ ମାଇଦିଙ୍କ୍ ଏର୍ ଇତ୍ତେ। 33 ଅନ୍ ମୁନେ ତିନ୍ଦାନ୍ ଜିନିଷ୍ ୱାଟ୍ତଡ଼୍; ମାତ୍ରମ୍ ଅଣ୍ଡ୍ କେତ୍ତଣ୍ଡ୍, ଗଟି କେଲକଟ ନାନ୍ ତିନ୍ନନ୍। ଆସୁଟ୍ ଲାବାନ୍ କେତ୍ତଣ୍ଡ୍, କେଲ୍ମ୍।
34 ଆସୁଟ୍ ଅଣ୍ଡ୍ କେତ୍ତଣ୍ଡ୍, ନାନ୍ ଅବ୍ରାହାମ୍ତେ ଦାସ। 35 ପ୍ରବୁ ନା ମାଲିକ୍ତିଙ୍କ୍ ନାର୍ଗେ ଆଶିର୍ବାଦ୍ ମାଡ଼ିମିନ୍ଦେଣ୍ଡ୍, ଆଦିଙ୍କ୍ ଅଣ୍ଡ୍ ବେଡ଼୍ୟଣ୍ଡ୍ ନାରୁଣ୍ଡ୍ ଆସ୍ମିନ୍ଦେଣ୍ଡ୍; ମେଣ୍ଡେ ସଦାପ୍ରବୁ ଅଂକିଙ୍କ୍ ମାନ୍ଦା ମାନ୍ଦା ଗଡ୍କ୍ ମେଣ୍ଢା ନୁ ରୂପା ସୁନା ନୁ ଦାସଦାସିଡ଼୍, ମେଣ୍ଡେ ଉଟ୍କ୍ ଗଦ ଇସ୍ମିନ୍ଦଣ୍ଡ୍। 36 ମେଣ୍ଡେ ନା ପ୍ରବୁନ୍ ମୁତେ ସାରାଲ୍ ମୁୟ୍ତେ ୱେଲେ ଆନ୍ତେ ତାମ୍ ମାଇଦିଙ୍କ୍ ଅର୍ତୁଣ୍ଡୁ ମାର୍ ଜନ୍ମ ମାଡ଼ିମିନ୍ଦେ ନୁ ଅଣ୍ଡ୍ ତାଂକିଙ୍କ୍ ନିଜର୍ତେ ସାରେ ଇସ୍ମିନ୍ଦେଣ୍ଡ୍। 37 ମେଣ୍ଡେ ନା ପ୍ରବୁ ନାକିଙ୍କ୍ ପ୍ରମାଣ ମାଡ଼ି କେତ୍ତଣ୍ଡ୍, ମାମେ ବେନଡ଼୍ ଲୋପେ ମାନ୍ଦୁତମ୍, ନିମେ ନା ମାରିନ୍ ପେଣ୍ଡୁଲ୍ତେ ମାଇଦିଙ୍କ୍ ଆ କିଣାନୀୟ ଦେଶ୍ତେ ନାରୁଡ଼୍ ଲୋପେଙ୍କ୍ ବେନ୍ ବା ପିକ୍ତିଙ୍କ୍ ତାଡ଼୍ମାଟ୍; 38 ମାତ୍ରମ୍ ମାନ୍ ବାବାନ୍ ପିଲୁଡ଼୍ତେ ନାରୁଡ଼୍ ଗାରେ ଆଞ୍ଜ୍ ନା ମାରିନ୍ ସେଙ୍ଗେ ପିକିର୍ ତାତିତିନ୍। 39 ଆସୁଟ୍ ନାନ୍ ପ୍ରବୁଙ୍କ୍ କେତ୍ତାନ୍, ଉମ୍ଭକି ବେନ୍ଆଇ ପିକିର୍ ନା ତଡ଼୍ ୱାଡ଼କଟ ମାତ୍ତ୍କେ ନାନେ ବାତେ ମାଡ଼ିତାନ୍ ? 40 ଆସୁଟ୍ ଅଣ୍ଡ୍ କେତ୍ତଣ୍ଡ୍, ମାମେ ବେନ୍ ସଦାପ୍ରବୁନ୍ ମୁନେ ଆଦା ୱାଦା ଆଦୁତମ୍ , ଅଣ୍ଡ୍ ନି ତଡ଼୍ ତାନ୍ ଦୂତ୍କ୍ ରୟ୍ସ୍ ନିୟାଦ୍ ଆଦାନାଦ୍ ତିଆର୍ ମାଡ଼ିତଣ୍ଡ୍; ଆସୁଟ୍ ନିମେ ମା ନାରୁଡ଼ାଗାଙ୍କ୍, ମା ବାବାନ୍ ପିଲୁଡ଼୍କଞ୍ଚ୍ ନା ମାରିନ୍ ସେଙ୍ଗେ ପିକିର୍ ତାତିତିନ୍; 41 ମେଣ୍ଡେ ନିମେ ମା ପିଲୁଡ଼୍ତେ ନାରୁଡ଼୍ ଗାରେ ହେୱୁସ୍ ଇ ଶପତ୍କଞ୍ଚ୍ ମୁକ୍ତଆଦ୍ତିନ୍, ଆଗେକ୍ବା ଅଡ଼୍ ପିକ୍ତିଙ୍କ୍ ଇୱଡ଼୍, ଆଗେକ୍ବା ନା ପ୍ରାମାଣକଞ୍ଚ୍ ମୁକ୍ତଆଦ୍ତି।
42 ଆଦିଙ୍କ୍ ନେଣ୍ଡ୍ ନାନ୍ ଇ ନୂୟ୍ଦେ ଗାରେ ହେୱୁସ୍ ଇ ପ୍ରାର୍ତନା ମାଡ଼୍ତାନ୍, ହୋ ନା ମାଲିକ୍ ରୟ୍ସ୍ ମାନ୍ଦାନ୍ ଅବ୍ରାହାମ୍ତେ ସଦାପ୍ରବୁ ପରମେଶ୍ୱର୍, ନିମେ ନା ଆଦାନାଦ୍ ଆର୍ ତିଆର୍ ମାଡ଼େ, 43 ଆଲାଇତ୍କେ ଉଡ଼ା, ନାନ୍ ଇଞ୍ଜେ ଇ ସାୟେତ୍ ନୂୟ୍ଦେ ଗାରେ ନିସ୍ ମିନ୍ଦେନ୍ ଆସୁଟ୍ ଏର୍ ତରାଙ୍କ୍ ୱାଦାନ୍ ବେନ୍ଆୟି ପିକ୍ତିଙ୍କ୍ ବେସୁଙ୍କ୍ ନାନ୍ କେତିତାନ୍, ନିମେ କୁଣ୍ଡ୍ତାଗାଙ୍କ୍ ନାକିଙ୍କ୍ ସୁଦୁର୍ ଏର୍ ଉନ୍ଦାନଙ୍କ୍ ଇମ୍; 44 ମେଣ୍ଡେ ଆ ପିକିର୍ ବେସୁଙ୍କ୍ କେତିତେ, ନିମେ ଉନ୍ ନୁ ନି ଉଟ୍କିନ୍ ସେଙ୍ଗେ ଆନ୍ତେ ଏର୍ ତରିଦ୍ତାନ୍, ଆଲାଇତ୍କେ ଆଦ୍ ନା ମାଲିକ୍ତେ ମାରିନ୍ ସେଙ୍ଗେ ସଦାପ୍ରବୁନ୍ତଡ଼୍ ତିଆର୍ ମାଡ଼ିମାନ୍ଦାନ୍ ପିକିର୍ ଆୟି। 45 ଇ ଗଟ୍ ନାନ୍ ମନେ ମନେ କେସମାତ୍ତାନ୍, ଆଦ୍ ସମୟ୍ତେ ରିବିକାଲ୍ ଆଟ୍ତାଗ୍ କୁଣ୍ଡ୍ ୱାଟି ବାୟ୍ଦେ ୱାତ୍ତେ। ମେଣ୍ଡେ ଆଦ୍ ନୂୟ୍ଦେ ଗାରେ ଆଞ୍ଜ୍ ଏର୍ ତରାନ୍ ୱେୟ୍ ନାନ୍ କେତ୍ତାନ୍, ଅନୁରଦ୍ ମାଡ଼ୁତାନ୍, ନାକିଙ୍କ୍ ଏର୍ ଉସ୍ପା। 46 ଆସୁଟ୍ ଆଦ୍ ସିଟ୍ପାଟ୍ ଆଟ୍ତାଗାଙ୍କ୍ କୁଣ୍ଡ୍ ରେୟ୍ସ୍ କେତ୍ତେ, ଉନ୍, ମେଣ୍ଡେ ନାନ୍ ନି ଉଟ୍କିଙ୍କ୍ ଆନ୍ତେ ଉସ୍ପିତାନ୍; ଆସୁଙ୍କ୍ ନାନ୍ ଉତ୍ତାନ୍, ମେଣ୍ଡେ ଆ ଉଟ୍କିଙ୍କ୍ ଉସ୍ପ୍ତେ। 47 ତାନ୍ପେର୍କେ ନାନ୍ ତାଙ୍କ୍ ପାଚ୍ରାରାମାଡ଼୍ତାନ୍, ନିମେ ବେନନ୍ ମାୟାଡ଼୍ତନି ? ଆସୁଟ୍ ଆଦ୍ କେତ୍ତେ, ନାହୋର୍ତେ ଡଙ୍କେତ୍କଞ୍ଚ୍ ପୁଟ୍ତେ ମିଲ୍କାତେ ମାର୍ ଜେ ବତୂୟେଲ୍, ନାନ୍ ଅନ୍ ମାୟାଡ଼୍ତନ୍। ଆସୁଟ୍ ନାନ୍ ତାନ୍ ମସର୍ତାଗ୍ ମୁଦ୍ ନୁ କାୟ୍ଦେ ଗାଜୁଲ୍ କେର୍ସ୍ପତାନ୍। 48 ମେଣ୍ଡେ ନାନ୍ ତାଲ୍ ଅଡ଼୍ସ୍ମାଡ଼ି ପ୍ରବୁନ୍ ଉଦେଶ୍ତେ ମଡ଼୍କ୍ତାନ୍, ମେଣ୍ଡେ ଯେ ନାନ୍ ମାଲିକ୍ତେ ମାରିନ୍ ସେଙ୍ଗେ ଦାଦାନ୍ ମାୟାଡ଼୍ତିଙ୍କ୍ ଗ୍ରହଣ ମାଡ଼ାଙ୍କ୍ ନାକିଙ୍କ୍ ନିଜାମ୍ତେ ଆରିନା ଚାଲାମାଡ଼ି ତାତ୍ତଣ୍ଡ୍, ନା ମାଲିକ୍ ଅବ୍ରାହାମ୍ତେ ଆ ସଦାପ୍ରବୁ ପରମେଶ୍ୱର୍ତିଙ୍କ୍ ଦନ୍ୟବାଦ୍ ମାଡ଼୍ତାନ୍। 49 ବାତେଙ୍କ୍ଇତ୍କେ ମିଡ଼୍ ଯଦି ନା ପ୍ରବୁନ୍ତଡ଼୍ ଦୟା ନୁ ନିଜାମ୍ତେ ବ୍ୟବହାର୍ ମାଡ଼ାଙ୍କ୍ ଇଚ୍ଛା ଆୟ୍ମୁଟ୍, ଆଲାଇତ୍କେ ଆଦ୍ କେଲ୍ମୁଟ୍; ଯଦି ଆୟ୍ୱିଡ଼୍, ଆଦ୍ ଆନ୍ତେ କେଲ୍ମୁଟ୍; ଆସୁଟ୍ ନାନ୍ ତିନ୍କାଇଦେପାକ୍ ଇଲୁକ୍ ଡେବ୍କାଇଦା ମାଲ୍ସ୍ ଆଦ୍ତାନ୍ ।
50 ଆସୁଟ୍ ଲାବାନ୍ ନୁ ବତୂୟେଲ୍ ଉତ୍ତର୍ ଇତ୍ତଡ଼୍, ସଦାପ୍ରବୁନାଗାଙ୍କ୍ ଇଦ୍ ଗଟନା ଆସ୍ମିନ୍ଦେ, ଇଗାଙ୍କ୍ ମାମ୍ମେ ଲେକେତ୍ କି ପିନ୍ଦ ବାତେ କେତ୍ ପାର୍ୱମ୍। 51 ଉଡ଼େ, ରିବିକା ନି ମୁନେ ମିନ୍ଦେ, ତାଂକିଙ୍କ୍ ପୟସ୍ ଆନ୍ ସଦାପ୍ରବୁନ୍ ବାକ୍ୟ ଅନୁସାରେ ଆଦ୍ ନି ମାଲିକ୍ତେ ମାରିନ୍ ମୁତ୍ ଆୟି। 52 ଆସୁଟ୍ ଅବ୍ରାହାମ୍ତେ ଦାସ ଅଡ଼୍ଆଗାଙ୍କ୍ ଇ ଗଟ୍ କେଞ୍ଜୱାନାକେ ସଦାପ୍ରବୁନ୍ ଉଦେଶ୍ତେ ବୁମ୍ଦାଗ୍ ମଡ଼୍କ୍ତଣ୍ଡ୍। 53 ତାନ୍ପେର୍କେ ଆ ଦାସ ରୂପା ନୁ ସୁନାତେ କେର୍ଦାନାଦ୍ ନୁ ସିଲେ ପେସ୍ପି ରିବିକାଙ୍କ୍ ଇତ୍ତଣ୍ଡ୍; ମେଣ୍ଡେ ତାମ୍ ଦାଦାଲ୍ ନୁ ୟାୟାଙ୍କ୍ ଆନ୍ତେ ଗାଟି ଦାମ୍ଦାଦ୍ ସାମାନ୍ ଇତ୍ତଣ୍ଡ୍।
54 ଆସୁଟ୍ ଅଣ୍ଡ୍ ନୁ ତାନ୍ ସାଙ୍ଗଡ଼୍ ଦଡ଼୍ ତିଞ୍ଜ୍ ଆଗେ ନାର୍କା ମାତ୍ତଡ଼୍ ତାନ୍ ପେର୍କେ ଅଡ଼୍ ନାର୍କକ୍ ତେଦ୍ତାଙ୍କ୍, ଆ ଦାସ କେତ୍ତଣ୍ଡ୍, ନା ପ୍ରବୁନ୍ ଗାରେ ଆଦାନଙ୍କ୍ ନାକିଙ୍କ୍ ରୟ୍ସିମ୍। 55 ଆସୁଟ୍ ରିବିକାନ୍ ଦାଦାଲ୍ ନୁ ୟାୟ୍ କେତ୍ତେ, ଇ ପିକିର୍ ମା ଗାରେ ଅଣ୍ଡୟ୍ ଆଟ୍ ବା ଦଶ୍ଦିନା ମାନି, ତାନ୍ ପେର୍କେ ଆଦ୍ ଆଦ୍ତେ। 56 ମାତ୍ରମ୍ ଅଣ୍ଡ୍ ଅଡ଼୍କିଙ୍କ୍ କେତ୍ତଣ୍ଡ୍, ନାକିଙ୍କ୍ ଲେଟ୍ ମାଡ଼୍ମାଟ୍, ବାତେଙ୍କ୍ଇତ୍କେ ସଦାପ୍ରବୁ ନାୟାଦ୍ ଆଦାନ୍ ଆର୍ଦିଙ୍କ୍ ତିଆର୍ ମାଡ଼୍ତଣ୍ଡ୍; ଇଞ୍ଜେ ନିଜର୍ କର୍ତ୍ତାନ୍ ଗାରେ ଆଦାନ୍ ମାଇଦିଙ୍କ୍ ନାକିଙ୍କ୍ ରହ୍ମୁଟ୍। 57 ଆସୁଟ୍ ଅଡ଼୍ କେତ୍ତଡ଼୍, ମାମେ ପିକ୍ତିଙ୍କ୍ କାର୍ଙ୍ଗି ତାଂକିଙ୍କ୍ ମୁନେ ପାଚାରା ମାଡ଼ିତମ୍। 58 ଅଡ଼୍ ରିବିକାଙ୍କ୍ କାର୍ଙ୍ଗି କେତ୍ତଡ଼୍, ନିମେ ବାତେ ଇ ନାରୁନ୍ ତ ଆଦ୍ତି ? ଆସୁଟ୍ ଆଦ୍ କେତ୍ତେ ହୋ ନାନେ ଆଦ୍ତାନ୍। 59 ଆସୁଟ୍ ଅଣ୍ଡ୍ ତାମ୍ ଏଲାଡ଼୍ତିଙ୍କ୍ ରିବିକାଙ୍କ୍ ନୁ ତାନ୍ ତଡ଼୍ ୱାସ୍ ମାନ୍ଦାନଡ଼୍କ୍ ମେଣ୍ଡେ ଅବ୍ରାହାମ୍ତେ ଦାସ୍ ନୁ ତାମ୍ ନାରୁଡ଼୍କ୍ ରହ୍ସିତ୍ତଡ଼୍। 60 ମେଣ୍ଡେ ରିବିକାଙ୍କ୍ ଆଶିର୍ବାଦ୍ ମାଡ଼ି କେତ୍ତଣ୍ଡ୍, ନିମେ ମା ଏଲାଡ଼୍ତନି, ହଜାର୍ ହଜାର୍ ନାରୁଡ଼୍ତେ ୟାୟ୍ ଆୟିମ୍; ନିୟାଦ୍ ପିଲୁଡ଼୍ ନି କପାମ୍ତଡ଼୍ ନଗର୍ତିଙ୍କ୍ ଅଦିକାର୍ ମାଡ଼ିଡ଼୍। 61 ଅନନ୍ତର ରିବିକା ନୁ ତାନ୍ ଦାସିଡ଼୍ ଉଟ୍କିନ୍ ପର କୁଦି ଆ ନାରୁନ୍ ପେର୍କେ ପେର୍କେ ଆତ୍ତଣ୍ଡ୍ । ଇଦ୍ପୁଟୁଙ୍କ୍ ଆ ଦାସ୍ ରିବିକାଙ୍କ୍ ପୟ୍ସ୍ ଆତ୍ତଣ୍ଡ୍ । 62 ଆ ସମୟ୍ତେ ଇସ୍ହାକ୍ ଦକ୍ଷିଣ ଦେଶ୍ତା ମାନ୍ଦାନଙ୍କ୍ ବେର୍- ଲହର୍- ରୋୟୀ ପେଦେର୍ତେ ପଡ଼୍ୟିତାଗ୍ ଆଞ୍ଜ୍ ମାଲ୍ସ୍ ୱାତ୍ତଣ୍ଡ୍। 63 ମେଣ୍ଡେ ମୁଲ୍ପୁଟ୍ ସମୟ୍ତେ ୱାୟାନା ଉଡାନଙ୍କ୍ ଆଞ୍ଜ୍ ମାତ୍ତଣ୍ଡ୍ ; ଆଗାକଞ୍ଚ୍ ଉଡ଼ି ଉଟ୍କିଙ୍କ୍ ୱାଦାନାଦ୍ ଉଡ଼୍ତମ୍। 64 ଆସୁଟ୍ ରିବିକା ମିଡ଼୍ନ୍ଦି ଇସ୍ହାକ୍ତିଙ୍କ୍ ଉଡ଼ି ଉଟ୍ତେ ପରକଞ୍ଚ୍ ଡିଗ୍ତେ। 65 ମେଣ୍ଡେ ଆ ଅବ୍ରହାମ୍ତେ ଦାସଡ଼୍କ୍ ପାଚାରା ମାଡ଼୍ତେ, ମାନ୍ତଡ଼୍ କାଇଲାଙ୍କ୍ ବେନ ୱାୟାନ୍ ଲୋପେଙ୍କ୍ ୱାସ ମିନ୍ଦେଣ୍ଡ୍, ଆ ନାରୁଣ୍ଡ୍ ବେନ ? ଆସୁଟ୍ ଦାସ୍ ଉତ୍ତର୍ ଇତ୍ତଣ୍ଡ୍, ଅଣ୍ଡ୍ ନା ପ୍ରବୁ; ଆସୁଟ୍ ରିବିକା କକାଡ଼୍ ମୁସ୍ତେ। 66 ଆ ଦାସ ଇସ୍ହାକ୍ତିଙ୍କ୍ ଅଣ୍ଡ୍ ମାଡ଼୍ତେ ସାରେକାମ୍ ବିଷୟ୍ କେତ୍ତଣ୍ଡ୍। 67 ଆସୁଟ୍ ଇସ୍ହାକ୍ ରିବିକାଙ୍କ୍ ଗ୍ରହଣ୍ ମାଡ଼ି ତାମ୍ ୟାୟ୍ ସାରାଲ୍ ମାନ୍ଦାନ୍ ଗୁଡ଼୍ସ୍ତାଗ୍ ଅସ୍ ତାଂକିଙ୍କ୍ ପେଣ୍ଡୁଲ୍ ଆତ୍ତଣ୍ଡ୍; ମେଣ୍ଡେ ଅଣ୍ଡ୍ ତାଂକିଙ୍କ୍ ପ୍ରେମ ମାଡ଼୍ତଣ୍ଡ୍। ଆସୁଟ୍ ଇସ୍ହାକ୍ତେ ୟାୟ୍ ଡଲାନ୍ ଦୁକାତେ ଶାନ୍ତି ପାହେମ୍ ଆତ୍ତଣ୍ଡ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)